Read urhobo Jọn 3 Bible Online

Jọn 3 - urhobo bible

Jọn 3

¹Asakiephana ọshare ọvo herọ ohwo ri Farisi, re se odẹ rọye Nikodimọs, osun ri Ju.

²Ọhwo nana de bru Jesu rhe vwẹ ason ọ da ta kẹ, Rabbi, avwanre riẹnre nẹ wọwẹ oyono ro nẹ obọ rẹ Ọghẹnẹ rhe; kidie ohwo ọvuọvo ro se ru eka nana ru wo ruẹ na herọ-ọ, jokpa nẹ Ọghẹnẹ vwọ ba.

³Jesu da kpahe kẹ, Uyota, uyota, me ta kẹ wẹ, jokpa nẹ e rhivwi vwiẹ ohwo-o, o sa mrẹ Ọghẹnẹ-ẹ.

⁴Nikodimọs da ta kẹ, Mavọ e rhivwi vwiẹ ohwo wan rọ da ghwo nu? Ko se rhivwi ro evun rẹ oni rọye ra da rhoma vwiẹ?

⁵Jesu da kpahe, Uyota, uyota, me ta kẹ owẹ, jokpa nẹ e rhivwi vwiẹ ohwo vwẹ ame kugbe Erhi-i, ọ sa ro uvie rẹ Ọghẹnẹ-ẹ.

⁶Ọ re vwiẹri vwẹ ugboma yẹ ọye ọ rẹ ugboma, ọ re vwiẹri vwẹ Erhi yẹ ọye ọ rẹ erhi.

⁷Wo jẹ obo me ta kẹ owẹ na gbe we unu-u, e rhivwi vwiẹ wẹ ọkpokpọ.

⁸Aphopho djuẹ kpo asan ro jere, wo nyo umri rọye, ẹkẹvuọvo wọ riẹn asan ro nẹ cha-a eyẹ asan rọ ra-a; ọtiọye ọ epha kẹ ohwo kohwo rẹ Erhi vwiẹri.

⁹Nikodimọs da ta kẹ, Komavọ ọnana cha dia?

¹⁰Jesu da kpahe kẹ, Wọ dia oyono rẹ Izrẹl, yi wo vwo ẹruọ rẹ imu nana-a?

¹¹Uyota, uyota, me ta kẹ owẹ, avwanre ta ota rẹ obo rẹ avwanre riẹnre ji se oseri rẹ obo rẹ avwanre mrẹre; ẹkẹvuọvo wa reyọ iseri rẹ avwanre-e.

¹²Mi de gbe ikun rẹ akpọ na kẹ ovwan yẹ ovwan sere gbuyota-a, komavọ ovwan se segbuyota mi de gbe ikun rẹ obo odjuvwu kẹ ovwan?

¹³Ohwo ọvuọvo ji yeri kpo obo odjuvwu dẹvo-o ẹkẹvuọvo ọ ro wotọ nẹ obo odjuvwu rhe na, ọye hẹ Ọmọ rẹ ohwo na.

¹⁴Kirobo ri Mosis kpare ọrọdekọ kpenu vwo vi vwẹ evun rẹ aghwa na, ọtiọye a je cha kpare Ọmọ rẹ ohwo kpenu,

¹⁵nẹ ohwo kohwo ro sere gbuyota se vwo vwo arhọ ri bẹdẹ.

¹⁶Kidie ọtiọye Ọghẹnẹ guọnọ akpọ na ọ da vwẹ Ọmọ ọvuọvo rọye na kẹ, rere ohwo kohwo ro sere gbuyota vwo je ẹghwọrọ ẹkẹvuọvo ko vwo arhọ ri bẹdẹ.

¹⁷Kidie Ọghẹnẹ ji Ọmọ na rhe akpọ na, ri brorhiẹ hwe akpọ na-a, ẹkẹvuọvo re akpọ na vwọ sa wan oma rọye rhọ.

¹⁸Ohwo ro sere gbuyota e se bru hwe-e; ohwo ro sere gbuyota-a ye bru hwe nure, fikiridie o se odẹ rẹ Ọmọ rẹ Ọghẹnẹ ọvuọvo na gbuyota-a.

¹⁹Ọnana hẹ obruhwe na, nẹ urhukpe na rhe akpọ na nure, ihwo da guọnọ ebri jẹ urhukpe na vwo, fikiridie uruemu rayen ọbrabra.

²⁰Kidie kohwo kohwo ro ruẹ umwemwu urhukpe tuoma, ọ kpo asan rẹ urhukpẹ epha-a, a da rha vwẹ uruemu rọye phia.

²¹Ẹkẹvuọvo ohwo ro ruẹ emu rẹ uyota kpo asan rẹ urhukpe epha, rere a vwọ mrẹ iruo rọye vughe nẹ o ruẹ ọhọre rẹ Ọghẹnẹ.

²²Rẹ ọnana vwọ wan nu Jesu vẹ idibo rọye de kpo otọ ri Judia; kẹ oboyi ọ vẹ ayen diare da vwẹ ame kẹ ihwo.

²³Yi Jọn je vwẹ ame kẹ ihwo vwẹ Anọn rọ kẹrẹ Salim, fikiridie ame buebu hẹ etiyin; ihwo de bro rhe ọ da vwẹ ame kẹ ayen.

²⁴Kidie ye ji mu Jọn phihọ uwodi-i.

²⁵Asakiephana aphro da rhe dia vwẹ uvwre rẹ idibo ri Jọn vẹ ihwo ri Ju vwẹ oma rẹ orufọn.

²⁶Ayen de bru Jọn rhe, ayen da ra kẹ, Rabbi rọ vẹ owẹ gba herọ vwẹ obo ovrẹn ri Jọdan na, ọ ro wọ dia oseri kẹ na, ọ hẹ etinẹ, ọ vwẹ ame kẹ ihwo, ihwo ejobi re bro ra.

²⁷Jọn da kpahe, Ohwo sa reyọ emuọvo jokpa nẹ a vwe rọ kẹ nẹ odjuvwu rhe.

²⁸Ekpuyovwi rẹ ovwan je dia oseri kẹ vwẹ, nẹ me tare nẹ, Mẹvwẹ hẹ Kristi na-a, ẹkẹvuọvo e ji vwe karo kẹ.

²⁹Ọ rọ yanvwe ọpha ọye hẹ ọshare rẹ ọpha; ugbeyan rẹ ọshare rẹ ọpha na, ro mudia kẹrẹ ro nyo ota rọye, oma ra vwerhọn vwẹ urhuru rẹ ọpha na ro nyo; vwẹ ọtiọye na aghọghọ mẹ na kẹ ọvọnvọn.

³⁰Ọ rho, ẹkẹvuọvo ke me hanvwe.

³¹Ọ ro nẹ obenu rhe ọye ri kpenu ejobi; ọ rọ dia ọ rẹ akpọ na ọye hẹ ọ rẹ akpọ na, ota rẹ akpọ na kọye ọ ta; ọ ro nẹ obo odjuvwu rhe na ọye ri kpenu ejobi.

³²Ọye ri se oseri rẹ obo rọ mrẹre kugbe ọ ro nyori, yẹ ohwo ọvuọvo reyọ iseri rọye-e;

³³ohwo rọ reyọ iseri rọye ka oka phihọ ọnana nẹ, Ọghẹnẹ hẹ uyota.

³⁴Kidie ohwo rẹ Ọghẹnẹ jiri ta ota rẹ Ọghẹnẹ, kidie Ọghẹnẹ vwanvwẹ Erhi na vwọ kẹ;

³⁵Ọsẹ na guọnọ Ọmọ na, o de phi emu na ejobi phihọ obọ.

³⁶Ọ ro se Ọmọ na gbuyota vwo arhọ ri bẹdẹ na; ọ ro rhe mu ọghọ kẹ Ọmọ na-a sa mrẹ arhọ-ọ, ẹkẹvuọvo ophu rẹ Ọghẹnẹ dia uyovwi rọye.