Read urhobo Urhi Rivẹ 7 Bible Online

Urhi Rivẹ 7 - urhobo bible

Urhi Rivẹ 7

¹Ọke rẹ Ọrovwohwo Ọghẹnẹ wẹn da vwẹ owẹ te otọ ru wọ ra re yeri na, rọ da djẹ ẹgborho buebu nẹ obaro wẹn, ihwo ri Hẹt, vẹ ihwo ri Gigash, vẹ ihwo rẹ Amọr, vẹ ihwo ri Kenan, vẹ ihwo ri Pẹriz, vẹ ihwo ri Hiv, kugbe ihwo ri Jebus, ẹgborho ighwrẹ re rhoro je gan nọ ovwan na;

²kugbe ọke rẹ Ọrovwohwo Ọghẹnẹ wẹn de phi ayen phihọ obọ wẹn, ri wo de hwe ayen kua re; ke wọ guọghọ ayen roro, we nene ayen re ọphọ-ọ, wo ji nẹ arodọvwẹ rẹ aye-en;

³wọ vẹ ayen ji knoma gbe vwẹ orọvwe-e, wọ vwẹ emetẹ wẹn kẹ emeshare raye-en eyẹ wọ vwẹ emetẹ rayen kẹ emeshare wẹ-ẹn.

⁴Kidie o che ku udu rẹ emeshare wẹn rhẹriẹ ri de je uvwe enene, rere ayen ra ga ẹdjọ; rẹ ophu rẹ Ọrovwohwo da rhe tua kpahe owẹ, rọ da rhe ghwọrọ owẹ phẹrẹkpẹ.

⁵Ẹkẹvuọvo enẹ we nene ayen yeri; wọ guọghọ egbada rẹ izobo rayen, guọghọ osunsun rayen she, she ighriki rayen teye otọ, wa vwẹ erhanre torhẹ ema rayen.

⁶Kidie ovwan ihwo efuanfon kẹ Ọrovwohwo rẹ Ọghẹnẹ rẹ ovwan na; Ọrovwohwo Ọghẹnẹ wẹn re sanọ owẹ re wọ dia oghẹre rẹ ohwo kẹ omobọ rọye, nọ ihwo rẹ herọ vwẹ evun rẹ akpọ na ejobi.

⁷Ọrovwohwo guọnọ ovwan ọ da sanọ ovwan, vwi fiki rẹ ebuo rẹ ovwa-an kidie ovwan re ma hanvwe kparobọ vwẹ ihwo na ejobi;

⁸ẹkẹvuọvo fiki rẹ obo rẹ Ọrovwohwo vwọ guọnọ ovwan, gbe fiki rẹ obo rọ vwọ yọnrọn ive ro veri kẹ esẹ rẹ ovwan gbagba, ọ vwọ vwẹ obọgangan reyọ ovwan phia ọ ke je tan ovwan nẹ uwevwi rẹ ọviẹn nẹ obọ ri Fero ovie rẹ Ijipt.

⁹Vwẹ ọtiọye na wọ Me riẹn nẹ Ọrovwohwo Ọghẹnẹ wẹn na, yẹ Ọghẹnẹ; Ọghẹnẹ rẹ uyota, rọ yọnrọn ọphọ vẹ arodọvwẹ kẹ otu re guọnerọ re je yọnrọn irhi rọye ra ro uvwiẹ uriori; ro ọ Me hwa osa kẹ ohwo ri mu kpahọ gbonozẹ,

¹⁰ọ Me ghwọrọ ayen; o che se dogho obọ kẹ ohwo ri mu kpahọ-ọ, ọ cha hwa osa kẹ gbonozẹ.

¹¹Vwẹ ọtiọye na wọ Me yọnrọn urhi na, vẹ ẹgha kugbe iji na, ri mi ji kẹ wẹ nonẹ na, vwo ru ayen gba.

¹²Fikirobo re wọ vwọ kerhọ rẹ iji nana, re wọ da yọnrọn ayen, ji ru ayen na, Ọrovwohwo Ọghẹnẹ wẹn na kọ cha yọnrọn ọphọ vẹ ẹguọnọ ro jẹrhẹriẹ ro veri kẹ esẹ wẹn na kẹ wẹ;

¹³kọ guọnọ owẹ ko bruba kẹ wẹ, ji ru we bu phihọ; o ji bruba kẹ omamọ rẹ oma wẹn kugbe omamọ rẹ otọ wẹn, vẹ eka, vẹ wain kugbe evwri wẹn, ebuohọ rẹ irhuẹn wẹn kugbe ebuohọ rẹ emọ rẹ igegede wẹn, vwẹ evun rẹ otọ ro veri kọ esẹ wẹn nẹ ọye vwọ kẹ wẹ.

¹⁴E che bruba kẹ wẹ wan ihwo na ejobi ẹga rẹ ọshare eyẹ ọ rẹ aye gbe cha dia uherevie wẹ-ẹn, ọ gbe je dia vwẹ uherevie rẹ eranvwe-e.

¹⁵Ọrovwohwo cha kpare emiavwe ejobi nẹ uwe oma, emiavwe omiomiovwi ọvuọvo re wọ riẹnre re hẹ otọ rẹ Ijipt na gbi te we oma-a, ẹkẹvuọvo ko mu ayen kpahe otu re jẹ wẹ eghrẹ ejobi.

¹⁶Wọ Me ghwọrọ ihwo ejobi rẹ Ọrovwohwo Ọghẹnẹ wẹn che sun rhe we na; wo nẹ arodọvwẹ raye-en; wọ je ga ẹdjọ raye-en; kidie ọye cha dia ufi kẹ wẹ.

¹⁷Ọ da dianẹ wọ ta vwẹ udu wẹn nẹ, Ẹgborho nana rhonọ vwẹ; mavọ mi ru sa djẹ ayen?

¹⁸wo bru udu raye-en; wẹ Me karohọ emu rẹ Ọrovwohwo Ọghẹnẹ wẹn na ru ki Fero, vẹ Ijipt na ejobi;

¹⁹edavwini ride na rẹ ẹro wẹn mrẹre, vẹ eka na, vẹ imuighunu na, kugbe obọgangan, vẹ ugbobọ ra riẹnre, rẹ Ọrovwohwo Ọghẹnẹ wẹn na vwọ reyọ owẹ phia, eriyin Ọrovwohwo Ọghẹnẹ wẹn na che ru ihwo ru wo bru udu rayen na,

²⁰Ọrọmarho ọtiọye dede Ọrovwohwo Ọghẹnẹ wẹn na che ji iro kpo uherevie rayen, bẹsiẹ rẹ otu rayen ri chekọ rhi vwo si omobọ rayen nu, rhi ghwu nẹ obaro wẹn.

²¹Wọ dje oshọ raye-en; kidie Ọrovwohwo Ọghẹnẹ wẹn ọ uherevie wẹn, Ọghẹnẹ rode rọ vẹ udidi.

²²Erherha Ọrovwohwo Ọghẹnẹ wẹn na cha djẹ ẹgborho na ejobi nẹ obaro wẹn; wọ ghwọrọ ayen ẹsiẹvuọvo-o, eranvwe rẹ aghwa de rhi bunọ kẹ wẹ.

²³Ẹkẹvuọvo Ọrovwohwo Ọghẹnẹ wẹn che phi ayen phihọ obaro wẹn, ọ Me vwẹ ohra rode na hra ayen, bẹsiẹye rọ rhe vwọ ghwọrọ ayen nu.

²⁴Ko che phi Ivie rayen phihọ obọ wẹn, ke hwe odẹ rayen nẹ otọ rẹ ọnre na; ohwo ro se mudia vwẹ obaro wẹn, gbe dia-a, bẹsiẹye wọ vwọ ghwọrọ ayen nu.

²⁵Wa vwẹ erhanre torhẹ ema rẹ ẹdjọ rayen; wo siurhuru rẹ idọnọ efuanfon eyẹ iro rẹ enu raye-en, wọ je reyọ kẹ oma wẹ-ẹn, ufi de rhi mu we vwẹ evun rọye; kidie ẹgua kẹ Ọrovwohwo Ọghẹnẹ wẹn.

²⁶Wọ ghwẹ ẹgua cha uwevwi wẹ-ẹn, o de rhi hirhe phihọ ohwo re duvwu iyori kẹ, jo tu we oma tototo, jọ nyẹnyẹ owẹ oma; kidie emu rẹ iyori oruẹ.