Read urhobo Urhi Rivẹ 34 Bible Online

Urhi Rivẹ 34 - urhobo bible

Urhi Rivẹ 34

¹Mosis da yan nẹ uphẹphẹ ri Moab vwo kpo ugbenu ri Nebo, kpenu ri Pisga, ro hirhe aro ku Jeriko. Ọrovwohwo da vwẹ otọ na ejobi nẹ ni Giliad re te Dan,

²Naftali ejobi, otọ rẹ Ifrem vi Manasse, otọ ri Juda ejobi re te Abadi rọ obuko ọnre na,

³ubrakpọ ri Nẹgẹb na, kugbe Uphẹphẹ na, rọ dia iyara ri Jeriko orere rẹ iriẹ na, re te Zua.

⁴Ọrovwohwo da ta ke, Ọnana otọ ri mi ve kẹ Ebraham, kẹ Aizik, kugbe Jekọp, Me vwọ kẹ esakpegodi wẹn. Mi ju we vwẹ ibiẹro wẹn mrẹ nure, yẹ ẹkẹvuọvo wọ cha sa wan vrẹn rẹ te oboyi-i.

⁵Kọye rẹ Mosis rẹ odibo rẹ Ọrovwohwo de ghwu vwẹ oboyi vwẹ otọ ri Moab, kirobo rẹ ota rẹ Ọrovwohwo epha.

⁶O de sho phihọ iyara vwẹ otọ ri Moab ro hirhe aro ku Betpeọ; ẹkẹvuọvo rhi te nonẹ na ohwo ọvuọvo riẹn asan ushi rọyee.

⁷Ẹgbukpe ujosa Mosis kpako te ro ki ghwu ẹro rọye djeri-i, oma je rhọ-ọ.

⁸Ọye ihwo rẹ Izrẹl da viẹ Mosis ẹdẹ ọgban vwẹ uphẹphẹ ri Moab; kọye ẹdẹ rẹ oviẹ vẹ uvweri ri Mosis ki rhi re.

⁹Erhi rẹ aghwanre kẹ rhe vọn Joshua rẹ ọmọ ri Nun oma, kidie Mosis da ghwẹ abọ rọye kpahọ uyovwi; eriyin re ihwo rẹ Izrẹl de nyo ota rọye, kirobo rẹ Ọrovwohwo ji urhi kẹ Mosis.

¹⁰Nẹ ọke yena rhe a gbe mrẹ ọmraro rọ họhọ Mosis vwẹ Izrẹl na-a, ohwo rẹ Ọrovwohwo vẹ ọye gba vwẹ opharo mrẹ ohwohwo na,

¹¹ọfa rẹ Ọrovwohwo vwẹ eka vẹ igbunu kẹ nẹ o ru vwẹ otọ ri Ijipt kerẹ ọye herọ-ọ, ro ru ki Fero vẹ idibo rọye ejobi kugbe otọ rẹ Ijipt ejobi,

¹²ji te fiki rẹ ogangan rẹ ọrho ejobi kugbe iruo ride ri muoshọ ejobi ri Mosis ruru vwe aro re Izrẹl ejobi.