Read urhobo Jọn 12 Bible Online

Jọn 12 - urhobo bible

Jọn 12

¹Ẹdẹ esan tavwe rẹ Ewanvrẹn ki rhi te, Jesu da rhe Betani, asan ri Lazarọs epha, ọ ri Jesu rhọvwọ nẹ ughwu na.

²Etiyin ayen de chere emu kẹ vwẹ ovwọnvwọn yena; Mata kọye chere emu na, ẹkẹvuọvo Lazarọs kẹ ọvo rọ vẹ ayen gbe tidia vwẹ imẹjẹ na.

³Meri da reyọ ori ri spaknad ghaghare ẹhọhọ rọye ikpahọ ọvo rẹ ovwavwọn o de vwo ghworo awọ ri Jesu ọ da vwẹ ẹto rẹ uyovwi rọye rhie; uwevwi na da rhe vọn vẹ ọnrhe ororo rẹ ori na.

⁴Ẹkẹvuọvo Judas Iskariọt, ọvo vwẹ idibo rọye (ọye ọ rọ cha shẹ na), ọ da ta,

⁵Kidie a gbe shẹ ori nana ikọba ujori erha re a vwọ kẹ ivwiogbere-e?

⁶Ọnana ọ tare, ọ dianẹ kọ davwerhọn rẹ ivwiogbere na-a, ẹkẹvuọvo oji o ruẹ, ekpeti rẹ igho na vwo rhe na kọ wanvwiẹ obo re hẹ evun rọye.

⁷Jesu da ta, Jẹn aye na vwo, e jẹn ọ yọnrọn fiki rẹ ẹdẹ rẹ esho mẹ.

⁸Ivwiogbere na vẹ ovwan gba herọ vwẹ ọke ejobi, ẹkẹvuọvo me vẹ ovwan sa dia vwẹ ọke ejobi-i.

⁹Ọke rẹ otu ri Ju ri kokori gbidi na vwọ riẹn nẹ ọ hẹ etiyin, ayen da rhe, ọ dianẹ ki fiki rẹ Jesu ọvo-o ẹkẹvuọvo re ayen vwọ mrasan mrẹ Lazarọs rhe, ri Jesu rhọvwọ nẹ ughwu rhe na.

¹⁰Ọtiọye na ilori rẹ irherẹn na ke guọnọ obo rẹ ayen vwọ teye Lazarọs hwe,

¹¹fikiridie, oma rọye ọye ihwo ri Ju buebu vwọ yan jẹ ayen vwo re se Jesu gbuyota na.

¹²Vwẹ ẹdẹ rivẹ na ihwo buebu na re rhe orẹ na de nyo nẹ Jesu cha Jerusalẹm.

¹³Ọtiọye na ayen da reyọ ewanvwe rẹ iriẹ ayen da yanran ra vwa, ayen de kuvwie, Hozana, Ebruba kẹ ọ rọ cha vwẹ odẹ rẹ Ọrovowhwo, mrẹmrẹ ọye hẹ Ovie rẹ Izrẹl.

¹⁴Jesu da mrẹ upene rẹ ekẹtẹkẹtẹ o de tidia; kirobo re siro,

¹⁵A djẹ oshọ-ọ, ọmọtẹ ri Zayọn; nighe, ovie wẹn cha, o tidia vwẹ enu rẹ upene rẹ ekẹtẹkẹtẹ.

¹⁶Ọnana sa ro idibo na vwẹ ẹsosuọ-ọ; ẹkẹvuọvo ọke ra vwọ vwẹ urinrin kẹ Jesu nu, kẹsiẹye ayen ke rhe karohọ nẹ e si ọnana kpahọ nẹ e ruro kẹ nure.

¹⁷Otu na re vẹ ọye gba herọ vwẹ ọke ro vwo se Lazarọs nẹ ushi rhe rọ da rhọvwọ nẹ ughwu rhe na da dia iseri.

¹⁸Otọ rẹ obo rẹ otu na vwọ yan bro ra kẹ ọna nẹ ayen nyori nẹ o ru emu rẹ igbunu nana.

¹⁹Farisi na da ta kẹ ohwohwo, Ovwan rha mrẹ nẹ ovwan se ru emuọvo-o; nighe, akpọ na re nene.

²⁰Asakiephana vwẹ ohri rẹ ihwo ri kpo orẹ na ra ga ẹga na ihwo ri Grik evo herọ.

²¹Ọtiọye na ayen de bru Filip, rẹ ohwo ri Bẹtsaida vwi Galili, ayen da ta kẹ, Ọga, avwanre guọnọ Jesu mrẹ.

²²Filip yanran ọ da vuẹ Andru; Andru vẹ Filip rhe vrẹn ayen da rhe ta kẹ Jesu.

²³Jesu da kpahe kẹ ayen, Ọke na tere ra vwọ vwẹ urinrin kẹ Ọmọ rẹ ohwo re.

²⁴Uyota, uyota, me ta kẹ ovwan, jokpa nẹ ubi rẹ ọka she phihọ otọ ro de ghwu-u, kọye ọvo kpoi re dia; ẹkẹvuọvo o de ghwu, kọ mọ emamọ buebu.

²⁵Ọ rọ guọnọ rọye ko kuofia; ohwo ro ku arhọ rọye fia vwẹ akpọ nana kọ sẹro rọye re te arhọ ro vwo oba-a.

²⁶Ohwo da ga vwẹ, ko nene uvwe; asan re me epha, kẹ etiyin idibo mẹ je dia rhe; ohwo da ga vwẹ, Ọsẹ na kọ vwẹ ọghọ kẹ.

²⁷Asakiephana ẹnwẹ mẹ ko kpogho. Kidie me cha ta, Ọsẹ, sivwi uvwe nẹ ọke nana? Ejo, kidie fiki rẹ ọnana na me vwọ rhe rhi te ọke nana na.

²⁸Ọsẹ, vwẹ urinrin kẹ odẹ wẹn. Etiyin urhuru ọvo de nẹ odjuvwu rhe, me vwẹ urinrin kẹ nure, me je rhoma vwẹ urinrin kẹ.

²⁹Otu ri mudia kẹrẹ etiyin de nyo ayen da ta nẹ agbrara vare. Efa da rha ta, Amakashe ta ota kẹ.

³⁰Jesu da kpahe, Urhuru nana rhere fiki rẹ ovwan, ọ dia fiki mẹ-ẹ.

³¹Asakiephana hẹ ẹdjọeguo rẹ akpọ nana, asakiephana a vwọ djẹ osun rẹ akpọ na kufia,

³²mẹvwẹ dẹn, ọke ra da kpare ovwẹ kpenu nẹ akpọ na, ki mi si ihwo buebu nene oma mẹ.

³³Ọ ta ọnana vwo dje oghẹre rẹ ughwu ro che ghwu.

³⁴Otu na da kpahe kẹ, Avwanre nyori vwẹ evun rẹ urhi na nẹ Kristi dia bẹdẹ. Komavọ wọ rha vwọ ta nẹ a cha kpare Ọmọ rẹ ohwo kpenu?

³⁵Jesu da ta kẹ ayen, Urhukpẹ na vẹ ovwan je dia kri emerha. Ovwan yan vwẹ ọke na rẹ urhukpẹ vwọ herọ na; ọ dia ọtiọye-e ebri na che muẹ ghene ovwan; ohwo rọ yan vwẹ evun rẹ ebri riẹn asan rọ ra-a.

³⁶Ọke rẹ ovwan vwo vwo urhukpẹ na, se urhukpẹ na gbuyota, rere ovwan sa rhe vwọ dia emọ rẹ urhukpẹ. Ọke ri Jesu vwọ ta ọnana nu, ọ de vrẹn nẹ etiyin o de sioma nu kẹ ayen.

³⁷Dede nẹ o ru eka buebu kẹ ayen mrẹ na, yẹ ayen sere gbuyota-a;

³⁸ọye kọye ota rẹ omraro Aizaya tare na vwọ mrasan gba; Ọrovwohwo, ono ri se iyẹnrẹ rẹ avwanre gbuyota, ono a vwẹ igbabọ rẹ Ọrovwohwo phia kẹ?

³⁹Fiki rẹ ọtiọye na ayen gbi se segbuyota-a. Kidie Aizaya je rhoma ta.

⁴⁰Orhurhu ẹro rayen o de ru udu rayen gan, ayen da vwẹ ẹro rayen mrẹ orẹ ayen da vwẹ udu rẹ ayen vughe, ayen de kurhẹriẹ e de sivwi ayen.

⁴¹Aizaya ta ọnana fikiridie ọ mrẹ urinrin rọye ọ da ta ota kpahọ.

⁴²Dede na buebu mrẹmrẹ vwẹ usun rẹ ihwo ri vwo ogangan na de segbuyota, ẹkẹvuọvo oshọ ri Farisi na gbi jẹ ayen rhọvwọ phia-a, a da rha djẹ ayen nẹ evun ri Sinegọg;

⁴³kidie ayen guọnọ ejiro rẹ ihwo nọ ejiro rẹ Ọghẹnẹ.

⁴⁴Jesu da van ọ da ta, Ọ ro se vwe gbuyota, o se vwe gbuyota-a ẹkẹvuọvo ọ ro ji vwe rhe.

⁴⁵Ọ rọ mrẹ vwẹ jọ mrẹ ọ ro ju vwe rhe.

⁴⁶Me rhere kerẹ urhukpẹ vwẹ evun rẹ akpọ na, rere ohwo kohwo ro se vwe gbuyota vwo jẹ ebri ẹdia.

⁴⁷Ohwo ro nyo eta mẹ rọ yọnrọn aye-en, mi vwiro guẹdjọ-ọ; kidie me rhere rhi guẹdjọ rẹ akpọ na-a ẹkẹvuọvo mi rhi sivwi akpọ na.

⁴⁸Ọ rọ sen vwẹ rọ reyọ eta mẹ-ẹ o vwo oguẹdjọ ọvo; ota na re me tare na ọye cha dia oguẹdjọ rọye vwẹ ẹdẹ rẹ obo oba na.

⁴⁹Kidie ọ dia ogangan robọ mẹ me vwọ ta ota na-a; Ọsẹ na ro ji vwe na vẹ ekpuyovwi rọye re kẹ vwẹ urhi rẹ obo re me ta vẹ obo re me ta wan.

⁵⁰Me riẹnre nẹ urhi rọye hẹ arhọ ri bẹdẹ. Obo re me ta na, me ta kirobo rẹ Ọsẹ na vuẹ vwẹ.