Read urhobo Urhi Rivẹ 33 Bible Online

Urhi Rivẹ 33 - urhobo bible

Urhi Rivẹ 33

¹Ọnana ẹrhovwo ri Mosis rẹ ohwo rẹ Ọghẹnẹ nẹ kẹ emọ rẹ Izrẹl tavwe ro ki ghwu.

²Ọ da ta, Ọrovwohwo nẹ Sinae rhe, ọ da bẹre mu avwanre vwi Sia; o lo nẹ ugbenu ri Peran rhe, o nẹ obọ rẹ ihwo efuanfon uriori ihwe rhe, vẹ erhanre rọ la vwẹ obọrhe rọye.

³Uyota, ọ guọnọ ihwo rọye; otu re vwo ve kẹ na ejobi e hẹ obọ rọye; eriyin ayen vwo nene ichiyi rọye, vwọ reyọ isuesun nẹ obọ rọye rhe

⁴ọke ri Mosis vwo ji urhi kẹ avwanre, kerẹ ughwẹ kẹ ukoko ri Jekọp

⁵Eriyin Ọrovwohwo dia ovie vwi Jeshurun, vwẹ asan re de si igbuyovwi na koko rẹ uvwiẹ rẹ Izrẹl ejobi de koko.

⁶Ji Rubẹn rhọ e jo ghwẹ-ẹ e jẹn ihwo rọye havwa-an,

⁷Enẹ ọ ta kpahe Juda; Nyo, E Ọrovwohwo, urhuru ri Juda reyọ vwo bru ihwo rọye rhe. Vwẹ abọ wẹn họnre vwọ kẹ wọ dia ukọn kẹ ivwighrẹ rọye.

⁸Vwọ kpahe Livae, ọ da ta, Reyọ Agbragha wẹn ke Livae, wọ vwẹ Ute wẹn vwọ kẹ ohwo esiri na ohwo wọ davwini vwi Masa, ọ rọ vẹ owẹ gbe gbe ozighi vwi Meriba,

⁹ọ rọ ta kpahe ọsẹ vẹ oni rọye nẹ, Me kerhọ raye-en, ọ sen iniọvo rọye, o de chuko ku emọ rọye; Kidie ayen vwẹ ẹro te ota wẹn, ayen da yọnrọn ọphọ wẹn na.

¹⁰Ayen che yono Jekọp iji wẹn, Izrẹl kẹ urhi wẹn; ayen che phi insẹns phihọ obaro wẹn te ọsoso rẹ izobo ra torhẹre phihọ enu rẹ agbada wẹn.

¹¹Bruba kẹ ekuakua rọye, E Ọrovwohwo, wọ reyọ iruo rẹ abọ rọye; guọghọ ehun rẹ ivwighrẹ rọye, rẹ ihwo ri mu kpahọ, rere ayen je vrẹn.

¹²Ọ ta kpahe Bẹnjamin, Avwebọ rẹ Ọrovwohwo na, omafuro rọ vwọ dia kẹrẹ; ọ gba ogba riariẹ phihọ vwẹ ọke ejobi, uherevie rẹ akakọ rọye kọye ọ dia.

¹³Ọ ta kpahe Josẹf nẹ, Ọrovwohwo bruba kẹ otọ rọye, Ọrovwohwo ghwẹ ẹse rẹ obo odjuvwu vọn, kugbe okokodo rọ djẹ vwẹ obo otọ na

¹⁴vẹ omamọ rẹ esiri rẹ otọ rẹ ọnre na vẹ ọriẹmọ rẹ emeranvwe,

¹⁵kugbe emamọ esiri rẹ igbenu rẹ awanre vẹ ebuo re igbenu rẹ itete ri bẹdẹ na

¹⁶vẹ ẹse esiri ejobi rẹ akpọ kugbe ọvọnvọn rọye, kugbe ẹroesiri rẹ ọ rọ dia aghwa na. Jẹn enana ejobi rhe enu rẹ uyovwi ri Josẹf, kugbe enu rẹ erhu rẹ uvie rọ hẹ uyovwi rẹ ohwo rọ dia osun vwẹ ohri rẹ iniọvo rọye.

¹⁷Erhuẹn re otuvwiẹ rọye vwo ẹgba, ighoro rọye kerẹ ighoro rẹ erhuẹn rọ djoma; kọ cha vwẹ ayen djẹ ihwo na, djẹ ayen ejobi, kpo oba rẹ akpọ na, ọtiọye uriori ihwe rẹ Ifrem epha, ọtiọye je uriori ri Manasse.

¹⁸Ọ ta kpahe Zẹbulọn nẹ, Zẹbulọn, ghọghọ vwẹ ọke wọ da ro otafe, vẹ Isaka, vwẹ itughẹ wẹn.

¹⁹Ayen che se ihwo kpo igbenu rayen; oboyi ayen de ze izobo rọ gbare; kidie ayen cha fiọnfiọn emu avwerhe rẹ urhie kugbe efe rọ djahere vwẹ evun rẹ ehavwọ,

²⁰Ọ ta kpahe Gad nẹ, Ebruba kẹ ọ ro ru Gad bu! Gad fiọnko kerẹ okpohrokpo, ọ bẹrẹ abọ ọ Me je bẹrẹ enu rẹ uyovwi rọ hẹ uyovwi.

²¹Ọ sanọ emuesiri rẹ otọ na kẹ oma rọye kidie Etiyin a da sẹro rẹ ẹkẹn rẹ onotu; o de bru igbuyovwi rẹ ihwo na rhe ọ vẹ Izrẹl gba vwẹ irhi na ru iruo kugbe irhi rẹ ọsoso rẹ Ọrovwohwo na.

²²Ọ ta kpahe Dan nẹ, Dan wẹ ọmọ rẹ okpohrokpo, ro pho ni Bashan cha.

²³Ọ ta kpahe Naftali nẹ, Aruesiri vọn wẹn evun E Naftali, wọ vọnre vẹ ebruba rẹ Ọrovwohwo, vwẹ ọkere rẹ ame rẹ obọrhe rẹ ọnre.

²⁴Ọ ta kpahe Asha nẹ, Ebruba te Asha nọ emọ na ejobi; jọ dia avwebọ rẹ iniọvo rọye, ro dje owọ rọye phihọ evwri.

²⁵Utehru vẹ ikọpa yẹ cha dia ogba wẹn; ọtiobo rẹ ẹdẹ wẹn teri, eriyin ẹgba wẹn ji rẹ.

²⁶Ọvuọvo rọ họhọ Ọghẹnẹ herọ-ọ, E Jeshurun, ọ rọ djẹ wan odjuvwu rhe re chọ wẹn uko na, ọ vẹ ọrho rọye da wan enu vrẹn.

²⁷Ọghẹnẹ ri bẹdẹ na ẹdia wẹn, abọ ri bẹdẹ na obotọ wẹn. Ọ da djẹ ọvweghrẹ nẹ obaro wẹn, ọ da ta, Ghwọrọ.

²⁸Ọye Izrẹl da dia egherhẹnẹdẹn, ẹtẹrhe ri Jekọp ọvo, vwẹ otọ rẹ eka vẹ wain; uyota obenu rọye na sun ọphogho cha.

²⁹Wa ghọghọ, E Izrẹl Ono họhọ owẹ, ihwo rẹ Ọrovwohwo sivwiri, ako rẹ ọchuko wẹn, kugbe ọlọkọ rẹ ephiokparobọ wẹn! Ivwighrẹ wẹn yan riariẹ owẹ phihọ ko wo che chiyi ẹdia rayen phihọ otọ.