Read urhobo Jọn 2 Bible Online

Jọn 2 - urhobo bible

Jọn 2

¹Vwẹ ẹdẹ rerha orọvwe kọ herọ vwi Kana vwi Galili, oni ri Jesu je hẹ etiyin rhe;

²e ji durhie Jesu vẹ idibo rọye kpo orọvwe na rhe.

³Ọke rẹ udi vwo re, oni ri Jesu da ta kẹ, Ayẹn vwo udi-i.

⁴Jesu da ta kẹ, E aye, die wọ vẹ ovwẹ gbi ru? Ọke mẹ ji te-e.

⁵Oni rọye da ta kẹ idibo rọye, Ru obo rọ ta kẹ ovwan.

⁶Asakiephana iche rẹ oragha esan mudia vwẹ etiyin, rẹ ihwo ri Ju vwọ họ ẹgua nẹ oma, usiobọ rẹ ame uje eyẹ ọghan re vọn ọvuọvo.

⁷Jesu da ta kẹ ayen, Vo ame vọn ichẹ na. Ayen de vo ame vọn ayen te unu.

⁸Ọ da ta kẹ ayen, Gba jẹ rhe, re we muo rhe omuidi rẹ orẹ na. Ọtiọye ayen de muo.

⁹Ọke rẹ omuidi rẹ orẹ na vwọ davwe ame re hirhe phihọ udi na, ọ riẹn asan ro nurhe-e (yẹ idibo re jẹ ame na riẹnre), omuidi rẹ orẹ na de se ọshare rẹ ọpha na.

¹⁰Ọ da ta kẹ, Udi ọvwevwerhe ọye kohwo kohwo ka jẹ karo; ọke rẹ udi de mu ihwo re, kẹsiẹye a ke vwẹ idi ebrabra cha; ẹkẹvuọvo wo si udi ọvwevwerhe nana nu rhi te ọke nana.

¹¹Ọnana, hẹ oka rọye rẹsosuọ, ri Jesu ruru vwi Kana vwi Galili, ọ da vwẹ urinrin rọye phia; idibo rọye de segbuyota.

¹²Rẹ ọnana vwọ wan nu o de kpo Kepanọm, vẹ oni rọye kugbe iniọvo rọye kugbe idibo rọye; ayen da dia etiyin emerha.

¹³Ewanvrẹn ri Ju si kẹri re, Jesu de kpo Jerusalẹm.

¹⁴Vwẹ evun rẹ uwevwi rẹ ẹga na, Ọ da mrẹ ihwo re shẹ irhuẹn kugbe igodẹ kugbe ilekuku, kugbe ihwo ri wene igho vwẹ oghwa rayen.

¹⁵Rọ vwọ reyọ ufi vwo me ophiaphiẹ, ọ da djẹ ayen ejobi, te igode te irhuẹn, nẹ uwevwi rẹ ẹga na; o de rhurie igho rẹ iwene-igho na she ọ da bọnvwọn imẹjẹ rayen rhu.

¹⁶Ọ da ta kẹ otu re shẹ ilekuku na, Si imu nana nẹ etinẹ; wo vwẹ uwevwi rẹ Ọsẹ mẹ vwo ruẹ uwevwi rẹ eki-i.

¹⁷Idibo rọye da karohọ nẹ e siro jovwo, Oruru rẹ uwevwi wẹn che mu uvwe rọ.

¹⁸Ihwo ri Ju na da ta kẹ, Didi oka wo se dje kẹ avwanre wo vwo ru onana?

¹⁹Jesu da kpahe kẹ ayen, Guọghọ uwevwi rẹ ẹga nana, vwẹ ẹdẹ erha ki mi muo vi.

²⁰Ihwo ri Ju na da ta, Ikpe ujuvẹ gbẹ esan a vwọ bọn uwevwi rẹ ẹga nana, kọye wo se mu vi vwẹ ẹdẹ erha na?

²¹Ẹkẹvuọvo ọ ta ota kpahe uwevwi rẹ ẹga rẹ oma rọye.

²²Ọke ra vwọ kparọ vrẹn nẹ ughwu nu, idibo rọye da rhe karohọ nẹ ọ je ta ọnana; ayen de se ọbe ọfuanfon na gbuyota kugbe ota na ri Jesu tare.

²³Asakiephana ọke rọ vwọ hẹ Jerusalẹm vwẹ ọke orẹ rẹ ẹwanvrẹn na, buebu de se odẹ rọye gbuyota vwẹ ọke rẹ ayen vwọ mrẹ eka ro ruru;

²⁴ẹkẹvuọvo Jesu ghwa gba oma rọye vwra ayen nọ-ọ,

²⁵fikiridie ọ riẹn ihwo ejobi ọ gbe guọnọ nẹ ọvuọvo dia oseri kẹ ohwo-o; kidie ekpuyovwi rọye riẹn obo re hẹ evun rẹ ohwo.