Read urhobo Urhi Rivẹ 28 Bible Online

Urhi Rivẹ 28 - urhobo bible

Urhi Rivẹ 28

¹Rẹ ọ da dianẹ ovwan nyo urhuru rẹ Ọrovwohwo rẹ Ọghẹnẹ rẹ ovwan na, wa da nabọ yọnrọn irhi rọye ejobi ri mi ji kẹ ovwan nonẹ na, Ọrovwohwo rẹ Ọghẹnẹ rẹ ovwan no kọ kpare ovwan kpenu nọ ẹgborho rẹ akpọ na ejobi.

²Ebruba nana ejobi ki bru ovwan rhe rhe vwa ovwan, ọ da dianẹ ovwan nyo urhuru rẹ Ọrovwohwo rẹ Ọghẹnẹ rẹ ovwan na.

³Kẹ ovwan dia ihwo rẹ ebruba kẹ vwẹ evun rẹ orere na, ovwan ke je dia ihwo re ebruba kẹ vwẹ evun rẹ aghwa.

⁴Ke bruba kẹ emamọ rẹ oma rẹ ovwan ke ji bruba kẹ emamọ rẹ otọ rẹ ovwan, kugbe emọ rẹ eranvwe rẹ ovwan, ebuo rẹ uchuru rẹ ovwan, kugbe emọ rẹ igegede rẹ ovwan.

⁵Ebruba kọ dia kẹ obere rẹ ovwan kugbe odo ri wo vwo duvwu eka.

⁶Ebruba kẹ wẹ vwẹ ọke wọ da ro otafe kugbe ọke wọ da ro uwevwi.

⁷Ọrovwohwo ko ru ivwighrẹ rẹ ovwan re vwọ so wẹ ejobi she; ayen cha wan idjerhe ọvo bru ovwan rhe ayen ke djẹ wan idjerhe ighwrẹ kpo.

⁸Ọrovwohwo che phi ebruphihọ rọye phihọ erhu rẹ ovwan kugbe emu kemu ejobi rẹ ovwan vwẹ obọ te ko bruba kẹ ovwan vwẹ evun rẹ otọ rẹ Ọrovwohwo rẹ Ọghẹnẹ rẹ ovwan kẹ ovwan na.

⁹Ọrovwohwo cha vwẹ ovwan mu ihwo efuanfon kẹ oma rọye, kirobo ro ve kẹ ovwan, ọ da dianẹ ovwan yọnrọn irhi rẹ Ọrovwohwo rẹ Ọghẹnẹ rẹ ovwan ro da yan vwi idjerhe rọye.

¹⁰Ihwo rẹ akpọ na ejobi ke mrẹ nẹ a vwẹ odẹ rẹ Ọrovwohwo se ovwan; oshọ rẹ ovwan ko mu ayen.

¹¹Ọrovwohwo ko ru oyouvwe rẹ ovwan bu phihọ, vwẹ emamọ rẹ oma rẹ ovwan, vẹ emamọ rẹ uchuru rẹ ovwan, kugbe emamọ rẹ otọ rẹ ovwan vwẹ evun rẹ otọ rẹ Ọrovwohwo na veri kẹ esẹ rẹ ovwan nẹ ọye vwọ kẹ ovwan na.

¹²Ọrovwohwo ko rhie ẹchẹ rẹ ughwẹ rẹ odjuvwu na kẹ ovwan, kọ rhọ osio phihọ otọ rẹ ovwan vwẹ ọke rọye o mi ji bruba kẹ iruo rẹ abọ rẹ ovwan; ovwan ki momo kẹ ẹgborho buebu, ẹkẹvuọvo ovwan che momo mie ohwo-o.

¹³Ọrovwohwo ko ru ovwan vwọ dia uyovwi, ọ gbe dia urhurhuvwu-u; ovwan ke rho kpo enuenu, ovwan gbi kpotọ-ọ; ọ da dianẹ ovwan mu ọghọ kẹ irhi rẹ Ọrovwohwo rẹ Ọghẹnẹ rẹ ovwan na, ri mi ji kẹ ovwan nonẹ na, wa nabọ vwẹ ẹro te otọ ru ayen,

¹⁴re ovwan rhe kuoma rhẹriẹ nẹ eta ri mi ji urhi kẹ ovwan nonẹ na-a, vwọ yan kpo obọrhẹ eyẹ obohwerẹ, vwo nene edjọ efa vwọ gan aye-en.

¹⁵Ẹkẹvuọvo ọ da dianẹ ovwan rhe nyo urhuru rẹ Ọrovwohwo rẹ Ọghẹnẹ rẹ ovwan na eyẹ vwẹ oma kpotọ vwọ yọnrọn irhi rọye ejobi vẹ ẹgha rọye ri mi ji urhi rọye kẹ ovwan nonẹ na-a, ekan nana ejobi ki bru ovwan rhe ke je vwa ovwan.

¹⁶Ekan dia kẹ ovwan vwẹ evun rẹ orere, ekan je dia kẹ ovwan vwẹ evun rẹ aghwa.

¹⁷Ekan kẹ obere rẹ ovwan ji kugbe odo ru we vwo duvwu eka.

¹⁸Ekan kẹ emamọ rẹ oma rẹ ovwan ji kugbe emamọ rẹ otọ rẹ ovwan, ebuo rẹ uchuru rẹ ovwan, kugbe emọ rẹ igegede rẹ ovwan.

¹⁹Ekan kẹ ovwan vwẹ ọke wa da ro uwevwi kugbe ọke wa da ro otafe.

²⁰Ọrovwohwo kọ vwẹ ekan, te ozighi kugbe oma ẹlaghọ rhe enu rẹ emu kemu rẹ ovwan ruẹ ejobi, bẹsiẹ rẹ ovwan vwọ ghwọrọ phrẹphrẹphrẹ, vwi fiki rẹ uruemu omiomiovwi rẹ ovwan, fikiridie ovwan sen vwẹ.

²¹Ọrovwohwo kọ vwẹ emiavwe rẹ ughwu mu ovwan bẹsiẹ rọ vwọ guọghọ ovwan nẹ otọ rẹ ovwan ra dia na.

²²Ọrovwohwo kọ vwẹ ofe vẹ ekpahe rode, irhue rọ vwọre, omaerhorhọn, kugbe oheri rẹ erhanre, kugbe ekpakpọ kugbe uvo hare hare kugbe itutu; kẹ ayen vwọ tua wẹ bẹsiẹ wọ vwọ ghwọrọ.

²³Irharheghe rẹ ovwan na ki hirhe phihọ ẹronvwo, otọ ro obotọ rẹ ovwan na ki hirhe phihọ utehru.

²⁴Ọrovwohwo che hirhe osio rẹ otọ rẹ ovwan na phihọ iwurhie vẹ ekpẹn, kọ rhọ nẹ enu rhe phihọ ovwan bẹsiẹ rẹ ovwan vwọ ghwọrọ kufia.

²⁵Ọrovwohwo kọ nẹrhẹ ivwighrẹ rẹ ovwan phi ovwan kparobọ; ovwan da vwọ so ayen vwẹ idjerhe ọvo, idjerhe ighwrẹ kọye ovwan djẹ wan kpo; ovwan ke dia utuoma kẹ ivie rẹ akpọ na ejobi.

²⁶Irivwi rẹ ovwan ke dia emuọre kẹ emephran rẹ irharheghe na, je kẹ eranvwe rẹ akpọ na; ohwo ro guegue ayen re da djẹ gbe dia-a.

²⁷Ọrovwohwo na cha vwẹ irubẹ rẹ Ijipt, kugbe ikpera vẹ okpe kugbe okpọ, rẹ ovwan se sivwi-i vwo mu ovwan.

²⁸Ọrovwohwo cha vwẹ orhuẹ vẹ aruerhuo kugbe ibeghe rẹ iroro teyọ ovwan;

²⁹kẹ ovwan dia akparhurhu vwẹ ọghẹruvo, kerẹ esẹ rẹ orhuẹro a yan bribri, ovwan gbi vwo oyouvwe vwẹ idjerhe rẹ ovwa-an; ke shenyẹ ovwan ke ji cho ovwan kọke kọke, ohwo rọ chọ ovwan uko gbe dia-a.

³⁰Wọ cha sa aye phihọ otọ, ohwo ọfa Me reyọ mie we; wọ cha bọn uwevwi, ye wọ cha dia evun rọye-e; wọ cha kọn ogba ri vain, yẹ wọ cha ria emamọ rọye-e.

³¹E che hwe erhuẹn wẹn vwẹ irharo wẹn, yo wọ cha riọ-ọ; e che fru ekẹtẹkẹtẹ reyọ vwẹ irharo wẹn yẹ e vwo rhivwi rhe we-e; a cha vwẹ igegede wẹn kẹ ivwighrẹ wẹn, yẹ a cha mrẹ ohwo rọ chọ wẹ-ẹ.

³²A cha vwẹ emeshare wẹn vẹ emetẹ wẹn kẹ ihwo efa, yẹ ẹro wẹ di nẹ ye oma di ro we ye wo se ru emu ọvuọvo-o; ẹgba rẹ obọ wẹn sa daji-i.

³³Ẹgborho ru wo vugherei-i cha re emamọ rẹ otọ wẹn vẹ owia rọ wọ wianre ejobi; ke shenyẹ wẹ guọghọ owẹ te otọ kọke kọke;

³⁴ughe rẹ ẹro wẹn cha mrẹ cha nẹrhẹ owẹ mwa orhuẹ.

³⁵Ọrovwohwo cha vwẹ irubẹ mu we iwurho awọ vẹ ivuawọ re je se sivwo, nẹ ẹhẹrhowọ wẹn re te ekpehruyovwi wẹn.

³⁶Ọrovwohwo cha reyọ ovwan, vẹ ovie re vwo mu vwẹ enu rẹ ovwan na, vwo rhe ẹgborho re te owẹ te esẹ wẹn je riẹn dẹvo-o; Etiyin wọ da ga edjọ, e rẹ urhe vẹ e re elalọ.

³⁷Ku wo hirhe phihọ utuoma vẹ isẹ, kugbe ehwẹjẹ, vwẹ uherevie rẹ ihwo na ejobi rẹ asan rẹ Ọrovwohwo che sun we ra na.

³⁸Wọ cha vwẹ ekankọn ibuebu voro udju wẹn, emerha wọ cha mrẹ vun; kidie ebaka cha ghwọro.

³⁹Wọ cha kọn ogba ri vain wọ Me rhuẹrẹ ayen, ẹkẹvuọvo wọ cha da wain na-a wo je cha kọrọ grep na koko-o, kidie ihori cha re ayen.

⁴⁰Wo che vwo irhe rẹ oliv vwẹ ubrakpọ wẹn na soso, ẹkẹvuọvo ye wọ sa mrẹ ori rọye vwo ghworo oma re ovwa-an; kidie ọfa cha ruo.

⁴¹Wo che vwiẹ emetẹ vẹ emeshare, ẹkẹvuọvo e cha dia ewẹ-ẹn; kidie ayen cha yan ro imu.

⁴²Ebaka cha re irhe re ovwan vẹ emamọ rẹ otọ rẹ ovwan ejobi.

⁴³Ọrhorha rọ uherevie rẹ ovwan cha rho kpenu ji ovwan vwo; yẹ ototọ kọye wa cha ra.

⁴⁴O che momo kẹ ovwan, yu ovwan se momo kẹ-ẹ; ọ cha dia uyovwi, kọ wọ cha dia urhurhuvwun.

⁴⁵Ekan nana ejobi ki che bru ovwan rhe ke vwa ovwan, bẹsiẹ wọ vwọ ghwọrọ, fikiridie ovwan nyo urhuru rẹ Ọrovwohwo rẹ Ọghẹnẹ ovwan, ro ovwan da yọnrọn irhi vẹ ẹgha rọye ro ji kẹ ovwan na-a.

⁴⁶Ke dia oka vẹ igbunu vwẹ enu ovwan, kugbe enu rẹ uvwiẹ rẹ ovwan bẹdẹ.

⁴⁷Fikiridie ovwan vwẹ aghọghọ vẹ omavwerhe vwẹ udu ga Ọrovwohwo rẹ Ọghẹnẹ rẹ ovwan na-a, vwẹ oma rẹ ebuo rẹ emu na ejobi,

⁴⁸ku wa cha ga ivwighrẹ rẹ ovwan rẹ Ọrovwohwo che ji nẹ i mu kpahe ovwan, vwẹ owẹvwe vẹ urhuru rẹ ame, vwẹ ẹbẹba, vẹ ọkarovwe ri kemu kemu ejobi, ko che phi urhekpe rẹ utehru phihọ ohọre rẹ ovwan, bẹsiẹ rọ vwọ ghwọrọ ovwan nu.

⁴⁹Ọrovwohwo cha reyọ ẹgborho ọfa nẹ ogboko rhe ri mu kpahe ovwan, nẹ oba rẹ akpọ na rhe kpata kpata kerẹ ugo rọ rhan, ẹgborho ro wa riẹn ephẹrẹ rọye-e

⁵⁰ẹgborho ro si opharo phihọ, ro nẹ aro rẹ ọkpako-o ọ je kerhọn rẹ egheie-e

⁵¹ọ cha re emọ rẹ uchuru rẹ ovwan kugbe emamọ rẹ otọ rẹ ovwan, bẹsiẹ ra vwọ ghwọrọ ovwan nu; o ji che je eka, vi wain, kugbe evwri vwọ kẹ ovwa-an, ebuo rẹ uchuru rẹ ovwan eyẹ emọ rẹ igegede rẹ ovwan bẹsiẹ rẹ ayen vwọ nẹrhẹ owẹ ghwọrọ.

⁵²Ayen cha yariẹ irere rẹ ovwan ejobi phihọ bẹsiẹ rẹ igbẹhẹn rẹ ovwan rẹ gangan ri gro kpenu, rẹ ovwan vwẹ ẹro so na rhi vwo she te otọ vwẹ asan na ejobi; ayen cha gba yariẹ irho re hẹ otọ rẹ ovwan na ejobi họ, rẹ Ọrovwohwo rẹ Ọghẹnẹ rẹ ovwan kẹ ovwan na.

⁵³Kọ wọ cha re emọ rẹ ovwan, uvwo rẹ emeshare vẹ uvwo rẹ emetẹ rẹ ovwan keye wa cha re, e rẹ Ọrovwohwo rẹ Ọghẹnẹ rẹ ovwan kẹ ovwan na, vwẹ ẹgbariariẹ kugbe ukpokpogho rẹ ivwighrẹ rẹ ovwan che vwo kpokpo ovwan.

⁵⁴Ọshare ra pẹpẹre ra nabọ ghẹre vwẹ uherevie rẹ ovwan na che vwo urhuru kẹ oniọvo rọye, eriyin o ji vwo urhuru kẹ aye rẹ obọ rọye, o ji vwo urhuru kẹ ubrevwiẹ rọye ro chekọ.

⁵⁵Ọ gbe cha vwẹ uvwo rẹ emọ rọye rọ ria na kẹ ọvuọvo vwẹ usun raye-en, kidie o gbi vwo ọfa ro chekọ kẹ-ẹ, vwẹ ẹgbariariẹ vẹ ukpokpogho rẹ ovweghrẹ rẹ ovwan cha vwọ kẹ ovwan vwẹ irho rẹ ovwan na ejobi;

⁵⁶Aye ra pẹpẹre ra nabọ ghẹrẹ vwẹ uherevie rẹ ovwan sa cha vwẹ ẹhẹrhowọ rọye chiyi otọ na-a fikiridie ọ pha ghenghẹnghẹn nọnọhọ, o che vwo urhuru kẹ ọshare rẹ obọ rọye na, o che vwo urhuru kẹ ọmọshare vẹ ọmọtẹ rọye,

⁵⁷ubrevwiẹ rọye kugbe emọ rọye ro vwiẹri, kidie ọ cha bẹbẹ re ayen, fiki rẹ ọkarovwẹ re emu ejobi, vwẹ ẹgbariariẹ vẹ ukpokpogho rẹ ovweghrẹ rẹ ovwan cha vwọ kẹ ovwan vwẹ irho rẹ ovwan na.

⁵⁸Ọ da dianẹ ovwan rha jomaotọ dẹndẹn vwọ yọnrọn eta rẹ urhi nana re si phihọ ọbe nana-a rẹ ovwan da djẹ oshọ rẹ odẹ rẹ urinrin ro mu oshọ na, Ọrovwohwo Ọghẹnẹ rẹ ovwan na-a;

⁵⁹Ọrovwohwo rẹ Ọghẹnẹ rẹ ovwan na kọ ghwa emiavwe ọgangan rhe ovwan vẹ emọ rẹ ovwan, emiavwe rọ da ovwan gangan ro ji krotọ, vẹ ọga ro mu oshọ ro ji krotọ.

⁶⁰Kọ rhoma ghwa emiavwe rẹ Ijipt bru ovwan rhe, e re udu rayen bru ovwan na; ayen ki che mu ovwan.

⁶¹Oga koga, kugbe emiavwe kemiavwe re si phihọ ọbe rẹ urhi na-a, Ọrovwohwo cha ghwa ayen bru ovwan rhe bẹsiẹ ra vwọ ghwọrọ ovwan nu.

⁶²Owenẹ ovwan vwo bu kerẹ isio rẹ obenu na, emerha tutuno krẹ ri che chekọ kẹ ovwan, fikiridie ovwan kerhọn rẹ urhuru rẹ Ọrovwohwo rẹ Ọghẹnẹ rẹ ovwan na-a.

⁶³Kirobo ro je Ọrovwohwo ro vwo ru ovwan yovwi bu phihọ na, eriyin o ji je Ọrovwohwo ro vwo si emiovwo rhe ovwan rọ vwọ ghwọrọ ovwan, kọ djẹ ovwan kufia nẹ otọ rẹ ovwan ra dia na.

⁶⁴Ọrovwohwo kọ hra ovwan ro uherevie rẹ ihwo na ejobi, nẹ oba rẹ akpọ na re te oba rẹ ivẹ; oboyi wọ da ga edjọ, edjọ rẹ irhe vẹ e rẹ elalọ e rẹ ovwan vẹ esẹ rẹ ovwan riẹnre-e.

⁶⁵Oma che se fu ovwan vwẹ ohri rẹ ẹgborho nana-a, urovwoma je sa dia kẹ ẹhẹrhowọ rẹ ovwa-an, ẹkẹvuọvo Ọrovwohwo cha vwẹ ofianvwe kẹ ovwan, kugbe ibiaro idjedje, vẹ ẹnwẹn ọphapharhe;

⁶⁶arhọ rẹ ovwan kọ dia gedegede vwẹ ẹro rẹ ovwan; te ason te uvo oshọ vwo mu ovwan, arhọ rẹ ovwan gbi se mu ovwan ẹro-o.

⁶⁷Kẹ ovwan cha ta vwẹ urhiọke nẹ, Manẹ ọ dia ovwọnvwọn! ovwọnvwọn wọ Me rha ta nẹ, Manẹ ọ dia urhiọke! vwi fiki rẹ oshọ ro che mu udu rẹ ovwan na, kugbe obo rẹ ibiẹro rẹ ovwan cha mrẹ.

⁶⁸Ọrovwohwo cha rhoma vwẹ ekọ ghwẹ ovwan kpo Ijipt, oyan ri mi veri nẹ ovwan gbe yan ọfa-a; ovwan ke dia Etiyin shẹ oma rẹ ovwan eviẹn rẹ eshare vẹ e rẹ eya kẹ ivwighrẹ rẹ ovwan, yẹ a mrẹ ohwo rọ dẹ ovwa-an.