Read urhobo Jọn 15 Bible Online

Jọn 15 - urhobo bible

Jọn 15

¹Mẹvwẹ hẹ uvi ri vain na, Ọsẹ mẹ hẹ ọghwẹrẹ na.

²Ọghọn koghọn mẹ rọ mọ ubi-i, ke sio no, oghọn koghọn mẹ rọ mọ ubi kọ rhuẹrẹ phihọ rere ọ vwọ mọ ibi buebu.

³E ru ovwan ejobi fon nure vwẹ oma rẹ ota na re me ta kẹ ovwan.

⁴Dia vwẹ evun mẹ, re me dia vwẹ evun rẹ ovwan. Kirobo rẹ oghọn na ọvo sa mọ ubi kẹ omobọ rọye-e, jokpa nẹ ọ herọ vwẹ evun ri vain na, eriyin na wa je sa mọ-ọ, jokpa nẹ wa herọ vwẹ evun mẹ.

⁵Mẹvwẹ hẹ vain na, ovwan kẹ ẹghọn na. Ọ rọ herọ vwẹ evun mẹ, re me da hẹ evun rọye, ọye ọ rọ sa mọ ini buebu, kidie ovwan de si oma nẹ uvwe ovwan se ru emuọvo-o.

⁶Ohwo rọ rha herọ vwẹ evun mẹ-ẹ, ya fianrọ kufia kerẹ oghọn kovwioro; ka kua eghọn na koko, ka kpare ayen phihọ erhanre ke torhẹ.

⁷Ovwan da herọ vwẹ evun mẹ, rẹ eta mẹ da dia evun rẹ ovwan, gba nọ kemu kemu rẹ ovwan guọnọre, ke ruo kẹ ovwan.

⁸Vwẹ oma rẹ ọnana kọyẹ a vwọ vwẹ urinrin kẹ Ọsẹ mẹ rere ovwan vwọ mọ ibi buebu, ọtiọye kọye e vwo dje phia nẹ ovwan idibo mẹ.

⁹Kirobo rẹ Ọsẹ na guọnọ ovwẹ, ọtiọye me je guọnọ ovwan; ovwan dia vwẹ evun rẹ ẹguọnọ mẹ.

¹⁰Ovwan da sẹro rẹ irhi mẹ, ovwan ke je dia vwẹ evun rẹ ẹguọnọ mẹ, kirobo re me sẹro rẹ irhi rẹ Ọsẹ mẹ re me da dia vwẹ ẹguọnọ rọyẹ.

¹¹Imu nana me ta kẹ ovwan, rere aghọghọ mẹ vwọ sa dia evun rẹ ovwan, rere aghọghọ rẹ ovwan yena vwọ vọn.

¹²Ọnana hẹ urhi mẹ, nẹ ovwan guọnọ ohwohwo kirobo re me guọnọ ovwan.

¹³Ẹguọnọ rẹ ohwo vwori rọ rhonọ ọnana gbe herọ-ọ, rẹ ohwo da vwẹ arhọ rọye kpahe otọ kẹ igbeyan rọye.

¹⁴Ovwan igbeyan mẹ ọ da dianẹ ovwan ru obo ri mi ji urhi rọye kẹ ovwan.

¹⁵Mi gbi se ovwan idibo ọfa-a, kidie odibo riẹn obo rẹ onini rọye ruẹ-ẹ ẹkẹvuọvo mi se ovwan igbeyan, kidie obo ri mi nyo mie Ọsẹ mẹ ejobi me vwẹ ayen phia kẹ ovwan.

¹⁶Ọ dia ovwan re jẹ vwẹ-ẹ, ẹkẹvuọvo mẹvwẹ re jẹ ovwan me da vwẹ ovwan mu rere ovwan yanran ra mọ ubi rere ubi rẹ ovwan vwọ dia; ọtiọye na emu kemu rẹ ovwan nọ Ọsẹ na vwẹ odẹ mẹ, ọ sa vwọ kẹ ovwan.

¹⁷Ọnana mi ji kẹ owẹ, re ovwan guọnọ ohwohwo.

¹⁸Ọ da dianẹ akpọ na tuoma wẹ, gba riẹn nẹ o ke tuoma mẹ nu tavwe ro ki rhi tuoma wẹ.

¹⁹Ọ da dianẹ ovwan kẹ e rẹ akpọ na, akpọ na ka guọnọ erobọ rọye; ẹkẹvuọvo fikiridie ovwan rha dia e rẹ akpọ na-a na, ẹkẹvuọvo me jẹ ovwan nẹ evun rẹ akpọ na, kọye akpọ na vwo tuoma rẹ ovwan na.

²⁰Karohọ ota re me ta kẹ ovwan na, Odibo rhonọ onini rọye-e. Ọ da djanẹ ayen kpokpo uvwe, ayen ji kpokpo ovwan rhe, ayen de sẹro rẹ ota mẹ, ayen ke je sẹro rẹ ọ rẹ ovwan rhe.

²¹Ẹkẹvuọvo enana ejobi na ayen che vwo ru ovwan vwi fiki mẹ, fikiridie ayen riẹn ọ ro ji vwe rhe na-a.

²²Ọ diane me rhere rhe ta ota kẹ aye-en, ayen e rhe ru umwemwu-u; ẹkẹvuọvo asakiephana ayen gbe mrẹ obo rẹ ayen gu fiki rẹ umwemwu raye-en.

²³Ọ ro tuoma mẹ ji tuoma rẹ Ọsẹ mẹ rhe.

²⁴Ọ dianẹ mi rhi ru iruo rẹ ohwo ofa ji ru vwẹ ohri rẹ ayen dẹvo-o, manẹ ayen ru umwemwu-u; ẹkẹvuọvo asakiephana ayen mrẹre yẹ ayen ji tuoma mẹ kugbe Ọsẹ mẹ.

²⁵Ọnana ruru rere ota re si phihọ urhi rayen na vwọ gba, Ayen di tuoma mẹ ekueku.

²⁶Ẹkẹvuọvo ọke rẹ Obruche na da rhe, ri mi che ji nẹ obọ rẹ Ọsẹ na rhe, mrẹmrẹ kọye hẹ Erhi rẹ uyota na, ro nẹ obọ rẹ Ọsẹ na rhe, ọye ri che se oseri kẹ vwẹ.

²⁷Ovwan je hẹ Iseri rhe, fikiridie ovwan vẹ ovwẹ gba herọ notọrhe.