Read urhobo Urhi Rivẹ 26 Bible Online

Urhi Rivẹ 26 - urhobo bible

Urhi Rivẹ 26

¹Ọke wo de te otọ rẹ Ọrovwohwo rẹ Ọghẹnẹ wẹn vwọ kẹ vwọ riuku na, wọ da reyọ nu, ro wọ da diare,

²wọ Me reyọ evo vwẹ emamọ rẹ ẹsosuọ rẹ otọ na, ru wo vuru nẹ otọ rẹ Ọrovwohwo rẹ Ọghẹnẹ wẹn vwọ kẹ wẹ na rhe, wo mi phio phihọ evun rẹ obere, wo mi kpo asan rẹ Ọrovwohwo rẹ Ọghẹnẹ wẹn cha jẹreyọ nẹ odẹ rọye dia Etiyin.

³Wo mi bru orherẹn rọ hẹ Etiyin vwẹ ọke yena, wọ Me ta kẹ nẹ, Me rhọvwe kẹ Ọrovwohwo rẹ Ọghẹnẹ wẹn nonẹ na nẹ mi rhi te otọ rẹ Ọrovwohwo veri kẹ esẹ rẹ avwanre nẹ ọye vwọ kẹ avwanre na re,

⁴kẹsiẹye orherẹn na ke reyọ obere na mie we, o mi muo phihọ obaro rẹ agbada rẹ Ọrovwohwo Ọghẹnẹ wẹn na.

⁵Wọ Me kpahe vwẹ obaro rẹ Ọrovwohwo rẹ Ọghẹnẹ wẹn na nẹ, Ohwo rẹ Aram ro suosuo ọye ọsẹ mẹ o de ghoro kpo Ijipt, ọ vẹ imihwo tutuno re gba ra Etiyin o de rhi hirhe phihọ ẹgborho rhuarho vẹ egba, o de rhi bu gangan.

⁶Ihwo rẹ Ijipt de gbe oja kẹ avwanre re, ayen da lagha avwanre, ayen de kru oghwa ọbẹbẹ rẹ ọviẹn nyẹ avwanre.

⁷Avwanre da viẹ kperi se Ọrovwohwo Ọghẹnẹ rẹ esẹ rẹ avwanre na, Ọrovwohwo de nyo urhuru rẹ avwanre ọ da mrẹ ojẹriọ, vẹ owian, kugbe oshenyẹ rẹ avwanre.

⁸Ọrovwohwo da vwẹ obọ ọgangan vẹ ugbobọ ra riẹnre vẹ oshọ rode na, kugbe eka vẹ igbunu vwo si avwanre nẹ Ijipt rhe;

⁹ọ da reyọ avwanre vwọ rhe etinẹ na ọ da kẹ avwanre otọ nana, otọ rọ djẹ ọkẹre rẹ ameivie vẹ ọnyọn.

¹⁰Gbe nighe, Asakiephana Me vwẹ emamọ rẹ ẹsosuọ rẹ otọ na rhe, ọ rẹ wọwẹ, E Ọrovwohwo, vwọ kẹ vwẹ na. Ku wo muo phihọ obaro rẹ Ọrovwohwo rẹ Ọghẹnẹ wẹn, ku wọ ga Ọrovwohwo Ọghẹnẹ wẹn na.

¹¹Ku wọ ghọghọ vwẹ evun rẹ emu kemu ejobi rẹ Ọrovwohwo Ọghẹnẹ wẹn vwọ kẹ wẹ vẹ uwevwi wẹn, wẹ, kugbe ohwo ri Livae kugbe ọrhora rọ hẹ ohri rẹ ovwan.

¹²Ọke ru wọ da hwa osa rẹ ẹkẹnhwe wẹn rẹ obo wo vuru ejobi nu vwẹ ukpe rerha, kọye ukpe rẹ ẹkenhwe, ra da vwọ kẹ ohwo rẹ Livae, ọrhora na, ọmọphrorivwi na kugbe ayeuku, rere ayen re vwẹ evun rẹ irho rẹ ovwan re evun vọn ayen.

¹³kẹsiẹye wọ ke ta vwẹ obaro rẹ Ọrovwohwo rẹ Ọghẹnẹ na, Ẹkẹn rẹ emu ọfuanfon na rẹ hẹ uwevwi mẹ mi si ayen no nure, ọ rọ ma rho Me je vwọ kẹ ohwo ri Livae na, vẹ ọrhorha na, ọmọphrorivwi na, kugbe ayeuku, kirobo rẹ urhi wo ji kẹ vwẹ epha; Me chọ urhi wẹn ọvuọvo-o ayen je chọrọ ovwẹ ẹro-o;

¹⁴ọke ri mi vwo muoma phihọ Me sa re vwẹ ẹkẹnhwe wẹn na-a, Me je vwẹ ijẹfuọn mẹ reyọ ọvuọvo no-o, Me je vwẹ ọvuọvo rọye gọ iye kẹ orivwi-i; mi nyo urhuru rẹ Ọrovwohwo rẹ Ọghẹnẹ mẹ, ọtiobo ri wo ji iji kẹ vwẹ eriyin mi ruru.

¹⁵Gba dia ẹdia ọfuanfon wẹn na de ni otọ nẹ obo odjuvwu rhe, rere wo bruphihọ kẹ Izrẹl rẹ ihwo wẹn vẹ otọ re wọ vwọ kẹ avwanre na, kirobo wo veri kẹ esẹ rẹ avwanre otọ rọ djẹ ọkẹre rẹ ameivie vẹ ọnyọn.

¹⁶Nonẹ na ẹdẹ rẹ Ọrovwohwo rẹ Ọghẹnẹ wẹn ji urhi kẹ wẹ nẹ wọ yọnrọn iji vẹ ẹgha nana; vwẹ ọtiọye na wọ Me jomaotọ rere wọ vwẹ udu wẹn ejobi vẹ ẹnwẹn wẹn ejobi ru ayen.

¹⁷Wo ghwoghwo phia nonẹ na kpahe Ọrovwohwo nẹ ọye Ọghẹnẹ wẹn, nẹ wọ yan phihọ idjerhe rọye, re wọ yọnrọn iji rọye, vẹ irhi rọye, kugbe ẹgha rọye, wo ji mu ọghọ kẹ urhuru rọye;

¹⁸Ọrovwohwo ji ghwoghwo phia kpahe owẹ nonẹ na nẹ wọwẹ kẹ ihwo rẹ obọ rọye, kirobo ro ve phihọ otọ kẹ wẹ, rere wọ yọnrọn irhi rọye ejobi,

¹⁹re ọ vwọ kparo wẹ kpenu nọ ẹgborho rọ mare na ejobi, vwẹ evun rẹ ejiro vwẹ evun rẹ usi kugbe evun rẹ ọghọ, rere wọ vwọ dia ihwo efuanfon kẹ Ọrovwohwo rẹ Ọghẹnẹ wẹn na, kirobo ro tare na.