Read urhobo Urhi Rivẹ 17 Bible Online

Urhi Rivẹ 17 - urhobo bible

Urhi Rivẹ 17

¹Ovwan vwẹ erhuẹn eyẹ ogegede ro vwo ekan ze izobo kẹ Ọrovwohwo rẹ Ọghẹnẹ rẹ ovwan na-a, o vwo upe kakaka-a; kidie ọye ẹgua kẹ Ọrovwohwo rẹ Ọghẹnẹ rẹ ovwan.

²Ọ da dianẹ a mrẹ ọshare eyẹ aye vwẹ ohri rẹ ovwan vwẹ evun rẹ irere rẹ Ọrovwohwo rẹ Ọghẹnẹ rẹ ovwan kẹ ovwan na, ro de gbe ọphọ na ẹgua,

³ro de gbe odibo kẹ ẹdjọ rọ da ga ayen, ọnre eyẹ emeranvwe eyẹ emu efa rẹ obo odjuvwu, re Me djẹ ovwan na,

⁴a vuẹ ovwan nure; ovwan gba vwẹ oma kpotọ guọnọ, ọ da dia uyota ro muẹro nẹ e ghinẹ ru ẹgua ọtiọye na vwẹ evun rẹ Izrẹl na,

⁵ovwan Me reyọ ọshare eyẹ aye ro ru emu omiomiovwi ọtiọye na kpo anurhoro rẹ orere na, ra reyọ elalọ vwo phi ọshare eyẹ aye yena hwe.

⁶Unu rẹ iseri ivẹ eye iseri erha ọye e vwo hwe ọ ro che ghwu na a vwẹ unu rẹ oseri ọvo hwe ohwo-o.

⁷Iseri na kọ ka vwẹ obọ te ohwo re che hwe na tavwe, kẹsiẹye ihwo ri chekọ ejobi ke vwẹ obọ te hwe. Kẹ ọtiọye ovwan vwọ hworhẹ umwemwu na nẹ ohri rẹ ovwan.

⁸Ẹdjọ rẹ ozighẹ de she vwẹ uherevie rẹ ihwo ivẹ re guọnọ orhiebro, oka rẹ urhi ọvo eyẹ urhi ọfa eyẹ ẹdjọ rẹ ohọre rọ so ihwo ivẹ, eyẹ kẹdjọ kẹdjọ rọ phiare vwẹ evun rẹ orere rọ bẹn ovwan ebro, ovwan ki vrẹn vwo kpo asan rẹ Ọrovwohwo rẹ Ọghẹnẹ jẹreyọ.

⁹Wo de bru irherẹn ri Livae rhire eyẹ oguẹdjọ ro tidia umukpe vwẹ ẹdẹ yena, ku wo gu kẹ ayen, kẹ ayen bru orhiẹn na kẹ wẹ.

¹⁰Ku wo ru kirobo rayen dje kẹ wẹ na vwẹ asan rẹ Ọrovwohwo sanọreyọ na; wọ Me jomaotọ ru dẹndẹn kirobo rayen dje kẹ wẹ na;

¹¹kere ọtiẹ uyono rẹ ayen vwọ kẹ we, kugbe oghẹre rẹ orhiẹn rẹ ayen bruru, ọye wo ru; wo gbobọnyẹ orhiẹn rẹ ayen bruru na-a, wo kpo obọrhe eyẹ obọhwẹre-e.

¹²Ohwo ro phuoma ro gbi mu ọghọ kẹ orherẹn rọ mudia vwẹ obaro rẹ Ọrovwohwo rẹ Ọghẹnẹ rẹ ovwan na-a, eyẹ oguẹdjọ na-a; ohwo yena ko ghwu; eriyin ovwan vwọ hworhẹ umwemwu nẹ Izrẹl na.

¹³Ihwo ejobi ki nyo re, oshọ ko mu ayen, ayen gbi phuoma ọfa-a.

¹⁴Ọke wọ de rhi te otọ rẹ Ọrovwohwo Ọghẹnẹ wẹn kẹ wẹ na, wọ da reyọ nu wọ diare, wọ da tanẹ, Me vwẹ ovie mu vwẹ enu mẹ, ketẹ ẹghotho re riariẹ ovwẹ phihọ na;

¹⁵wọ Me vwẹ ohwo rẹ Ọrovwohwo rẹ Ọghẹnẹ wẹn sanọre mu ovie vwẹ enu wẹn. Ọvo vwẹ ohri re iniọvo wẹn na wo vwo mu ovie vwẹ enu wẹn, wọ vwẹ ọrhorha muẹ vwẹ enu wẹ-ẹ, ọ rọ dia oniọvo wẹ-ẹn na.

¹⁶Ọ rọ herọ na wo jẹn ovie na koko isi buebu kẹ oma rọye-e, eyẹ re o ru ihwo na vwo rhivwi kpo Ijipt rọ vwọ mrasa ghwẹ isi koko buehu-u, rẹ Ọrovwohwo vwọ ta kẹ wẹ nu na nẹ, Wo gbi rhivwi kpo idjerhe yena ọfa-a.

¹⁷Ọ gbe ghwẹ eya gidi oma-a udu rọye de rhi kurhẹriẹ, eyẹ o ji nene esi rẹ idọnọ efuanfon vẹ iro buẹ nọ-ọ.

¹⁸Ọke ro de tidia vwẹ ekete rẹ uvie rọye re, o mi si urhi nana phihọ ọbe kẹ oma rọye, ọ ra vwọ kẹ irherẹn ri Livae yọnre na;

¹⁹kẹ ọ vẹ ọye gba dia, o mie se vwẹ ẹdẹ rẹ akpọ rọye ejobi, ko yono vwọ djẹ oshọ kẹ Ọrovwohwo rẹ Ọghẹnẹ rọye, kọ yọnrọn eta rẹ urhi nana kugbe iji nana, ko ru ayen;

²⁰ro vwo jẹ udu rọye ẹkparọ kpenu nọ imoni rọye, rere o vwo je gbobọnyẹ urhi na, vwo kpo obọrhe eyẹ obọhwere, jẹn urhi na vwo-o; rere ọ vwọ mrasan re uvie rọye na kri, te ọye vẹ emọ rọye vwẹ Izrẹl na.