Read urhobo Urhi Rivẹ 27 Bible Online

Urhi Rivẹ 27 - urhobo bible

Urhi Rivẹ 27

¹Kọye Mosis vẹ ekpako rẹ Izrẹl ki ji urhi kẹ ihwo na, tanẹ, Wa yọnrọn urhi ri mi ji kẹ ovwan nonẹ na.

²Ẹdẹ rẹ ovwan wan Jọdan vrẹn kpo otọ rẹ Ọrovwohwo rẹ Ọghẹnẹ rẹ ovwan kẹ ovwan na, wa Me reyọ elalọ ride vwo vi, a Me vwẹ ọda vwọ rharọ ayen;

³we mi si eta rẹ urhi nana phihọ enu rayen, vwẹ ọke rẹ ovwan da yanran ra ro otọ rẹ Ọrovwohwo rẹ Ọghẹnẹ vwọ kẹ ovwan na, otọ rọ djẹ ọkẹre rẹ ameivie kugbe ọnyọn kirobo rẹ Ọrovwohwo rẹ Ọghẹnẹ rẹ esẹ rẹ ovwan, ve phihọ kẹ ovwan.

⁴Ọke rẹ ovwan da wan Jọdan vrẹn nu, ovwan Me vwẹ elalọ nana vi, kirobo mi ji urhi kẹ ovwan nonẹ na, vwẹ Ugbenu rẹ Ebal a Me vwẹ ọda vwọ rharọ ayen.

⁵Etiyin wa da so agbada rẹ Ọrovwohwo rẹ Ọghẹnẹ rẹ ovwan, agbada rẹ elalọ; ovwan kpare emu kemu rẹ utehru vwọ teyọ aye-en.

⁶Elalọ re sheri-i ọye wa vwọ so agbada rẹ Ọrovwohwo rẹ Ọghẹnẹ rẹ ovwan na; ovwan Me dia enu rọye de ze izobo rẹ ẹtorhẹ kẹ Ọrovwohwo rẹ Ọghẹnẹ rẹ ovwan na;

⁷ku wo ze izobo rẹ ufuoma, wọ Me je re emu vwẹ Etiyin; wọ Me ghọghọ vwẹ obaro rẹ Ọrovwohwo rẹ Ọghẹnẹ wẹn na.

⁸Wo mi si eta rẹ urhi nana ejobi phihọ enu rẹ elalọ na gbonozẹ.

⁹Etiyin Mosis vẹ irherẹn ri Livae na da ta kẹ Izrẹl ejobi nẹ, We fotovwi ru we nyo, E Izrẹl: nonẹ na ovwan rhe dia ihwo rẹ Ọrovwohwo rẹ Ọghẹnẹ rẹ ovwan na re.

¹⁰Vwẹ ọtiọye na we gbe nyo urhuru rẹ Ọrovwohwo rẹ Ọghẹnẹ rẹ ovwan na, yọnrọn irhi vẹ iji rọye, ri mi ji kẹ ovwan nonẹ na.

¹¹Mosis da ta kẹ ihwo na vwẹ ẹdẹ yena ọvuọvo na tanẹ,

¹²Ọke rẹ ovwan da wan Jọdan na vrẹn nu, ihwo nana Simiọn, Livae, Juda, Isaka, Josẹf, vi Bẹnjamin mi mudia vwẹ enu rẹ Ugbenu ri Gerizim re ayen nẹ ẹrhovwo kẹ ihwo na.

¹³Ihwo nana ki rhe mudia enu rẹ Ugbenu rẹ Ebal ri duvwi iyori Rubẹn, Gad, Asha, Zẹbulọn, Dan, kugbe Naftali.

¹⁴Ihwo ri Livae Me vwẹ urhuru ọgangan ghwoghwo kẹ eshare rẹ Izrẹl ejobi.

¹⁵Ekan dia kẹ ohwo rọ kare oma eyẹ ohwo rọ ma oma ọye ẹgua kẹ Ọrovwohwo na, emu rẹ ọwena kare, re mu phihọ odjahọ, Ihwo na ejobi Me kpahe tanẹ, Isẹ.

¹⁶Ekan kẹ ohwo ro mu ọghọ kẹ ọsẹ eyẹ oni rọye-e. Ihwo na ejobi Me kpahe tanẹ, Isẹ.

¹⁷Ekan kẹ ohwo rọ kpare ughwru rẹ ọrivẹ rọye. Ihwo na ejobi Me kpahe tanẹ, Isẹ.

¹⁸Ekan kẹ ohwo ro sun orhuẹro ghwru vwẹ idjerhe. Ihwo na ejobi Me kpahe tanẹ, Isẹ.

¹⁹Ekan kẹ ohwo rọ rhẹriẹ ase rẹ ọrhorha, ọ rẹ ọmophrorivwi kugbe ayeuku. Ihwo na ejobi Me kpahe tanẹ, Isẹ.

²⁰Ekan kẹ ohwo ro nene aye rẹ ọsẹ rọye ruemu, kidie yọ mrẹ ẹba rẹ aye rẹ ọsẹ rọye nure. Ihwo na ejobi Me kpahe tanẹ, Isẹ.

²¹Ekan kẹ ohwo ro nene eranvwe keranvwe ruemu. Ihwo na ejobi Me kpahe tanẹ, Isẹ.

²²Ekan kẹ ohwo ro nene oniọvo rọye rẹ ọmọtẹ ruemu, owenẹ ọ dia ọmọtẹ rẹ ọsẹ rọye eyẹ ọmọtẹ rẹ oni rọye. Ihwo na ejobi Me kpahe tanẹ, Isẹ.

²³Ekan kẹ ohwo ro nene oniaye rọye ruemu. Ihwo na ejobi Me kpahe tanẹ, Isẹ.

²⁴Ekan kẹ ohwo ro hwe ọrivẹ rọye vwẹ odjahọ. Ihwo na ejobi Me kpahe tanẹ, Isẹ.

²⁵Ekan kẹ ohwo rọ re udi vwo hwe ọvwata. Ihwo na ejobi Me kpahe tanẹ, Isẹ.

²⁶Ekan kẹ ohwo ro ru eta rẹ urhi nana gan rọ da yọnrọn aye-en. Ihwo na ejobi Me kpahe tanẹ, Isẹ.