Read urhobo Jọn 20 Bible Online

Jọn 20 - urhobo bible

Jọn 20

¹Asakiephana vwẹ ẹdẹ rẹsosuọ rẹ ẹdidjala na Meri ri Magdala da rhe asan ushi na vwẹ irhiọke ride, yẹ ọke ji rhie muotọ-ọ, ọ da mrẹ oragha na re ghorieri nẹ ushi na.

²Kọye ọ da djẹ, bru Saimọn Pita kugbe odibo ọfa ra, ọvo ri Jesu guọnọre na, ọ da ta kẹ ayen, Ayen mu Ọrovwohwo nẹ evun rẹ ushi na, avwanre rha riẹn asan rẹ ayen muro phihọ-ọ.

³Pita vẹ odibo rivẹ na da yan phia, ayen da yan kpo obo ushi na.

⁴Ayen ivẹ na de mu onẹ họ, ẹkẹvuọvo odibo rivẹ na da djẹ karo kẹ Pita o de ke rhi te ushi na.

⁵Ro vwo rhuẹn ni evun rọye, ọ da mrẹ ukpoyibo na re hẹ otọ, ẹkẹvuọvo ọ ro evun rọye-e.

⁶Etiyin Saimọn Pita, de nene te etiyin, ọ da ro evun rẹ ushi na; ọ da mrẹ ukpoyibo re hẹ otọ,

⁷kugbe amwa ra vwọ pharo uyovwi rọye, ọ vẹ ukpoyibo na hẹ asan ọvo-o ẹkẹvuọvo e kpirhiro phihọ asan obọ rọye san.

⁸Etiyin odibo rivẹ na, ro ke te ushi na jovwo na, ọ da je ruọ, ọ da mrẹ o de segbuyota.

⁹Kidie rhi te ọke nana ayen ji riẹn ọbe ọfuanfon na-a nẹ ọ cha rhoma vrẹn nẹ ughwu.

¹⁰Etiyin idibo na dẹ rhivwi kpo uwevwi rayen.

¹¹Ẹkẹvuọvo Meri Mudia vwẹ obo otafe rẹ ushi rọ viẹ, rọ vwọ viẹ re o de rhuẹn ni evun rẹ ushi na;

¹²ọ da mrẹ emakashe ivẹ vẹ emwa efuanfon, ri tidia vwẹ asan rẹ orivwi ri Jesu epha jovwo na, ọvo hẹ obo uyovwi ọvo hẹ obo awọ.

¹³Ayen da ta kẹ, Aye, die wọ vwọ viẹ? Ọ da ta kẹ ayen, Fikiridie ayen mu Ọrovwovwe reyọ, ye me riẹn asan rẹ ayen muro phihọ-ọ.

¹⁴Rọ vwọ ta ọnana, o de kuoma rhẹriẹ ọ da mrẹ Jesu ro mudia, ẹkẹvuọvo ọ gbe riẹn nẹ ọye Jesu-u.

¹⁵Jesu da ta kẹ, Aye, die wọ vwọ viẹ? Ono wọ guọnọ? Rọ vwọ reyọ roro ohwo ro vwo ogba na, ọ da ta kẹ, Ọga, ọ da dia owẹ ri muro reyọ ta kẹ vwẹ asan wo muro phihọ, rere mi re muo reyọ.

¹⁶Jesu da ta kẹ, Meri. Ọ de kuoma rhẹriẹ ọ da ta kẹ vwi Hibru, Raboni (otọ rọye oyono)

¹⁷Jesu da ta kẹ, Wọ yọnrọn ovwẹ-ẹ, kidiẹ mi ji yeri bru Ọsẹ na-a; ẹkẹvuọvo yanran bru imoni mẹ re wọ ta kẹ ayen, Mi yerẹ bru Ọsẹ mẹ kugbe Ọsẹ rẹ ovwan, Ọghẹnẹ mẹ kugbe Ọghẹnẹ rẹ ovwan.

¹⁸Meri ri Magdala da yanran ra ta kẹ idibo na, Me mrẹ Ọrovwohwo na; ọ da ta kẹ ayen nẹ ọye re ta imu nana kẹ.

¹⁹Vwẹ ovwọnvwọn rẹ ẹdẹ yena, ẹdẹ rẹsosuọ rẹ ẹdidjala na, yẹ e huhu ẹchẹ vwẹ asan rẹ idibo na epha, vwi fiki rẹ oshọ ri Ju, Jesu da rhe rhi mudia vwẹ uherevie rayen ọ da ta kẹ ayen, Ufuoma dia kẹ ovwan.

²⁰Ọke rọ vwọ ta ọnana nu, ọ da vwẹ abọ rọye vẹ efẹn rọyẹ vwọ nẹ ayen. Etiyin idibo na da ghọghọ rẹ ayen vwọ mrẹ Ọrovwohwo na.

²¹Jesu da rhoma ta kẹ ayen, Ufuoma dia kẹ ovwan. Kirobo rẹ Ọsẹ na ji vwe, ọtiọye mi ji ji ovwan rhe.

²²Ọke rọ vwọ ta ọnana nu, o de ku ẹnwẹn ku ayen, ọ da ta kẹ ayen, Reyọ Erhi Ọfuanfon na.

²³Ovwan da vwẹ imwemwu ghovwo ohwo kohwo, yẹ e vwo ghovwo ayen; ovwan de ji imwemwu rẹ ohwo kohwo vwo, ye jẹ ayen vwo kẹ ayen.

²⁴Asakiephana Tọmọs, ọvo vwẹ ihwivẹ na, re se Agbava, vẹ ayen gbe hẹ etiyin vwẹ ọke ri Jesu vwọ rhe-e.

²⁵Kọye idibo ri chekọ na da ta kẹ, Avwanre mrẹ Ọrovwohwo na. Ẹkẹvuọvo ọ da ta kẹ ayen, Jokpa nẹ me mrẹ inu rẹ ibibẹ duvwuru vwẹ abọ rọye, ri mi de duvwu urhiabọ mẹ phihọ unu rẹ ibibẹ na-a, re mi de ji duvwu obọ mẹ phihọ efẹn rọye-e, mi se segbuyota-a.

²⁶Ẹdẹ ẹrenre vwọ wan nu, idibo rọye ke rhoma hẹ evun rẹ uwevwi, Tọmọs vẹ ayen je herọ. Ye ehuhu echẹ na, ẹkẹvuọvo Jesu da rhe rhi mudia vwẹ uherevie rẹ ayen, ọ da ta, Ufuoma dia kẹ ovwan.

²⁷Etiyin ọ da ta kẹ Tọmọs. Vwẹ urhiabọ wẹn te etinẹ, re wọ mrẹ abọ mẹ; gba riẹn obọ wẹn rhe, re wo vwo te ẹfẹn mẹ; wo jẹ esegbuyota evwo-o, ẹkẹvuọvo segbuyota.

²⁸Tọmọs da kpahe kẹ, Ọrovwovwe kugbe Ọghẹnẹ mẹ!

²⁹Jesu da da kẹ, Wo segbuyota fikiridie wọ mrẹ vwẹ? Ebruba kẹ otu re mrẹre-e dede na yẹ ayen segbuyota.

³⁰Asakiephane Jesu ru eka buebu vwẹ irharo rẹ idibo rọye, re je sio phihọ ọbe nana;

³¹ẹkẹvuọvo e si enana rere ovwan vwo se segbuyota nẹ Jesu hẹ Kristi na, Ọmọ rẹ Ọghẹnẹ na, rere we de segbuyota ovwan vwo se vwo arhọ vwẹ odẹ rọye.