Read urhobo Jọn 17 Bible Online

Jọn 17 - urhobo bible

Jọn 17

¹Ọke ri Jesu vwọ ta eta nana nu, ọ da kpare opharo ni enu ọ da ta, Ọsẹ, ọke na tere; vwẹ urinrin kẹ Ọmọ wẹn rere Ọmọ na vwẹ urinrin kẹ owẹ.

²Ọtiobo re wọ vwẹ ogangan kẹ vwẹ vwẹ enu rẹ ihwo ejobi na, ke me vwẹ arhọ ro vwo oba-a kẹ ayen ejobi re wọ vwọ kẹ vwẹ.

³Ọnana hẹ arhọ ro vwo oba-a na, rere ayen vwọ riẹn owẹ ọvo rẹ Ọghẹnẹ rẹ uyota na, kugbe Jesu Kristi ru wo ji rhe na.

⁴Me vwẹ urinrin kẹ owẹ vwẹ akpọ na, ri mi vwo ru iruo ru wọ vwọ kẹ vwẹ ru gba;

⁵vwẹ asakiephana, Ọsẹ, gba vwẹ oma wẹn ọvo wan vwẹ urinrin kẹ vwẹ vẹ urinrin ri mi vwori vwẹ obaro wẹn tavwẹ rẹ a ke ma akpọ na.

⁶Me vwẹ odẹ wẹn phia kẹ ihwo re wọ kẹ vwẹ vwẹ evun rẹ akpọ na; ewẹn ayen ruẹ, kẹ owẹ re vwẹ ayen kẹ vwẹ, ayen da sẹro rẹ ota wẹn.

⁷Asakiephana ayen riẹnre nẹ kemu kemu ru wọ vwọ kẹ vwẹ obọ wẹn i nurhe;

⁸kidie eta na re wọ vwọ kẹ vwẹ na me vwẹ ayen vwọ kẹ ayen, ayen da reyọ ayen da riẹn vwẹ ọ rẹ uyota nẹ obọ wẹn mi nurhe; ayen de segbuyota nẹ wọwẹ ri ji vwe rhe.

⁹Me rẹ vwọ kẹ ayen; me rẹ vwọ kẹ akpọ na-a ẹkẹvuọvo vwọ kẹ ayen otu re wọ vwọ kẹ vwẹ, kidie ewẹn ayen ruẹ.

¹⁰E rẹ mi vwori ejobi na ewẹn, ewẹn ke rha vwẹ emẹ, a da vwẹ urinrin kẹ vwẹ vwẹ oma rẹ ayen.

¹¹Asakiephana me gbe hẹ akpọ na ọfa-a, ẹkẹvuọvo ayen hẹ evun rẹ akpọ na, mi bru uwe cha. Ọsẹ Ọfuanfon, sẹro rayen vwẹ odẹ wẹn ru wọ vwọ kẹ ovwẹ, rere ayen sa vwọ dia ọvo, mrẹmrẹ kirobo rẹ avwanre hẹ ọvo na.

¹²Ọke re me vẹ ayen vwọ hẹro na, me sẹro rẹ ayen vwẹ odẹ wẹn re wọ vwọ kẹ vwẹ na; me rhẹrẹ ayen, ọvuọvo rẹ ayen ghwruru-u ẹkẹvuọvo ọmọ rẹ ughwru na, rere ọbe ọfuanfon na vwọ gba.

¹³Ẹkẹvuọvo asakiephana mi bru uwe cha; me ta imu nana vwẹ evun rẹ akpọ na, rere aghọghọ mẹ vwọ gba vwẹ oma rẹ ayen.

¹⁴Me vwẹ ota wẹn vwọ kẹ ayen; akpọ na de tuoma rẹ ayen fikiridie ayen dia e rẹ akpọ na-a, mrẹmrẹ kirobo re me je dia ọ rẹ akpọ na-a na.

¹⁵Me rẹ re nẹ wo si ayen nẹ evun rẹ akpọ na-a, ẹkẹvuọvo rere wọ vwọ sẹro rẹ ayen nẹ obọ rẹ ohwo umwemwu na.

¹⁶Ayen dia e rẹ akpọ na-a.

¹⁷Ru ayen fon vwẹ uyota na; ota wẹn hẹ uyota.

¹⁸Kirobo ru wo ji vwe rhe evun rẹ akpọ na, ọtiọye mi ji ji ayen rhe evun rẹ akpọ wẹn.

¹⁹Fiki rayen mi vwo ru oma mẹ fọn, rere ayen vwọ fọn rhe vwẹ uyota na.

²⁰Me rẹ kẹ enana ọvo-o, ẹkẹvuọvo je vwọ kẹ ayen rhe ri se vwe gbuyota fiki rẹ ota rayen,

²¹rere ayen ejobi vwọ dia ọvo; kirobo rẹ owẹ, rẹ Ọsẹ, hẹ evun mẹ, re me da hẹ evun wẹ, rere ayen je vwọ dia evun rẹ avwanre rhe, ọtiọye na akpọ na ki segbuyota nẹ wọwẹ ri ji vwe rhe.

²²Urinrin na re wọ vwọ kẹ vwẹ me vwe rọ kẹ ayen, rere ayen vwọ dia ọvo kirobo rẹ avwanre hẹ ọvo na.

²³Me hẹ evun rẹ ayen yu wọ hẹ evun mẹ, rere ayen vwọ dia ọvo gbae, ọtiọye na akpọ na kẹ riẹn nẹ we ri ji vwẹ rhe me da rha guọnọ ayen kirobo ru wọ guọnọ ovwẹ.

²⁴Ọsẹ, me guọnọre nẹ ayen rhe, re wọ vwọ kẹ vwẹ na, vẹ ovwẹ dia asan re me epha, re mrẹ urinrin mẹ re wọ kẹ vwẹ vwẹ ẹguọnọ ru wọ vwọ kẹ vwẹ tavwe ra ke ma akpọ na.

²⁵E Ọsẹ rẹ ọvwata, akpọ na je riẹn wẹ-ẹn, ẹkẹvuọvo me riẹn wẹn; yẹ enana riẹnre nẹ wẹ ri ju vwe rhe.

²⁶Mi dje odẹ wẹn kẹ ayen, ki mi ruo re ayen vwọ riẹn, rere ẹguọnọ ru wọ vwọ kẹ vwẹ na vwọ sa dia evun rẹ ayen, re me dia evun rẹ ayen.