Read urhobo Urhi Rivẹ 16 Bible Online

Urhi Rivẹ 16 - urhobo bible

Urhi Rivẹ 16

¹Wọ Me karohọ emeranvwe rẹ Abib, re wọ re ọrẹ rẹ ẹwanvrẹn na kẹ Ọrovwohwo Ọghẹnẹ wẹn na; kidie evun rẹ emeranvwe rẹ Abib na Ọrovwohwo Ọghẹnẹ wẹn na vwọ reyọ owẹ nẹ Ijipt rhe vwẹ ason.

²Wọ Me reyọ nẹ igegede eyẹ nẹ uchuru wẹn vwo ze izobo rẹ ọwanvrẹn na kẹ Ọrovwohwo Ọghẹnẹ wẹn, vwẹ asan rẹ Ọrovwohwo sanọre, nẹ odẹ rọye dia na.

³Wọ vwẹ ikara ro phuẹ riọ-ọ; ẹdẹ ighwrẹ wọ vwọ vwẹ ikara ro je phuo vwọ riọ ikara rẹ oja na — kidie onẹ rẹ okpakpa wọ vwọ nẹ otọ rẹ Ijipt rhe — rere wọ vwọ karohọ ẹdẹ wo nẹ otọ rẹ Ijipt rhe vwẹ ọke re wọ dia akpọ na krite.

⁴Vwẹ ẹdẹ ighwrẹ gbagba na wo ja mrẹ iphuephu vwẹ ubrakpọ wẹ-ẹn; eyẹ wo jẹ uvwo ru wo vwo ze izobo vwẹ ason rẹ ẹdẹ rẹ ẹsosuọ na dia re te urhiọke-e.

⁵Wo se ze izobo rẹ ọwanvrẹn na vwẹ evun rẹ irere rẹ Ọrovwohwo Ọghẹnẹ vwọ kẹ wẹ na-a;

⁶ẹkẹvuọvo vwẹ asan rẹ Ọrovwohwo Ọghẹnẹ wẹn na sanọre nẹ odẹ rọye dia na, Etiyin wo de ze izobo rẹ Ẹwanvrẹn na, vwẹ ovwọnvwọn vwẹ ọke rẹ ọnre da ro otọ ye, oghẹre ọke ru wo vwo nẹ Ijipt rhe ye.

⁷Wo mi chere re wọ riọ vwẹ asan rẹ Ọrovwohwo Ọghẹnẹ wẹn na sanọre, urhiọke wo mi rhivwi kpo utughẹ wẹn.

⁸Ẹdẹ esan wọ vwọ re ikara ro je phuo; ẹdẹ rẹ ighwrẹ na kẹ ẹdẹ ofuefu rẹ ọghwẹgbe rẹ ihwo ejobi kẹ Ọrovwohwo rẹ Ọghẹnẹ wẹn; wo ru iruo vwẹ ẹdẹ yena-a.

⁹Wo mi kere ẹdidjana ighwrẹ; nẹ ọke rẹ ẹsosuọ re wọ vwọ reyọ aphia vwo bru ọka ro mudia na wo vwo mu ekere rẹ ẹdidjala na phihọ.

¹⁰Kẹsiẹye wọ ke re orẹ rẹ ẹdidjala na kẹ Ọrovwohwo Ọghẹnẹ wẹn na kugbe ẹga rẹ ọghọ rẹ izobo ro nẹ evun wẹn rhe vwẹ obọ wẹn, re wọ kẹ kirobo rẹ Ọrovwohwo bruphihọ kẹ wẹ te;

¹¹wọ Me ghọghọ vwẹ obaro rẹ Ọrovwohwo rẹ Ọghẹnẹ, wọwẹ vẹ ọmọ wẹn rẹ ọshare vẹ ọmọ wẹn rẹ aye, te odibo wẹn rẹ ọshare vẹ odibo wẹn rẹ aye, kugbe ohwo rẹ Livae rọ hẹ orere wẹn, te ọrhorha, vẹ ọmọphrorivwi, vẹ ayeuku rọ uherevie rẹ ovwan na, vwẹ asan rẹ Ọrovwohwo Ọghẹnẹ wẹn sanọre, nẹ odẹ rọye dia na.

¹²Wọ Me karohọ nẹ ọviẹn wọ diare vwẹ Ijipt jovwo; wọ Me jomaotọ wọ karohọ ẹgha nana.

¹³Ẹdẹ ighwrẹ wa re orẹ rẹ egarivi, vwẹ ọke ru wa da ghwẹ orhọ rẹ ovwan te ntnwevwi re de woro eka, vẹ asan re de mie wain;

¹⁴ovwan Me ghọghọ vwẹ orẹ rẹ ovwan na, wẹ vẹ ọmọ wẹn rẹ ọshare, kugbe ọmọ wẹn rẹ aye, odibo wẹn rẹ ọshare vẹ odibo wẹn rẹ aye, kugbe Livae, te ọrhorha, vẹ ọmọphrorivwi vẹ ayeuku re hẹ irere rẹ ovwan na.

¹⁵Kidie ẹdẹ ighwrẹ wọ vwọ re orẹ na kẹ Ọrovwohwo rẹ Ọghẹnẹ wẹn na vwẹ asan rẹ ọ sanọre na; kidie Ọrovwohwo rẹ Ọghẹnẹ wẹn che bruphihọ kẹ emu wọ kọnre ejobi kugbe iruo rẹ obọ wẹn ejobi, ọtiọye na ovwan ki kuomagbe ghọghọ.

¹⁶Asiarha ẹgbukpe eshare ejobi rẹ ovwan vwẹ oma phia kẹ Ọrovwohwo rẹ Ọghẹnẹ rẹ ovwan vwẹ asan rọ sanọre; vwẹ orẹ rẹ ikara ro jephuo, vwẹ orẹ rẹ ẹdidjala kugbe orẹ rẹ egarivi. Wa vwẹ abọ ofefe phia vwẹ obaro rẹ Ọrovwohwo-o;

¹⁷obo rẹ ẹgba rẹ ohwo teri ọye ọ kẹ te, ọtiobo rẹ Ọrovwohwo rẹ Ọghẹnẹ wẹn bruba kẹ wẹ te.

¹⁸Ovwan Me vwẹ iguẹdjọ vẹ ilori mu vwẹ irere rẹ Ọrovwohwo rẹ Ọghẹnẹ rẹ ovwan kẹ ovwan na, a vwẹ ayen mu kirobo rẹ uvwiẹ rẹ ovwan epha; kẹ ayen brorhiẹ rẹ ọvwata kẹ ihwo na.

¹⁹Ovwan chahe uyota na kuẹrhẹriẹ-ẹ; ovwan nẹ abọvo-o, ovwan ria udi-i, kidie udiẹriọ rhuẹ ohwo ẹro o mi ku orhiẹn rẹ ọvwata rhẹriẹ.

²⁰Uyota, uyota ọvo ovwan nene, rere ovwan vwọ sa dia vwọ riuku rẹ otọ rẹ Ọrovwohwo rẹ Ọghẹnẹ rẹ ovwan kẹ ovwan na.

²¹Ovwan vwẹ urhe rọ họhọ Ashera vwo viẹ kugbe agbada rẹ izobo rẹ Ọrovwohwo rẹ Ọghẹnẹ rẹ ovwan che ru na-a.

²²Ovwan vwẹ orisẹ viẹ-ẹ, eye Ọrovwohwo rẹ Ọghẹnẹ rẹ ovwan sere na.