Read urhobo Jọn 16 Bible Online

Jọn 16 - urhobo bible

Jọn 16

¹Me ta enana ejobi kẹ ovwan rere ovwan vwo je she.

²Ayen cha djẹ ovwan nẹ evun ri sinegọg; eriyin dẹn, ọke cha ri kohwo kohwo ro hwe ovwan ejobi ko che roro nẹ Ọghẹnẹ ọye ga.

³Ayen che ru ọnana fikiridie ayen je riẹn Ọsẹ na vwo, siẹvo kẹ omẹvwẹ-ẹ.

⁴Ẹkẹvuọvo me ta enana kẹ ovwan nure, rere ọke rayen de rhi te re, ovwan vwọ karohọ nẹ me ta ayen kẹ ovwan jovwo. Me ta enana kẹ ovwan notọrhe jovwo-o, fikiridie me vẹ ovwan je herọ.

⁵Ẹkẹvuọvo asakiephana mi bru ọ ro ji vwe rhe ra; yẹ ovwan ọvuọvo rọ cha nọ vwẹ nẹ, Bovọ wọ ra-a?

⁶Ẹkẹvuọvo fikiridie me ta imu nana kẹ ovwan nure na, kọye uvweri vwọ vọn udu rẹ ovwan na.

⁷Dede na uyota na me ta kẹ ovwan: oyovwi kẹ ovwan nẹ me yanran, kidie me gbe yanran, Obruche na gbi bru ovwan rhe-e; ẹkẹvuọvo me da yanran, ki mi jo bru ovwan rhe.

⁸Ọke rọ da rhe, kọ cha nẹrhẹ umwemwu kugbe ọvwata kugbe ẹdjọeguo mu akpọ na ẹro.

⁹Ọ rẹ umwemwu vwenẹ, fikiridie ayen se vwe gbuyota-a;

¹⁰ọ rẹ ọvwata vwenẹ, fikiridie mi bru Ọsẹ na ra, yẹ ovwan gbe cha mrẹ vwẹ ọfa-a;

¹¹ọ rẹ ẹdjọeguo vwenẹ, fikiridie e guẹdjọ rẹ osun rẹ akpọ nana nure.

¹²Mi vwo eta buebu re me cha ta kẹ ovwan, ẹkẹvuọvo e cha sa ro ovwan vwẹ asakiephana-a.

¹³Ọke rẹ Erhi rẹ uyota na da rhe, ko che sun ovwan vwọ riẹn uyota na ejobi; kidie ọ cha vwẹ ogangan rẹ obọ rọye ta ota-a, ẹkẹvuọvo kemu kemu ro nyori ọye ọ cha ta, o che dje imu re cha vwobọ kẹ ovwan.

¹⁴Ọ cha vwẹ urinrin kẹ vwẹ, kidie ọ cha reyọ ọmẹ ọ me rha vwọ phia kẹ ovwan.

¹⁵Obo rẹ Ọsẹ na vwori ejobi emẹ; fiki rẹ ọtiọye me vwọ ta nẹ ọ reyọ obo ri mi vwori ọ me vwọ phia kẹ ovwan.

¹⁶Ọmọke krẹ, ovwan gbe cha mrẹ vwẹ ọfa-a; ọmọke krẹ ọfa, ovwan ke cha mrẹ vwẹ.

¹⁷Evo vwẹ idibo rọye da ta kẹ ohwohwo, Ọnana kidie ọ ta kẹ avwanre na, Ọmọke krẹ, ovwan gbe cha mrẹ vwẹ-ẹ, ọmọke krẹ ọfa, ovwan ke cha mrẹ vwẹ; kugbe, fikiridie mi bru Ọsẹ na ra?

¹⁸Ayen da ta, Die ọ tare na, ọmọke krẹ? Avwanre riẹn obo rọ vwe rọ ta-a.

¹⁹Jesu riẹnre nẹ ayen cha nọ; ọtiọye na ọ da ta kẹ ayen, Ọnana hẹ obo rẹ ovwan nọ omoma rẹ ovwan, obo re me tare nẹ, Ọmọke krẹ, ovwan gbe cha mrẹ vwẹ-ẹ, ọmọke krẹ ọfa, ovwan ke cha mrẹ vwẹ?

²⁰Uyota, uyota, me ta kẹ ovwan, ovwan cha viẹ ovwan che vwere oma, ẹkẹvuọvo akpọ na cha ghọghọ; ọ cha da ovwan gangan, ẹkẹvuọvo ọdavwẹ rẹ ovwan che hirhe phihọ aghọghọ.

²¹Ọke rẹ aye da chuẹ uvwiẹ kọ mrẹ odjadja, fikiridie yẹ ọke rọye tere; ẹkẹvuọvo ọke ro de vwiẹ ọmọ na nu, ọ gbe karohọ odjadja na ọfa-a, fiki rẹ aghọghọ rẹ ọmọ ro vwiẹ phihọ akpọ na.

²²Ọtiọye na ovwan ke mrẹ odjadja vwẹ asakiephana, ẹkẹvuọvo me cha rhoma mrẹ ovwan udu rẹ ovwan kọ ghọghọ, ohwo ọvnovo gbi se mie ovwan aghọghọ yena-a.

²³Vwẹ ẹdẹ yena ovwan gbe cha nọ vwẹ enanọ-ọ. Uyota, uyota, me ta kẹ ovwan, ovwan da nọ kemu kemu vwẹ obọ rẹ Ọsẹ na, kọ vwọ kẹ ovwan vwẹ odẹ mẹ.

²⁴Rhi te ọke nana ovwan je nọ emuọvo vwẹ odẹ mẹ-ẹ; nọ, kẹ ovwan mrẹ reyọ, rere aghọghọ rẹ ovwan vwọ vọn.

²⁵Me ta onana kẹ ovwan vwẹ itẹ; ọke cha ri mi vwo jẹ itẹ ekpe vwọ ta ota kẹ ovwan, ẹkẹvuọvo ke me ta obo rẹ Ọsẹ na epha phephẹ kẹ ovwan.

²⁶Vwẹ ẹdẹ yena ovwan ke nọ vwẹ odẹ mẹ; ọ dianẹ me tare nẹ me rẹ Ọsẹ na kẹ ovwa-an;

²⁷kidie ekpuyovwi rẹ Ọsẹ na guọnọ, ovwan, fikiridie ovwan guọnọ ovwẹ we de segbuyota nẹ obọ rẹ Ọsẹ na mi nurhe.

²⁸Obọ rẹ Ọsẹ na mi nurhe me da rhe evun rẹ akpọ na; ọfa, mi ji che nẹ akpọ na rhivwi bru Ọsẹ na ra.

²⁹Idibo rọye da ta, Ẹhẹ, asakiephana wọ ke ta ota na phephẹ, wo kpe itẹ vwọ ta-a!

³⁰Asakiephana avwanre riẹnre nẹ wọ riẹn emu ejobi re, ọ gbe guọnọ nẹ ohwo ọvuọvo nọ wẹ-ẹ; kẹ ọna avwanre vwo segbuyota nẹ obọ rẹ Ọsẹ na wọ nurhe.

³¹Jesu da kpahe kẹ ayen, Ovwan segbuyota vwẹ asakiephana re?

³²Ọke cha, o rhe nu dede re, ra cha vwọ hra ovwan, kpo dohwo duwevwi rọye, ku we che ji vwe ọvo vwo, kidie Ọsẹ na vẹ ovwẹ herọ.

³³Me ta ọnana kẹ ovwan nẹ, vwẹ oma mẹ ovwan ki vwo ufuoma. Vwẹ akpọ na ovwan mrẹ ukpokpogho; ẹkẹvuọvo ghọghọ, mi phi akpọ na kpare obọ nure.