Read urhobo Jọn 21 Bible Online

Jọn 21 - urhobo bible

Jọn 21

¹Rẹ ọnana vwọ wan nu Jesu da rhoma vwẹ oma phia kẹ idibo rọye vwẹ oma rẹ Abadi ri Tiberias; kẹ enẹ ọ vwẹ oma rọye vwọ phia kẹ ayen.

²Saimọn Pita, Tọmọs re se Agbava, Nataniẹl ri Kana ri Galili, emo ri Zebedi, kugbe idibo rọye efa da ghwẹ koko.

³Saimọn Pita da ta kẹ ayen, Mi kpo okọn rẹ iyeri. Ayen da ta kẹ, Avwanre vẹ owẹ ra. Ayen da yanran ra ro okọ na; ẹkẹvuọvo ason yena ayen hwe emuọvo-o.

⁴Rẹ ọke vwo rhie cha re, Jesu de mudia vwẹ erhuru; yẹ idibo na riẹnre nẹ ọye Jesu-u.

⁵Jesu da ta kẹ ayen, Emọ na, we vwo emeri? Ayen da kpahe kẹ, Ẹjo.

⁶Ọ da ta kẹ ayen, Fa ariri na phihọ obọrhe rẹ okọ na, ku we hwe emevo. Ọtiọye na ayen da fa phihọ, asakiephana ayen gbe sa ghwiẹ reyọ-ọ, kidie iyeri buebu muro.

⁷Odibo yena ri Jesu guọnọre na da ta kẹ Pita, Ọye Ọrovwohwo na. Ọke ri Saimọn Pita vwo nyo nẹ ọye Ọrovwohwo na, ọ da vwẹ emwa rọye rhuo, kidie ọ ban phihọ vwo ruẹ iruo na, o de pho teyọ abadi.

⁸Ẹkẹvuọvo idibo ri chekọ de bi okọ na rhe, yẹ ayen siẹ ariri na rọ vọnre vẹ iyeri, kidie ayen vẹ otọ sheri-i, ẹkẹvuọvo kerẹ agbadobọ ujori.

⁹Ọke rẹ ayen vwo te otọ re, ayen da mrẹ erhanre ra vwẹ esia koko phihọ, a vwẹ eri tọn, kugbe ikara.

¹⁰Jesu da ta kẹ ayen, Vwẹ emevo rẹ eri ru we hweri na rhe.

¹¹Ọtiọye na Saimọn Pita da ro okọ na o de si ariri na rhe otọ, ọ vọnre vẹ iyẹri ride, unu rẹ ayen ujughwrẹ gbẹ ihwerha; kirobo rẹ ayen bu te na, ariri na bẹre-e.

¹²Jesu da ta kẹ ayen, A mọ re a re emu. Asakiephana ohwo ọvuọvo yivwi nọ nẹ, Wẹ ono-o? Ayen riẹnre nẹ ọye hẹ Ọrovwohwo na.

¹³Jesu da reyọ ikara ọ da vwọ kẹ ayen, ọtiọye ji te eri na.

¹⁴Asakiephana ọnana kọye asiarha ri Jesu vwẹ oma phia kẹ idibo na ro vwo vrẹn nẹ ughwu na.

¹⁵Ọke rẹ ayen vwọ re emu nu, Jesu da ta kẹ Saimọn Pita, Saimọn, ọmọ ri Jọn, wọ guọnọ ovwẹ nọ enana? Ọ da ta kẹ, E, Ọrovwohwo; Wọ riẹnre nẹ me guọnọ owẹ. Ọ da ta kẹ, Ghẹrẹ imigegede mẹ.

¹⁶O da ta kẹ obọ rivẹ, Saimọn, ọmọ ri Jọn, wọ guọnọ ovwẹ? Ọ da ta kẹ, E, Ọrovwohwo; wọ riẹnre nẹ me guọnọ owẹ. Ọ da ta kẹ, Sẹro rẹ igegede mẹ.

¹⁷Ọ da ta kẹ obọ rerha, Saimọn, ọmọ ri Jọn, wọ guọnọ ovwẹ? Ophu de mu Pita rọ vwọ nọ asiarha gbagba nẹ, Wọ guọnọ ovwẹ? Ọ da ta kẹ, Ọrovwohwo, wọ riẹn emu ejobi re; wọ riẹnre nẹ me guọnọ owẹ. Jesu da ta kẹ, Ghẹrẹ igegede mẹ.

¹⁸Uyota, uyota, me ta kẹ wẹ, ru wẹ vwẹ hẹ ọmọha, wẹ ọvo ri rhuo oma wẹn wo mi kpo asan ro je we; ẹkẹvuọvo wọ da rha ghworo, ku wọ riẹn abọ wẹn, ohwo ọfa ko rhuo we kọ ghwa wẹ kpo asan wọ guọnọ ra-a.

¹⁹(Ọ ta ọnana vwo dje oka rẹ ughwu ro che ghwu rọ da vwẹ urinrin kẹ Ọghẹnẹ,) Rẹ ọnana vwọ wan nu ọ da ta kẹ, Nene uvwe.

²⁰Pita kuoma rhẹriẹ ọ da mrẹ odibo ri Jesu guọnọre na ro nene ayen, ọ rọ vwẹ oma rẹrẹ udu rọye rẹ ayen vwọ ria emu rẹ ovwọnvwọn na rọ nọrọ nẹ, Ọrovwohwo, ono re cha shẹ wẹ?

²¹Ọke ri Pita vwọ mrẹ, ọ da ta kẹ Jesu, Ọrovwohwo, kidie ohwo nana che ru?

²²Jesu da kẹ, Ọ da dia ọhọre mẹ nẹ ọ dia bẹsiẹ me vwọ rhe, kidie ọyena fi kẹ wẹ? Nene uvwe.

²³Ota na da hrabọ ro ohri rẹ imoni na nẹ odibo nana gbi che ghwu-u; ọ diane kẹ Jesu tare nẹ o che ghwu-u, ẹkẹvuọvo, Ọ da dia ọhọre mẹ nẹ ọ dia bẹsiẹ me vwọ rhe, kidie ọyena fi kẹ wẹ?

²⁴Ọnana hẹ odibo na ro se oseri kpahe imu nana, kọye ri si imu nana; avwanre riẹnre nẹ iseri rọye uyota.

²⁵Ẹkẹvuọvo imu efa buebu je herọ ri Jesu ruru; ọ dianẹ ke si ayen ọvuọvo, mi rori mẹ akpọ na dede sa gba ẹbe re si ayen phihọ-ọ.