Read urhobo Urhi Rivẹ 18 Bible Online

Urhi Rivẹ 18 - urhobo bible

Urhi Rivẹ 18

¹Irherẹn ri Livae na, kọye orua ri Livae ejobi, vẹ ihwo rẹ Izrẹl che vwo ẹkẹn eyẹ ukuẹriọ kugbe-e; izobo ra torhẹre kẹ Ọrovwohwo ọye ayen re, kọye je dia ẹkẹn osa rayen.

²Ayen che vwo ukuẹriọ vwọ uherevie rẹ imoni raye-en, Ọrovwohwo re cha dia ẹkẹn uku rayen, kirobo ro ve kẹ ayen.

³Ọnana kọye ute rẹ irherẹn na rẹ ihwo na cha kẹ ayen, ihwo ri che ze izobo na, owenẹ ọ dia erhuẹn eyẹ ogegede, ayen Me vwẹ igabọ vẹ ọhwa rọye ivẹ na kugbe egede rọye kẹ orherẹn.

⁴Orhọ rẹ eka wẹn rẹ ẹsosuọ re ka mọ, wain wẹ rẹ ẹsosuọ, kugbe evwri wẹn rẹ ẹsosuọ, ji kugbe ẹto rẹ igegede wẹn rẹ ẹsosuọ, wọ Me vwẹ ayen kẹ.

⁵Kidie Ọrovwohwo rẹ Ọghẹnẹ wẹn jẹrẹ reyọ nẹ uherevie rẹ orua rọye nure, ro mudia gbe odibo vwẹ odẹ rẹ Ọrovwohwo na, te ọye kugbe emọ rọye.

⁶Ọ da dianẹ ohwo ri Livae ọvo nẹ irere rẹ ovwan na ọvo rhe vwẹ Izrẹl na, nẹ asan rọ dia jovwo, ọ sa rhe vwẹ ọke rọ jẹre — vwọ rhe asan rẹ Ọrovwohwo cha jẹreyọ,

⁷ko ji se gbe odibo vwẹ odẹ rẹ Ọrovwohwo rẹ Ọghẹnẹ rọye, kirobo rẹ otu ri Livae ri chekọ ji mudia gbe odibo vwẹ obaro rẹ Ọrovwohwo vwẹ Etiyin.

⁸Ẹkẹn emuọre rayen Me je dia abavo, etiọye ji te uku rọye ra shẹre.

⁹Ọke rẹ ovwan de te otọ rẹ Ọrovwohwo rẹ Ọghẹnẹ rẹ ovwan vwọ kẹ ovwan na, ovwan yono rere we nene ẹgua rẹ ẹgborho yena-a.

¹⁰We ja mrẹ ohwo ọvo vwẹ uherevie rẹ ovwan rọ torhẹ ọmọshare eyẹ ọmọtẹ rọye vwo ze izobo-o, eyẹ ohwo rọ mraro, eyẹ ọbuepha eyẹ ohwo rọ mrorẹ eyẹ ọbo rọ ghwa ihwo ria,

¹¹eyẹ ohwo ro ruẹ inehweri, eyẹ ohwo ro nene irivwi ta ota eyẹ ọrieda, eyẹ ohwo ro hrẹn.

¹²Kidie ohwo ro ru imu nana yo gbe ẹgua rẹ Ọrovwohwo, fiki re uruemu rẹ ẹgua ọye Ọrovwohwo rẹ Ọghẹnẹ wẹn vwọ djẹ ayen nẹ obaro rẹ ovwan.

¹³Wo gbi vwo ekan vwẹ obaro rẹ Ọrovwohwo rẹ Ọghẹnẹ wẹ-ẹn.

¹⁴Kidie ẹgborho nana ru wọ cha ra reyọ ẹdia rayen na, nenesi rẹ epha ẹbọ kugbe aroẹmrẹ gangan, ẹkẹvuọvo Ọrovwohwo rẹ Ọghẹnẹ wẹn na rhọvwere nu wo ru ọtiọye-e.

¹⁵Ọrovwohwo rẹ Ọghẹnẹ wẹn cha kparẹ ọmraro ọvo vwẹ uherevie rẹ ovwan rọ họhọ ovwẹ, nẹ usun rẹ imoni wẹn na, ọye wa cha kerhọn rọye,

¹⁶kirobo wọ guọnọre vwẹ obọ rẹ Ọrovwohwo rẹ Ọghẹnẹ wẹn vwi Horẹb vwẹ ẹdẹ rẹ ọghwẹgbe ye, ọke wọ vwọ tanẹ, Wo gbi ju vwe nyo urhuru rẹ Ọrovwohwo Ọghẹnẹ mẹ ọfa-a, mi de rhe ghwu.

¹⁷Ọrovwohwo da ta kẹ vwẹ nẹ, Ayen riẹn obo rẹ ayen tare na ta.

¹⁸Me cha vwẹ ọmraro rọ họhọ owẹ kẹ ayen nẹ uherevie rẹ imoni rayen rhe; ki mi che phi ota mẹ phihọ unu rọye, obo re Me ta kẹ ejobi kọye ọ cha ta.

¹⁹Ohwo kohwo rọ gbe kerhọn rẹ eta Me rọ cha ta vwẹ odẹ mẹ na-a, mẹvwẹ ọvo kọye nọ ekpẹn rọye vwẹ obọ rọye.

²⁰Ẹkẹvuọvo ọmraro rọ de ta ota ọvo vwẹ odẹ mẹ ro dia ota ri mi jiro-o, eyẹ ohwo rọ vwẹ odẹ rẹ ẹdjọ ta ota, ọmraro yena ko ghwu.

²¹Wọ da rha ta vwẹ udu wẹn nẹ, Mavọ o ru riẹn ota, rẹ Ọrovwohwo tare-e?

²²Ọke rẹ ọmraro da ta ota vwẹ odẹ rẹ Ọrovwohwo, rẹ ota na gbe phia-a eyẹ ọ gbe sẹ-ẹ yẹ Ọrovwohwo ta ota yena-a; ọmraro yena bruruọ ta, wọ djẹ oshọ rọye-e.