Read urhobo Jọn 10 Bible Online

Jọn 10 - urhobo bible

Jọn 10

¹Uyota, uyota, me ta kẹ ovwan, ohwo rọ wan anurhoro na ro ogba rẹ igegede na-a ẹkẹvuọvo ọ da ra kpanọ asan ọfa wan, ohwo yena hẹ oji kugbe igbunegbu;

²ẹkẹvuọvo ohwo rọ wan anurhoro na ruọ ọye hẹ osuigegede rẹ igodẹ na.

³Ọye ọrhẹrẹchẹ che rhiẹ ẹchẹ kẹ; igodẹ na nyo urhuru rọye, o se igodẹ rọye odẹ o mi sun ayen ro otafe.

⁴Ọke rọ da ghwẹ erọye ejobi ro otafe nu, kọ ka obaro kẹ ayen, igodẹ na ki nene, kidie ayen riẹn urhuru rọye.

⁵Ayen se nene ọrhorha-a, ẹkẹvuọvo ayen mrẹ djẹ, kidie ayen riẹn urhuru rẹ erhorha-a.

⁶Itẹ nana Jesu kpe kẹ ayen, ẹkẹvuọvo ayen vwo ẹruọ rẹ obo rọ ta kẹ aye-en.

⁷Ọtiọye na Jesu da rhoma ta kẹ ayen, Uyota, uyota, me ta kẹ ovwan, Mẹvwẹ hẹ anurhoro rẹ igodẹ na.

⁸Ayen ejobi re ka rhe nu re me ke rhe na hẹ iji vẹ igbunegbu; ẹkẹvuọvo igodẹ na davwerhọn rẹ aye-en.

⁹Mẹvwẹ hẹ anurhoro na; ohwo da wan oma mẹ ruọ, kọ rhọ, kọ sa ro uwevwi ro otafe kọ mrẹ egbri re.

¹⁰Oji ọvo cha re o cho re o hwe re ọ ghwọrọ; me rhere rere ayen vwo vwo arhọ, rere ayen vwo buebu.

¹¹Mẹvwẹ hẹ osuigegede rẹ esiri. Osuigegede rẹ esiri na vwẹ arhọ rọye kpahe otọ kẹ igodẹ na.

¹²Ọ re durhieri rọ dia osuigegede na-a na, rẹ igodẹ na dia erọye-e na, ọ da mrẹ okpohrokpo rọ cha ọ me djẹ jẹ igodẹ na vwo; okpohrokpo na mi fru ayen reyọ ọ me hra ayen.

¹³Ọ djẹre fikiridie ọ re durhieri oruẹ ọ rha davwerhọn rẹ igodẹ na-a.

¹⁴Mẹvwẹ hẹ osuigegede rẹ esiri; me riẹn e robọ mẹ e robọ mẹ je riẹn vwẹ,

¹⁵kirobo rẹ Ọsẹ na riẹn vwẹ na eriyin me je riẹn Ọsẹ na; me da vwẹ arhọ mẹ kpahe otọ kẹ igodẹ na.

¹⁶Mi ji vwo igodẹ efa, re je dia evun rẹ ogba na-a; me je cha reyọ ayen rhe, ayen ki nyo urhuru mẹ. Ọtiọye na ekru rẹ igodẹ ọvo re cha dia, osuigegede ọvuọvo.

¹⁷Fiki rẹ ọnana Ọsẹ na vwọ guọnọ ovwẹ, fikiridie me vwẹ arhọ mẹ kpahe otọ, rere me vwọ rhoma reyọ.

¹⁸Ohwo ọvuọvo sa reyọ mie vwe-e, ẹkẹvuọvo ọhorobọ mẹ me vwọ reyọ kpahe otọ. Mi vwo ogangan me vwọ reyọ kpahe otọ, mi ji vwo ogangan me rhoma reyọ; ọnana urhi re me reyọ miẹ Ọsẹ mẹ.

¹⁹Ogharọ da rhoma rhe dia vwẹ ohri ri Ju na fiki rẹ eta nana.

²⁰Ayen buebu da ta, O vwo idẹbono, ọ je honvwa orhuẹ; die wa vwọ kerhọn rọye?

²¹Efa da ta, Enana dia eta rẹ ohwo ro vwo idẹbono-o Kẹ idẹbono se rhiẹ ẹro rẹ ohwo ro rhuru?

²²Ọ da dia okẹ rẹ orẹ rẹ orufuọn vwi Jerusalẹm;

²³ọ da dia ọke ohwahwa, Jesu kọ yan vwẹ uwevwi rẹ ẹga na, vwẹ ọguan ri Solomọn.

²⁴Ọtiọye na ihwo ri Ju da rhe gba yariẹ phihọ ayen da ta kẹ, Mavọ wọ nẹrhẹ avwanre dia gedegede krite? Ọ da dia owẹ hẹ Kristi na ta kẹ avwanre phephẹ.

²⁵Jesu da kpahe kẹ ayen, Me ta kẹ ovwan, ovwan sere gbuyota-a. Iruo na ri mi ruẹ vwẹ odẹ rẹ Ọsẹ mẹ na, ayen se oseri kẹ vwẹ;

²⁶ẹkẹvuọvo ovwan se vwẹ gbuyota-a, fikiridie ovwan dia usun rẹ igodẹ mẹ-ẹ.

²⁷Igodẹ mẹ nyo urhuru mẹ, me riẹn ayen, ayen nene uvwe;

²⁸me da kẹ ayen arhọ ri bẹdẹ, ayen gbe ghwọrọ-ọ, ohwo ọvuọvo se fru ayen nẹ obọ mẹ-ẹ.

²⁹Ọsẹ mẹ, rọ vwẹ ayen kẹ vwẹ na, ọ rhonọ ovwẹ, ohwo ọvuọvo ji che se fru ayen nẹ obọ rẹ Ọsẹ na-a.

³⁰Mẹvwẹ vẹ Ọsẹ mẹ ọvuọvo.

³¹Ihwo ri Ju da tọrọ elalo re ayen vwo phio.

³²Jesu da kpahe kẹ ayen, Me vwẹ iruo rẹ esiri buebu phia kẹ ovwan nẹ obọ rẹ Ọsẹ na rhe; kẹ ọrhọ vwẹ usun rẹ enana we che vwo phi vwe na?

³³Ihwo ri Ju na da kpahe kẹ, Avwanre vwi fiki rẹ iruo esiri phi wee; ẹkẹvuọvo fiki rẹ avwavwe; fikiridie wẹ, rẹ ohwo ghevweghe, vwẹ oma wẹn ruẹ Ọghẹnẹ

³⁴Jesu da kpahe kẹ ayen, E rhe sio phihọ urhi rẹ ovwan, me tare, ovwan hẹ edjọ?

³⁵Ọ de se ayen edjọ ihwo rẹ ota rẹ Ọghẹnẹ bru rhe je se miovwi ọbe ọfuanfon na-a.

³⁶Ku wọ ta kpahe ohwo rẹ Ọghẹnẹ ru fon nu ro de jo rhe akpọ na nẹ, Wo bru avwavwe, fikiridie me tare nẹ, Mẹvwẹ Ọmọ rẹ Ọghẹnẹ?

³⁷Ọ da dianẹ mi rhe ru iruo rẹ Ọsẹ mẹ-ẹ, we gbi se vwe gbuyota-a;

³⁸ẹkẹvuọvo mi de ru ayen, dede na nẹ we se vwe gbuyota-a, gbe se iruo na gbuyota, rere ovwan riẹn re ọ ro ovwan nẹ Ọsẹ hẹ evun mẹ nẹ mi he evun rẹ Ọsẹ na.

³⁹Ayen da rhoma guọnọ mu, ọ da reyọ oma nẹ ohri rọye ayen abọ.

⁴⁰Ọ rhoma yanran kpo obo ovrẹn ri Jọdan kpo asan ri Jọn da ka vwẹ ame kẹ ihwo, kẹ etiyin ọ diare.

⁴¹Buebu de bro rhe; ayen da ta, Jọn ru oka-a, ẹkẹvuọvo kota kota ri Jọn tare kpahe ohwo nana uyota.

⁴²Buebu de segbuyota.