Read urhobo Jọn 18 Bible Online

Jọn 18 - urhobo bible

Jọn 18

¹Ọke ri Jesu vwọ ta eta nana nu, ọ vẹ idibo rọye da yan vrẹn iyara ri Kidrọn, rẹ ogba epha, te ọye te idibo rọye da vwẹriẹ etiyin.

²Asakiephana Judas, rọ shẹrẹ na riẹn asan na; kidie Jesu vẹ idibo rọye ji kpo etiyin jovwo.

³Ọtiọye ri Judas, vwọ reyọ otu rẹ isodje vwọ ba oma kugbe iruiruo evo nẹ obọ rẹ ilori rẹ irherẹn kugbe Farisi rhe, ayen de kpo etiyin vẹ irhukpẹ vẹ ituerhanre vẹ ikpokpo.

⁴Etiyin Jesu, vwọ riẹn obo re cha phia kẹ ejobi, ọ da yanrhe obaro ọ da ta kẹ ayen, Ono ovwan guọnọ?

⁵Ayen da kpahe kẹ, Jesu ri Nazarẹt. Jesu da ta kẹ ayen, Mẹvwẹ hẹ ọye. Judas rọ shẹrẹ na, mudia kẹrẹ ayen.

⁶Ọke rọ vwọ ta kẹ ayen nẹ, Mẹvwẹ hẹ ọye, ayen de ghwe sihọ obuko ayen de she teye otọ.

⁷Ọ da rhoma nọ ayen, Ono ovwan guọnọ? Ayen da ta, Jesu ri Nazarẹt.

⁸Jesu da kpahe, Me ta kẹ ovwan nẹ mẹvwẹ hẹ ọye; ọtiọye na, o da dia omẹvwẹ ovwan guọnọ, gbe jẹn enana yanran.

⁹Ọnana ọ tare rere ota rọ tare na vwọ gba, Usun rẹ ihwo ru wọ vwọ kẹ vwẹ na ọvuọvo va vwẹ abọ ghwru-u.

¹⁰Etiyin Saimọn Pita, ro vwo ọlọkọ, de yoro rhe ọ da nyavwe orhọn rẹ obọrhe rẹ ọviẹn rẹ orherẹn rode na bru kufia. Odẹ rẹ ọviẹn na hẹ Makos.

¹¹Jesu da ta kẹ Pita, Dje ọlọkọ wẹn vwọ hẹ ako rọye; Me rha da uko rẹ Ọsẹ mẹ vwọ kẹ vwẹ na?

¹²Ọtiọye na otu rẹ isodje na kugbe inotu rayen kugbe iruiruo rẹ ihwo ri Ju de shabọ họ Jesu ayen da gba.

¹³Ẹsosuọ ayen de ke suo rhe Anas; kidie ọye hẹ ọgọ ri Kaifas, rọ dia orherẹn rode vwẹ ukpe yena.

¹⁴Kaifas hẹ ohwo rọ ta kẹ ihwo ri Ju nẹ o fori rere ohwo ọvo vwo ghwu kẹ ihwo na.

¹⁵Saimọn Pita de nene Jesu, ọtiọye je te odibo rọye ọfa. Rẹ orherẹn rode na vwọ riẹn odibo nana, ọ da ro ọguan rẹ orherẹn rode na vẹ Jesu,

¹⁶yi Pita mudia vwẹ otafe vwẹ anurhoro na. Ọtiọye je hẹ odibo ọfa, rẹ orherẹn rode na riẹnre, ọ da ro otafe ra ta ota kẹ ọmọtẹ rọ rhẹrẹ anurhoro na, ọ da reyọ Pita ro uwevwi.

¹⁷Ọmọtẹ na rọ rhẹrẹ anurhoro na da ta kẹ Pita, Wọ dia ọvo vwẹ usun rẹ idibo rẹ ohwo nana rhe? Ọ da ta, Ọ dia omẹvwẹ-ẹ.

¹⁸Asakiephana idibo na kugbe iruiruo na da vwẹ esia koko erhanre họ, fikiridie ekpahe muẹ, ayen de mudia yariẹ re sasa oma rẹ ayen; Pita vẹ ayen je hẹ etiyin rhe, o mudia rọ sasa oma rọye.

¹⁹Orherẹn rode na da nọ Jesu kpahe idibo rọye kugbe uyono rọye.

²⁰Jesu da kpahe kẹ, Me ta ota gbonoze kẹ akpọ na. Kọke kọke ejobi mi vwo yono vwi Sinagọg kugbe uwevwi rẹ ẹga, asan rẹ ihwo ri Ju ejobi de koko, Me ta ota ọvuọvo vwẹ odjahọ-ọ.

²¹Die wọ vwọ nọ vwẹ? Nọ ayen otu ri nyo vwe, obo re me ta kẹ ayen; ayen riẹn obo re me tare.

²²Ọke rọ vwọ ta ọnana nu, oruiruo ọvo ro mudia kẹrẹ etiyin da vwẹ obọ ghwiẹ Jesu, tanẹ, ọtiọye wọ kpahe ota kẹ orherẹn rode na?

²³Jesu da kpahe kẹ, Me da ta ota ọchọchọ, gbe se oseri rẹ ota ọchọchọ na; ẹkẹvuọvo ọ da dia uyota me ta na, die wọ vwọ ghwiẹ vwẹ?

²⁴Anas gbarọ o de vwo rhe Kaifas rẹ orherẹn rode na.

²⁵Ri Saimọn Pita ji vwo mudia rọ sasa oma rọye na, ayen da ta kẹ, Wọ je dia ọvo vwẹ usun rẹ idibo rọye? Ọ da ghwọ unu tanẹ, ọ dia omẹvwẹ-ẹ.

²⁶Ọvo vwẹ usun rẹ odibo rẹ orherẹn rode na, omoni rẹ ohwo ri Pita nyavwe orhọn rọye bru kufia na, da nọ, Me mrẹ wẹ vẹ ọye vwẹ obo ogba na?

²⁷Pita da rhoma ghwọ unu; siẹvuọvo ọhọ de whe bo.

²⁸Etiyin ayen de sun Jesu nẹ uwevwi ri Kaifas kpo obo ọguan rẹ Pailet vwẹ irhiọke. Ekpuyovwi rẹ ayen sa ro ọguan na-a, fikirẹ obo rẹ ayen vwo jẹ ẹgua egbe, ẹkẹvuọvo re ayen vwo sa re ẹwanvrẹn na.

²⁹Ọtiọye na Pailet da ro otafe bru ayen ọ da ta, Didi urhi ovwan vwo mu ohwo nana?

³⁰Ayen da kpahe kẹ, Ọ da dianẹ ohwo nana dia ohwoumwemwu-u, avwanre e muo rhe we-e.

³¹Pailet da ta kẹ ayen, Ekpuyovwi rẹ ovwan ọvo reyọ vwo gu ẹdjọ nene urhi rẹ ovwan. Ihwo ri Ju na da ta kẹ, Ọ fori kẹ avwanre re vwo hwe ohwo ghwu-u.

³²Ọnana kọye ota ri Jesu tare vwọ gba ro vwo dje oka rẹ ughwu ro che ghwu.

³³Pailet da rhoma ro ọguau na o de se Jesu, ọ da ta kẹ, Wẹ hẹ ovie ri Ju na?

³⁴Jesu da kpahe, Wẹ ọvo re vwẹ ọhọrobọ wẹn ta ọnana vwo, eyẹ ihwo efa tarọ kpahe ovwẹ kẹ wẹ?

³⁵Pailet da kpahe, Mẹvwẹ hẹ ihwo ri Ju? Ẹgborho wẹn kugbe ilori rẹ irherẹn na ri mu uwe vwo rhe vwe; Didi emu wo ruru?

³⁶Jesu da kpahe, Uvie mẹ dia ọ rẹ akpọ nana-a; ọ dianẹ uvie mẹ ọ rẹ akpọ nana, manẹ idibo mẹ a họnre, re de ji uvwe emuo kẹ ihwo ri Ju; ẹkẹvuọvo uvie mẹ dia akpọ o nurhe-e.

³⁷Pailet da ta kẹ, Ọtiọye na wẹ kẹ ovie? Jesu da kpahe, We rẹ tare nẹ mẹvwẹ ovie. Kidie ọnana e vwo vwiẹ vwẹ, je vwi fiki rẹ ọnana me vwọ rhe akpọ na, rhi se oseri kẹ uyota na. Kohwo kohwo rọ dia ọ rẹ uyota na ko nyo urhuru mẹ.

³⁸Pailet da ta kẹ, Die hẹ uyota? Rọ vwọ ta onana nu, ọ da rhọma ro otafe bru ihwo ri Ju na, ọ da ta kẹ ayen, Me mrẹ oruchọ vwẹ obọ rọye-e.

³⁹Ẹkẹvuọvo ovwan vwo uruemu rere mi siobọ nẹ ohwo ọvo kẹ ovwan vwẹ ẹwanvrẹn na, ki mi siobọ nẹ Ovie ri Ju na kẹ ọvwan?

⁴⁰Ayen da rhoma kuvwie, Ọ dia ohwo nana, ẹkẹvuọvo Barabas. Asakiephana Barabas na oji.