Read urhobo Urhi Rivẹ 2 Bible Online

Urhi Rivẹ 2 - urhobo bible

Urhi Rivẹ 2

¹Etiyin ma ke rhẹriẹ oma, mu oyan rẹ avwanre kpo evun rẹ aton wan idjerhe rẹ Abadi ọvwavware na, ọtiobo rẹ Ọrovwohwo ta kẹ vwẹ; avwanre da yariẹ ugbenu ri Sia phihọ ẹdẹ buebu.

²Ọrovwohwo da ta kẹ vwẹ, nẹ.

³Wa yariẹ ugbenu na phihọ krite re; rhẹriẹ oma ku obọrhe ọnre.

⁴Wo ji iji kẹ ihwo na, nẹ, ovwan cha wan vrẹn ughere rẹ imoni rẹ ovwan emọ rẹ Isọ, ihwo re dia Sia; ayen che bru udu rẹ ovwan; fiki rẹ ọtiọye na wa Me jomaotọ;

⁵we nene ayen họnra-a; kidie Me cha vwẹ otọ rayen kẹ ovwa-an, ẹjo, owenẹ ọ dia amasan rẹ owọ wẹn chiri dede; fikiridie Me vwẹ ugbenu ri Sia kẹ Isọ nẹ ọ dia nure.

⁶Ovwan Me vwẹ igho dẹ emu rẹ ovwan re mie ayen; ovwan mi ji vwẹ igho dẹ ame mie ayen da.

⁷Kidie Ọrovwohwo Ọghẹnẹ rẹ ovwan bruba iruo rẹ obọ rẹ ovwan ejobi nure; ọ riẹn oyan rẹ ovwan re wa yanre wan aton na; vwẹ ikpe ujuvẹ nana rẹ Ọrovwohwo rẹ Ọghẹnẹ rẹ ovwan vwo nene ovwan dia na; emu ọvuọvo rọ karo ovwan herọ-ọ.

⁸Etiyin avwanre da wan vrẹn imoni rẹ avwanre rẹ emọ rẹ Isọ, re dia Sia na, ma da yan wan idjerhe rẹ Araba na wan Ilat vẹ Eziọn-geba. Avwanre da rhẹriẹ oma ra wan idjerhe rẹ aton ri Moab na.

⁹Ọrovwohwo da ta kẹ vwẹ nẹ, Ekpokpo Moabu-u, e ji nene ayen họnra-a; kidie Me sa vwẹ otọ rayen kẹ wẹ re wọ dia-a; fikiridie Me vwẹ Ai kẹ emọ ri Lọt nẹ ayen dia nure.

¹⁰(Imim ka dia jovwo, ihwo ride, buebu grogro, kerẹ ihwo rẹ Anak;

¹¹re vwọ họhọ ihwo re Anak e de ji se ayen Rifem, Ẹkẹvuọvo ihwo ri Moab se ayen Imim.

¹²Ihwo ri Họr je ka dia Sia jovwo, ẹkẹvuọvo emọ rẹ Isọ da rhe dia re ayen vwo no nu; ayen da ghwọrọ ayen nẹ obaro rayen, rhe dia ẹdia rayen; kirobo rẹ Izrẹl ru kẹ otọ rẹ ayen diare, rẹ Ọrovwohwo vwọ kẹ ayen.)

¹³Asakiephana wa gba kparoma, re wa wan vrẹn uto ri Zẹrẹd na. Avwanre da wan uto ri Zẹrẹd na vrẹn.

¹⁴Nẹ ẹdẹ rẹ avwanre vwo nẹ Kedesh-banea, rhi te ẹdẹ rẹ avwanre wan vrẹn uto ri Zẹrẹd na da dia ikpe ọgban gbe ẹrenren; bẹsiẹ rẹ edje rẹ eshare rẹ ofovwi na ejobi rhe vwọ ghwọrọ nẹ ohri rẹ erhọn na, kirobo rẹ Ọrovwohwo ve kẹ ayen.

¹⁵Dede na obo rẹ Ọrovwohwo ji mu kpahe ayen rọ vwọ ghwọrọ ayen nẹ erhọn na bẹsiẹ rẹ ayen vwo ghwu.

¹⁶O vwo rure, rẹ egba ofovwi na ejobi rhe vwọ ghwọrọ ghwu nẹ ohri rẹ ihwo na nu,

¹⁷Ọrovwohwo da ta kẹ vwẹ, nẹ,

¹⁸Nonẹ na gba wan vrẹn ughwru ri Moab vwi Ar;

¹⁹wo si kẹrẹ obaro rẹ emọ re Ammọn, wo kpokpo aye-en wo nene ayen họnra-a; kidie Me sa vwẹ otọ rẹ emọ rẹ Ammọn kẹ wẹ dia-a, fikiridie Me vwẹ rọ kẹ emọ ri Lọt nẹ ayen dia.

²⁰(Ọ re ji se otọ ri Rifem; Rifem re diarọ jovwo; ẹkẹvuọvo ihwo rẹ Ammọn se ayen Zamzummim;

²¹ihwo ride na, buebu, grogro, kere ihwo rẹ Anak; ẹkẹvuọvo Ọrovwohwo da ghwọrọ ayen vwẹ aro rayen; ayen de phi ayen kua, ayen da rhe dia ẹdia rayen;

²²ọtiobo ro ruru kẹ emọ rẹ Isọ, re dia Sia na, rọ ghwọrọ ihwo ri Hoa nẹ obaro rayen; ayen de phi ayen kua, ayen da dia ẹdia rayen rhi te nonẹ na.

²³Ji te Avim ihwo re dia ighwre siẹ re de kpo Gaza na, Kaftọrim, ihwo ri ni Kafto rhe na, da ghwọrọ ayen, ayen da dia ẹdia rayen.)

²⁴Wa kparoma, re we mu oyan rẹ ovwan phihọ wan vrẹn iyara rẹ Anọn; nighe, Me vwẹ Sihọn ohwo rẹ Amọr, rọ dia ovie ri Hẹshbọn kugbe otọ rọye kẹ ovwan nure; we ruo phihọ ẹdia, rere ovwan vẹ ọye họnre.

²⁵Me vwẹ uguegue vẹ oshọ wẹn mu ihwo re herọ vwẹ otọ rẹ odjuvwu nonẹ na, ihwo ri che nyo usi wẹn, che kpogho, ayen ke re oja vwi fiki wẹn.

²⁶Mi de ji ikọn nẹ aton ri Kedemọt rhe Sihọn ovie ri Hẹshbọn ra vuẹ eta rẹ ufuoma, nẹ,

²⁷ju vwe wan otọ wẹn vrẹn; idjiidjerhe ọvo Me yan nene, Me cha rhẹriẹ oma kpo obọrhe eyẹ kẹ obọhwẹre-e.

²⁸Me vwẹ igho dẹ emuọre mie we, re Me ke rẹ; Me je vwẹ igho dẹ ame mie we, re Me ke da; ju vwe vwẹ owọ ọvo yan vrẹn;

²⁹kirobo rẹ emọ rẹ Isọ re dia Sia kugbe ihwo ri Moab rẹ Ai, ru kẹ vwẹ; bẹsiẹ Me vwọ wan Jọdan vrẹn kpo evun rẹ otọ rẹ Ọrovwohwo Ọghẹnẹ rẹ avwanre na vwọ kẹ avwanre.

³⁰Ẹkẹvuọvo Sihọn ovie ri Hẹshbọn rhọvwere nẹ avwanre wan vrẹ-ẹn kidie Ọrovwohwo Ọghẹnẹ wẹn na ru udu rọye gangan, o de ji ru erhi rọye gan, rere Ọ vwọ mrasan phio phihọ obọ wẹn ọtiobo rọ epha nonẹ na.

³¹Ọye Ọrovwohwo da ta kẹ vwẹ, Nighe, Mi mu Sihọn vẹ otọ rọye phihọ ẹ vwọ kẹ wẹ re, gba reyọ wọ dia.

³²Ẹsiẹyẹ Sihọn vẹ ihwo rọye ejobi da rhe họnre avwanre vwi Jahaz.

³³Ọrovwohwo Ọghẹnẹ rẹ avwanre na de muo phihọ obọ rẹ avwanre; avwanre de hwe, vẹ emeshare rọye ejobi vẹ ihwo rọye ejobi.

³⁴Avwanre da reyọ irere rọye ejobi, eshare, te eya, vẹ imitete; vwẹ ọke yena, avwanre jẹ ọvuọvo vwo-o;

³⁵eranvwe ọvo avwanre ghwẹ reyọ kẹ oma rẹ avwanre, ne evun rẹ irere rẹ avwanre phi kua na ejobi.

³⁶Nẹ Aroer, rọ hẹ unu rẹ iyara rẹ Anọn na, ji nẹ orere rọ evun rẹ iyara na, tobọ re te Giliad, o vwo orere ọvuọvo rọ rho nọ kẹ avwanre-e; Ọrovwohwo Ọghẹnẹ rẹ avwanre na phi ayen ejobi phihọ abọ rẹ avwanre.

³⁷Otọ rẹ emọ rẹ Ammọn ọvo wo je sio kẹrẹ; ẹbẹre rẹ urhie ri Jabọk ejobi, ve rẹ igbenu na, kugbe asan kasan rẹ Ọrovwohwo Ọghẹnẹ rẹ avwanre sẹn kẹ avwanre.