Read urhobo Urhi Rivẹ 15 Bible Online

Urhi Rivẹ 15 - urhobo bible

Urhi Rivẹ 15

¹Vwẹ oba rẹ ẹgbukpe kẹgbukpe ighwrẹ ejobi we mi siobọ nẹ emu.

²Enẹ we siobọ nẹ emu wẹn ohwo kohwo ra re osa rọye mi siobọ nẹ osa na kẹ ọrivẹ rọye rọ re osa na; o gbi vwi osa na vwẹ obọ rẹ ọrivẹ rọye-e, obọ rẹ oniọvo rọye, fikiridie eghwoghwo obesiono rẹ Ọrovwohwo nure.

³Wo se vwi osa na vwẹ obọ rẹ ọrhorha; ẹkẹvuọvo emu kemu wẹn rọ hẹ obọ rẹ oniọvo wẹn wo mi siobọ no kẹ.

⁴Ẹkẹvuọvo ogbere cha dia vwẹ uherevie rẹ ovwa-an ikidie Ọrovwohwo che bruba kẹ ovwan vwẹ evun rẹ otọ rẹ Ọrovwohwo Ọghẹnẹ rẹ ovwan kẹ ovwan nẹ wa dia vwọ riuku na,

⁵ẹsiẹ re wa da rhọvwe nyo urhuru rẹ Ọrovwohwo Ọghẹnẹ rẹ ovwan, vwo ru dẹndẹn wọ yọnrọn urhi nana ri mi ji iji rọye kẹ ovwan nonẹ na.

⁶Kidie Ọrovwohwo Ọghẹnẹ rẹ ovwan che bruba kẹ ovwan, kirobo ro veri kẹ ovwan, ku we che momo kẹ ẹgborho efa buebu, ẹkẹvuọvo we momo mie ohwo-o; wa cha re uvie vwẹ enu rẹ ẹgborho buebu, yẹ ẹkẹvuọvo ayen sa re uvie vwẹ enu rẹ ovwa-an.

⁷Ọ da dianẹ ogbere hẹ uherevie rẹ ovwan, ọvo vwẹ imoni rẹ ovwan na, vwẹ evun rẹ orere korere vwẹ otọ rẹ ovwan rẹ Ọrovwohwo rẹ Ọghẹnẹ vwọ kẹ ovwan na, wa ga udu kẹ-ẹ we ji rhurhu obọ kẹ oniọvo rẹ oghẹre na-a,

⁸ẹkẹvuọvo we mi rhie obọ phihọ kẹ, rere we momo uche rọ guọnọre ejobi kẹ.

⁹We ni oma te rere we vwo jẹ iroro ofefe evwo vwẹ udu, vwọ ta nẹ, Ẹgbukpe rẹ ighwrẹ na si kẹre rẹ, ukpe rẹ vwo siobọnẹ na, wọ da rha vwẹ ẹro ọbrabra kpahe oniọvo wẹn rẹ ogbere na, ru we de jẹ kẹ ro de rhi kperi kẹ Ọrovwohwo kpahe owẹ, ọ Me rhe dia umwemwu kẹ wẹ.

¹⁰Kẹ vẹ uduophephẹ, wo guẹ vwẹ udu wẹn siẹ wọ da kẹ na-a; fikiridie Ọrovwohwo wẹn na che bruba kẹ wẹ vwẹ iruo wẹn ejobi kugbe obo wo ruẹ ejobi fiki rẹ Ọnana.

¹¹Kidie ogbere se fue nẹ otọ na-a; eriyin na mi ji iji kẹ wẹ na, Wọ kẹkẹ obọ kẹ ọniọvo wẹn, kẹ ọ rọ ọbẹn vẹ ovwiogbere rẹ otọ na.

¹²Ọ da dianẹ a shẹ oniọvo rẹ ọshare eyẹ ọ rẹ aye ri Hibru kẹ wẹ, jọ ga wẹ ikpe esa, ẹgbukpe rẹ ighwrẹ re wo mi siobọ no kpo ọphẹ.

¹³Wo de siobọ no kpo ọphẹ na, wo jọ vwẹ ababọ kpo-o;

¹⁴Wọ Me vwẹ igegede wẹn ẹvo ruo ẹse, wọ Me je kẹ eka wẹn ẹvo, te wain wẹn re miri ẹvo; ọtiobo rẹ Ọrovwohwo Ọghẹnẹ wẹn bruba kẹ wẹ te, eriyin wọ je kẹ te.

¹⁵Wọ Me karohọ nẹ wọ je dia ọviẹn vwẹ otọ rẹ Ijipt jovwo, Ọrovwohwo Ọghẹnẹ wẹn ke tan wẹ; kẹ eriyin mi vwo ji iji kẹ wẹ nonẹ na.

¹⁶Ọ da dianẹ ọ ta kẹ wẹ nẹ, Mi se nẹ obọ wẹ-ẹn, kidie wọ vẹ ihwo rẹ uwevwi wẹn jere gangan rẹ ọ vẹ owẹ vwọ riẹn yeri na,

¹⁷wọ Me reyọ oshuẹ, vwo duvwu orhọ rọye muẹ ẹchẹ, kọ dia ọviẹn wẹn bẹdẹ, eriyin wo ji ru ọviẹn wẹn rẹ aye.

¹⁸Siẹ ru wo de siobọ no kpo ọphẹ na, ọ gbe cha bẹn kẹ wẹ-ẹ; kidie ọ ga wẹ abọvo rẹ obọ rẹ odibo re durhieri ga ohwo te vwẹ ikpe esan. Eriyin na Ọrovwohwo Ọghẹnẹ wẹn na ko bruba kẹ emu wo che ru ejobi.

¹⁹Ọtuvwiẹ rẹ uchuru vẹ igegede wẹn rọ dia ọshare wo mi ru ayen fuanfon kẹ Ọrovwohwo Ọghẹnẹ wẹn na; wọ reyọ ọtuvwiẹ rẹ uchuru wẹn rọ dia ọshare na vwo ru iruo ọvuọvo-o, wo ji brẹ ẹton rẹ ọtuvwiẹ rẹ ọshare rẹ igegede wẹn na-a.

²⁰Wọ Me riọ, wẹ vẹ ihwo rẹ uwevwi wẹn, vwẹ obaro rẹ Ọrovwohwo Ọghẹnẹ wẹn kukpe kukpe vwẹ asan rẹ Ọrovwohwo sanọre na.

²¹Ẹkẹvuọvo ọ da dianẹ o vwo ekan, o de ghwuobọ eyẹ owọ eyẹ o de rhuẹro, eyẹ kẹ oghẹre rẹ ekan omiovwiri ọfa, wo gbi vwo ze izobo kẹ Ọrovwohwo Ọghẹnẹ wẹn na ọfa-a.

²²Wo Me riọ vwe evun re irere re ovwan; ihwo igbegbe vẹ efuanfon Me riọ, kerẹ orhua eyẹ kerẹ uzo.

²³Ọbara rọye ọvo wo jẹ riọ; wo mi iruo phihọ otọ kerẹ ame.