Read urhobo Jọn 1 Bible Online

Jọn 1 - urhobo bible

Jọn 1

¹Notọrhe ọye Ota na vwọ herọ, Ota na vẹ Ọghẹnẹ gba herọ, Ota na ye hẹ Ọghẹnẹ.

²Ọye ọvo vẹ Ọghẹnẹ gba herọ notọrhe;

³oma rọye a wan mama imu na ejobi, ọ gbe dia ọye-e emu ọvuọvo ra mare na a gbe mama-a.

⁴Oma rọye arhọ epha, arhọ na kọye hẹ urhukpẹ rẹ ihwo.

⁵Urhukpe ro lo vwẹ evun rẹ ebri, ebri na sa djẹ elo-o.

⁶Ohwo ọvo herọ rẹ Ọghẹnẹ ji rhe, odẹ rọye Jọn.

⁷Ọ rhere kerẹ oseri, rere o vwo se oseri kẹ urhukpẹ na, rere ihwo ejobi vwọ wan oma rọye segbuyota.

⁸Ọ dia ọye hẹ urhukpẹ na-a, ẹkẹvuọvo ọ rhere rhi se oseri kẹ urhukpẹ na.

⁹Urhukpẹ rẹ uyota rọ vwẹ elo kẹ ohwo kohwo rọ cha akpọ na.

¹⁰Ọ hẹ evun rẹ akpọ na, oma rọye a wan mama akpọ na, yẹ akpọ na riẹnrẹ-ẹ.

¹¹Ọ rhe uwevwi robọ, rọye ihwo robọ rọye na reyerọ-ọ.

¹²Ẹkẹvuọvo vwọ kẹ ihwo re reyerọ ejobi, ri se odẹ rọye gbuyota, ọ kẹ ayen ogangan rere ayen rhe vwọ dia emọ rẹ Ọghẹnẹ.

¹³Ihwo re vwiẹri, ọ dia ọ rẹ obara-a eyẹ vwẹ ọhọre rẹ ugboma-a eyẹ ọhọre rẹ ohwo-o, ẹkẹvuọvo ọ rẹ Ọghẹnẹ.

¹⁴Ota na de rhi hirhe phihọ ohwo ọ da rhe dia ohri rẹ avwanre, ọ vọnre vẹ ẹserọphẹ vẹ uyota; avwanre da mrẹ urinrin rọye ọ tiẹ urinrin rẹ Ọmọ ọvuọvo na ro nẹ obọ rẹ Ọsẹ na rhe.

¹⁵Jọn de se oseri kẹ, ọ de kperi, Ọnana hẹ ọ re me tare nẹ, Ọ rọ cha vwẹ obuko mẹ na rhonọ ovwẹ, kidie ọ ka obaro kẹ vwẹ.

¹⁶Nẹ oma rẹ ọvọnvọn rọye avwanre ejobi, da mrẹ ẹserọphẹ kpahe ẹserọphẹ reyọ.

¹⁷Kidie oma ri Mosis a wan kẹ avwanre urhi na; ẹserọphẹ vẹ uyota kẹ oma ri Jesu Kristi ọ wan rhe.

¹⁸Ohwo ọvuọvo je mrẹ Ọghẹnẹ na dẹvo-o; Ọmọ ọvuọvo na, rọ hẹ agada rẹ Ọsẹ na, ọye re nẹrhẹ a riẹn.

¹⁹Ọnana kọye hẹ oseri ri Jọn, vwẹ ọke rẹ ihwo ri Ju vwo ji irherẹn kugbe ihwo ri Livae nẹ Jerusalẹm ra nọ, Wẹ ono?

²⁰Ọ da rhọvwe, ọ phrorọ-ọ, ẹkẹvuọvo ọ da rhọvwe nẹ, Ọ dia omẹvwẹ hẹ Kristi na-a.

²¹Ayen da nọ, Kidie wọ epha? Wẹ hẹ Ilaija? Ọ da ta, Me dia ọye-e. Wẹ hẹ ọmraro na? Ọ da kpahe, Ẹjo.

²²Etiyin ayen da ta kẹ, Kono wọ epha? Jẹn avwanre mrẹ obo rẹ avwanre kpahe kẹ otu ri ji avwanre rhe. Die wọ ta kpahe oma wẹn?

²³Ọ da ta, Mẹvwẹ hẹ urhuru rẹ ohwo ọvo ro kperẹ vwẹ evun rẹ aghwa, Ru idjerhe rẹ Ọrovwohwo phiọn phiọn kirobo rẹ ọmraro Aizaya tare.

²⁴Asakiephana Farisi yi ji ayen rhe.

²⁵Ayen da nọ, Kidie wọ vwọ vwẹ ame kẹ ihwo, ye wọ dia Kristi, eyẹ Ilaija-a, eyẹ ọmraro na-a?

²⁶Jọn da kpahe kẹ ayen, Ame me vwọ kẹ ihwo; ẹkẹvuọvo vwẹ ohri rẹ ovwan na ohwo ọvo mudia rẹ ovwan riẹnree,

²⁷ọye dẹn ohwo rọ cha vwẹ obuko mẹ na, ifi rẹ isabato rọye mi fo ohwo rọ rha aye-en.

²⁸Ọnana phiare vwi Betani vwẹ ovrẹn ri Jọdan, vwẹ asan ri Jọn da vwẹ ame kẹ ihwo na.

²⁹Vwẹ ẹdẹ rivẹ ọ da mrẹ Jesu rọ yan bro cha, ọ da ta, Nighe, Omogegede rẹ Ọghẹnẹ, rọ ghwa imwemwu rẹ akpọ na nu!

³⁰Ọnana hẹ ohwo re me tare, nẹ ọ cha vwẹ obuko mẹ rọ rhonọ ovwẹ, kidie ọ ka obaro kẹ vwẹ.

³¹Ekpuyovwi mẹ riẹnrẹ jovwo-o, ẹkẹvuọvo fiki rẹ ọnana me vwọ rhe rhe vwẹ ame kẹ ihwo rere a mrasan vwọ phia kẹ Izrẹl.

³²Jọn da dia oseri rọye, Me mrẹ Erhi na ro wotọ rhe kerẹ ilekukn nẹ odjuvwu cha, o de she muo.

³³Ekpuyovwi mẹ riẹnrẹ jovwo-o; ẹkẹvuọvo ọ ro ji vwe nẹ me rhe vwẹ ame kẹ ihwo na re ta kẹ vwẹ, nẹ ọ ru wọ mrẹ Erhi na ro wotọ rhe ro de she muo, ọnana hẹ ọ rọ vwẹ Erhi Ọfuanfon na vwọ kẹ ihwo.

³⁴Me mrẹrẹ me dia oseri rọye nẹ ọnana hẹ Ọmọ rẹ Ọghẹnẹ na.

³⁵Ẹdẹ rivẹ Jọn vẹ idibo rọye ivẹ de mudia;

³⁶ọ da mrẹ Jesu rọ wan vrẹn, ọ da ta, Nighe, Omogegede rẹ Ọghẹnẹ na!

³⁷Idibo ivẹ na de nyo rọ vwọ ta ọnana, ayen de nene Jesu.

³⁸Jesu de kuoma rhẹriẹ, ọ da mrẹ ayen ri nene, ọ da ta kẹ ayen, Die wa guọnọ? Ayen da ta kẹ, Rabbi (otọ rọye Oyono), tivọ wọ dia?

³⁹Ọ da ta kẹ ayen, Yanrhe wọ ra mrẹ. Ayen da rhe ayen da mrẹ asan rọ dia; ayen vẹ ọye da dia etiyin vwẹ ẹdẹ yena, kidie yẹ ọke na te unọke ihwe re.

⁴⁰Ọvo vwẹ usun rẹ ivẹ na ro nyo Jọn rọ vwọ ta ota na, ro de nene na, kẹ Andru, oniọvo ri Saimọn Pita.

⁴¹Ọye ka mrẹ oniọvo rọye Saimọn, ọ da ta kẹ, Avwanre mrẹ Mesaya na re (otọ rọye Kristi).

⁴²Ọ da reyọ vwo rhe Jesu. Jesu de no, ọ da ta, Wẹ hẹ Saimọn na ọmọ ri Jọn? E che se we Kifas (otọ rọye oragha).

⁴³Vwẹ ẹdẹ rivẹ Jesu ko kpo Galili. Ọ da mrẹ Filip ọ da ta kẹ, Nene uvwe.

⁴⁴Asakiephana Filip Bẹtsaida o nurhe, orere rẹ Andru kugbe Pita.

⁴⁵Filip da mrẹ Nataniẹl, ọ da ta kẹ, Avwanre mrẹ ohwo na ri Mosis djeri vwẹ evun rẹ urhi na rẹ emraro na si kpahe, Jesu ri Nazarẹt, ọmọ ri Josẹf.

⁴⁶Nataniẹl da ta kẹ, Kẹ emu esiri se nẹ Nazarẹt rhe? Filip da ra kẹ, Mọ wọ ra mrẹ.

⁴⁷Jesu vwọ mrẹ Nataniẹl ro bro cha, ọ da ta kẹ, Nighe, ohwo rẹ Izrẹl rẹ uyota, ra mrẹ abe vwẹ obọ rọye-e!

⁴⁸Nataniẹl da ta kẹ, Mavọ wo ru riẹn vwẹ? Jesu da kpahe kẹ, Tavwe ri Filip ki se we, vwẹ okẹ wọ vwọ hẹ otọ rẹ owe na, me mrẹ wẹ.

⁴⁹Nataniẹl da kpahe kẹ, Rabbi, Wẹ hẹ Ọmọ rẹ Ọghẹnẹ na! Wẹ hẹ Ovie ri Ju na!

⁵⁰Jesu da kpahe kẹ, Fikiridie me ta kẹ owẹ nẹ, Me mrẹ wẹ vwẹ otọ rẹ owe na, ku wo segbuyota? Wo cha mrẹ imu re rhonọ enana.

⁵¹Ọ da ta kẹ, Uyota, uyota, me ta kẹ owẹ, wọ cha mrẹ odjuvwu ro rhie phihọ, rẹ emakashe rẹ Ọghẹnẹ de kpenu ri de wotọ rhe vwẹ enu rẹ Ọmọ rẹ ohwo.