Read urhobo Urhi Rivẹ 25 Bible Online

Urhi Rivẹ 25 - urhobo bible

Urhi Rivẹ 25

¹Ọ da dianẹ ẹghwọ herọ vwẹ uherevie rẹ ihwo, rọ ghwa ayen kpo ẹguare, rẹ de brorhiẹ rẹ ayen ivẹ, re de brorhiẹ ohwo rọ rease re de bruhwe ọ rọ reabe,

²rọ da dianẹ ọ rọ re abe na fohwo ra fa, obrorhiẹ na mi jo shevwerhẹ te otọ ra fa uchabọ rẹ oruchọ rọye na muru vwẹ irharo rẹ obrorhiẹn na.

³A sa fa abọ ujuvẹ, ẹkẹvuọvo o jọ vrẹn ọtiọye-e eyẹ, ọ da dianẹ ohwo ọvo ra fa vrẹn ọtiọye, yẹ aphọpherọ vwẹ irharo wẹn.

⁴Wọ gba erhuẹn unu, vwẹ ọke ro de woro eka-a.

⁵Iniọvo de yeri kugbe, rẹ ọvo rayen de ghwu yo vwiẹ ọmọ-ọ, aye rẹ ọ ro ghwuru na se nẹ orua na ra rọvwọ ọrhorha vwẹ obo otafe-e; oniọvo rẹ ọshare rọye na ko bro kpo uwevwi, ọ Me reyọ vwo ru aye rọye, o mi ru iruo rẹ oniọvo rẹ ọshare kẹ aye na.

⁶Ọmọkpako rẹ aye na vwiẹri Me re odẹ rẹ oniọvo rọye ro ghwuru na, rere odẹ rọye vwo je phoro nẹ Izrẹl.

⁷Ọ da dianẹ ọshare na guọnọ nẹ ọye reyọ aye rẹ oniọvo rọye na-a, kẹsiẹye aye rẹ oniọvo rọye na ko kpo ughere bru ekpako na ra, ọ Me vuẹ ayen nẹ, Ọniọvo rẹ ọshare Me rhọvwere nẹ odẹ rẹ oniọvo rọye dia evun rẹ Izrẹl na-a, ọ rhọvwe ru iruo rẹ oniọvo rẹ ọshare kẹ vwẹ-ẹ.

⁸Etiyin ekpako rẹ orere na ki se ọshare na, ayen Me vuẹ ọ da jẹ dianẹ ọ je sẹ nẹ ọye reyọ aye rẹ oniọvo rọye na-a,

⁹aye rẹ oniọvo rọye na Me yan bro ra vwẹ irharo rẹ ekpako na, o mi ku ephiẹn nẹ awọ rọye, ọ mi dje enya ku opharo rọye, ọ Me kpahe ta kẹ nẹ, Ọtiọye e ru ọshare rọ rhọvwe bọn uwevwi rẹ oniọvo rọye-e.

¹⁰Ke se odẹ rẹ uwevwi rọye vwẹ Izrẹl na nẹ Uwevwi rẹ ohwo re ku ephiẹn nu.

¹¹Ọke rẹ eshare da họnre ohwohwo rẹ aye rẹ ọvo de si kẹrẹ nẹ ọye sivwi ọshare rọye nẹ obọ rẹ ohwo ro hwe na, rọ da riẹn obọ rọye vwọ yọnrọn oshọ eyẹ ivwrite rẹ ọrivẹ na,

¹²wọ Me ghwa nyavwe obọ rọye bru; wo jẹn aro rọye dọ wẹ-ẹ.

¹³Wo vwo oghẹre rẹ ẹhọhọ ivẹ vwẹ evun rẹ ekpo wẹ-ẹn, ọvo ọrode ọvo otete.

¹⁴Wo ji vwo oghẹrẹ rẹ ovwanvwọn ivẹ vwẹ evun rẹ uwevwi wẹ-ẹn, ọrode kugbe otete.

¹⁵Ẹhọhọ rọ gbunu rọ dia ọsoso ọye wo vwo, ovwanvwọn rọ vọnre rọ dia ọsoso ọye wo vwo; rere ẹdẹ wẹ vwo gro vwẹ evun rẹ otọ rẹ Ọrovwohwo rẹ Ọghẹnẹ wẹn vwọ kẹ wẹ na.

¹⁶Kidie ihwo ejobi ri ru imu etiọye, ihwo re ghwa ihwo ria ejobi, ẹgua kẹ Ọrovwohwo rẹ Ọghẹnẹ wẹn na.

¹⁷Karohọ obo rẹ Amalẹk ru we vwẹ idjerhe vwẹ ọke wo vwo nẹ Ijipt cha,

¹⁸obo ro mu kpahe owẹ vwẹ idjerhe ọke rẹ oma vwọ rhọ wẹ ru wo vwo vwioro ro de hwe ihwo wẹn ri gbe eghẹrẹ vwẹ obuko wẹ, ọ djẹ oshọ rẹ Ọghẹnẹ-ẹ.

¹⁹Fiki rẹ ọtiọye na ọke rẹ Ọrovwohwo rẹ Ọghẹnẹ wẹn na de si we nẹ abọ rẹ ivwighrẹ re riariẹ owẹ phihọ nu, rọ da kẹ wẹ omerovwo nu, vwẹ evun rẹ otọ rẹ Ọrovwohwo rẹ Ọghẹnẹ kẹ wẹ nẹ wọ dia da riuku na, wo mi phoro ẹkarohọ rẹ Amalẹk nẹ otọ rẹ ọnre, wo jọ chọrọ owẹ ẹro-o.