Read urhobo Jọn 8 Bible Online

Jọn 8 - urhobo bible

Jọn 8

²Vwẹ irhiọke ride ọ da rhoma rhe uwevwi rẹ ẹga na; ihwo na ejobi de bro rhe, o de tidia o de yono ayen.

³Isiẹbe na kugbe Farisi na da reyọ ayen ọvo re muru ro gbe igberadja bro rhe, ayen da reyọ phihọ uherevie.

⁴Ayen da ta kẹ, Oyono, e mu aye nana ro gbe igberadja.

⁵Askiephana vwẹ evun rẹ urhi na Mosis ta kẹ avwanre nẹ e phi ohwo ọtiọye hwe. Kidie wọ ta kpahọ?

⁶Ayen ta ọnana vwọ davwọ ni, rere ayen vwọ mrẹ emu keri muo obọ. Jesu rhuẹri kọ vwẹ urhiabọ siotọ.

⁷Rẹ ayen vwo dje ẹ nọ ẹ nọ re, o vrẹn mudia ọ da ta kẹ ayen, E jẹn ohwo ro ji ru umwemwu vwẹ ohri rẹ ovwan na dẹvo-o ka tọrọ ukpokpo vwo phio.

⁸Ọ da rhoma rhuẹ rọ vwẹ urhiabọ vwo siotọ.

⁹Ẹkẹvuọvo ọke rẹ ayen vwo nyo, ayen da yanran, ohwo ọvuọvo, nẹ okpako rhiri re te ọkẹ oba, Jesu ọvo kọye ri chekọ kugbe aye na ro mudia vwẹ obaro rọye.

¹⁰Jesu vwọ kpare opharo nẹ otọ rhe ọ da ta kẹ, Aye, kẹ ayen rhọ? Ohwo ọvuọvo rhe bruhwe we-e?

¹¹Ọ da ta, Kaka ohwo, Ọrovwohwo. Jesu da ta, Yi mi ji bruhwe we rhe-e; kpo, wo gbi ru umwemwu ọfa-a.

¹²Jesu da rhoma ta kẹ ayen, tanẹ, Mẹvwẹ hẹ urhukpe rẹ akpọ na; ohwo ro nene uvwe ọ gbe sa yan vwẹ evun rẹ ebrii, ẹkẹvuọvo ko vwo urhukpe rẹ arhọ.

¹³Etiyin ihwo ri Farisi da ta kẹ, Wọwẹ ọvo ri se oseri kẹ oma wẹn; iseri wẹn dia uyota-a.

¹⁴Jesu da kpahe, Ọ da tobọ dianẹ mi se oseri kẹ omaobọ mẹ, iseri mẹ o rẹ uyota, kidie mẹ riẹn asan ri mi nurhe me je riẹn asan re me ra, ẹkẹvuọvo ovwan riẹn asan ri mi nurhe-e eyẹ asan re me ra-a.

¹⁵Ovwan guẹdjọ nene ugboma, mi guẹdjọ rẹ ohwo-o.

¹⁶Yẹ me da tobọ guẹdjọ, edjọ mẹ ọ rẹ uyota, kidiẹ ọ dia o mẹvwẹ ọvo ri guẹdjọ na-a, ẹkẹvuọvo mẹvwẹ vẹ ọ ro ji vwẹ rhẹ.

¹⁷Vwẹ ẹvun rẹ urhi rẹ ovwan e siro nẹ oseri rẹ ihwo ivẹ uyota;

¹⁸Mi se oseri kẹ oma mẹ, Ọsẹ na ro ji vwe rhe na ji se oseri kẹ vwẹ.

¹⁹Ayen da ta kẹ, Tivọ Ọsẹ wẹn epha? Jesu da kpahe, Wa riẹn vwẹ vwo siẹvo kẹ Ọsẹ mẹ-ẹ; ọ dianẹ ovwan riẹn vwẹ, manẹ ovwan je riẹn Ọsẹ mẹ na rhe.

²⁰Ọ ta eta nana vwẹ evun rẹ uwevwi rẹ efe, ro vwo yono vwẹ uwevwi rẹ ẹga na; ẹkẹvuọvo ohwo ọvuọvo muro-o, fikiridie ọke rọye ji te-e.

²¹Ọ da rhoma ta kẹ ayen, Me yanran, kẹ ovwan cha guọnọ ovwẹ ku we ghwu vwẹ umwemwu rẹ ovwan; asan re me ra, ovwan che se te-e.

²²Etiyin ihwo ri Ju na da ta, Ko che hwe oma rọye, rọ vwọ ta nẹ, Asan re me ra, ovwan che se te-e?

²³Ọ da ta kẹ ayen, obotọ ovwan nurhe, obenu mi nurhe; ovwan hẹ ihwo rẹ akpọ nana, me dia ohwo rẹ akpọ nana-a.

²⁴Me ta kẹ ovwan nẹ we che ghwu phihọ imwemwu rẹ ovwan, kidie we che ghwu phihọ imwemwu rẹ ovwan jokpa nẹ ovwan segbuyota nẹ mẹvwẹ hẹ ọye.

²⁵Ayen da ta kẹ, Wẹ ono? Jesu da ta kẹ ayen, kọye hẹ obo re me ta kẹ ovwan notọrhe na.

²⁶Mi vwo emu buebu re me ta kpahe ovwan kugbe emu buebu mi gu kpahe ovwan; ẹkẹvuọvo ọ ro ji vwe rhe na uyota, obo ri mi nyo mie kọye mi ghwoghwo kẹ akpọ na.

²⁷Ọ rha ro ayen nẹ ota rẹ Ọsẹ na ọ ta kẹ ayen na-a.

²⁸Ọtiọye na Jesu da ta, Ọke rẹ ovwan da kpare Ọmọ rẹ ohwo kpenu, etiyin kẹ ovwan riẹn nẹ mẹvwẹ hẹ ọye, nẹ mi vwẹ ogangan robọ mẹ ru emu ọvuọvo-o ẹkẹvuọvo me ta enẹ kirobo rẹ Ọsẹ na yono uvwe.

²⁹Ọ ro ji vwe rhe na vẹ ovwẹ herọ; o che jẹ uvwe ọvo vwo-o, kidie mi ru obo ri je kọke kọke.

³⁰Rọ vwọ ta ọnana nu, ihwo buebu de segbuyota.

³¹Jesu da ta kẹ otu ri Ju ri sere gbuyota, Wo de phi obọ phihọ ota mẹ vwẹ ọ rẹ uyota ovwan ke dia idibo mẹ,

³²ovwan ke riẹn uyota na, uyota na ko ru ovwan phihọ ọmuvwiẹ.

³³Ayen da kpahe kẹ, avwanre uvwiẹ rẹ Ebraham, avwanre je dia ọviẹn rẹ ohwo dẹvo-o. Komavọ wọ vwọ ta nẹ, Ke ru ovwan ọmuvwiẹ?

³⁴Jesu da kpahe kẹ ayen, Uyota, uyota, me ta kẹ ovwan, kohwo kohwo ro ru umwemwu ọye hẹ ọviẹn rẹ umwemwu.

³⁵Ọviẹn na sa dia uwevwi na bẹdẹ-ẹ; ọmọ na dia bẹdẹ.

³⁶Ọtiọye na ọ da dianẹ Ọmọ na ru uwe phihọ ọmuvwiẹ, ku wọ dia ọmwuvwiẹ rẹ uyota.

³⁷Me riẹnre nẹ ovwan hẹ uvwiẹ rẹ Ebraham; yẹ ovwan guọnọ ovwẹ hwe, fikiridie ota mẹ mrẹ asan dia vwẹ evun rẹ ovwa-an.

³⁸Me ta ota rẹ obo re me mrẹre vwẹ obọ rẹ Ọsẹ mẹ, yẹ ovwan ruẹ obo ru we nyo mie ọsẹ rẹ ovwan.

³⁹Ayen da kpahe kẹ, Ebraham hẹ ọsẹ rẹ avwanre. Jesu da ta kẹ ayen, Ovwan da dia emọ rẹ Ebraham, ku we ru obo rẹ Ebraham ruru,

⁴⁰ẹkẹvuọvo asakiephana ovwan guọnọ ovwẹ hwe, ohwo rọ ta uyota ro nyo miẹ Ọghẹnẹ rhe; Ebraham ru ọtiọna-a.

⁴¹We ruẹ obo rẹ ọsẹ rẹ ovwan ruru. Ayen da ta kẹ, A vwẹ igberadja vwiẹ avwanre-e; avwanre vwo Ọsẹ ọvo, ọye Ọghẹnẹ.

⁴²Jesu da ta kẹ ayen, Ọ da dianẹ Ọghẹnẹ hẹ Ọsẹ rẹ ovwan, kẹ ovwan a guọnọ ovwẹ, kidie obọ rẹ Ọghẹnẹ na mi nurhe; me vwẹ ọhorobọ mẹ rhe-e, ẹkẹvuọvo ọye ji vwe rhe.

⁴³Kidie obo mẹ tare vwo jẹ ovwan ẹruọ? Fikiridie ovwan guọnọ ota mẹ nyo-o.

⁴⁴Ovwan ọ rẹ ọsẹ rẹ ovwan idẹbono, ẹguọnọ rẹ ọsẹ rẹ ovwan ọye we ruẹ na. Ozighẹ o ruẹ nẹ otọrhe, kaka uyota rhere-e, fikiridie uyota na hẹ evun rọye-e. Ọke rọ da vwọnrọn ofian, ọ ta ota kirobo rẹ uruemu robọ rọye epha, kidie ọ vwọnrọn ofian o ruẹ ọye hẹ ọsẹ rẹ ofian.

⁴⁵Ẹkẹvuọvo, fikiridie me ta uyota na, ovwan gbi se vwe gbuyota-a.

⁴⁶Ono vwẹ usun rẹ ovwan na ri kere umwemwu ba vwẹ obọ? Ọ da dianẹ me ta uyota na, kidie ovwan gbi se vwe gbuyota-a?

⁴⁷Ọ rọ dia ọ rẹ Ọghẹnẹ nyo eta rẹ Ọghẹnẹ; otọ rẹ obo rẹ ovwan gbi nyo aye-en na kọye sorọ rẹ ovwan vwo jẹ ọ rẹ Ọghẹnẹ ẹ dia.

⁴⁸Ihwo ri Ju da kpahe kẹ, Avwanre rha ta uyota rẹ avwanre vwọ tanẹ wẹ ohwo ri Sameria nẹ wo vwo idẹbono?

⁴⁹Jesu da kpahe, Mi vwo idẹbono-o; ẹkẹvuọvo mi mu ọghọ kẹ Ọsẹ mẹ, yẹ ovwan mu ọghọ kẹ vwẹ-ẹ.

⁵⁰Ye me guọnọ urinrin rẹ oma mẹ-ẹ; Ọvo herọ rọ guọnerọ, ọye re cha dia oguẹdjọ.

⁵¹Uyota, uyota, me ta kẹ ovwan, ohwo da sẹro rẹ eta mẹ, ọ gbe cha mrẹ ughwu bẹdẹ-ẹ.

⁵²Ihwo ri Ju da ta kẹ, Asakiephana avwanre riẹnre nẹ wo vwo idẹbono. Ebraham ghwuru, ọtiọye je hẹ emraro na; yu wọ ta nẹ, Ohwo da sẹro rẹ eta mẹ, ọ gbe davwe ughwu bẹdẹ-ẹ

⁵³Wọ rhonọ ọsẹ rẹ avwanre Ebraham, ro ghwuru? kugbe emraro na ri ji ghwu! Ono wọ vwẹ oma wẹn dje vwo?

⁵⁴Jesu da kpahe, Me da vwẹ urinrin kẹ oma mẹ, yẹ urinrin mẹ kẹ odiodi; Ọsẹ mẹ re vwẹ urinrin kẹ ovwẹ, kọye ovwan tanẹ ọye hẹ Ọghẹnẹ rẹ ovwan na.

⁵⁵Ẹkẹvuọvo ovwan je riẹ-ẹn; Me riẹnrẹ. Me da ta nẹ, Me riẹnrẹ-ẹ, mẹvwẹ kẹ ọvwọnrọn ofian kerẹ ovwan; ẹkẹvuọvo me riẹnrẹ me sẹro rẹ ota rọye.

⁵⁶Ọsẹ rẹ ovwan Ebraham ghọghọre nẹ ọye mrẹ ẹdẹ mẹ; ọ mrẹrẹ ọ da ghọghọ.

⁵⁷Ihwo ri Ju da ta kẹ, Wo ji te ikpe ujuvẹ gbẹ ihwe-e, kọye wọ da mrẹ Ebraham?

⁵⁸Jesu da ta kẹ ayen, Uyota, uyota, me ta kẹ owẹ, Tavwe rẹ Ebraham ke herọ, ye me herọ nure.

⁵⁹Ọtiọye ayen de tọrọ elalọ nẹ ayen vwo phio; ẹkẹvuọvo Jesu de sioma nu, ọ da yan nẹ uwevwi rẹ ẹga na.