Read urhobo Urhi Rivẹ 4 Bible Online

Urhi Rivẹ 4 - urhobo bible

Urhi Rivẹ 4

¹Asakiephana, E Izrẹl, wa kerhọ rẹ irhi vẹ iji, ri mi yono ovwan, rere we ru ayen; re wa mrasan rhọ, rere wa ra dia otọ rẹ Ọrovwohwo Ọghẹnẹ rẹ esẹ rẹ ovwan vwọ kẹ ovwan na.

²We brẹ ba ota ri mi ji iji kẹ ovwan na-a we ji siẹno-o, rere wa yọnrọn irhi rẹ Ọrovwohwo Ọghẹnẹ rẹ ovwan na ri mi jiji rayen kẹ ovwan.

³Ibiẹro rẹ ovwan mrẹ obo rẹ Ọrovwohwo ru vwi Baal-peọr; kidie ihwo ri nene Baal ri Peọr ejobi, Ọrovwohwo Ọghẹnẹ rẹ ovwan da guọghọ ayen nẹ uherevie rẹ ovwan.

⁴Ẹkẹvuọvo ovwan ejobi re gbanọ Ọrovwohwo Ọghẹnẹ rẹ ovwan na je herọ rhi te nonẹ na.

⁵Nighe, mi yono ovwan irhi kugbe iji nure, kirobo rẹ Ọrovwohwo Ọghẹnẹ mẹ jiji kẹ vwẹ na, rere wa mrasan ru ayen vwẹ evun rẹ otọ re wa ra dia na.

⁶Wa yọnrọn ayen re we ru ayen; kidie ẹyọnrọn rayen ẹriẹn vẹ aghwanre kẹ ovwan vwẹ obaro rẹ ihwo na, ihwo ri nyo irhi nana ejobi ke cha ta nẹ, Ọ muẹro ẹgborho rode nana ihwo ghwanghwanre re riẹnre.

⁷Ki didi ẹgborho rode ọfa herọ ri vwo ọghẹnẹ ro bi gba ayen, kirobo rẹ Ọrovwohwo Ọghẹnẹ rẹ avwanre epha na ro de nyo ọke ejobi rẹ avwanre vwo se?

⁸Didi ẹgborho rode ọfa herọ, ri vwo irhi vẹ iji ri Shehọ kerẹ urhi nana, ri mi phihọ obaro rẹ ovwan nonẹ na?

⁹Wọ Me jomaotọ, vwẹ ẹro re ẹnwẹn wẹn dẹndẹn, obo rẹ ẹro wẹn mrẹre da rha chọre owẹ ẹro, ri de nẹ udu wẹn vwẹ ẹdẹ rẹ akpọ wẹn ejobi; ẹkẹvuọvo wo mi jẹ emọ wẹn kugbe emọ rẹ emọ wẹn riẹn ayen;

¹⁰ẹdẹ wo vwo mudia vwẹ obaro rẹ Ọrovwohwo Ọghẹnẹ wẹn vwẹ obi Horẹb na, ọke rẹ Ọrovwohwo vwọ ta kẹ vwẹ nẹ, Koko ihwo na kẹ vwẹ, re mi ru ayen re ayen nyo eta mẹ na ejobi, re ayen mrasa vwo yono oshẹdjẹ vwẹ ẹdẹ rẹ ayen dia akpọ na krire, rere ayen vwọ mrasa yono emọ rayen.

¹¹We de si kẹrẹ we de mudia obotọ rẹ ugbenu na, ugbenu na de mu la vẹ erhanre kpenu phelephele, ọ vẹ ebri, vẹ egho kugbe ebri rode gangan.

¹²Kọye Ọrovwohwo da ta ota nẹ evun rẹ erhanre na kẹ ovwan; we nyo urhuru rẹ ota na, ẹkẹvuọvo wa mrẹ uhoho ọvuọvo-o; jokpa rẹ urhurhu na ọvo we nyori.

¹³O de ghwoghwo ọphọ rọye kẹ ovwan. O ro jiji kẹ ovwan nẹ we ru gba, mrẹmrẹ kẹ irhi ihwe na; O de si ayen phihọ enu rẹ ẹbẹre rẹ oragha ivẹ

¹⁴Ọrovwohwo da ta kẹ vwẹ vwẹ ọke yena nẹ mi yono ovwan irhi vẹ iji, rere we vwo ru ayen vwẹ evun rẹ otọ re wa wan vrẹn ra dia na.

¹⁵Wa nabọ joma rẹ ovwan otọ gangan. Kidie wa mrẹ oghẹre rẹ uhoho ọvuọvo vwẹ ẹdẹ rẹ Ọrovwohwo ta ota kẹ ovwan vwi Horẹb vwẹ evun rẹ ogidi erhanre na-a;

¹⁶we de miovwi oma rẹ ovwan, wa da rha kanre ẹdjọ re họhọ uhoho rẹ ọshare eyẹ ọ rẹ aye,

¹⁷uhoho rẹ eranvwe keranvwe rọ akpọ na, uhoho rẹ ọphra kọphra rọ vwẹ ibekpe rhan vwẹ obenu,

¹⁸uhoho rẹ ema kema ri kpono vwẹ otọ, uhoho rẹ eri keri rọ hẹ evun re ame vwẹ otọ rẹ akpọ na.

¹⁹Jomaotọ wa da rhe kpare opharo rẹ ovwan ni enu, rhe mrẹ ọnre vẹ emeranvwe kugbe isio na, kugbe otu rẹ obenu na ejobi, i mi sun ovwan ghwru, we mi shekpotọ kẹ ayen, ga ayen, e rẹ Ọrovwohwo Ọghẹnẹ vwọ kẹ ihwo rẹ akpọ na ejobi.

²⁰Ẹkẹvuọvo Ọrovwohwo reyọ ovwan, o de si ovwan nẹ erhanre rẹ utehru rhe, nẹ Ijipt rhe, rere wa dia ihwo rẹ obọ rọye, kirobo rọ epha nonẹ na.

²¹Ọfa rọye Ọrovwohwo de mu ophu kẹ vwẹ fiki rẹ ovwan, o de duvwu iyori nẹ Me wan Jọdan vrẹ-ẹn, nẹ Me ruẹ otọ esiri yena-a, rẹ Ọrovwohwo Ọghẹnẹ wẹn na kẹ wẹ nẹ wọ riuku rọye na.

²²Kidie na mi se ghwu vwẹ evun rẹ otọ nana, nẹ Me wan vrẹn Jọdan re yere otọ esiri yena-a, ẹkẹvuọvo ovwan cha wanvrẹn ra dia otọ esiri na.

²³Wa Me joma rẹ ovwan otọ, ọphọ rẹ Ọrovwohwo Ọghẹnẹ rẹ ovwan na da rha chọre ovwan ẹro, ọ rẹ ọ vẹ owẹ gba re na, re wọ da rha kanre oma rọ họhọ emu kemu rẹ Ọrovwohwo Ọghẹnẹ wẹn na sẹn kẹ wẹn na.

²⁴Kidie Ọrovwohwo Ọghẹnẹ wẹn na erhanre rọ ghwọrọ emu oruẹ, Ọghẹnẹ ro rioma.

²⁵Ọke wo de rhi vwiẹ emọ kugbe emọ rẹ emọ wẹn re wa da rhe dia otọ na krekri re, we de rhi miovwi omobọ rẹ ovwan re, rhe kanre oma re emu kemu re, we de rhi ru umwemwu vwẹ obaro rẹ Ọrovwohwo Ọghẹnẹ wẹn na, wọ da nẹrhẹ ophu muo.

²⁶Mẹ vwẹ odjuvwu vẹ akpọ se iseri hwe ovwan nonẹ na nẹ, wa cha ghwọrọ tototo nẹ otọ na re wa wan Jọdan vrẹn re yere na; ẹdẹ rẹ ovwan gbi gro vwẹ otọ na-a, ẹkẹvuọvo kẹ wa cha ghwọrọ roro.

²⁷Ọrovwohwo kọ cha hra ovwan phihọ ohri rẹ ihwo, umuchihwo rẹ ovwan keye e che jovwo vwẹ ohri rẹ ẹgborho ra cha djẹ ovwan ra na.

²⁸Kẹ oboyi ovwan da cha ga ẹdjọ rẹ irhe vẹ eragha, iruo rẹ ihwo vwẹ abọ ru, re mrẹ orẹ-ẹ, i ji nyo ẹme-e, i ji re emu-u ri ji nyo ọnrhe-e.

²⁹Ẹkẹvuọvo ovwan da dia oboyi guọnọ Ọrovwohwo Ọghẹnẹ rẹ ovwan, ko wa cha mrẹ, ro wọ da vwẹ udu rẹ ovwan kugbe ẹnwẹn ejobi guọnọ.

³⁰Ọke rẹ ovwan da evun rẹ ukpokpogho rẹ emu nana ejobi de bru ovwan rhire, ku ovwan rhivwi bru Ọrovwohwo Ọghẹnẹ rẹ ovwan na, ke ovwan kerhọ rẹ urhuru rọye;

³¹kidie Ọrovwohwo Ọghẹnẹ rẹ ovwan na Ọghẹnẹ rẹ aruẹdọn; ọ cha sen ovwa-an, ọ je ghwọrọ ovwan, ọphọ rọ nene esẹ wẹn re na sa chọrọ ẹro-o.

³²Kidie gba nekpẹn rẹ ẹdẹ rẹ awanre na, e re hẹ obaro wẹn na, rha wẹ ọke rẹ Ọghẹnẹ vwọ ma ohwo phihọ enu rẹ akpọ na, nẹ abọvo rẹ odjuvwu re te abọ rivẹ, se oghẹre rẹ emu rode ọtiọnana ru vwọ dẹvure, gbenẹ e ji nyo ọ rọ họherọ re?

³³Ihwo ji nyo urhuru rẹ ọghẹnẹ rọ ta ota nẹ ohri rẹ erhanre rhe dẹvure kerẹ ọtiobo wo nyori na, rọ da je rhọ?

³⁴Eyẹ o vwo ọghẹnẹ ọvo rọ sa ra reyọ ẹgborho nẹ ohri rẹ ẹgborho ọfa kẹ omobọ rọye re, ọ da vwẹ edavwini, vẹ eka vẹ imuigbunu, kugbe ofovwi, eye vwẹ obọgangan, vẹ ugbobọ ra riẹn phihọ kugbe oshọ rode na, kerẹ ọtiobo rẹ Ọrovwohwo rẹ Ọghẹnẹ rẹ ovwan ru kẹ ovwan mrẹ vwẹ evun rẹ Ijipt na?

³⁵Wẹwẹ a vwẹ rọ nẹ rere wọ vwọ mrasa riẹn nẹ Ọrovwohwo na ghinẹ Ọghẹnẹ; ọfa herọ vwọ ba-a.

³⁶Ọ nẹrhẹ owẹ nyo urhuru rọye nẹ evun rẹ odjuvwu rhe, rere o vwo se yono ovwan; vwẹ evun rẹ akpọ na wa vwọ mrẹ erhanre rọye rode na, ovwan de nyo eta rọye nẹ uherevie rẹ erhanre rhe.

³⁷Fikiridie ọ guọnọ esẹ rẹ ovwan, kọye ọ vwọ jẹ uvwiẹ rayen reyọ rẹ ayen vwo ghwu nu, ọ da vwẹ opharo rọye ji kugbe ogangan rọye rode na reyọ owẹ phia, nẹ Ijipt rhe;

³⁸ọ vwọ djẹ ẹgborho rọ rho wan ovwan je gan vrẹn ovwan nẹ obaro rẹ ovwan, Ro de phi ovwan phihọ, Ọ vwẹ otọ rayen na kẹ ovwan vwọ riuku, kirobo rọ epha nonẹ na.

³⁹Vwẹ ọtiọye na gba riẹn nonẹ na, wo mi phio phihọ udu wẹn, nẹ Ọrovwohwo na Ọghẹnẹ rọ evun rẹ odjuvwu vẹ enu rẹ akpọ rọ herọ vwẹ obotọ na; ọfa herọ-ọ.

⁴⁰Wọ Me yọnrọn irhi rọye, kugbe iji rọye, e re mi ji iji kẹ wẹn nonẹ na, rere o vwo yovwi kẹ wẹ re o ji vwo yovwi kẹ emọ wẹn re vwo kpahe owẹ, rere ẹdẹ wẹn vwọ mrasan gro vwẹ otọ rẹ Ọrovwohwo Ọghẹnẹ wẹn vwọ kẹ wẹ bẹdẹ.

⁴¹Esiẹye Mosis ke hẹriẹ irere erha vwẹ ovrẹn ri Jọdan rọ hẹ obaro ọnre;

⁴²rere ozighẹ vwọ mrasa djẹ kpo Etiyin, ọ rẹ obọchọre hwe ọrivẹ rọye, ohwo rẹ ivun rọye miovwiro jovwo vwẹ ọke rọ wanre-e; ọ djẹ kpo ọvo vwẹ irere nana na re ọ vwọ rhọ;

⁴³Biza vwẹ evun aton na, vwẹ evun rẹ otọ ro shaton na, vwọ kẹ emọ ri Reubẹn; kugbe Ramọt vwẹ evun ri Giliad, vwọ kẹ emọ ri Gad; kugbe Golan vwi Bashan, vwọ kẹ emọ ri Manasse.

⁴⁴Ọnana urhi ri Mosis phi obaro rẹ emọ rẹ Izrẹl;

⁴⁵enana kẹ iseri, vẹ irhi, kugbe iji, ri Mosis ji kẹ emọ rẹ Izrẹl, rẹ ayen vwo nẹ Ijipt rhe;

⁴⁶ovrẹn ri Jọdan, vwẹ iyara ro nẹ Bẹt-peọr, otọ ri Sihọn rọ dia ovie rẹ ihwo rẹ Amọr rọ dia Hẹshbọn, ohwo ri Mosis vẹ emọ rẹ Izrẹl phi kua na rẹ ayen vwo nẹ Ijipt rhe nu;

⁴⁷ayen da reyọ otọ rọye vwo ru ẹdia rayen, kugbe otọ rẹ Ọg ovie ri Bashan, ivie ivẹ rẹ ihwo rẹ Amọr, e re hẹ ovrẹn ri Jọdan rọ obaro ọnre,

⁴⁸nẹ Aroer, rọ unu rẹ iyara rẹ Anọn na, re te Ugbenu ri Sairiọn iro dia Hammọn,)

⁴⁹ji te Araba rọ hẹ ovrẹn ri Jọdan rẹ hẹ obaro ọnre na ejobi, ji re te abadi rẹ Araba na, rọ obotọ ri Pisga.