Read urhobo Jọn 7 Bible Online

Jọn 7 - urhobo bible

Jọn 7

¹Rẹ ọnana vwọ wan nu Jesu kẹ yan vwi Galili; ọ gbe guọnọ kpo Judia-a, fikiridie ihwo ri Ju na guọnọ hwe.

²Asakiephana orẹ rẹ Ọgarivi rẹ ihwo ri Ju si kẹre re.

³Ọtiọye na iniọvo rọye da ta kẹ, Vrẹn nẹ etinẹ re wo kpo Judia, rere idibo wẹn vwọ mrẹ iruo ru wo ruẹ.

⁴Kidie o vwo ohwo rọ guọnọ emu ruẹ vwẹ azagba ro de sionẹ vwẹ uvu-un. Wo de gbine ruẹ imu nana, gbe dje oma wẹn kẹ akpọ.

⁵Kidie iniọvo rọye dẹn na seregbuyota-a.

⁶Jesu da ta kẹ ayen, Ọke mẹ ji rhi te-e, ẹkẹvuọvo ọke rẹ ovwan ọ hẹ obọ rẹ ovwan.

⁷Akpọ na se tuoma rẹ ovwa-an, ẹkẹvuọvo o tuoma mẹ fikiridie mi se oseri kpahọ nẹ iruo rọye ọ rẹ uvumwemwu.

⁸Ekpuyovwi rẹ ovwan se kpo orẹ na; mi che kpo orẹ na-a, kidie ọke mẹ je nabọ te-e.

⁹Ọtiọye na rọ vwọ ta nu, ọ da daji Galili.

¹⁰Ẹkẹvuọvo rẹ Iniọvo rọye vwọ yanran kpo orẹ na nu, etiyin ekpuyovwi rọye da je ra, ọ vwẹ oma phia-a ẹkẹvuọvo vwẹ odjahọ.

¹¹Ihwo ri Ju na ke guọnọ vwẹ orẹ na, tanẹ, Tivọ ọ epha?

¹²Kẹ ayen guẹ huhuhu vwẹ ohri rẹ ihwo na. Yẹ evo ra tanẹ, Ohwo esiri o ruẹ, Efa da rha ta, Ejo, o suẹn ihwo na ghwrẹ.

¹³Vwi fiki rẹ osho ri Ju na ohwo ọvuọvo gbe ta ota rọye phia-a.

¹⁴Vwẹ uherevie rẹ orẹ na Jesu da yanran kpo uwevwi rẹ ẹga na o de yono.

¹⁵Ọ de gbe ihwo ri Ju na unu, tanẹ, Mavọ ohwo nana vwo vwo erianriẹn, yo ji kpo uyono dẹvo-o?

¹⁶Ọtiọye na Jesu da kpahe kẹ ayen, uyono mẹ dia ọmẹ-ẹ, ẹkẹvuọvo ọ rẹ o ro ji vwe rhe;

¹⁷ọ da dianẹ ohwo vwo ọhọre ro vwo ru ọhọre rọye gba, ko cha riẹn sẹ uyono na obọ rẹ Ọghẹnẹ o nurhe eyẹ se ogangan robọ mẹ me vwọ ta ota na.

¹⁸Ọ rọ vwẹ ogangan robọ rọye ta ota yọ guọnọ urinrin robo rọye; ẹkẹvuọvo ọ rọ guọnọ urinrin rẹ ohwo ro jiro rhe yẹ ọye ohwo rẹ uyota, kaka efian rhere-e.

¹⁹Ọ dia Mosis re kẹ ovwan urhi na? Yẹ ovwan ọvuọvo yọnre urhi na-a. Kidie wa vwọ guọnọ ovwẹ hwe?

²⁰Ihwo na da kpahe, Wo vwo idẹbono! Kono re guọnọ owẹ hwe?

²¹Jesu da kpahe kẹ ayen, Emu rẹ igbunu ọvuọvo ọ ye mi ruru, o de gbe ovwan ejobi unu.

²²Mosis kẹ ovwan oyanvwe ọ dianẹ obọ ri Mosis o nurhe-e, ẹkẹvuọvo obọ rẹ ọsẹ na, yẹ ovwan yanvwe ohwo vwẹ edidjala.

²³Ọ da dianẹ ovwan yanvwe ohwo vwẹ ẹdidjala, rere e vwo jẹ urhi ri Mosis ẹchọ, kẹ ivun miovwẹ ovwan ri mi vwo sivwi ekroma soso vwẹ ẹdidjala?

²⁴We nẹ opharo guẹdjọ-ọ, ẹkẹvuọvo we guẹdjọ rẹ ọsoso.

²⁵Ihwo ri Jerusalẹm evo da ta, Ọnana dia ohwo rẹ ayen guọnọ hwe na-a?

²⁶Ọye hẹ etinẹ na, rọ ta ota vwẹ azagba na, yẹ ayen kpahe ota ọvuọvo kẹ-ẹ. Kẹ otu ri vwo ogangan rẹ usuo na sa riẹn nẹ ọnana hẹ Kristi na?

²⁷Avwanre riẹn asan rẹ ohwo nana nurhe; ọke ri Kristi na da rhe, ohwo ọvuọvo cha riẹn asan ro nurhe-e.

²⁸Kọye Jesu de ghwoghwo, ro vwo yono vwẹ uwevwi rẹ ẹga na, Wa riẹn vwẹ, wa je riẹn asan ri mi nurhe? Ẹkẹvuọvo me vwẹ ọhọrobọ mẹ rhe-e; ohwo ro ji vwe rhe na hẹ uyota, kọye ovwan jẹ riẹn na.

²⁹Me riẹnrẹ, kidie obọ rọye mi nurhe, ọye ri ji vwe rhe.

³⁰Ọtiọye na kẹ ayen guọnọ muẹ; ẹkẹvuọvo ohwo ọvuọvo shabọ phihọ-ọ, fikiridie ọke rọye ji rhi te-e.

³¹Yẹ ihwo na buebu sere gbuyota; ayen da ta, Ọke rẹ Kristi na da rhe, ko che ru eka re nọ ọ rẹ ohwo nana ruẹ na?

³²Farisi na de nyo ihwo na ri guẹ huhuhu kpahọ, ilori rẹ irherẹn kugbe Farisi de ji iruiruo re muo.

³³Etiyin Jesu da ta, Me vẹ ovwan je cha dia emerha, ki mi che rhivwi bru ọ ro ji vwe ra;

³⁴ovwan cha guọnọ ovwẹ yẹ ovwan cha mrẹ vwẹ-ẹ; asan re me epha ovwan che se te-e.

³⁵Ihwo ri Ju na da ta kẹ ohwohwo, Tivọ ohwo nana guọnọ ra rẹ avwanre de jẹ mrẹ? Kọ guọnọ bru otu re hrabọ ro ohri rẹ ihwo ri Grik na re yono ihwo ri Grik?

³⁶Die ọ vwẹ ota nana ta, Wọ cha guọnọ ovwẹ yu wo cha mrẹ vwẹ-ẹ, Asan re me epha we che se te-e?

³⁷Vwẹ ẹdẹ rọ ka oba vwẹ orẹ na, ẹdẹ rode na, Jesu de mudia o de ghwoghwo, Ohwo rẹ urhuru rẹ ame hwe, e jo bru uvwe rhe rhe da.

³⁸Ọ ro se vwe gbuyota, kirobo rẹ ọbe ọfuanfon na tare, Irhie rẹ arhọ ke djẹ nẹ udu rọye rhe.

³⁹Asakiephana ọ ta ọnana kpahe Erhi na, rẹ otu ri sere gbuyota che vwo; kidie rhi te ọke na yọ je vwẹ Erhi na kẹ aye-en, fikiridie yẹ a je vwẹ urinrin na kẹ-ẹ.

⁴⁰Ọke rẹ ayen vwo nyo eta nana, evo vwẹ ihwo na da ta, Ọnana ghene hẹ ọmraro na.

⁴¹Efa da rha ta, Ọnana hẹ Kristi na. Ẹkẹvuọvo evo da ta, Kristi na kẹ Galili o che nurhe?

⁴²Ọ dianẹ ọbe ọfuanfon na tare nẹ uvwiẹ ri Devid Krisri na che nurhe, o che nẹ Bẹtlẹhẹm rhe, ọko ri Devid diare jovwo?

⁴³Ọtiọye na ohẹriẹ da hẹ ohri rẹ ihwo na fiki rọye.

⁴⁴Evo vwẹ usun rẹ ayen da guọnọ mu, ẹkẹvuọvo ohwo ọvuọvo shabọ phihọ-ọ.

⁴⁵Iruiruo na de rhivwi bru ilori rẹ irherẹn na kugbe Farisi na, re ta kẹ ayen, Die we gbi muo rhe-e?

⁴⁶Iruiruo na da kpahe, A je mrẹ ohwo rọ ta ota kerẹ ohwo nana-a.

⁴⁷Farisi na da kpahe kẹ ayen, A je phiẹn ovwan ghwru rhe?

⁴⁸Kẹ otu ri vwo ogangan na eyẹ Farisi na sere gbuyota?

⁴⁹Ẹkẹvuọvo vwọ kẹ otu nana, re riẹn urhi na-a na, e duvwu ayen iyori.

⁵⁰Nikodimọs, rọ bru ro ra jovwo na, rọ je dia ọvo vwẹ usun rẹ ayen, da ta kẹ ayen,

⁵¹Kẹ urhi rẹ avwanre brorhiẹ hwe ohwo ye ji nyo ọ rẹ unu rọye ra da mrẹ obo ro ruru-u?

⁵²Ayen da kpahe, Galili wo ji nurhe? Nabọ fuẹrẹ, wọ cha mrẹ nẹ ọmraro ọvuọvo che nẹ Galili cha-a. [

⁵³Dohwo duwevwi rọye da ra.