Read urhobo Jọn 6 Bible Online

Jọn 6 - urhobo bible

Jọn 6

¹Rẹ ọnana vwọ wan nu Jesu da samu kpo abọ rivẹ rẹ Abadi ri Galili, kọye hẹ Abadi ri Taberas.

²Urogho de bru nene, fikiridie ayen mrẹ eka ro ruru kẹ ihwo re họnvwa.

³Jesu de yeri kpo obenu rẹ ugbenu na, ọ vẹ idibo rọye de tidia te otọ vwẹ etiyin.

⁴Asakiephana Ẹwanvrẹn na, rọ dia orẹ ri Ju na, si kẹre re.

⁵Rọ vwọ kpare ẹro rọye vwo ni, ọ da mrẹ urogho na ri bro cha, Jesu da ta kẹ Filip, Bro ikara avwanre sa dẹ, ro te ihwo nana re?

⁶Ọ ta ọnana vwọ davwọ ni, kidie ekpuyovwi rọye riẹn obọ ro che ruẹ.

⁷Filip da kpahe kẹ, Ikọba ujori ivẹ che te vwọ dẹ ikara ro te ihwo na re-e rẹ emerha de te ohwo ọvuọvo unu.

⁸Ọvo vwẹ idibo rọye na, Andru, oniọvo ri Saimọn Pita, da ta kẹ,

⁹Ọmọshare ọvo hẹ etinẹ ro vwo ọko rẹ ikara iyori kugbe imiyeri ivẹ; ẹkẹvuọvo kidie ena che te ihwo buebu na vwo ruẹ?

¹⁰Jesu da ta, Vwẹ ihwo na tidia tẹ otọ. Asakiephana odi phiẹphiẹphiẹ buebu vọn asan na; ọtiọye ihwo na de tidia te otọ, unu rayen uriori iyori.

¹¹Jesu da reyọ ikara na, rọ vwọ kpẹvwẹ nu, ọ da gharọ kẹ ayen otu ri tidia na; ọtiọye je hẹ eri na, kirobo rẹ ayen guọnọre.

¹²Ọke rẹ ayen vwọ re evun vọn nu, ọ da ta kẹ idibọ roye, Ghwẹ ivwuvwu ri chekọ na koko, e jẹn emu ọvuọvo ghwrẹ-ẹ.

¹³Ọtiọye na ayen da ghwẹ ayen koko e da vọn ibere ihwivẹ rẹ ivwuvwu rẹ emu rẹ ayen re chekọ vwẹ ọko rẹ ekuoka iyọri na.

¹⁴Ọke rẹ ihwo na vwọ mrẹ oka nana rọ ruru, ayen da ta, Uyota ọnana gbine ọmraro na rọ cha akpọ na.

¹⁵Rọ vwọ riẹn nẹ ayen cha vwẹ ogangan reyọ vwo mu ovie, Jesu da rhoma sioma reyọ nẹ ohri rẹ ayen kpo obo vwo kpo obo igbenu na.

¹⁶Ọke rẹ ovwọnvwọn vwo te, idibo rọye de kpo obo abadi na,

¹⁷Ayen ro okọ, ayen da sa abadi na mu kpo Kepanọm. Yẹ ọke na kpore, yi Jesu ji bru ayen rhe-e.

¹⁸Abadi na kọ họnra fiki rẹ aphopho rode ro djuẹ.

¹⁹Ọke rẹ ayen vwo bi kerẹ emu rẹ uroko erha eyẹ ẹne re, ayen da mrẹ Jesu rọ yan vwẹ enu rẹ abadi ko siẹ kẹrẹ okọ na. Ayen de guegue,

²⁰ẹkẹvuọvo ọ da ta kẹ ayen, Mẹvwẹ; wa djẹ oshọ-ọ.

²¹Etiyin oma da vwerhe ayen reyọ phihọ evun rẹ okọ na, siẹvuọvo na okọ na da ghwa vware otọ vwẹ asa rẹ ayen ra na.

²²Vwẹ ẹdẹ rivẹ ihwo re daji obo o vrẹn rẹ abadi na da mrẹ nẹ okọ ọvuọvo ri chekọ vwẹ etiyin, nẹ Jesu vẹ idibo rọye ro okọ na-a, ẹkẹvuọvo idibo rọye ọvo re yanran.

²³Kọye, ekọ efa ri nẹ Taberas rhe de rhi bi kẹrẹ asan na rẹ ayen da re ikara na rẹ Ọrovwohwo vwọ kpẹvwẹ nu na.

²⁴Ọtiọye na rẹ ihwo na vwọ mrẹ nẹ Jesu hẹ etiyi-in, eyẹ idibo rọye-e, ekpuyovwi rẹ ayen da ro ekọ na ayen de kpo Kepanọm, ra guọnọ Jesu.

²⁵Ọke rẹ ayen vwọ mrẹ vwẹ obo o vrẹn rẹ abadi na, ayen da ta kẹ, Rabbi, Ọkevọ wọ vwọ rhe obonẹ?

²⁶Jesu da kpahe kẹ ayen, Uyota, uyota, me ta kẹ ovwan, wa guọnọ ovwẹ, ọ dia fiki rẹ eka rẹ ovwan mrẹre-e, ẹkẹvuọvo fiki rẹ ikara rẹ ovwan rere rẹ evun da vọn ovwan na.

²⁷Ovwan wian owian fiki rẹ emuọre rọ ghwọrọ-ọ; ẹkẹvuọvo fiki rẹ emuọre rọ tọn re te arhọ ri bẹdẹ, rẹ Ọmọ rẹ ohwo cha vwọ kẹ ovwan; kidie enu rọye ọye Ọghẹnẹ Ọsẹ na ka oka rọye phihọ.

²⁸Etiyin ayen da ta kẹ, Kidie avwanre ru, re vwo ru iruo rẹ Ọghẹnẹ?

²⁹Jesu da kpahe kẹ ayen, Ọnana hẹ iruo rẹ Ọghẹnẹ, rere we vwo se ọ ro ji vwe rhe na gbuyota.

³⁰Ọtiọye na ayen da ta kẹ, Ọ da dia ọtiọye ki didi oka wo se ru, rere avwanre mrẹ, vwo se we gbuyota? Didi iruo wo ruẹ?

³¹Esẹ rẹ avwanre re mana vwẹ aton; kirobo re siro, Ọ vwẹ ikara nẹ odjuvwn rhe kẹ ayen re.

³²Jesu da ta kẹ ayen, Uyota, uyota, me ta kẹ ovwan, ọ dia Mosis re vwẹ ikara nẹ odjuvwu rhe ovwa-an; Ọsẹ mẹ re vwẹ ikara rẹ uyota na nẹ odjuvwu rhe kẹ ovwan.

³³Kidie ikara rẹ Ọghẹnẹ na hẹ ohwo rọ nẹ obo odjuvwu rhe, ọ da vwẹ arhọ kẹ akpọ na.

³⁴Ayen da ta kẹ, Ọrovwohwo, gba kẹ avwanre ikara nana kọke kọke.

³⁵Jesu da ta kẹ ayen, Mẹvwẹ hẹ ikara rẹ arhọ na; ohwo ro bru uvwe rhe owẹvwe gbi hwe-e, ohwo ro se vwe gbuyota urhuru rẹ ame gbi hwe bẹdẹ-ẹ.

³⁶Ẹkẹvuọvo me ta kẹ ovwan nẹ ovwan mrẹ vwẹ yẹ ovwan segbuyota-a.

³⁷E rẹ Ọsẹ mẹ vwọ kẹ vwẹ ejobi che bru uvwe rhe, ọ ro bru uvwe rhe nu me sa djẹ kufia-a.

³⁸Kidie mi nẹ obo odjuvwu rhe, rhi ru ọhọre mẹ-ẹ, ẹkẹvuọvo ọhọre rẹ ọ ro ji vwe rhe;

³⁹ọnana hẹ ọhọre rẹ ọ ro ji vwe rhe na, nẹ ọvuọvo rọ vwọ kẹ vwẹ na va vwẹ abọ ghwrẹ-ẹ, ẹkẹvuọvo re me kparọ vrẹn vwẹ ẹdẹ rẹ oba na.

⁴⁰Kidie ọnana hẹ ọhọre rẹ Ọsẹ mẹ na, nẹ ohwo kohwo rọ mrẹ Ọmọ na nu ro de segbuyota ko vwo arhọ ri bẹdẹ; ke me kparọ vrẹn vwẹ ẹdẹ rẹ oba na.

⁴¹Ihwo ri Ju na ki guo, fikiridie ọ tare, Mẹvwẹ hẹ ikara ro nẹ obo odjuvwu rhe.

⁴²Ayen da ta, Ọnana dia Jesu, rẹ ọmọ ri Josẹf, rẹ avwanre riẹn ọsẹ vẹ oni rọye na? Mavọ ọ rha vwọ ta vwẹ asakiephana nẹ, Mi nẹ obo odjuvwu rhe?

⁴³Jesu da kpahe kẹ ayen, We guẹ vwẹ omoma rẹ ovwa-an.

⁴⁴Ohwo ọvuọvo se bru uvwe rhe-e jokpa nẹ Ọsẹ na ro ji vwe na siro toma; ke me kparọ vrẹn vwẹ ẹdẹ rẹ oba na.

⁴⁵E siro phihọ ọbe rẹ emraro na nẹ, Ọghẹnẹ ọvo ko che yono ayen ejobi. Kohwo kohwo ro nyori ro de yono mie Ọsẹ na ko bru uvwe rhe.

⁴⁶Ọ dianẹ kẹ ohwo ọvo mrẹ Ọsẹ na-a jokpa rẹ ọ ro nẹ obọ rẹ Ọghẹnẹ rhe; ọye re mrẹ Ọsẹ na.

⁴⁷Uyota, uyota, me ta kẹ owẹ, ohwo ro segbuyota o vwo arhọ ri bẹdẹ.

⁴⁸Mẹvwẹ hẹ ikara rẹ arhọ na.

⁴⁹Esẹ rẹ ovwan re mana vwẹ evun rẹ aghwa, ayen de ghwu.

⁵⁰Ọnana hẹ ikara ro nẹ obo odjuvwu rhe, rẹ ohwo da riọ nu o gbi ghwẹ-ẹ.

⁵¹Mẹvwẹ hẹ Ikara ro je ghwo na ro nẹ obo odjuvwu rhe na; ohwo da re ikara nana nu, kọ rhọ bẹdẹ; ikara na re me cha kẹ fiki rẹ arhọ rẹ akpọ na ọye hẹ uvwo rẹ oma mẹ.

⁵²Ihwo ri Ju ke phra vwẹ omoma rẹ ayen, tanẹ, Komavo ohwo nana vwọ vwẹ uvwo rẹ oma rọye kẹ avwanre re?

⁵³Ọtiọye na Jesu da ta kẹ ayen, Uyota, uyota, me ta kẹ owẹ, jokpa nẹ wọ re uvwo rẹ oma rẹ Ọmọ rẹ ohwo re wọ da da obara rọye-e, ovwan se vwo arhọ vwẹ oma rẹ ovwa-an;

⁵⁴ohwo ro re uvwo rẹ oma mẹ rọ da da ọbara mẹ ko vwo arhọ ri bẹdẹ, ke me kparọ vrẹn vwẹ ẹdẹ rẹ oba na.

⁵⁵Kidie uvwo mẹ ghine hẹ emuọre dẹn, ọbara mẹ gbine hẹ udi dẹn.

⁵⁶Ohwo rọ re uvwo mẹ rọ da da ọbara mẹ kọ dia vwẹ evun mẹ, ke me je dia evun rọye.

⁵⁷Kirobo rẹ Ọsẹ ro je ghwo na ju vwe na, re me da rhọ fiki rẹ Ọsẹ na, ọtiọye ohwo rọ re vwe nu je rhọ fiki mẹ.

⁵⁸Ọnana hẹ ikara ro nẹ obo odjuvwu rhe na, ọ dia oghẹre rẹ esẹ na rere ri de ghwu-u; ohwo rọ re ikara nana kọ rhọ bẹdẹ.

⁵⁹Ọnana ọ tare vwẹ evun ri sinegọg, ro vwo yono vwi Kepanọm.

⁶⁰Ọke rẹ idibo rọye buebu, vwo nyo, e da ta, Ọnana ota ọgangan; kono sa kerhọn rọye?

⁶¹Ẹkẹvuọvo Jesu, vwọ riẹn vwẹ oma rọye nẹ idibo na guo, ọ da ta kẹ ayen, Ke ophu muẹ ovwan vwẹ ọnana?

⁶²Komavọ ọ dia rẹ ovwan da mrẹ Ọmọ rẹ ohwo ro yere kpenu vwẹ asan rọ epha jovwo?

⁶³Erhi na re kẹ arhọ, uvwo fi erere ọvuọvoo; eta na re me ta kẹ ovwan na eye hẹ erhi kugbe arhọ.

⁶⁴Ẹkẹvuọvo evo vwẹ ohri rẹ ovwan na segbuyota-a. Kidie Jesu riẹnre nẹ ẹsosuọ rhe ayen otu ri jiro esegbuyota, kugbe ohwo rọ je cha shẹ na.

⁶⁵Ọ da ta, Ọnana re sorọ re me vwọ ta kẹ ovwan nẹ ohwo ọvuọvo se bru uvwe rhe-e jokpa nẹ Ọsẹ na rhọvwe phihọ.

⁶⁶Rẹ ọnana vwọ wan nu idibo rọye buebu de sihọ uko ayen gbi nene yan ọfa-a.

⁶⁷Jesu da ta kẹ ihwivẹ na, Ovwan je yanran rhe?

⁶⁸Saimọn Pita da kpahe kẹ, Ọrovwohwo, kono mi bru ra? Wẹ ri vwo eta rẹ arhọ ri bẹdẹ na;

⁶⁹avwanre ji segbuyota, avwanre je rhe riẹn nẹ, wẹ hẹ Ọfuanfon Ọvuọvo rẹ Ọghẹnẹ.

⁷⁰Jesu da kpahe kẹ ayen, Ọ dia ihwivẹ rẹ ovwan me sanọre-e, ọvo vwẹ usun rẹ ovwan na kẹ idẹbono?

⁷¹Ọ ta ota kpahe Judas ọmọ ri Saimọn Iskariọt, kidie ọye, ọvo vwẹ ihwivẹ na, rọ cha shẹ.