Read urhobo Urhi Rivẹ 22 Bible Online

Urhi Rivẹ 22 - urhobo bible

Urhi Rivẹ 22

¹Wọ sa mrẹ erhuẹn eyẹ ogegede rẹ oniọvo wẹn rọ yan ghwre ru wo dẹ jẹn ayen ẹcha uko-o; wọ Me vwẹ ayen rhivwi vwo rhe oniọvo wẹn na.

²Ọ da dianẹ ọ gbe dia kerẹ owẹ-ẹ eyẹ wọ gbe je riẹ-ẹn wọ Me reyọ kpo uwevwi wẹn ọ Me dia obọ wẹn bẹsiẹ rẹ oniọvo wẹn vwọ guọnọ rhe; kẹsiẹye wọ ke vwọ kẹ.

³Eriyin wo ji ru ekẹtẹkẹtẹ rọye; ọtiọye wo ji ru amwa rọye; eriyin wo ru emu kemu rẹ oniọvo wẹn ro ghwruru, rọ varọ abọ ghwru ro wọ mrẹre; wo jẹ ọchuko ẹ vwọ kẹ-ẹ.

⁴Wọ sa mrẹ ekẹtẹkẹtẹ rẹ oniọvo wẹn eyẹ erhuẹn rọye ro she teyọ otọ vwẹ idjerhe, wo de jẹn ọchuko ẹ vwo kẹ aye-en; wọ Me chọ uko kpare ayen vrẹn.

⁵Aye ghwa emu kemu rẹ ọshare ghwa-a, ọshare ghwa amwa rẹ aye-e; kidie ohwo kohwo ro ru imu nana yo gbe ẹgua kpahe Ọrovwohwo rẹ Ọghẹnẹ wẹn na.

⁶Ọ da dianẹ wọ yan te asan rẹ ẹho rẹ ọmọphran epha vwẹ enu rẹ urhe eyẹ vwẹ enu rẹ otọ, o de vwo emọ oboba eyẹ ikẹn yẹ oni rẹ ọphran na rhuẹn emọ na eyẹ ikẹn na, wo muẹ emọ na muẹ oni-i;

⁷jẹn oni na kpo, re wo mu emọ na reyọ kẹ oma wẹn rere o vwo yovwi kẹ wẹ, rere wọ vwọ tọn.

⁸Wọ da bọn uwevwi ọkpokpọ, wo mi fi igbẹhẹ otete riariẹ akọkọ rẹ ebọ rọye, rere abe rẹ ọbara rẹ ohwo ro she norhe, vwo jẹ uwevwi wẹn ete.

⁹Wọ vwẹ ekankọn ivẹ kọn ogba ri vain wẹ-ẹn e de rhe gborho obo ri nuro rhe ejobi kẹ ẹdia ọfuanfon na, te ubi wọ kọnre vẹ obo rẹ ogba na mọre ejobi.

¹⁰Wọ vwẹ erhuẹn vẹ ekẹtẹkẹtẹ voro udju kugbe-e.

¹¹Wọ ghwa amwa ra vwẹ ẹton rẹ ogegede vẹ esada vwọ gua-a.

¹²Wo churu ejọjọ si ọkọkọ ẹne rẹ amwa ru wo vwo phopho ejobi.

¹³Ọ da dianẹ ọshare reyọ aye, ro de bro kpo ovwerhẹ, rọ da vwọ jehwẹ,

¹⁴rọ da barọ ota nẹ, oma rọye gbare-e, ro de miovwo odẹ rọye, tanẹ, Me rọvwọ aye nana, mi vwo bro ra re, Me da mrẹ nẹ o vwo ọghọ-ọ,

¹⁵Etiyin ọsẹ vẹ oni rẹ ọmọtẹ na ke reyọ oka rẹ ọghọ rọye rhe ekpako rẹ orere na vwẹ ughere rẹ orere na;

¹⁶ọsẹ rẹ ọmọtẹ na kọ ta kẹ ekpako na, Me vwẹ ọmọtẹ mẹ kẹ ọshare nana nọ rọvwọ, ọ da vwọ jehwẹ;

¹⁷gbe nighe, ọ barọ ota vẹ omavovwẹ tanẹ, Me mrẹ oka rẹ ọghọ vwẹ ọmọtẹ wẹ-ẹn, Dede na yẹ enana eka rẹ ọghọ rẹ ọmọtẹ mẹ. Ayen Me riẹn amwa na vwẹ obaro rẹ ekpako rẹ orere na.

¹⁸Etiyin ekpako rẹ orere yena ke reyọ ọshare na ayen Me fa;

¹⁹ayen mi ho shekẹl rẹ idọnọ efuanfon ujori, vwọ kẹ ọsẹ rẹ ọmọtẹ na, fikiridie o se odẹ umwemwu kpahe ọmọtobẹ rẹ Izrẹl; ọ Me je dia aye rọye; bẹdẹ ro vwo nẹ akpọ na ọ gbe djẹ kpo-o.

²⁰Ẹkẹvuọvo emu na da dia uyota nẹ a mrẹ ọghọ vwẹ oma rẹ ọmọtẹ na-a,

²¹kẹ ayen reyọ ọmọtẹ na kpo anurhero rẹ uwevwi rẹ ọsẹ rọye, eshare rẹ orere rọye Me vwẹ elalọ phio hwe, fikiridie o gbe ugheghẹ vwẹ evun rẹ Izrẹl rọ vwọ dia uwevwi rẹ ọsẹ rọye de gbe ọfanrhiẹ; eriyin wọ vwọ hworhẹ umwemwu nẹ uherevie rẹ ovwan.

²²A da mrẹ ọshare ro du aye rẹ ohwo ọfa, ọshare na vẹ aye na ki ghwu, ayen ri du ohwohwo na, eriyin wọ vwọ hworhẹ umwemwu nẹ Izrẹl.

²³Ọ da dianẹ ọmọtobẹ herọ rẹ ohwo sahotọ ọshare da vwa ro de nene vwerhẹ vwẹ evun rẹ orere na,

²⁴wọ Me reyọ ayen rhe ughere rẹ orere na, wọ Me vwẹ elalọ phi ayen hwe, phi ọmọtẹ na hwe fikiridie evun rẹ orere ọ epha yẹ o kperi nẹ a rhe chọ ọye uko-o, phi ọshare na hwe kidie ọ gba aye rẹ ọrivẹ rọye du; eriyin ovwan vwọ hworhẹ umwemwu nẹ uherevie rẹ ovwan.

²⁵Ẹkẹvuọvo ọ da dianẹ evun rẹ aghwa ọshare na da vwa ọmọtẹ ra sahotọ na, ọshare na de muo ro de duo, ọshare na ro duro na ọvo kọye ri ghwu.

²⁶Ẹkẹvuọvo wo ru ọmọtẹ na emuọvo-o; oruchọ vuọvo ro te ughwu ọ hẹ oma rẹ aye na-a, kidie Ota nana họho ohwo rọ vwọ tua ọrivẹ rọye o de hwe ghwu,

²⁷fikiridie evun rẹ aghwa ọ da vwa, owenẹ a sa aye na phihọ ọtọ dede ọke ro vwo kperi a mrẹ ohwo rọ rhere rhi sivwo-o.

²⁸Ọshare da mrẹ ọmọtobẹ ra sahotọ-ọ, ro de muo nene vwerhẹ, ra da mrẹ ayen,

²⁹ọshare ro nenire vwerhẹ na Me vwẹ shekẹl ujuvẹ gbe ihwe rẹ idọnọ efuanfon kẹ ọsẹ rẹ ọmọtẹ na, ọ Me dia aye rọye, fikiridie ọ gbarọ du nure, bẹdẹ ro vwo nẹ akpọ na ọ gbe djẹ kpo-o.

³⁰Ọshare sa rọvwọ aye rẹ ọsẹ rọye-e, o ji si amwa nẹ aye rọ dia ọ rọ ọsẹ rọye-e.