Read urhobo Urhi Rivẹ 24 Bible Online

Urhi Rivẹ 24 - urhobo bible

Urhi Rivẹ 24

¹Ọke rẹ ohwo da reyọ aye vwọ rọvwọ, ọ da dianẹ aye na mrẹ ẹroesiri rẹ ọshare na-a fikiridie ọshare na mrẹ ijẹfuọn vwẹ oma rẹ aye na, rẹ ọshare na de si ọbe rẹ obesiono vwọ kẹ aye na ro de sio nẹ uwevwi rọye, rẹ aye na de nẹ uwevwi rọye yanran,

²ọ da dianẹ ọ yanran rọ da rhe dia aye rẹ ohwo ọfa,

³ro gbi ji je ọshare rẹ ukuko na-a ro de ji si ọbe rẹ obesiono vwọ kẹ aye na ro de sio nẹ uwevwi rọye, eyẹrẹ ọshare rẹ ukuko na ghwuru ọ rọ reyerọ vwo ru aye na,

⁴ọshare rọ ka reyọ jovwo na, ro siobọ no kpo na, gbe reyọ vwo ru aye rọye ọfa-a, kidie o miovwi oma nure; omaemiovwo ẹgua kẹ Ọrovwohwo, wọ ghwa abiẹriọ cha evun rẹ otọ rẹ Ọrovwohwo rẹ Ọghẹnẹ vwọ kẹ wẹ nẹ wọ vwọ riuku na-a.

⁵Ohwo da reyọ aye nu vwo obọ, o se nene otuofovwi kpọ ofovwi-i a je sa vwẹ oghẹre rẹ iruo ọvuọvo kẹ nẹ o ru-u; ọ mi vwo uphẹ ẹgbukpe soso, re ọ vẹ aye rọye rọ reyọ re na vwọ ghọghọ.

⁶Ohwo ọvuọvo vwọ ọmọ rẹ olalọ vwọ nọ emu eyẹ oragha ra vwọ nọ emu viẹnwa-a kidie yẹ ọ vwẹ arhọ viẹnwa.

⁷Ọ da dianẹ ohwo ro cho ohwo ọvo vwẹ usun rẹ imoni rọye na, rẹ ihwo rẹ Izrẹl na, ro de ruo kerẹ ọviẹn eyẹ ọ da shẹ, oji yena ko ghwu; rere wọ vwọ hworhẹ umwemwu na nẹ uherevie wẹn.

⁸Jomaotọ rẹ oti de mu ohwo, ọ Me nabọ ru dẹndẹn kirobo rẹ irherẹn ri Livae dje kẹ wẹ; kirobo mi ji urhi kẹ ayen, rere wo ru ọtiọye dẹndẹn.

⁹Wọ Me karohọ obo rẹ Ọrovwohwo rẹ Ọghẹnẹ wẹn ru ki Miriam vwẹ obo idjerhe ri wo vwo nẹ Ijipt cha.

¹⁰Ọke wo de momo emu kemu kẹ ọrivẹ wẹn, wọ yan kpo uwevwi rọye ra reyọ emu ro vwo viẹnwa-a.

¹¹Wo mi mudia vwẹ obo otafe, rere ohwo ru wo momo ke na ọvo Me reyọ emu rẹ iviẹnwa na vwọ kẹ wẹ.

¹²Ọ da dianẹ ovwiogbere oruẹ, wo jẹ emu ro vwo viẹnwa na vwerhẹ obọ wẹ-ẹn,

¹³ọnre da ro otọ nu, wọ Me reyọ emu rọ vwo viẹnwa na rhivwi rhe rere ọ vwọ mrasan vwẹ ewun rọye shevwerhẹ re ọ vwọ nẹ ẹrhovwo kẹ wẹ; kọ dia ọvwata kẹ wẹ vwẹ obaro rẹ Ọrovwohwo rẹ Ọghẹnẹ wẹn na.

¹⁴Wo shenyẹ odibo re durhieri rọ dia ogbere rẹ akpọ bẹ-ẹ, owenẹ ọ dia ọvo vwẹ usun rẹ imoni wẹn na eyẹ ọvo vwẹ usun rẹ erhorha na re hẹ evun rẹ otọ irere wẹn na;

¹⁵ẹdẹ ro te osa ẹhwa ke wọ Me hwa kẹ, tavwe re ọnre ke ruotọ (kidie ovwiogbere o ruẹ, ọ vwẹ udu rọye kpahọ), o de brenu kẹ Ọrovwohwo kpahe owẹ, kọ dia umwemwu kẹ wẹ.

¹⁶Ehwe esemọ na sohọ emọ na-a, e ji hwe emọ na sohọ esemọ na-a; ohwo ro ru umwemwu ri ghwu phihọ umwemwu rọye.

¹⁷Ase rẹ ọrhorha eyẹ ọ rẹ omophrorivwi wo kuorhẹriẹ-ẹ, wọ je reyọ amwa rẹ ayeuku viẹnwa-a,

¹⁸ẹkẹvuọvo wọ Me karohọ nẹ wọ je dia ọviẹn vwẹ Ijipt jovwo tavwe re Ọrovwohwo rẹ Ọghẹnẹ wẹn kẹ tan wẹ nẹ Etiyin rhe fiki rẹ ọtiọye na mi vwo ji urhi kẹ wẹ nẹ wo ru Ọnana.

¹⁹Ọke ri wo de vu orhọ wẹn vwẹ obo udju wẹn rẹ ekru rẹ eka da chọrọ owẹ ẹro vwẹ evun rẹ udju na, Wo gbi rhivwi kpo uko ra reyọ-ọ, ọ Me ghwa dia kẹ ọrhorha, vẹ omophrorivwi kugbe ayeuku; rere Ọrovwohwo rẹ Ọghẹnẹ vwọ mrasan bruphihọ kẹ wẹ vwẹ iruo kiruo ru wọ ghwẹ obọ kpahe ejobi.

²⁰Wọ da kọrọ irhe rẹ oliv wẹn, wọ gbe rhoma re gbo eghọ rayen ọfa-a; e jọ dia kẹ ọrhorha, vẹ omophrorivwi kugbe ayeuku.

²¹Wọ da kọrọ grep ri ogba ri vain wẹn, wọ gbi kpo ugbo rọye-e; e jọ dia kẹ ọrhorha, vẹ omophrorivwi kugbe ayeuku.

²²Wọ Me karohọ nẹ wọ je dia ọviẹn vwẹ otọ rẹ Ijipt jovwo; fiki rẹ ọtiọye na mi vwo ji urhi kẹ wẹ nẹ wo ru Ọnana.