Read urhobo Jọn 13 Bible Online

Jọn 13 - urhobo bible

Jọn 13

¹Asakiephana tavwe rẹ orẹ rẹ Ewanvrẹn ki rhi te, ri Jesu vwọ riẹn nẹ ọke rọye vwo nẹ akpọ na bru Ọsẹ na ra tere, rọ vwọ guọnọ erobọ rọye re hẹ akpọ na, ọ da guọnọ ayen te oba.

²Vwẹ ọke ra vwo ria emu rẹ ovwọnvwọn, rẹ idẹbono vwo phio phihọ udu ri Judas Iskariọt, ọmọ ri Saimọn, rọ shẹ,

³ri Jesu vwọ riẹn nẹ Ọsẹ na phi emu na ejobi phihọ obọ nure, nẹ obọ rẹ Ọghẹnẹ o nurhe nẹ obọ rẹ Ọghẹnẹ ọye ra na,

⁴o de vrẹn nẹ udoemu rẹ ovwọnvwọn na, ọ da ghwiẹ iwun rọye hẹ akakọ, ọ da reyọ okpan vwo rhuo.

⁵Etiyin o de ku ame phihọ oze, kọ hworhẹ awọ rẹ idibo na ọ da vwẹ okpan ro vwo rhuo na vwo rie ayen.

⁶O ki rhe te Saimọn Pita; Pita da ta kẹ, Ọrovwohwo, kẹ owẹ re hworhẹ awọ mẹ?

⁷Jesu da kpahe kẹ, Ọbo ri mi ruẹ na wọ sa riẹn vwẹ asakiephana-a, ẹkẹvuọvo esiẹfa vwobọ ọ cha ro owẹ.

⁸Pita da ta kẹ, Wo sa hworhẹ awọ mẹ o ruẹ Jesu da kpahe kẹ, Me gbe hworhẹ owẹ-ẹ, yu wo gbi vwo ẹkẹn vwẹ oma mẹ-ẹ.

⁹Saimọn Pita da ta kẹ, Ọrovwohwo, ọ gbe dia awọ mẹ ọvo heyọ-ọ ẹkẹvuọvo ji te abọ mẹ rhe kugbe uyovwi mẹ.

¹⁰Jesu da ta kẹ, Ohwo rọ họ nure gbe guọnọ ẹhọ ọfa-a, jokpa rẹ awọ rọye, ẹkẹvuọvo yọ fonre kpae; yo wọ fonro, ẹkẹvuọvo yọ dia ovwan ejobi-i.

¹¹Kidie ọ riẹn ọ rọ cha shẹ na; kọye ọ vwọ ta, Ovwan ejobi fonre-e.

¹²Ọke rọ vwọ hworhẹ awọ rayen ejobi nu, ro vwo ku iwun rọye phihọ nu, ro vwo tidia ẹdia rọye, ọ da ta kẹ ayen, Ovwan riẹn obo ri mi ruẹ kẹ ovwan na?

¹³Ovwan se vwe Oyono kugbe Ọrovwohwo; ovwan riẹn se, kidie ọtiọye me epha.

¹⁴Ọ da dianẹ, mẹvwẹ rẹ Ọrovwohwo rẹ ovwan kugbe Ọyono rẹ ovwan, da hworhẹ awọ rẹ ovwan, ovwan ke je hworhẹ awọ rẹ ohwohwo rhe.

¹⁵Kidie mẹ kẹ ovwan oniru nure, rere ovwan ji ru obo ri mi ru kẹ ovwan na rhe.

¹⁶Uyota, uyota, me ta kẹ ovwan, odibo rhonọ onini rọye-e, eyẹ ohwo re jiri rhonọ ọ ro jiro-o.

¹⁷Ovwan da riẹn imu nana, ebruba kẹ ovwan rẹ ovwan de ru ayen.

¹⁸Ọ dia ovwan ejobi me ta-a; me riẹn otu re me jẹreyọ; rere ọbe ọfuanfon na vwọ gba, Ọ rọ re emu mẹ rhoma hirhe ichukawo rọye ku vwẹ.

¹⁹Me ta ọnana kẹ ovwan vwẹ asakiephana, tavwe rọ ke rhe phia, rere ọke rọ da rhe phiare ovwan vwo segbuyota nẹ mẹvwẹ hẹ ọye.

²⁰Uyota, uyota, me ta kẹ ovwan, ohwo kohwo rọ reyọ ọvo ri mi ji rhe na yọ reyọ ovwẹ; ọ rọ reyọ ovwẹ reyọ ọ ro ji vwe rhe.

²¹Ri Jesu vwọ ta eta nana nu, erhi de kpokpo, o de se oseri, Uyota, uyota, me ta kẹ ovwan, ọvo vwẹ usun rẹ ovwan na cha shẹ vwẹ.

²²Idibo na ki di nẹ ohwohwo, ayen ke epha gedegede kpahe ohwo rọ ta na.

²³Ọvo vwẹ idibo rọye na, ri Jesu guọnọre, de sherhẹ vwẹ oma rẹrẹ udu ri Jesu;

²⁴ọtiọye na Saimọn Pita da vwẹ obọ se ọ da ta, Ta kẹ avwanre ono ọye ọ ta na vwo.

²⁵Ọtiọye na rọ vwọ vwẹ oma rẹrẹ na, ro vwo si kẹre udu ri Jesu na, ọ da ta kẹ Ọrovwohwo, ono vwo?

²⁶Jesu da kpahe, Ohwo ri mi che duvwu ẹbẹre rẹ ikara vwo te oghwo kẹ. Ọtiọye na ro vwo duvwo phihọ oghwo nu, ọ da vwọ kẹ Judas, ọmọ rẹ Iskariọt.

²⁷Rọ vwọ riọ nu, Idẹbono da ro evun rọye. Jesu da ta kẹ, obo ru wo ruẹ na, ruo phẹrẹkpẹ.

²⁸Asakiephana o vwo ohwo ọvuọvo vwẹ enu rẹ imẹjẹ na rọ riẹn obo ro vwọ ta onana kẹ-ẹ.

²⁹Evo de roro nẹ, fikiridie Judas vwọ yọnrọn ekpu rẹ igho na, Jesu kọ ta kẹ, Ra dẹ obo ra guọnọ vwọ re orẹ na; eyẹ, ọ vwẹ ememu vwọ kẹ ivwiogbere.

³⁰Ọtiọye na, rọ vwọ re ẹbẹre rẹ ikara na nu, siẹvuọvo na ọ da ro otafe; yẹ ọke shere.

³¹Ọke rọ vwọ ro otafe nu, Jesu da ta, Asakiephana ọye a vwọ vwẹ urinrin kẹ Ọmọ rẹ ohwo na, vwẹ oma rọye a wan vwẹ urinrin kẹ Ọghẹnẹ;

³²a da vwẹ urinrin kẹ Ọghẹnẹ vwẹ oma rọye, Ọghẹnẹ kọ je vwẹ urinrin kẹ vwẹ oma rọye rhe, siẹvuọvo na kọ vwẹ urinrin kẹ.

³³Emọ na, ọmọke krẹ ri chekọ re mẹ vẹ ovwan vwọ dia. Ovwan cha guọnọ ovwẹ; kirobo re me ta kẹ otu ri Ju na ọtiọye me je ta kẹ ovwan na. Asan re me ra na ovwan se te-e.

³⁴Urhi ọkpokpọ mi ji kẹ ovwan nẹ, ovwan guọnọ ohwohwo; kirobo re me guọnọ ovwan na ọtiọye ovwan je guọnọ ohwohwo rhe.

³⁵Vwẹ oma rẹ ọnana kọye ihwo ejobi vwọ riẹn nẹ ovwan gbine idibo me, ọ da dianẹ ovwan guọnọ ohwohwo.

³⁶Saimọn Pita da ta kẹ, Ọrovwohwo, Tivọ wọ ra vwo? Jesu da kpahe, Asan re me ra we che se nene uvwe vwẹ asakiephana-a; ẹkẹvuọvo we che nene uvwe vwobọ.

³⁷Pita da ta kẹ, Ọrovwohwo, kidie mi vwo jẹ uwe enene vwẹ asakiephana? Me vwẹ arhọ mẹ kpahe otọ kẹ wẹ.

³⁸Jesu da kpahe, Wọ sa vwẹ arhọ wẹn kpahe otọ kẹ vwẹ? Uyota, uyota me ta kẹ owẹ, ọhọ che bo-o tavwe wọ ke sen vwẹ asiarha-a.