Read urhobo Urhi Rivẹ 31 Bible Online

Urhi Rivẹ 31 - urhobo bible

Urhi Rivẹ 31

¹Mosis de dje eta nana ẹtẹta kẹ Izrẹl ejobi,

²Ọ da ta kẹ ayen, Nonẹ na mi te ohwo rẹ ẹgbukpe ujosan re; Me gbe sa yanrhe yankpo-o. Ọrovwohwo ta kẹ vwẹ nure nẹ, Wọ cha wan Jọdan vrẹ-ẹn.

³Ekpuyovwi rẹ Ọrovwohwo Ọghẹnẹ rẹ ovwan na ọvo cha karọ kẹ wẹ wan vrẹn, ọ Me ghwọrọ ẹgborho nana vwẹ aro rẹ ovwan, re wọ vwọ dia ẹdia rayen; Joshua kọye sun ovwan vrẹn, kirobo rẹ Ọrovwohwo tare.

⁴Ọrovwohwo ko ru ayen kirobo ro ru Sihọn vẹ Ọg, ivie rẹ ihwo rẹ Amọr, o ji ru kẹ otọ rayen, ọke rọ vwọ ghwọrọ ayen.

⁵Ọrovwohwo kọ cha vwẹ ayen kẹ ovwan, ku we ru ayen kirobo rẹ irhi ri mi ji kẹ wẹ na ejobi epha.

⁶Wọ Me gan oma wo vwo udu, wọ djẹ oshọ-ọ eyẹ wọ je ro ẹnwan raye-en; kidie Ọrovwohwo Ọghẹnẹ rẹ ovwan yi nene ovwan yan; ọ sa phiẹn wẹ-ẹ ọ jẹ sen wẹ-ẹ.

⁷Kẹsiẹye Mosis ki se Joshua, ọ da vuẹ vwẹ aro rẹ Izrẹl ejobi. Wọ Me gan oma wo vwo udu; kidie wo che nene ihwo nana kpo otọ rẹ Ọrovwohwo veri kẹ ese rayen nẹ ọye vwọ kẹ ayen; wo mi phi ayen phihọ ughwẹ rọye.

⁸Ọrovwohwo na cha karọ kẹ wẹ ra; o nene uwe dia, ọ sa phiẹn we-e ọ jẹ sen wẹ-ẹ, wọ djẹ oshọ-ọ wo guegue-e.

⁹Mosis ki si urhi nana, ọ da vwọ kẹ irherẹn rẹ emọ ri Livae na, re ghwa ekpeti rẹ ọphọ rẹ Ọrovwohwo na, kugbe ekpako rẹ Izrẹl ejobi.

¹⁰Mosis ki ji urhi kẹ ayen, vwẹ oba rẹ ẹgbukpe ighwrẹ ejobi, Vwẹ oba rẹ ukpe rẹ esiobọno vwẹ orẹ rẹ egarivi na,

¹¹ọke rẹ Izrẹl ejobi da vwẹ oma phia vwẹ obaro rẹ Ọrovwohwo rẹ Ọghẹnẹ rẹ ovwan vwẹ asan rọ cha sanọ reyọ na, wo che se urhi nana vwẹ aro rẹ Izrẹl ejobi re ayen nyo.

¹²Koko ihwo na, eshare, vẹ eya, kugbe imitete, vẹ erhorha re hẹ irere rẹ ovwan, re ayen nyo vwo yono obo ra djẹ oshọ rẹ Ọrovwohwo rẹ Ọghẹnẹ rẹ ovwan, nabọ ru eta rẹ urhi nana,

¹³rere emọ rayen, re je riẹ-ẹn vwọ mrasan nyo vwo yono obo ra dje oshọ rẹ Ọrovwohwo rẹ Ọghẹnẹ rẹ ovwan, ọtiobo rẹ ovwan dia otọ na krite rẹ ovwan wan Jọdan vrẹn ra dia na.

¹⁴Ọrovwohwo kọ vuẹ Mosis, Nighe, ẹdẹ rẹ ughwu wẹn sikẹrẹ re, se Joshua, re wọ vwẹ oma wẹn nẹ vwẹ evun rẹ utughẹ ra da vwa oma na, rere Me kẹ ogangan. Mosis vi Joshua da yanran ra vwẹ oma rayen phia vwẹ utughẹ ra da vwa oma na.

¹⁵Ọrovwohwo da vwẹ oma phia vwẹ evun rẹ utughẹ vwẹ evun rẹ egho ro mu kpenu; egho ro mu kpenu na de mudia kerẹ ẹchẹ rẹ utughẹ na.

¹⁶Ọrovwohwo ke vuẹ Mosis, Nighe, wo che ghwu bru ihwo wẹn; ihwo nana ki che bibi ra gọ edjọ rẹ otọ na, asan rẹ ayen vẹ ihwo na de yenri kugbe, ayen ke cha sen vwẹ ayen ki miovwi ọphọ mẹ re Me vẹ ayen rere na.

¹⁷Ophu mẹ kọ la kpahe ayen vwẹ ẹdẹ yena, ke Me sen ki mi si opharo mẹ nu kẹ ayen, ka ghwọrọ ayen; emiovwo vẹ ukpokpogho buebu ki bru ayen ra, eriyin na ayen ke ta vwẹ ẹdẹ yena, Ọ dianẹ emiovwo nana bru avwanre rhe fikirobo rẹ Ọrovwohwo gbe hẹ uherevie rẹ avwanre-e.

¹⁸Ki mi ghine si opharo mẹ nu kẹ ayen vwẹ ẹdẹ yena fiki rẹ umwemwu na ejobi rẹ ayen ruru na, kidie ayen rhẹriẹ bru edjọ ra.

¹⁹Fiki rẹ ọtiọye na gbe si une nana wo vwo yono ihwo rẹ Izrẹl, phio phihọ unu rayen, rere une nana vwo dia oseri mẹ kpahe ihwo rẹ Izrẹl.

²⁰Kidie Me vwọ reyọ ayen rhe otọ rẹ djẹ ọkẹre vẹ ameivie vẹ ọnyọn na, ọ ri mi veri nẹ Me vwọ kẹ esẹ rayen, ayen rere evun vwọ vọn ayen oma da ro ayen, kẹ ayen che nene edjọ ayen ke ga ayen, re ayen da sen vwẹ miovwo ọphọ mẹ.

²¹Ọke rẹ ukpokpogho vẹ emiovwo buebu de bru ayen rhe re, une nana kọ dia kẹ ayen kerẹ oseri (kidie ọ cha dia ẹbẹrunu rẹ uvwiẹ rayen ro de jẹ ayen ẹchọrọ); kidie Me riẹn oghẹre rẹ iroro rẹ ayen roro nure, tavwe Me ke reyọ ayen rhe otọ ri mi veri nẹ Me vwọ kẹ na.

²²Ọye Mosis de si une nana vwẹ ẹdẹ ọvo na, vwo yono ihwo rẹ Izrẹl.

²³Ọrovwohwo da vwẹ ogangan ki Joshua ọmọ ri Nun, ọ da ta kẹ nẹ, Wọ Me gan oma wo vwo udu; kidie wọ cha reyọ emọ rẹ Izrẹl kpo otọ ri mi veri nẹ Me vwọ kẹ ayen na; mi nene uwe dia.

²⁴Ri Mosis vwo si eta rẹ urhi nana phihọ evun rẹ ọbe nu re te oba rọye,

²⁵Mosis de ji urhi kẹ ihwo ri Livae re ghwa ekpeti rẹ ọphọ rẹ Ọrovwohwo na,

²⁶Reyọ ọbe nana rẹ urhi na, wa vwọ kẹre ekpeti rẹ ọphọ rẹ Ọrovwohwo Ọghẹnẹ rẹ ovwan, rere ọ dia oseri kpahe ovwan vwẹ Etiyin.

²⁷Kidie Me riẹn obo rẹ ovwan gan udu te obo rẹ ovwan je dia ihwo ebẹbẹn te; nighe, Asakiephana Me vẹ ovwan vwọ herọ Me je vwọ nwẹn na, ovwan je ghwa gan udu kpahe Ọrovwohwo nonẹ na; komavo ọ gan te mi de ghwu nu!

²⁸Koko ekpako rẹ uvwiẹ rẹ ovwan ejobi kẹ vwẹ, kugbe isun rẹ ovwan, rere Me ta eta nana phihọ erhọn rayen mi ji se odjuvwu vẹ akpọ vwọ dia oseri hwe ayen.

²⁹Kidie Me riẹnre nẹ mi de ghwu nu omuẹro nẹ ovwan che miovwo oma gangan, ovwan da rhẹriẹ nẹ idierhe re Me vuẹ ovwan na; evun rẹ ẹdẹ yena ukpokpoma ko she tẹyo ovwan, fikiridie ovwan che ru umwemwu vwẹ obaro rẹ Ọrovwohwo vwọ nẹrhẹ phihọ ophu fiki rẹ iruo rẹ abọ rẹ ovwan.

³⁰Kẹsiẹye Mosis ke ta eta rẹ une nana bẹsiẹ ri vwo re, rẹ ukoko rẹ Izrẹl ejobi nyo.