Read urhobo Urhi Rivẹ 30 Bible Online

Urhi Rivẹ 30 - urhobo bible

Urhi Rivẹ 30

¹Ọke rẹ imu nana ejobi de bru ovwan rhe re, ebruba vẹ ekan, re mi phihọ obaro rẹ ovwan na, ovwan Me karohọ ayen vwẹ ohri rẹ ẹgborho vwẹ asan rẹ Ọrovwohwo rẹ Ọghẹnẹ djẹ ovwan ra na,

²ovwan vẹ emọ rẹ ovwan gbe rhivwi bru Ọrovwohwo rẹ Ọghẹnẹ rẹ ovwan we de nyo urhuru rọye vwi kemu kemu ejobi ri mi ji urhi rọye kẹ ovwan nonẹ na, vwẹ udu rẹ ovwan ejobi ji kugbe ẹnwẹn rẹ ovwan ejobi;

³kẹsiẹye Ọrovwohwo rẹ Ọghẹnẹ rẹ ovwan kọ vwẹ erhuvwu rẹ ovwan rhivwi rhe o mi ni arodọvwẹ rẹ ovwan, ohri rẹ ihwo rọ hra ovwan ra jovwo na o mi rhe koko ovwan nẹ oboyi rhe.

⁴Ọ da dianẹ ihwo ra djẹ kufia vwẹ usun rẹ ovwan na hẹ obo etan rẹ odjuvwu dede, Ọrovwohwo Ọghẹnẹ rẹ ovwan na cha ghwẹ ayen koko rhe, ọ cha reyọ ovwan nẹ oboyi rhe,

⁵Ọrovwohwo Ọghẹnẹ rẹ ovwan na cha reyọ ovwan rhe otọ rẹ esẹ rẹ ovwan diare na, rere ovwan vwọ mrasan dia; ko ru ovwan yovwi ku we bu nọ esẹ rẹ ovwan.

⁶Ọrovwohwo Ọghẹnẹ rẹ ovwan kọ yanvwe udu rẹ ovwan kugbe udu rẹ emọ rẹ ovwan, rere ovwan vwọ reyọ udu rẹ ovwan ejobi guọnọ Ọrovwohwo rẹ Ọghẹnẹ rẹ ovwan kugbe ẹnwẹn rẹ ovwan ejobi, re ovwan vwọ mrasan rhọ.

⁷Yẹ Ọrovwohwo Ọghẹnẹ rẹ ovwan na ko phi ekan nana phihọ enu rẹ ivwighrẹ rẹ ovwan ri mu kpahe ovwan.

⁸Ko wọ rhoma nyo urhuru rẹ Ọrovwohwo ku wọ yọnrọn irhi rọye ejobi ro ji kẹ ovwan nonẹ na.

⁹Ọrovwohwo rẹ Ọghẹnẹ rẹ ovwan kọ nẹrhẹ iruo rẹ obọ rẹ ovwan ejobi yovwi vwẹ emamọ rẹ oma rẹ ovwan vẹ emamọ rẹ uchuru rẹ ovwan, kugbe emamọ rẹ otọ rẹ ovwan; kidie Ọrovwohwo cha vwẹ oma avwerhe ruẹ ovwan yovwẹ, kirobo ro vwo avwerhe vwẹ oma rẹ esẹ rẹ ovwan,

¹⁰ọ da dianẹ we nyo urhuru rẹ Ọrovwohwo Ọghẹnẹ rẹ ovwan na, vwọ yọnrọn irhi vẹ ẹgha rọye re siri phihọ evun rẹ ọbe rẹ urhi nana, ọ da dianẹ we kurhẹriẹ bru Ọrovwohwo Ọghẹnẹ rẹ ovwan, vwẹ udu rẹ ovwan ejobi ji kugbe ẹnwẹn rẹ ovwan ejobi.

¹¹Kidie urhi nana mi ji kẹ ovwan nonẹ na gan kẹ ovwa-an, o ji sheri nọ-ọ.

¹²Ọ dia odjuvwu ọ epha-a, ro wọ da ta nẹ, Ko no yeri kpo odjuvwu kẹ avwanre ra reyọ rhe avwanre, rere avwanre nyo vwo ruo?

¹³Ọ je dia obo ovrẹn rẹ abadi ọ epha-a, ro wọ da tanẹ, Ko no gua urhie na vrẹn kẹ avwanre, ra reyọ rhe avwanre, rere avwanre vwo nyo vwo ruo?

¹⁴Ẹkẹvuọvo ota na kẹre ovwan gangan; ọ hẹ evun rẹ unu rẹ ovwan ọ je evun rẹ udu rẹ ovwan, rere ovwan vwo ruo.

¹⁵Nighe, mi phihọ vwẹ obaro rẹ ovwan nonẹ na arhọ vẹ emuesiri, ughwu kugbe umiovwo.

¹⁶Ọ da dianẹ wọ kerhọ rẹ irhi rẹ Ọrovwohwo Ọghẹnẹ rẹ ovwan ri mi ji kẹ ovwan nonẹ na, vwọ guọnọ Ọrovwohwo Ọghẹnẹ rẹ ovwan, vwọ yan phihọ idjerhe rọye, ji vwọ yọnrọn irhi rọye vẹ ẹgha rọye ji kugbe iji rọye, kẹsiẹye wọ ke rhọ wo ki ji bu phihọ, Ọrovwohwo rẹ Ọghẹnẹ rẹ ovwan ko bruba kẹ ovwan vwẹ evun rẹ otọ rẹ ovwan ra dia na.

¹⁷Ẹkẹvuọvo udu rẹ ovwan de kurhẹriẹ ghwru, rẹ ovwan gbi nyo-o, ẹkẹvuọvo e de si ovwan ghwru ra gọ edjọ efa wa da ga ayen,

¹⁸mi ghwoghwo kẹ ovwan nonẹ na, nẹ we ghwu kufia; wa gbe sa tọn vwẹ evun rẹ otọ re wa wan Jọdan vrẹn ra dia na-a,

¹⁹Mi se odjuvwu vẹ akpọ vwo se oseri hwe ovwan nonẹ na, nẹ mi phi arhọ vẹ ughwu, ebruba vẹ ekan phihọ obaro rẹ ovwan, vwẹ ọtiọye na jẹn arhọ, rere ovwan vẹ uvwiẹ rẹ ovwan mrasan rhọ,

²⁰vwọ guọnọ Ọrovwohwo Ọghẹnẹ, kerhọ rẹ urhuru rọye wọ je gba oma wẹn muo kidie, ọye vwẹ arhọ kugbe ẹdẹ ogrogro kẹ ovwan, re wọ sa dia otọ rẹ Ọrovwohwo veri kẹ esẹ rẹ ovwan, kẹ Ebraham kẹ Aizik, kugbe Jekọp, nẹ ọye vwọ kẹ ayen.