Read urhobo Jọn 5 Bible Online

Jọn 5 - urhobo bible

Jọn 5

¹Rẹ ọnana vwọ wan nu orẹ ri Ju ko te otọ, Jesu de kpo Jerusalẹm.

²Asakiephana vwẹ asan eki rẹ igegede vwi Jerusalẹm na ẹtẹrhe ọvo herọ, ra vwẹ unu ri Hibru se nẹ Bẹtzata, ro vwo ẹguan iyori.

³Eguan nana keye urogho rẹ ehonvwo dia, irhuẹro, ikpono, kugbe otu ri ghwoma re hẹrhẹ ọke rẹ ame na dẹ che kpogho.

⁴Kidie amakashe ruẹ ẹtẹrhe na ọkeọvo o mi kpogho ame na ohwo kohwo rọ karo she teyọ ame na vwẹ ọke ro de kpogho nu, emiavwe kemiavwe rọ hẹ oma rọye ejobi mi ghwe kpo.

⁵Ọshare ọvo hẹ etiyin, rọ họnvwa ẹgbukpe ọgban gbẹ ẹrenre re.

⁶Ọke ri Jesu vwọ mrẹ rọ vwọ riẹn nẹ o shevwerhẹ etiyin krekri re, ọ da ta kẹ, Wọ guọnọre nẹ esivwi uwe?

⁷Ọhonvwo na da kpahe kẹ, Ọga, mi vwo ohwo ọvuọvo ro mu vwe phihọ evun rẹ ẹtẹrhe na vwẹ ọke rẹ ame na de kpogho-o, ọke me da yanran ohwo ọfa me ghwa djẹ karo kẹ vwẹ re she teyọ.

⁸Jesu da ta kẹ, Vrẹn, tọrọ eruẹ wẹn, wọ yan.

⁹Siẹvuọvo na e de ghwe sivwi ohwo na, ọ da tọrọ eruẹ rọye ọ da yan. Asakiephana ẹdẹ yena kẹ ẹdidjala.

¹⁰Ọtiọye na ihwo ri Ju da ta kẹ ọ re sivwiri na, Ọnana ẹdidjala, o rhe fo rere wọ ghwa eruẹ wẹ-ẹn.

¹¹Ẹkẹvuọvo ọ da kpahe kẹ ayen. Ohwo ro sivwi uvwe na re ta kẹ vwẹ nẹ, Tọrọ eruẹ wẹn, re wọ yan.

¹²Ayen da nọ, Ono hẹ ohwo rọ ta kẹ owẹ nẹ, Tọrọ eruẹ wẹn, re wọ yan?

¹³Asakiephana ohwo re sivwiri na gbe riẹn ohwo rọ e pha-a, kidie yi Jesu sioma reyọ nure, yẹ ihwo buebu hẹ asan na.

¹⁴Ukuko rọye re, Jesu da mrẹ vwẹ evun rẹ uwevwi rẹ ẹga na, ọ da ta kẹ, Nighe, oma wẹ kpo re. Wo gbi ruẹ imwemwu ọfa-a, rere emu ro miovwi nọ ọtiọna vwo jẹ uwe ẹvwa.

¹⁵Ohwo na da yanran ra ta kẹ otu ri Ju nẹ Jesu hẹ ohwo ro sivwi ọye.

¹⁶Ọnana kọye sorọ rẹ ihwo ri Ju vwo kpokpo Jesu, fikiridie o ru ọnana vwẹ ẹdidjala.

¹⁷Ẹkẹvuọvo Jesu da kpahe kẹ ayen, Ọsẹ mẹ ji ru iruo te ọke na, kọye mi ji vwo ruẹ.

¹⁸Kọye sorọ rẹ ihwo ri Ju na vwọ rhoma guọnọ hwe, fikiridie ọ dia urhi rẹ ẹdidjala ọvo ọ chọre-e, ẹkẹvuọvo o ji se Ọghẹnẹ Ọsẹ rọye, ọ vwẹ oma rọye vwavwẹ Ọghẹnẹ.

¹⁹Jesu da ta kẹ ayen, Uyota, uyota, me ta kẹ ovwan, Ọmọ na sa vwẹ ọhọrobọ rọye ru emuọvo-o, ẹkẹvuọvo obo rọ mrẹ Ọsẹ na ro ruẹ ọvo ọye o se ru; kidie obo ro ruẹ, ọye Ọmọ na ji ru rhe.

²⁰Kidie Ọsẹ na guọnọ Ọmọ na, o de dje obo rẹ ekpuyovwi rọye ruẹ ejobi vwọ kẹ; iruo re rhonọ ọtiọna eye o che dje kẹ, rere o vwo gbe ovwan unu.

²¹Kidie kirobo rẹ Ọsẹ na kpare irivwi vrẹn na ọ da vwẹ arhọ kẹ ayen na, ọtiọye rhe Ọmọ na je vwẹ arhọ kẹ ayen otu ri jere.

²²Ọsẹ na gu ohwo ọvuọvo-o, ẹkẹvuọvo ọ da vwẹ ẹdjọeguo na vwọ kẹ Ọmọ na,

²³rere ayen ejobi vwo mu ọghọ kẹ Ọmọ na, kirobo rẹ ayen ji mu ọghọ kẹ Ọsẹ na. Ohwo ro rhe mu ọghọ kẹ Ọmọ na-a yo ji mu ọghọ kẹ Ọsẹ na ro jiro rhe-e.

²⁴Uyota, uyota, me ta kẹ owẹ, ohwo ro nyo eta mẹ rọ de se ọ ro ji vwe rhe gbuyota, ko vwo arhọ ri bẹdẹ; e gbi vwo guẹdjọ ọfa-a, ẹkẹvuọvo yo nẹ ughwn kpo arhọ nure.

²⁵Uyota, uyota, me ta kẹ owẹ, ọke cha, o te nu vwẹ asakiephana rẹ irivwi de che nyo urhuru rẹ Ọmọ rẹ Ọghẹnẹ, otu ri nyori ke rhọ.

²⁶Kidie kirobo rẹ Ọsẹ na vwo arhọ vwẹ oma rọye, ọtiọye ọ je vwẹ arhọ na kẹ oma rọye rhe,

²⁷ọ da vwẹ ogangan kẹ ro vwo guẹdjọ, fikiridie Ọmọ rẹ ohwo o ruẹ.

²⁸Wo jẹ ọnana gbe ovwan unu-u; kidie ọke na cha rẹ irivwi rẹ hẹ evun rẹ ishi ejobi che vwo nyo urhuru rọye.

²⁹Ke cha yan phia, otu ri ru ọ rẹ esiri, ki vrẹn kpo arhọ, otu ri ru umwemwu, ki vrẹn kpo ẹdjọeguo.

³⁰Me sa vwẹ ogangan ru emuọvo-o; kirobo ri mi nyori, ọye mi guẹ nene; yẹ ẹdjọeguo mẹ ọ rẹ ọsoso, fikiridie mi ruẹ ọhọrobọ mẹ-ẹ ẹkẹvuọvo ọhore rẹ ọ ro ji vwe rhe.

³¹O da dianẹ mi se oseri kẹ omaobọ mẹ, yẹ iseri mẹ dia uyota-a;

³²ọfa herọ ro se iseri kẹ vwẹ, ye me riẹnre nẹ iseri ro se kpahe ovwẹ na uyota.

³³We ji ohwo bru Jọn, o de se iseri rẹ uyota na.

³⁴Ọ dianẹ iseri ri mi vwori kẹ obọ rẹ ohwo o nurhe-e; ẹkẹvuọvo me ta ọnana rere wan vwọ rhọ.

³⁵Ọye hẹ urhukpẹ rọ la ro lo, ovwan da rhọvwe ghọghọ emerha vwẹ urhukpẹ rọye.

³⁶Ẹkẹvuọvo iseri ri mi vwori rhonọ ọ ri Jọn; kidie iruo rẹ Ọsẹ mẹ vwọ kẹ vwẹ ni mi ru gba, iruo nana dẹn ri mi ruẹ na, se oseri kẹ vwẹ nẹ Ọsẹ na ri ji vwe rhe.

³⁷Ọsẹ na ro ji vwe rhe na ekpuyovwi rọye ji se oseri kẹ vwẹ. We nyo urhuru rọye dẹvo-o, wa je mrẹ ugboma rọye dẹvo-o;

³⁸wa guọnọ nẹ ota rọye dia evun rẹ ovwaan, kidie we se ọ rọ ji rhe na gbuyota-a.

³⁹Wa guọnọ ẹbe efuanfon na, fikiridie we rori nẹ evun rẹ ayen we de vwo arhọ ri bẹdẹ na; ayen ri se oseri kpahe ovwẹ na;

⁴⁰Dede na wa rhovwe bru uvwe rhe re we vwo arhọ na-a.

⁴¹Me guọnọ ejiro rẹ ihwo-o.

⁴²Ẹkẹvuọvo me riẹnre nẹ we vwo ẹguọnọ rẹ Ọghẹnẹ vwẹ evun rẹ ovwa-an.

⁴³Me rhere vwẹ odẹ rẹ Ọsẹ mẹ, ovwan reyọ ovwẹ-ẹ; ọfa da rhe vwẹ ode robọ rọye, ọye ovwan cha reyọ.

⁴⁴Mavọ ovwan vwo vwo segbuyota kpahe otu re guọnọ urinrin rẹ ohwohwo yọ gbe rha guọnọ urinrin ro nẹ obọ rẹ Ọghẹnẹ ọvuọvo rhe-e?

⁴⁵We roro nẹ mi rhi gu ovwan vwọ kẹ Ọsẹ na-a; Mosis ri guẹ ovwan, ohwo re wa vwẹ ẹro so.

⁴⁶Ọ da dianẹ we se Mosis gbuyota, ku we se vwe gbuyota, kidie o siro kpahe ovwẹ.

⁴⁷Ẹkẹvuọvo we rhe se obo ro siri gbuyota-a na, komavọ we se se eta mẹ gbuyota.