Read urhobo Urhi Rivẹ 29 Bible Online

Urhi Rivẹ 29 - urhobo bible

Urhi Rivẹ 29

¹Enana eta rẹ ọphọ na rẹ Ọrovwohwo vwọ kẹ Mosis nẹ o nene ihwo rẹ Izrẹl re vwẹ otọ ri Moab, vwọ ba ọphọronene ayen re vwi Horẹb.

²Mosis de se Izrẹl ejobi koko ọ da ta kẹ ayen nẹ, Ovwan mrẹ obo rẹ Ọrovwohwo ruru vwẹ irharo rẹ ovwan vwẹ otọ rẹ Ijipt vwọ ki Fero vẹ idibo rọye ejobi kugbe otọ rọye ejobi,

³edavwini ride na rẹ ẹro rẹ ovwan mrẹre na, eka vẹ imu igbunu ride yena;

⁴ẹkẹvuọvo rhi te nonẹ na Ọrovwohwo je kẹ ovwan iroro re vwo vughe-e, eyẹ ibiẹro ra vwọ mrẹ-ẹ, eyẹ erhọn re vwo nyo-o.

⁵Mi sun ovwan ẹgbukpe ujuvẹ vwẹ evun rẹ aghwa na; emwa rẹ ovwan bẹrẹ dje ovwan oma-a, ephiẹ rẹ ovwan je ghwọrọ dje ovwan awọ-ọ;

⁶ovwan re ikara-a, ovwan da wain eyẹ udi ọgangan-an rere ovwan vwọ riẹn nẹ mẹvwẹ Ọrovwohwo Ọghẹnẹ rẹ ovwan na.

⁷Rẹ ovwan rhi vwo te etinẹ, Sihọn ovie ri Hẹshbọn kugbe Ọg ovie ri Bashan da rhe họnre ovwan, ẹkẹvuọvo avwanre de hwe ayen;

⁸avwanre reyọ otọ rayen, a da vwọ ke ihwo ri Rubẹn vẹ ihwo ri Gad, kugbe abọvo rẹ orua ri Manasse nẹ ayen vwọ riuku.

⁹Vwẹ ọtiọye na gba jomaotọ wọ yọnrọn eta rẹ ọphọ nana, rere emu rẹ ovwan ru ejobi vwọ yovwi kẹ ovwan.

¹⁰Ovwan ejobi mudia vwẹ obaro rẹ Ọrovwohwo rẹ Ọghẹnẹ rẹ ovwan nonẹ na rẹ Igbuyovwi rẹ uvwiẹ rẹ ovwan, ekpako rẹ ovwan, kugbe inotu rẹ ovwan, vẹ eshare rẹ Izrẹl ejobi,

¹¹imitete rẹ ovwan, te eya rẹ ovwan, vẹ ọrhorha re hẹ erhọn rẹ ovwan, itu ri she irhe kẹ ovwan kugbe iri vo ame kẹ ovwan,

¹²rere wa ra re ọphọ rẹ Ọrovwohwo Ọghẹnẹ rẹ ovwan na, ọ rẹ Ọrovwohwo Ọghẹnẹ rẹ ovwan na nene ovwan re nonẹ na;

¹³rere ọ vwẹ ovwan mu ihwo rọye nonẹ na, rere ọ je vwọ dia Ọghẹnẹ kẹ ovwan, kirobo ro veri kẹ ovwan, ro ji ve kẹ esẹ rẹ ovwan, kẹ Ebraham, kẹ Aizik, je kẹ Jekọp.

¹⁴Ọ dia ovwanvwan ọvo mi nene re ọphọ na-a,

¹⁵ẹkẹvuọvo ji kugbe ohwo rọ vẹ ovwan gbe etinẹ vwẹ obaro rẹ Ọrovwohwo Ọghẹnẹ nonẹ na-a kugbe ohwo rọ vẹ avwanre gbe mudia.

¹⁶Wa riẹn obo rẹ avwanre dia otọ rẹ Ijipt te vẹ obo rẹ avwanre yan vwẹ ohri rẹ ẹgborho na vrẹn e re ovwan wan vrẹn na,

¹⁷wa mrẹ imu ẹgua rayen ri tuoma na, ema rayen rẹ irhe vẹ e re elalọ, iri idọnọ vẹ iri iro, re hẹ uherevie rayen.

¹⁸Wa kẹnoma eyẹ a da rhe mrẹ ọshare eyẹ aye eyẹ orua eyẹ uvwiẹ ọvo, rẹ udu rọye kurhẹriẹ jẹ Ọrovwohwo Ọghẹnẹ rẹ avwanre vwo nonẹ na ra ga edjọ rẹ ẹgborho yena; eyẹ a da rhe mrẹ ọvo rọ mọ omamọ ro vwo obi kugbe omamọ ro muenu vwẹ uherevie rẹ ovwan,

¹⁹ohwo ọvo ro nyo eta rẹ ọphọ nana ra rere na rọ bẹbẹ nẹ ẹrhovwo vwẹ udu rọye nẹ, Owenẹ Me yan nene obo rẹ udu mẹ guọnọre dede, emu ọvuọvo se ru vwe-e. Ọnana kọye cha ghwa ehwerhe kuẹfia rẹ odjidjiro vẹ ọyaya rhe.

²⁰Ọrovwohwo rhe se vwo ghovwo-o, ukpe rẹ evworhovwo ophu vẹ omẹriọ rẹ Ọrovwohwo ko guvwie nene ohwo yena, ekan re siri phihọ ọbe nana na ki bro ra, Ọrovwohwo ko phoro odẹ rọye nẹ otọ rẹ odjuvwu na.

²¹Ọrovwohwo kọ sanọ nẹ uvwiẹ rẹ Izrẹl na vwọ kẹ uyovwiemiovwo, kirobo re ekan rẹ ọphọ na re siri phihọ ọbe rẹ urhi na epha,

²²Ji kugbe edje rọ cha, emọ wẹn re cha vwẹ obuko wẹn kugbe ọrhorha ro nẹ isiorho rhe, cha ta, vwẹ ọke rẹ ayen da mrẹ ukpokpogho rẹ otọ na kugbe emiavwe rẹ Ọrovwohwo cha vwọ họnre otọ na,

²³osio rẹ ibieragha rẹ erhanre ve isọn ọnre ke rhọ phihọ otọ na ejobi, kugbe otuanto re torhẹ kufia ejobi, asan ro shaton, re voro-o, ro di ẹbe-e ra torhẹ muotọ kiri Sodọm vi Gomora, Adma vi Ziboim, rẹ Ọrovwohwo vwẹ ophu rọye vwọ ghwọrọ kufia na,

²⁴uyota, ẹgborho na ejobi ke cha tanẹ, Die nẹrhẹ Ọrovwohwo ru otọ nana ọtiọna? Die ghwa ogidi rẹ ophu rode nana rhe?

²⁵Ihwo ke ta nẹ, Fiki rẹ obo rẹ ayen vwọ sen ọphọ rẹ Ọrovwohwo Ọghẹnẹ rẹ esẹ rayen na, ro nene ayen re vwẹ ọke ro vwo si ayen nẹ otọ rẹ Ijipt rhe,

²⁶ayen da yan ra ga edjọ ayen de shiguẹ kẹ ayen, edjọ rẹ ayen riẹnre-e ra ghare te aye-en;

²⁷fiki rẹ ọtiọye na ophu rẹ Ọrovwohwo vwọ la nene otọ nana rọ vwọ ghwa ekan re siri phihọ ọbe nana ejobi phihọ enu rọye na;

²⁸Ọrovwohwo da vwẹ ophu ri kpregede kugbe ivuemiovwo ghwie ayen notọ, re mu teyọ otọ ọfa, kirobo rọ hẹ epha nonẹ na.

²⁹Imu re djahere ejobi e rẹ Ọrovwohwo rẹ Ọghẹnẹ rẹ avwanre; ẹkẹvuọvo imu ra vwọ phia na ke rha ọ rẹ avwanre vẹ emọ rẹ avwanre bẹdẹ, rere avwanre vwọ yọnrọn eta rẹ urhi nana.