Read urhobo Urhi Rivẹ 32 Bible Online

Urhi Rivẹ 32 - urhobo bible

Urhi Rivẹ 32

¹Wa kerhọ, E idjuvwu, re Me ta; jẹn akpọ na nyo eta rẹ ugbunu mẹ.

²Jẹn uyono mẹ sun rhe kerẹ osio ota mẹ bru ighorigho kerẹ evwru, kerẹ eghwẹghwẹ rẹ osio ro tue kuẹ odi ọboba kugbe eghwẹghwẹ vwẹ enu rẹ ẹbe.

³Kidie mi che ghwoghwo odẹ rẹ Ọrovwohwo. Vwẹ ọrho kẹ Ọghẹnẹ rẹ avwanre.

⁴Oragha na, iruo rọye gbare; kidie idjerhe rọye ejobi ọsoso. Ọghẹnẹ rẹ uyota ro vwo umwemwu-u, ọvwata vẹ ohwo ọsoso o ruẹ.

⁵Ayen nenire yeri miomiovwi, ayen gbe dia emọ rọye ọfa-a fiki rẹ ekan rayen; ayen edje iwuwurhu gẹgẹre.

⁶Kenẹ wọ hwa osa kẹ Ọrovwohwo, ovwan ihwo ughẹghẹn ri jẹ iroro evwo na! Ọ dia ọsẹ rẹ ovwan o ruẹ, rọ ma ovwan, rọ ma ovwan nu rọ da vwẹ ovwan mudia!

⁷Karohọ ẹdẹ rẹ awanre, roro ikpe rẹ edje buebu na nọ vwẹ obọ rẹ ọsẹ wẹn, ro dje kẹ wẹ; nọ ekpako wẹn, ayen ta kẹ wẹ.

⁸Ọke rẹ Ọro Me Kpenu ejobi vwọ kẹ ẹgborho na ejobi ukuẹriọ rayen nu, rọ vwọ hẹriẹ emọ rẹ ihwo nu, o de gberi ughwru kẹ ihwo na, kirobo rẹ unu rẹ emọ rẹ Ọghẹnẹ bute.

⁹Kidie ẹkẹn rẹ Ọrovwohwo ọye ihwo rọye, Jekọp ọye ẹkẹn uku rọye.

¹⁰Ọ mrẹrẹ vwẹ evun rẹ aton asan ro shaton vwẹ evun rẹ aghwa; ọ gba ogba riariẹ phihọ, ọ sẹro rọye, ọ vwẹ ẹro te kerẹ ọmọẹro rọye.

¹¹Kerẹ ugo ro tuẹ ẹho rọye, ro tuetue iphoro rọye vwẹ enu rẹ emọ rọye, rọ bẹrẹ ibekpe rọye, vwo mu ayen, o mu ayen phihọ uwurho re ibekpe rọye.

¹²Ọrovwohwo ọvo suro, edjọ vwẹ oma ba-a.

¹³O ruro rọ da djẹ vwẹ asan ro kpenu rẹ akpọ na, ọ da re emamọ rẹ aghwa na; o ruro fiọnfiọn ọnyọn ro nẹ oragha na rhe, kugbe evwri nẹ oragha gangan na rhe.

¹⁴Ameivie orhierhi rẹ ẹvwe, kugbe ameivie ro nẹ igegede rhe kugbe ivwri rẹ emọ rẹ igegede vẹ egbo, uchuru ri Bashan kugbe ẹvwe kugbe eka ri Me yovwi ejobi vwẹ evun rẹ ọbara ri otie wọ da da wain

¹⁵Ẹkẹvuọvo oma ro Jeshurun, ọ da sare; oma rẹ ovwan da rho phihọ, oma da ghwọrọ ovwan; ọ da sen Ọghẹnẹ rọ maro, ọ da vwẹ Oragha rẹ esivwo rọye jehwẹ

¹⁶Ayen da nẹrhẹ ọ rioma kpahe edjọ; ẹgua rayen gberi da nẹrhẹ ophu muo.

¹⁷Ayen ze izobo kẹ idẹbono re dia edjọ-ọ na, vwọ kẹ edjọ rẹ ayen jẹn riẹ-ẹn, vwọ kẹ edjọ kpopko re rhere na, e re esẹ rẹ ovwan djẹ oshọ kẹ na-a.

¹⁸Wa davwe erhọn rẹ Oragha ro vwiẹ ovwan na-a, Ọghẹnẹ ro vwiẹ ovwan na da chọrọ ovwan ẹro.

¹⁹Ọrovwohwo mrẹre, ọ da sen ayen, fiki rẹ ophu ẹrhariẹn rẹ emeshare vẹ emetẹ rọye.

²⁰Ọ da tanẹ, Mi si opharo mẹ nu kẹ ayen, Me cha mrẹ obo rẹ oba rayen cha dia, kidie edje ogugunu ayen ruẹ, emọ rẹ uyota hẹ evun raye-en.

²¹Ayen nẹrhẹ Me rioma kpahe obo rọ dia ọghẹnẹ-ẹ ayen vwẹ ẹdjọ rayen kpare ovwẹ ophu, Eriyin na ke Me kpare ayen ẹnwẹn vwọ rioma kpahe otu re dia ihwo-o; Me vwẹ ẹgborho oghẹghẹ vwọ kpare ayen ophu.

²²Kidie ophu mẹ koko erhanre phihọ nure, ọ cha torhẹ ọ rọ hẹ evun re obo Erivwi. ọ cha ghwọrọ akpọ vẹ ebuo rọye ejobi, ko phi erhanre phihọ uchivwo rẹ igbenu ejobi.

²³Ki mi kru oghwa rẹ umiovwo kpahe ayen Ke Me ghwọrọ edada mẹ phihọ enu rayen,

²⁴Owẹvwẹ hwe ayen kufia, oheri kọ torhẹ ayen hwe kugbe obi ọdjadja; ki mi ji ibiako re eranvwe re djoma bru ayen rhe, vẹ obi re imu ri kpono vwẹ otọ na.

²⁵Vwẹ uphephẹ kẹ ọlọkọ nyavwe ayen oshọẹdjẹ kọ dia ivun na, rọ guọghọ imighele rẹ eshare vẹ ọmọtobẹ, te ọmọ ri viẹ evie kugbe ọmare.

²⁶Ke Me a ta nẹ, Me cha hra ayen shesheri, mi ru rere ihwo vwo jẹn ayen ẹkarohọ,

²⁷Ọ dianẹ Me djẹ oshọ rẹ ophu ẹrhanriẹ rẹ ivwighrẹ-ẹ, manẹ otu rẹ ukọn rayen brorhiẹ chọ, ayen da rha ta nẹ, Avwanre kparobọ, ọ dia Ọrovwohwo ri ru ọnana-a.

²⁸Kidie ayen ẹgborho ri vwo ẹghwanre-e ẹriẹn ọvuọvo-o hẹ evun raye-en.

²⁹Ọ dianẹ ayen ghwanre nọ, manẹ ayen riẹn Ọnana, yẹ ayen vughe oba rẹ akpọ rayen.

³⁰Mavọ ohwo ọvo ru djẹ uriori, ihwo ivẹ da sa nẹrhẹ uriori ihwe djẹ, jokpa nẹ Oragha rayen shẹ ayen, rẹ Ọrovwohwo na da sen ayen?

³¹Kidie oragha rayen họhọ Oragha rẹ avwanre-e, owenẹ ivwighrẹ rẹ avwanre dia ibrorhiẹ dede.

³²Kidie vain rayen nẹ vain ri Sodọm rhe, o ji nẹ aghwa ri Gomora rhe; otie rayen otie rọ vwo obi, ẹrhẹghẹ rayen yara.

³³Wain rayen obi rẹ erọdekọ, kugbe obi umwemwu rẹ ọrobiebi.

³⁴Ọ dia omẹvwẹ e si Ọnana nu kẹ-ẹ, gbinẹ ka tarọgbe vwẹ ẹvun rẹ ughwẹ mẹ?

³⁵Ihri ẹriọ ọmẹ mẹvwẹ re hwa osa ọke rẹ owọ rayen da ghworiẹ kidie ẹdẹ rẹ okpetu rayen sikẹre re, ughwu rayen cha kpregede.

³⁶Kidie Ọrovwohwo che brorhiẹ kẹ ihwo rọye ro de ni arodovwẹ rẹ idibo rọye, ọke rọ da mrẹ nẹ ogangan rayen reri, nẹ ọvuọvo gbi chekọ-ọ, te ọviẹn vẹ ọmuvwiẹ dede.

³⁷Kẹsiẹye ọ ke ta, Tivọ edjọ rayen epha, oragha rẹ ayen da djahe na,

³⁸ono re ivwri rẹ izobo rayen na, ono da wain rẹ izobo rẹ ẹda rayen na? Gbe jẹn ayen vrẹn rere ayen chọ wẹ, gbe jẹn ayen sẹro wẹ!

³⁹Gba mrẹ nẹ Mẹvwẹ, mẹvwẹ vẹ ekpuyovwi mẹ ọye, ọye ọghẹnẹ ọfa gbe herọ chọ vwẹ ra-a. Mi se hwe mi ji sivwi rhọ; Me sa woma mi mi ji se hworo kpo; ọ ro se sivwẹ nẹ obọ mẹ herọ-ọ.

⁴⁰Me kpare obọ mẹ kpenu, vwo se iyori, Kirobo Me herọ bẹdẹ na

⁴¹ọ da dianẹ Me nọ ọlọkọ mẹ ro lo na, rẹ obọ mẹ da yọnrọn orhiebro, ki mi che ru ivwighrẹ mẹ keri, ke Me cha hwa osa kẹ iri mu kpahe ovwẹ.

⁴²Ki mi ru edada mẹ re da da ọbara vọn evun. ọlọkọ mẹ kọ cha re uvwo ọ Me je da ọbara rẹ otu re hweri kugbe ighuvwu, ẹto igrogro rẹ uyovwi rẹ ovweghrẹ na.

⁴³We jiri ihwo rọye, ovwan ẹgborho na; fikiridie ọ choja rẹ ọbara rẹ idibo rọye ọ da re ihri vwẹ enu rẹ ivwighrẹ rọye ra vwọ rhuẹrẹ arhuẹrẹ kẹ otọ rẹ ihwo rọye.

⁴⁴Mosis de rhe se eta rẹ une nana phihọ erhọn rẹ ihwo na, ọ vẹ Joshua ọmọ ri Nun.

⁴⁵Ri Mosis vwo se eta nana kẹ Izrẹl ejobi,

⁴⁶ọ da ta kẹ ayen nẹ, Ovwan Me karohọ eta ejobi ri mi ji urhi kẹ ovwan nonẹ na, rere we ji ayen kẹ emọ rẹ ovwan, rere ayen vwo ru dẹndẹn vwọ yọnrọn eta rẹ urhi nana.

⁴⁷Kidie ọ dia emu ọphapharhe kẹ ovwa-an, ẹkẹvuọvo ọye arhọ rẹ ovwan, oma rọye ovwan wan dia otọ na krekri rẹ ovwan wan Jọdan vrẹn, ra dia na.

⁴⁸Ọrovwohwo da ta kẹ Mosis vwẹ ẹdẹ yena,

⁴⁹Yeri kpo ugbenu nana rẹ Abarim na, Ugbenu ri Nebo, rọ hẹ otọ ri Moab na, ro hirhe aro ku Jeriko; re wo ni otọ ri Kenan, ọ re Me vwọ kẹ ihwo rẹ Izrẹl nẹ e dia na;

⁵⁰ku wo ghwu vwẹ enu rẹ ugbenu ri wo yeri ra na, ka ghwẹ wẹ se kugbe ihwe wẹn, kirobo rẹ Erọn rẹ oniọvo wẹn ghwuru vwẹ ugbenu ri Họr ra da ghwa re kugbe ihwo rọye;

⁵¹fikiridie wọ chọ urhi mẹ vwẹ ohri rẹ ihwo ri Izrẹl vwẹ asan ame ri Meribatka-desh, vwẹ aghwa ri Zin; kidie wo mu ọghọ kẹ vwẹ fuanfon vwẹ ohri rẹ ihwo rẹ Izrẹl na-a.

⁵²Wọ sa mrẹ otọ rọ hẹ obaro wẹn na; ẹkẹvuọvo wọ cha sa ra, ra rọ evun rẹ otọ re Me vwọ kẹ ihwo rẹ Izrẹl na-a.