Read urhobo Urhi Rivẹ 11 Bible Online

Urhi Rivẹ 11 - urhobo bible

Urhi Rivẹ 11

¹Vwẹ ọtiọye na wọ Me guọnọ Ọrovwohwo Ọghẹnẹ, vwo ru iruo kẹ, vwọ yọnrọn irhi, vẹ ẹgha kugbe iji rọye, vwẹ ọke ejobi.

²Wọ mẹ riẹn nonẹ na: (kidie ẹdia emọ rẹ ovwan re je riẹ-ẹn, re je mrẹ-ẹ eyẹ mi nene ta ota na-a) karophihọ uyono rẹ Ọrovwohwo Ọghẹnẹ rẹ ovwan na, ọrho rọye, vẹ ogangan rẹ ugbobọ rọye,

³kugbe eka rọye, vẹ uruemu rọye ro ru Fero ovie rẹ Ijipt, vẹ otọ rọye ejobi;

⁴vẹ obo ro ru otuofovwi rẹ Ijipt, o ru iyesi rayen, vẹ idjighere rẹ ofovwi rayen; obo ro vwo ru ame rẹ Abadi Ọvwavware na rọ da vọn rhurhu ayen rẹ ayen vwo nene ovwan chachacha gbẹ obo rẹ Ọrovwohwo ghwọrọ ayen rhi te nonẹ na;

⁵kugbe imu ro ru kẹ ovwan vwẹ evun rẹ aghwa na, bẹsiẹ rẹ ovwan rhi vwo te etinẹ na;

⁶kugbe obo ro ru Detan vẹ Abairam, emọ rẹ Ehab, rẹ emọ ri Rubẹn; obo rẹ otọ vwo rhie unu rọye, vwo mu ayen rọ vẹ ihwo re dia iwevwi rayen ejobi, vẹ itughẹ rayen, kugbe emu kemu rọ nwẹ, rọ yan kpahe ayen, vwẹ uherevie rẹ Izrẹl.

⁷Ẹkẹvuọvo ibiẹro rẹ ovwan mrẹ iruo ride na ejobi rẹ Ọrovwohwo ruru na.

⁸Vwẹ ọtiọye na wọ Me yọnrọn urhi ejobi ri mi ji kẹ wẹ nonẹ na, re wọ gan oma ra reyọ otọ re wa wan vrẹn ra dia na,

⁹rere wa dia ọto rẹ Ọrovwohwo veri kẹ esẹ rẹ ovwan na krekri, ọ rọ tare nẹ ọye vwọ kẹ uvwiẹ rayen, otọ rẹ ameivie vẹ ọnyọ da djẹ.

¹⁰Kidie otọ re wa ra ra dia na họhọ otọ rẹ Ijipt ri we vrẹn nẹ na-a, asan re wa da kọn ekakọn rẹ ovwan nu re wa da reyọ awọ rẹ ovwan ku ame hẹ ayen, kerẹ ogba rẹ ifọ;

¹¹ẹkẹvuọvo otọ re wa wan vrẹn ra dia na otọ rọ vọnre vẹ igbenu itete kugbe iyara, ame rẹ osio ro nẹ enu rhe ọ da,

¹²otọ rẹ Ọrovwohwo Ọghẹnẹ wẹn na vwẹ ẹro te; ibiẹro rẹ Ọrovwohwo Ọghẹnẹ wẹn hẹ enu rọye vwẹ ọke ejobi, nẹ emuohọ rẹ ukpe re te oba rẹ ukpe.

¹³Ọ da dianẹ wa yọnrọn irhi mẹ ri mi ji kẹ ovwan nonẹ na, wa da guọnọ Ọrovwohwo Ọghẹnẹ rẹ ovwan na, vwọ vwẹ udu rẹ ovwan ejobi kugbe ẹnwẹn rẹ ovwan ejobi ga,

¹⁴rere ọ vwọ rhọ osio ku otọ na vwẹ ọke rọye, osio rẹ ẹsosuọ vẹ osio rẹ ọkuko, rere wọ ghwẹ eka wẹn vẹ wain wẹn, kugbe evwri wẹn rhe uwevwi.

¹⁵Rẹ ọ vwẹ odi rẹ udju rẹ ovwan kẹ eranvwe rẹ ovwan re, ko wọ rẹ evun Me vọn wẹn.

¹⁶Wa Me jomaotọ, udu rẹ ovwan da rhe phiẹn ovwan, we de kurhẹriẹ ruẹ akakọ, ra ga edjọ shiguẹ kpotọ kẹ ayen;

¹⁷rẹ ophu rẹ Ọrovwohwo da tua kpahe ovwan, ro de rhurhu odjuvwu, rẹ osio de jẹrhọ, rẹ otọ na vwo jẹn emamọ rọye emọ; rẹ ovwan de ghwu phẹrẹphẹrẹ nẹ otọ esiri rẹ Ọrovwohwo vwọ kẹ ovwan na.

¹⁸Vwẹ ọtiọye na we gbe phi eta mẹ nana phihọ evun rẹ udu rẹ ovwan kugbe ẹnwẹn rẹ ovwan; wa gba ayen hẹ obọ rẹ ovwan re dia oka, re wa gba mu arhare rẹ ovwan.

¹⁹Wa vwẹ ayen yono emọ rẹ ovwan, re we gbe ikun rayen, siẹ re wo de tidia vwẹ uwevwi rẹ ovwan vẹ ọke re wọ da yan vwẹ idjerhe, vẹ ọke wo de shevwerhẹ totọ, kugbe ọke wo de vrẹn.

²⁰Wo mi si ayen phihọ edọvi rẹ ẹchẹ rẹ uwevwi wẹn, vẹ unu rẹ anurhoro wẹn,

²¹rere ẹdẹ rẹ ovwan, vẹ ẹdẹ rẹ emọ rẹ ovwan vwọ mrasa bu phihọ vwẹ enu rẹ otọ rẹ Ọrovwohwo veri kẹ esẹ rẹ ovwan nẹ ọye vwọ kẹ ayen, kirobo rẹ odjuvwu hẹ enu rẹ akpọ na.

²²Kidie ọ da dianẹ wa fẹkotọ yọnrọn urhi nana ri mi ji kẹ ovwan na, re de ruo; vwọ guọnọ Ọrovwohwo Ọghẹnẹ rẹ ovwan na vwọ yan phihọ idjerhe rọye ejobi, vwọ gba oma muo;

²³kẹsiẹye Ọrovwohwo na ke djẹ ẹgborho nana ejobi nẹ obaro rẹ ovwan, ovwan ke dia ẹgborho re rho nọ ovwan re je gan nọ ovwan.

²⁴Asan kasan rẹ ẹhẹrhawọ rẹ ovwan chiri ejobi kọ dia ọ rẹ ovwan, ubrotọ rẹ ovwan ko nẹ aghwa na, re te Lẹbanọn, nẹ urhie na, Urhie rẹ Yufretis, re te abadi rọ obuko ọnre.

²⁵O gbi vwo ohwo ro se mudia vwẹ obaro rẹ ovwa-an; Ọrovwohwo Ọghẹnẹ rẹ ovwan na che phi oshọ vẹ uguegue re ovwan vwo enu rẹ otọ rẹ ovwan chiri, kirobo ro veri kẹ ovwan na.

²⁶Nighe, mi phi ebruba vẹ ekan phihọ obaro rẹ ovwan ẹdẹ ri nonẹ na;

²⁷ebruba, ọ da dianẹ wa kerhọ rẹ irhi rẹ Ọrovwohwo Ọghẹnẹ rẹ ovwan, ri mi ji kẹ ovwan vwẹ ẹdẹ ri nonẹ na;

²⁸ke rha ekan, ọ da dianẹ wa rha kerhọ rẹ irhi rẹ Ọrovwohwo Ọghẹnẹ rẹ ovwan na-a, vwo kurhẹriẹ nẹ idjerhe mi ji urhi rọye kẹ ovwan nonẹ na, re nene ẹdjọ, rẹ ovwan riẹnre-e.

²⁹Ko che te, siẹ rẹ Ọrovwohwo Ọghẹnẹ wẹn na da reyọ owẹ te otọ ru wọ yanran ra dia na, wo mi phi ebruba na phihọ enu rẹ Ugbenu ri Geraizim, phi ekan na phihọ enu rẹ Ebal.

³⁰Ọ dia ovrẹn ri Jọdan ayen epha, vwẹ obuko ọnre vwẹ idjerhe na, vwẹ ọke rẹ ọnre de she kpotọ vwẹ evun rẹ otọ rẹ ihwo ri Kenan re dia Araba, ro hirhe aro ku Gilgal, vwẹ oma rẹ iloho ri Morẹ na-a?

³¹Kidie wa cha wan Jọdan vrẹn re vwẹ otọ rẹ Ọrovwohwo Ọghẹnẹ kẹ ovwan, we che vwo, re wa dia,

³²wa Me karohọ vwọ gha ẹgha vẹ iji ri mi phihọ obaro rẹ ovwan vwẹ ẹdẹ ri nonẹ na.