Read urhobo Jọn 11 Bible Online

Jọn 11 - urhobo bible

Jọn 11

¹Asakiephana ohwo ọvo kọ honvwa, Lazarọs ri Betani, ọko rẹ Meri vẹ oniọvo rọye Mata.

²Meri na re vwẹ ori ghworo Ọrovwohwo ọ da vwẹ ẹto rọye vwo rhie awọ rọye, ọye oniọvo rọye Lazarọs họnvwa na.

³Ọtiọye na iniọvo rọye rẹ emetẹ na de ji ohwo bru Jesu ra, tanẹ, Ọrovwohwo, ọ re wọ guọnọre na họnvwa.

⁴Ẹkẹvuọvo ọke ri Jesu vwo nyo ọ da ta, Emiavwe nana ọ dia ọ rẹ ughwu-u; ọ rẹ a wan vwẹ urinrin vwọ kẹ Ọghẹnẹ, rere Ọmọ rẹ Ọghẹnẹ vwo se vwo urinrin fiki rọye.

⁵Asakiephana Jesu guọnọ Mata vẹ oniọvo rọye rẹ ọmọtẹ kugbe Lazarọs.

⁶Ọtiọye na ro vwo nyo nẹ ọ họnvwa, ọ da da oma ji ẹdẹ ivẹ vwẹ asan rọ epha jovwo.

⁷Etiyin rẹ ọnana vwọ wan nu ọ da ta kẹ idibo rọye, E jẹn avwanre rhoma kpo Judia.

⁸Idibo na da ta kẹ, Rabbi, ihwo ri Ju na guọnọ owẹ phiẹ hwe vwẹ asakiephana, kẹ oboyi wọ rhoma ra na?

⁹Jesu da kpahe, Ọ dia unọke ihwivẹ re dia ẹdọke? Ohwo da yan vwẹ ogheruvo, o se she-e, kidie ọ mrẹ urhukpẹ rẹ akpọ nana.

¹⁰Ẹkẹvuọvo ohwo da yan vwẹ evun rẹ ason, o she, fikiridie urhukpẹ na hẹ evun rẹ oma rọye-e.

¹¹Enẹ o ta nu, ọ da ta kẹ ayen, Ugbeyan rẹ avwanre Lazaros shero ovwerhẹ, ẹkẹvuọvo me ra ra rhọvwọ nẹ ovwerhẹ.

¹²Idibo na da ta kẹ, Ọrovwohwo, o de shero ovwerhẹ, yọ je cha rhọvwọ.

¹³Asakiephana Jesu ta ota rẹ ughwu rọye, ẹkẹvuọvo ayen de roro nẹ omaerovwo vwẹ ovwerhẹ ọye ọ ta.

¹⁴Etiyin Jesu da ta kẹ ayen phia, Lazarọs ghwuru;

¹⁵vwi fiki rẹ ovwan oma vwerhe ovwẹ ne me hẹ eriyi-in, rere ovwan vwo segbuyota. Ẹkẹvuọvo e gbe je bro ra.

¹⁶Tọmọs, re se Agbava, da ta kẹ otu rọye idibo na, E jẹn avwanre je ra rhe, rere a vẹ ọye ghwu.

¹⁷Asakiephana ri Jesu vwọ rhe, ọ da mrẹ Lazarọs vwẹ ushi re shiri ẹdẹ ẹne nure.

¹⁸Betani kẹrẹ Jerusalẹm, kerẹ uroko ivẹ,

¹⁹ihwo ri Ju buebu bru Mata kugbe Meri rhe rhi bru ayen uche fiki rẹ oniọvo rayen na.

²⁰Ọke ri Mata vwo nyo ni Jesu cha, ọ da yanran ra vwa, yi Meri tidia vwẹ evun rẹ uwevwi.

²¹Mata da ta kẹ Jesu, Ọrovwohwo, ọ diane wọ hẹ etinẹ nọ, oniọvo mẹ na e ghwu-u.

²²Yẹ asakiephana me riẹnre nẹ kemu kemu ru wọ nọ mie Ọghẹnẹ, Ọghẹnẹ sa vwọ kẹ owẹ.

²³Jesu da ta kẹ, Oniọvọ wẹn che vrẹn vwobọ.

²⁴Mata da ta kẹ, Me riẹnre nẹ o che vrẹn vwobọ vwẹ evun rẹ evrẹnushi na vwẹ ẹdẹ rẹ obo oba na.

²⁵Jesu da ta kẹ, Mẹvwẹ hẹ evrẹnushi na kugbe arhọ na; ọ ro se vwe gbuyota, owenẹ o ghwu, yọ je cha rhọ,

²⁶ohwo kohwo rọ herọ ro se vwe gbuyota o gbi che ghwu bẹdẹ-ẹ. Ku wo se ọnana gbuyota?

²⁷Ọ da ta kẹ, E, Ọrovwohwo; mi segbuyota nẹ wẹ hẹ Kristi na, Ọmọ rẹ Ọghẹnẹ na, ọye hẹ ọ rọ cha akpọ na.

²⁸Ọke rọ vwọ ta ọnana nu, ọ da yanran re se oniọvo rọye Meri, ọ da bẹbẹ ta kẹ, Oyono na hẹ etinẹ o re se we.

²⁹Ọke ro vwo nyo, o de vrẹn kpre o de bro rhe.

³⁰Asakiephana yi Jesu ji te obo ọko na-a, ẹkẹvuọvo yọ je hẹ asan ri Mata da vwa na.

³¹Ọke rẹ ihwo ri Ju re vẹ ọye gba hẹ evun rẹ uwevwi na, ri bro uche na, vwọ mrẹ Meri ro vrẹri kpre ro otafe na, ayen de nene, ki roro nẹ o kpo obo ushi na da ra viẹ vwẹ etiyin.

³²Etiyin Meri, vwo te asan ri Jesu epha rọ vwọ mrẹ, o de she teye awọ rọye, ta kẹ nẹ, Ọrovwohwo, ẹ dianẹ wọ hẹ etinẹ nọ, oniọvo mẹ na e ghwu-u.

³³Ọke ri Jesu vwọ mrẹ rọ viẹ, kugbe ihwo ri Ju ri bruro rhe re viẹ rhe, o de se iherihe rẹ oviẹ ọ da da gangan;

³⁴Ọ da ta, Tivọ we shiro phihọ? Ayen da ta kẹ, Ọrovwohwo, mọ wọramrẹ.

³⁵Jesu da viẹ.

³⁶Ọtiọye ihwo ri Ju na da ta, nighe mavọ ọ guọnerọ te.

³⁷Ẹkẹvuọvo evo rẹ ayen da ta, Kẹ ohwo nana ro se rhiẹ ẹro rẹ orhuẹro na gbi se ru ọshare nana ro de je ghwo?

³⁸Etiyin Jesu, da rhoma se iherihe kokodo, o de rhi te ushi na; ushi na ẹmwa, a vwẹ oragha rhurho.

³⁹Jesu da ta, E mu oragha na no. Mata, oniọvo rẹ ohwo ro ghwuru na, da ta kẹ, Ọrovwohwo, vwẹ ọke nana yo gbore, kidie o ghwuru etiyin ason ẹne re.

⁴⁰Jesu da ta kẹ, Me ta kẹ owẹ nẹ wo de segbuyota wọ cha mrẹ urinrin rẹ Ọghẹnẹ?

⁴¹Ọtiọye na ayen de mu oragha na no. Jesu da kpare opharo rọye kpenu ọ da ta, Ọsẹ, me kpẹvwẹ owẹ ru wo vwo nyo vwe.

⁴²Me riẹnre nẹ wo nyo vwe kọke kọke, ẹkẹvuọvo me ta ọnana fiki rẹ ihwo ri mudia vwẹ etinẹ na, rere ayen vwo segbuyota nẹ wọwẹ ri ghine ji uvwe.

⁴³Ọke rọ vwọ ta ọnana nu, ọ da van gangan se, Lazarọs, yanrhe.

⁴⁴Ohwo ro ghwuru na da yanrhe, a vwẹ ukpoyibo gba abọ vẹ awọ rọye, a vwẹ amwa gba opharo rọye. Jesu da ta kẹ ayen, A rhan, rere e jo kpo.

⁴⁵Ihwo ri Ju buebu, ri bru Meri rhe re mrẹ obo ro ruru, de segbuyota;

⁴⁶ẹkẹvuọvo evo rẹ ayen yanran bru otu ri Farisi ayen de gbe obo ri Jesu ruru kẹ ayen.

⁴⁷Ọtiọye ilori rẹ irherẹn kugbe otu ri Farisi de se ẹguare koko, ayen da ta, kidie avwanre ru? Kidie ohwo nana ruẹ eka buebu re.

⁴⁸Avwanre da yan jovwo enẹ, kohwo kohwo che segbuyota, ihwo ri Rom ke cha rhe rhe guọghọ asan ọfuanfon rẹ avwanre kugbe ẹgborho rẹ avwanre.

⁴⁹Ẹkẹvuọvo ọvo vwẹ usun rẹ ayen, re se Kaifas, rọ dia orherẹn rode vwẹ ukpe yena da ta kẹ ayen, Ovwan riẹn emuọvo kakaka-a;

⁵⁰ovwan vwo ẹruọ nẹ o fori kẹ ovwan rẹ ohwo ọvo vwo ghwu kẹ ihwo na, rere ẹgborho na vwo jẹ ghwọrọ.

⁵¹Ọ vwẹ ọhorọho rọye ọvo ta ọnana-a, ẹkẹvuọvo rọ vwọ dia orherẹn rode vwẹ ukpe yena kọye ọ vwọ mraro nẹ Jesu che ghwu kẹ ẹgborho na,

⁵²ọ je dia ẹgborho na ọvo-o, ẹkẹvuọvo ro vwo se emọ rẹ Ọghẹnẹ re hrabọ ro isi na ejobi koko phihọ ọvuọvo.

⁵³Ọtiọye na kẹ ẹdẹ yena yanran ayen de se umẹ rẹ obo rẹ ayen vwo hwe ghwu.

⁵⁴Jesu gbe sa vwẹ oma phia gangan vwẹ ohri ri Ju na-a, ẹkẹvuọvo o de nẹ etiyin kpo orho rọ hẹ obo aghwa, vwo kpo orho re se Ifrem; kẹ etiyin ọ vẹ idibo rọye diare.

⁵⁵Asakiephana Ewanvrẹn na rẹ ihwo ri Ju na te otọ re, buebu da yanran kpo obo orho kpo Jerusalẹm tavwe rẹ Ewanvrẹn ki rhi te, re ru oma rẹ ayen fuanfon.

⁵⁶Kẹ ayen guọnọ Jesu ayen ke ta kẹ ohwohwo rẹ ayen vwo mudia vwẹ uwevwi rẹ ẹga na, Die wo rori? Ro vwo jẹ orẹ na ẹcha?

⁵⁷Asakiephana ilori rẹ irherẹn kugbe Farisi ji urhi nẹ ohwo da ghwa riẹn asan rọ epha, o jẹn ayen riẹn, rere ayen mrasan muo.