Read urhobo Urhi Rivẹ 21 Bible Online

Urhi Rivẹ 21 - urhobo bible

Urhi Rivẹ 21

¹Ọ da dianẹ a mrẹ ohwo ọvo re di hwe phihọ otọ rẹ Ọrovwohwo Ọghẹnẹ wẹn vwọ kẹ wẹ nẹ wọ dia na, ra gbe riẹn ohwo ro hwere-e,

²Etiyin ekpako vẹ iguẹdjọ wẹn ke yan phia, ayen Me ma ugbo rẹ irere re yariẹ asan rẹ ohwo re hweri na epha;

³ekpako rẹ orere rọ ma kẹrẹ ohwo re hweri na ke reyọ umuomuo rẹ erhuẹn re ji vwo ru iruo dẹvo-o, re ji churu urhekpe si dẹvo-o.

⁴Ekpako rẹ orere na Me reyọ umuomuo rẹ erhuẹn na rhe iyara rẹ ame rọye djẹ ọkẹre, re vori-i ra je kọn dẹvo-o e mi vwirhi ohọre rẹ umuomuo rẹ erhuẹn na vwẹ evun rẹ iyara na.

⁵Irherẹn na rẹ emọ ri Livae na ke yan phia, kidie Ọrovwohwo Ọghẹnẹ wẹn sanọ ayen reyọ nure nẹ ayen gbe odibo kẹ re ayen nẹ ẹrhovwo kẹ ihwo na vwẹ odẹ rẹ Ọrovwohwo na, ota rayen a vwọ rhuẹrẹ ẹghwọ kẹghwọ ejobi ji kugbe ohọnre kohọnre ejobi.

⁶Ekpako na ejobi re hẹ orere yena rọ ma kẹrẹ ohwo re hweri na ke hworhẹ abọ rayen phihọ enu rẹ umuomuo rẹ erhuẹn re vwirhi ọhọre rọye vwẹ evun rẹ iyara na;

⁷ayen mi se iseri tanẹ, Abọ rẹ avwanre te ọbara nana-a, ẹro rẹ avwanre je mrẹ re vwo hwe-e.

⁸Vwo rhovwo ihwo wẹn Izrẹl, E Ọrovwohwo, e re wọ tanre na, wọ garo rẹ abe rẹ ọbara rẹ ọvwata na vie uherevie rẹ ihwo wẹn Izrẹl na-a. Vwẹ abe rẹ ọbara na vwo ghovwo ayen.

⁹Eriyin wọ vwọ hworhẹ abe rẹ ọbara rẹ ọvwata na nẹ uherevie wẹn, ọke wo de ru obo ri shehọ vwẹ obaro rẹ Ọrovwohwo na.

¹⁰Wọ da kpare ofovwi bru ivwighrẹ wẹn rẹ Ọrovwohwo rẹ Ọghẹnẹ wẹn de phi ayen phihọ obọ wẹn, ru wo de mu ayen ighuvwu,

¹¹wọ da mrẹ aye ro je we vwẹ uherevie rayen, ro wọ guọnọre nẹ wọ vwọ rọvwọ,

¹²wọ Me reyọ kpọ uwevwi wẹn, ọ Me wanre uyovwi rọye re wọ biẹn ififabọ rọye.

¹³Ọ Me ghwiẹ emwa rẹ imu rọye nẹ oma, ọ Me dia evun rẹ uwevwi wẹn emeranvwe soso da viẹ ọsẹ vẹ oni rọye; kẹsiẹye wo ki bro ra, wọ ke dia ọshare kẹ rọ ke dia aye kẹ wẹ.

¹⁴Ọ da dianẹ ivun rọye gbe vwerhe owẹ-ẹ, wo mi jo kpo obo ro jere ẹkẹvuọvo wọ shẹ reyọ igho-o, wo ji ruo kerẹ ọviẹ-en, kidiẹ wo vwi ro gbotọ nure.

¹⁵Ọ da dianẹ ohwo vwẹ eya ivẹ, ọvo avwebọ ọrivẹ da dia avwiorọvwe, ayen de vwiẹ emọ kẹ, te avwebọ vẹ avwiorọvwe na, ọ da dianẹ ọmọ rẹ avwiorọvwe na kọye he ọmọkpako,

¹⁶kọye ẹdẹ rọ da cha ghare emu ro vwori kẹ emeshare rọye vwọ riuku, ofori rere o ru ọmọkpako rẹ avwebọ na kẹrẹsiẹ ra mrẹ nẹ ọye ọmọkpako rẹ avwiorọvwe na, rọ dia ọkpako na-a,

¹⁷ẹkẹvuọvo ọ Me rhọvwe ọmọkpako na, emọ rẹ avwiorọvwe na, vwọ kẹ ọhwọhwọ ivẹ rẹ mu ro vwori ejobi; kidie ọye o ke vwiẹ rẹ ogangan rọye, ọrho rẹ okẹvwiẹ ọ rọye.

¹⁸Ọ da dianẹ ohwo vwo ọmọ rọ gan udu ro gbe urhi, ro nyo urhuru rẹ ọsẹ eyẹ urhuru rẹ oni rọye-e, owenẹ ayen farọ dede, ọ kerhọ raye-en,

¹⁹ọsẹ vẹ oni rọye Me reyọ vwo rhe ekpako rẹ orere rọye vwẹ unu rẹ ogba rẹ asan rọ dia na,

²⁰ayen Me ta kẹ ekpako rẹ orere rọye na, Ọmọshare rẹ avwanre nana ọ gan udu je vwẹ ọgburhi ọ nyo urhuru rẹ avwanre-e; ovwurhuru kugbe ogbaidi oruẹ.

²¹Etiyin eshare rẹ orere na Me vwẹ elalọ phio ghwu ke etiọye vwọ hworhẹ umwemwu nẹ uherevie wẹn; Izrẹl ejobi de nyo, oshọ ko mu ayen.

²²Ọ da dianẹ ohwo so ota rẹ ughwu re de hwe, ru wo de churo si enu rẹ urhe;

²³wo jẹ ugboma rọye vwerhẹ enu rẹ urhe na phrọke-e, ẹkẹvuọvo wo mi ghwe sho ẹdẹdẹ yena, kidie Ọghẹnẹ harhe ohwo ro churu. Wo gbe otọ rẹ Ọrovwohwo rẹ Ọghẹnẹ wẹn kẹ wẹ na ẹgua-a.