Read urhobo Urhi Rivẹ 6 Bible Online

Urhi Rivẹ 6 - urhobo bible

Urhi Rivẹ 6

¹Asakiephana urhi na, vẹ ẹgha, kugbe iji na kẹ ena, e rẹ Ọrovwohwo Ọghẹnẹ rẹ ovwan ta nẹ mi vwo yono ovwan, rere we ru ayen vwẹ otọ rẹ ovwan wan vrẹn re yeri na;

²re wa sa vwọ djẹ oshọ rẹ Ọrovwohwo Ọghẹnẹ rẹ ovwan, vwọ yọnrọn irhi rọye, ri mi jiji kẹ ovwan na, wẹ vẹ ọmọ wẹn, vẹ ọmọ rẹ ọmọ wẹn vwẹ ẹdẹ rẹ akpọ wẹn ejobi; rere wọ vwọ tọn.

³Vwẹ ọtiọye na, Gbe nyo E Izrẹl, wọ karohọ vwo ruo; rere ọ mrasa yovwi kẹ ovwan kugbe rere we vwo bu phihọ ọtiobo rẹ Ọrovwohwo Ọghẹnẹ rẹ esẹ rẹ ovwan ve kẹ ovwan vwẹ otọ rẹ ameivie vẹ ọnyọn da djẹ na.

⁴E nyo, E Izrẹl; Ọrovwohwo Ọghẹnẹ avwanre na Ọrovwohwo ọvuọvo;

⁵wọ Me vwẹ udu wẹn ejobi, vẹ ẹnwẹn wẹn ejobi, kugbe ogangan wẹn ejobi, guọnọ Ọrovwohwo Ọghẹnẹ wẹn.

⁶Eta nana ri mi jiji kẹ wẹ nonẹ na, Me dia evun rẹ udu wẹn;

⁷wọ Me vwẹ ayen yono emọ wẹn, wo mi gbe ikun rayen siẹ wo de tidia vwẹ uwevwi wẹn vẹ ọke ru wọ da yan vwẹ idjerhe, vẹ ọke wọ de shevwerhẹ totọ, kugbe ọke wo de vrẹn.

⁸Wọ Me gba ayen phihọ obo wẹn rọ dia oka, wọ Me gba mu arhare wẹn.

⁹Wọ mi si ayen phihọ edọvi rẹ ẹchẹ rẹ uwevwi wẹn, kugbe enu rẹ anurhoro wẹn.

¹⁰Vwẹ ọke rẹ Ọrovwohwo Ọghẹnẹ wẹn da cha vwẹ owẹ te otọ ro ve kẹ esẹ rẹ ovwan Ebraham vẹ Aizik kugbe Jekọp, nẹ ọye vwọ kẹ ovwan, irere ride vẹ irere iyoyovwi na, e rẹ ovwan bọnre-e na;

¹¹vẹ iwevwi re vọnre vẹ imu esiri e re wọ ghwẹ phihọ na-a, kugbe ẹtẹrhe ra tọnre, i re wọ tọnre-e, egba ri vain vẹ irhe rẹ ọliv, i re wọ kọnre-e, ko wọ cha re evun Me vọn wẹ;

¹²ọke yena wọ Me jomaotọ Ọrovwohwo da rha chọrọ owẹ ẹro, Ọ ro si we nẹ otọ rẹ Ijipt rhe na, nẹ uwevwi rẹ ọviẹn.

¹³Wọ Me djẹ oshọ Ọrovwohwo Ọghẹnẹ wẹn na, ọye wọ cha ga, odẹ rọye wo che vwo ve.

¹⁴We che nene edjọ-ọ, edjọ rẹ ihwo re yariẹ ovwan phihọ na;

¹⁵kidie Ọrovwohwo Ọghẹnẹ wẹn rọ herọ vwẹ uherevie wẹn na Ọghẹnẹ rọ rioma; ọ dia ọtiọye-e ophu rẹ Ọrovwohwo Ọghẹnẹ wẹn da rha tua kpahe owẹ, rọ da ghwọrọ owẹ nẹ otọ rẹ akpọ na.

¹⁶Wa davwẹ Ọrovwohwo Ọghẹnẹ nẹ-ẹ, kirobo rẹ ovwan davwerọ ni vwi Masa.

¹⁷Wa Me vwẹ oma kpotọ yọnrọn irhi rẹ Ọrovwohwo Ọghẹnẹ rẹ ovwan na, vẹ iseri rọye, kugbe ẹgha rọye, i ro ji kẹ ovwan na.

¹⁸Wo mi ru obo ri shehọ ro ji yovwi vwẹ obaro rẹ Ọrovwohwo na; rere o vwo yovwi kẹ wẹ, kugbe rere wọ vwọ sa ra dia otọ rẹ esiri na rẹ Ọrovwohwo ve kẹ esẹ rẹ ovwan na,

¹⁹rọ vwọ djẹ ivwighrẹ wẹn ejobi nẹ obaro wẹn na, ọtiobo rẹ Ọrovwohwo veri.

²⁰Rọ ọmọ wẹn da nọ wẹ vwẹ ẹdẹ rọ cha nẹ, Die otọ rẹ iseri, vẹ ẹgha, kugbe iji nana, e rẹ Ọrovwohwo Ọghẹnẹ rẹ avwanre ji kẹ ovwan na?

²¹ko wọ ta kẹ ọmọ wẹn nẹ, Avwanre eviẹn ri Fero vwẹ Ijipt; Ọrovwohwo da vwẹ obọ ọgangan si avwanre nẹ Ijipt rhe.

²²Ọrovwohwo da vwẹ eka vẹ imuighunu ride gangan vwọ phia kẹ Ijipt vẹ Fero kugbe uwevwi rọye ejobi, vwẹ aro rẹ avwanre.

²³Ọ di si avwanre nẹ Etiyin rhe, rere ọ vwọ reyọ avwanre rhe, vwọ kẹ avwanre otọ ro veri kẹ esẹ rẹ avwanre.

²⁴Ọrovwohwo de ji iji nana kẹ avwanre, ra vwo djẹ oshọ rẹ Ọrovwohwo Ọghẹnẹ rẹ avwanre, fiki rẹ erhuvwu rẹ avwanre bẹdẹ, rere ọ mrasa vwo sivwi avwanre rhọ, kirobo rọ epha nonẹ na.

²⁵Ọvwata kọ dia ọ rẹ avwanre, ọ da dianẹ avwanre karohọ ru urhi nana vwẹ obaro rẹ Ọrovwohwo rẹ avwanre, kirobo ro jiji kẹ avwanre na.