Read urhobo Urhi Rivẹ 20 Bible Online

Urhi Rivẹ 20 - urhobo bible

Urhi Rivẹ 20

¹Ọke wo de re nene ivwighrẹ wẹn phi ofovwi, ru wọ da mrẹ esi vẹ idjighere kugbe otuofovwi re rho nọ wẹ, wọ djẹ oshọ raye-en, kidie Ọrovwohwo rẹ Ọghẹnẹ wẹn vẹ owẹ herọ, ohwo rọ reyọ owẹ nẹ otọ rẹ Ijipt rhe na.

²Wo de sikẹrẹ unu ofovwi na re, orherẹn na kọ yan kpo obaro rhe ta ota kẹ ihwo na,

³kọ ta kẹ ayen nẹ, Nyo, E Izrẹl, nonẹ na wo sikẹrẹ ivwighrẹ wẹn rere wọ vẹ ayen phi ofovwi re; wo jẹn udu bru we-e; wọ djẹ oshọ-ọ wo jẹn uguegue rayen mu uwe-e,

⁴kidie Ọrovwohwo rẹ Ọghẹnẹ wẹn na ri nene uwe ra, ra họnre ivwighrẹ wẹn na kẹ wẹ, rẹ ọ kẹ wẹ ephio kparobọ.

⁵Etiyin ilori na da kẹ ihwo na, nẹ, Ono re bọn uwevwi ọkpokpọ rọ je dia-a? E jo rhivwi kpo uwevwi rọye, eyẹ o de ghwu vwe ofovwi na, ohwo ọfa kọye cha dia.

⁶Ono re kọn ogba ri vain ro jẹ ubi rọye ẹriọ? E jọ rhivwi kpo uwevwi rọye, o de rhe ghwu phihọ ohwo ọfa da rhe re ubi rọye.

⁷Ono herọ rọ sa aye phihọ otọ ro jẹ reyọ te uwevwi-i? E jo rhivwi kpo uwevwi rọye, eyẹ o de ghwu vwẹ ofovwi na ohwo ọfa da rhe rọvwọ.

⁸Iiori na kẹ ta kẹ ihwo na ta nẹ, Ono oshọ muẹ rẹ udu ji brẹ? E jo rhivwi kpo uwevwi rọye, eyẹ ọfiavwe da fiavwe otu rọye ri chekọ.

⁹Ọke rẹ ilori na vwọ ta eta kẹ ihwo na ejobi nu, ka vwẹ inotu vwo mu vwẹ enu rẹ ihwo na ejobi.

¹⁰Wo de sikẹrẹ orere wọ cha họnre na, guọnọ obo ru wọ vẹ ọye vwọ rhuẹrẹ kugbe.

¹¹Ọ da kpahe ota rẹ ufuoma kẹ wẹ ro rhie kẹ wẹ, gbe jẹ ohwo kohwo ru wọ mrẹ vwẹ evun rọye ejobi ru iruo kẹ wẹ re e ga wẹ.

¹²Ẹkẹvuọvo ọ vẹ owẹ gbe rhuẹrẹ kugbe-e, ẹkẹvuọvo o de nene uwe phi ofovwi, kẹsiẹye wọ ke gba phihọ,

¹³ọke rẹ Ọrovwohwo rẹ Ọghẹnẹ wẹn de phio phihọ obọ wẹn nu wọ Me vwẹ ọlọkọ nyavwe eshare rọye ejobi hwe,

¹⁴ẹkẹvuọvo eya vẹ imitete na, te uchuru, vẹ emu kemu efa re hẹ evun rẹ orere na, ekuakua rayen ejobi, wọ ghwẹ ayen reyọ kẹ oma rẹ ovwan; wọ Me re ekuakua rẹ ivwighrẹ wẹn, rẹ Ọrovwohwo rẹ Ọghẹnẹ vwọ kẹ wẹ na.

¹⁵Enẹ wo ru irere ejobi ri sheri kẹ wẹ gangan re dia irere rẹ ihwo nana re hẹ etinẹ na-a,

¹⁶Ẹkẹvuọvo irere rẹ ihwo nana Ọrovwohwo rẹ Ọghẹnẹ wẹn kẹ wẹ vwọ riuku na, emu kemu rọ nwẹn vwọ wo sivwo-o,

¹⁷ẹkẹvuọvo wọ Me ghwọrọ ayen ejobi tototo. ihwo ri Hẹt vẹ ihwo rẹ Amọr, ihwo ri Kenan vẹ e re Pẹrẹz, ihwo ri Hiv vẹ e rẹ Jebus, ọtiobo rẹ Ọrovwohwo rẹ Ọghẹnẹ wẹn tare na,

¹⁸rere ayen vwo ju we eyono uruemu ẹgua rayen rẹ ayen ruẹ vwẹ egagọ rẹ edjọ rayen na, wo de rhe ru umwemwu kpahe Ọrovwohwo rẹ Ọghẹnẹ wẹn na.

¹⁹Ọke wọ da gba yariẹ orere na phihọ krekri, ru wọ vwọ họnrọ wọ vwọ mrasan reyọ, wo muẹ ushurhe vwo she irhe rọye rere wọ guọghọ-ọ, ọke ọvo wọ cha re ayen vwẹ obọ, ẹkẹvuọvo wo she ayen teyọ otọ-ọ. Irhe rẹ aghwa na kẹ ihwo ru wọ gba yariẹ phihọ?

²⁰Irhe ru wọ riẹnre nẹ i ja re-e wo mi she ayen te otọ wọ vwẹ ayen gba ogba rẹ imu riariẹ orere ro nene uwe phi ofovwi na, rhiri bẹsiẹ ro vwo she.