Read urhobo Urhi Rivẹ 14 Bible Online

Urhi Rivẹ 14 - urhobo bible

Urhi Rivẹ 14

¹Ovwan emọ rẹ Ọrovwohwo Ọghẹnẹ rẹ ovwan. we bru oma rẹ ovwa-an, wa je wanre uyovwi phihọ orivwi-i.

²Kidie wọwẹ ohwo ọfuanfon kẹ Ọrovwohwo rẹ Ọghẹnẹ wẹn na, Ọrovwohwo na sanọ owẹ vwo dia oghẹre re ohwo ko omobọ rọye, nọ ihwo na ejobi re hẹ enu rẹ akpọ na.

³Wọ re emuẹgha ọvuọvo-o.

⁴Eranvwe re wa re ena. erhuẹn, ogegede, kugbe ẹvwe,

⁵uzo, vẹ orhua, kugbe uguzuma, evweaghwa, ọviẹn, vẹ odẹ, vẹ ọrhẹre,

⁶Keranvwe keranvwe rẹ ichiotọ rẹ awọ rayen bẹre ivẹ, rọ re egban, vwẹ ohri rẹ eranvwe nana wa da rẹ.

⁷Dede na wa re enana-a re re egba yẹ ichiotọ rẹ awọ rayen hẹriẹre-e. Kamel, hare, kugbe koni, ayen igbegbe kẹ ovwan,

⁸kugbe esi, kidie ọ hẹriẹ ichiotọ rẹ awọ rọye ẹkẹvuọvo ọ re egba-an, ọ fon kẹ wẹ-ẹ. Wọ ria uvwo raye-en, wọ vwẹ obọ te orivwi raye-en.

⁹Enana wa re vwẹ e rẹ ame na. emu kemu ro vwo osuaso rẹ uko rọye ji vwo esẹ ọye wa re.

¹⁰Emu kemu ro vwo osuaso vwẹ uko-o ro ji vwo esẹ-ẹ wa riọ-ọ; ọ fon kẹ ovwa-an.

¹¹Ọphran kọphran rọ fonro ejobi wa re.

¹²Ẹkẹvuọvo wa re enana-a; ugo, vẹ oghwuru, kugbe ọkeghọrọ,

¹³vẹ okpemu vẹ egodi kugbe oghẹre rayen ejobi;

¹⁴te erurẹ vẹ oghẹre rọye ejobi;

¹⁵vẹ ogomugoro, ọso ọgangan, vẹ ikpukpuyẹkẹ rẹ ame, ọso, kugbe oghẹre rọye;

¹⁶okpukpurhu vẹ ọbe, kugbe ọhọ-urhie;

¹⁷vẹ okpogho, te oghwuru kugbe oko;

¹⁸vẹ ọkẹkẹrẹ, vẹ obo koghẹre ejobi, evwu vwẹ adjan.

¹⁹Emeraranvwe ejobi ri vwo ibekpe epha gheghe ke ovwan; wa ria aye-en.

²⁰Obo ri vwo ibekpe re fonro ejobi wa sa re ayen.

²¹Wa re emu ro ghwuru-u; wọ sa vwọ kẹ ọrhorha ro wo orho wẹn re ọ riọ, eyẹ wọ sa shẹ kẹ ohwo rẹ isi; kidie ovwan ihwo efuanfon kẹ Ọrovwohwo Ọghẹnẹ rẹ ovwan na. Wo rho ọmọ rẹ ẹvwe vwẹ ame rẹ Ivie rẹ oni rọye-e.

²²Wọ Me hwa abọvo rẹ ẹkẹnhwe rẹ obo wọ kọnre, e re mọ vwẹ udju wẹn kukpe kukpe.

²³Vwẹ obaro rẹ Ọrovwohwo rẹ Ọghẹnẹ wẹn na, vwẹ asan rọ sanọre nẹ odẹ rọye dia na, Etiyin wọ da re ẹkẹnhwe rẹ ekankọn wẹn na, te wain wẹn, vẹ evwri wẹn, vẹ ẹkẹnhwe rẹ uchuru vẹ igegede wẹn; rere wọ vwọ mrasa yono oshẹdjẹ rẹ Ọrovwohwo Ọghẹnẹ wẹn vwẹ ọke ejobi.

²⁴Ọ da dianẹ idjerhe na sherinọ kẹ wẹ, ru wọ gbe sa ghwa-a, fikiridie nẹ asan na sherinọ kẹ wẹ, asan rẹ Ọrovwohwo Ọghẹnẹ wẹn na sanọre nẹ odẹ rọye dia, vwẹ esiẹn rẹ Ọrovwohwo Ọghẹnẹ wẹn de bruphihọ kẹ wẹ nu,

²⁵wo mi wene phihọ igho, wo churu igho na si obọ wẹn, wọ yan kpo asan rẹ Ọrovwohwo Ọghẹnẹ wẹn sanọre na,

²⁶wọ Me vwẹ igho na dẹ emu kemu re ẹnwẹn wẹn guọnọre, erhuẹn eyẹ ogegede, eyẹ wain, eyẹ udi ogangan, eyẹ kemu rẹ ẹnwẹn wẹn guọnọre vwẹ obọ wẹn; wọ Me dia Etiyin da riọ vwẹ obaro rẹ Ọrovwohwo Ọghẹnẹ wẹn na, wẹ vẹ ihwo re uwevwi wẹn ejobi Me ghọghọ.

²⁷Wọ sia Livae rọ hẹ orho wẹ-ẹn kidie ọ vẹ owẹ vwo ẹkẹn eyẹ ukuẹriọ kugbe-e.

²⁸Oba rẹ ẹgbukpe erherha wọ Me ghwẹ ẹkẹnhwe rẹ ebuo rẹ emu wẹn rhe vwẹ evun rẹ ukpe ọvuọvo yena, wo mi phio phihọ orho wẹn;

²⁹kugbe Livae, fikiridie ọ vẹ owẹ gbe vwo ẹkẹn eyẹ ukuẹriọ-ọ, ji te ọrhorha, yẹ ọmọphrorivwi, te ayeuku, e re herọ vwẹ orho wẹn, Me yanrhe, rhe re evun vọn; rere Ọrovwohwo Ọghẹnẹ wẹn na vwo bruphihọ kẹ wẹ vwẹ evun rẹ iruo ru wo ruẹ ejobi.