Read urhobo Jọn 9 Bible Online

Jọn 9 - urhobo bible

Jọn 9

¹Ri Jesu vwọ wan vrẹn, ọ da mrẹ ohwo ọvo ro rhuẹro nẹ ọke re vwo vwiẹ rhe.

²Idibo rọye da nọ, Rabbi, ono ri ru umwemwu, ohwo nana gbinẹ ọsẹ vẹ oni rọye, re vwo vwiẹ orhuẹro?

³Jesu da kpahe, Ọ dia ohwo nana ri ru imwemwu-u, eyẹ ọsẹ vẹ oni rọye-e, ẹkẹvuọvo rere iruo rẹ Ọghẹnẹ vwọ mrasan phia vwẹ oma rọye.

⁴Avwanre se ru iruo rẹ ohwo ro ji vwe rhe, rẹ ọke vwọ herọ na; ason cha, rẹ ohwo de jẹ iruo eruo.

⁵Re me vwọ hẹ evun rẹ akpọ na, mẹvwẹ hẹ urhukpẹ rẹ akpọ na.

⁶Rọ vwọ ta ọnana re, o de dje enya phihọ otọ ọ da vwẹ enya na gbe emekpẹn ọ da vwẹ emekpẹn na vwo sio ẹro,

⁷ọ da ta kẹ, Yanran, ra họ vwẹ ẹtẹrhe si Sailom (otọ rọye Ejo). Ọtiọye ọ da yanran ra họ ọ da rhe ọ da mrẹ orẹ.

⁸Ihwo re dia kẹrẹ kugbe otu re mrẹrẹ rọ yare emu jovwo, da ta, Ọnana dia ohwo na rọ yare emu jovwo na-a?

⁹Evo da ta, ọye, efa da ta, Ẹjo ẹkẹvuọvo ọ họherọ. Ọ da ta, Mẹvwẹ hẹ ohwo na.

¹⁰Ayen da ta kẹ, Komavọ ẹro wẹn ru rhie vwo?

¹¹Ọ da kpahe, Ohwo na re se Jesu ọye gbe emekpẹn vwo si vwe ẹro ọ da ta kẹ vwẹ, Yanran kpo Sailom ra họ; ọtiọye me da yanran ra họ me da mrẹ orẹ.

¹²Ayen da ta kẹ, Kọ rhọ? Ọ da ta, Me riẹnre-e.

¹³Ayen da reyọ ohwo na ro rhuẹro jovwo na vwo rhe ihwo ri Farisi.

¹⁴Asakiephana ẹdẹ na kẹ ẹdidjala kọye Jesu vwo gbe ekpẹn na o de rhiẹ ẹro rọye.

¹⁵Farisi na da rhoma nọ obo ro ru mrẹ orẹ. Ọ da ta kẹ ayen, Ọ vwẹ emekpẹn vwo si vwe ẹro, me da họ, me da mrẹ orẹ.

¹⁶Evo vwi Farisi na da ta, Ohwo nana dia obọ rẹ Ọghẹnẹ o nurhe-e, kidie ọ yọnrọn ẹdidjala-a. Ẹkẹvuọvo efa da ta, Komavọ ohwo rọ dia oruimwemwu se ru eka tiọnana? Ogharọ da herọ vwẹ ohri rẹ ayen.

¹⁷Ọtiọye na ayen da rhoma ta kẹ ọ ro rhuẹro jovwo na, Die wọ ta kpahọ, ro vwo rhiẹ ẹro wẹn na? Ọ da tanẹ, Ọmraro o ruẹ.

¹⁸Ihwo ri Ju na sere gbuyota nẹ o rhuẹro jovwo tavwe rọ ke rhe mrẹ orẹ na-a, eriyin na, ayen de re se ọsẹ vẹ oni rẹ ohwo re rhiẹ ẹro rọye na,

¹⁹ayen da nọ ayen, Ọnana ọmọ rẹ ovwan, ra tanẹ e vwiẹri orhuẹro nẹ orivwi rhe na? Komavọ o ru mrẹ orẹ vwẹ asakiephana?

²⁰Ọsẹ vẹ oni rọye da kpahe, Avwanre riẹnre nẹ ọnana ọmọ rẹ avwanre, nẹ e ghine vwiẹ orhuẹro;

²¹ẹkẹvuọvo obo ro ru mrẹ orẹ vwẹ asakiephana avwanre riẹnre-e, eyẹ avwanre jẹ riẹn ohwo ro rhiẹ ẹro rọye-e. Ovwan nọ, ọ ghwanri re, e gbe jẹ ọ vwẹ unu rọye ta.

²²Ọsẹ vẹ oni rọye ta ọnana fikiridie ayen djẹ oshọ rẹ ihwo ri Ju, kidie ihwo ri Ju ejobi rhọvwe kugbe nẹ ohwo ọvo da rhọvwe nẹ ọye ghine Kristi na, ayen ke djẹ nẹ evun ri sinagọg na.

²³Kọye ọsẹ vẹ oni rọye vwọ ta, Ọ ghwanri re, gba nọ.

²⁴Ọtiọye ayen da rhoma se ọ ro rhuẹro jovwo na, ayen da ta kẹ, Gba vwẹ ejiro kẹ Ọghẹnẹ; avwanre riẹnre nẹ ohwo nana oruimwemwu.

²⁵Ọ da kpahe, Owenẹ ọ dia oruimwemwu eyẹ o jẹ dia, me riẹnre-e; emu ọvo me riẹnre na, mi rhuẹro jovwo, asakiephana me mrẹ orẹ re.

²⁶Ayen da ta kẹ, Kidie o ru kẹ wẹ? Mavọ o rhiẹ ẹro wẹn wan?

²⁷Ọ da kpahe kẹ ayen, Me ta kẹ ovwan nure, ovwan kerhọ-ọn. Kidie ovwan rhoma nyo ru? Ovwan je guọnọ dia idibo rọye rhe?

²⁸Ayen de do kuo, tanẹ, Wẹ hẹ odibo rọye, ẹkẹvuọvo avwanre idibo ri Mosis.

²⁹Avwanre riẹnre nẹ Ọghẹnẹ ta ota kẹ Mosis, ẹkẹvuọvo vwọ kẹ ohwo nana, avwanre riẹn asan ro nurhe-e.

³⁰Ohwo na da kpahe, Die sorọ, ọnana hẹ igbunu! Ovwan riẹn asan ro nurhe-e, dede na yo rhiẹ ẹro mẹ.

³¹Avwanre riẹnre nẹ Ọghẹnẹ kerhọn rẹ iruimwemwu-u, ẹkẹvuọvo ọ da dianẹ ohwo ga Ọghẹnẹ ro de ru ọhọre rọye, Ọghẹnẹ kọ kerhọn rọye.

³²Rhabae rẹ akpọ na vwo tophihọ na e ji nyo nẹ ohwo ọvo rhiẹ ẹro rẹ ohwo re vwiẹri orhuẹro-o.

³³Ọ da dianẹ ohwo nana rhe nẹ obọ rẹ Ọghẹnẹ rhe-e, o se ru emu ọvuọvo-o.

³⁴Ayen da kpahe kẹ, We re vwiẹri vwẹ evun rẹ imwemwu tototo na, kẹ owẹ ri che yono avwanre? Ayen da djẹ ro otafe.

³⁵Jesu de nyo nẹ ayen djẹrẹ ro otafe, rọ vwọ mrẹ re ọ da ta, Wo se Ọmọ rẹ ohwo na gbuyota?

³⁶Ọ da kpahe, Ọno vwo, ọga, rere mi vwo segbuyota?

³⁷Jesu da ta kẹ, Wọ mrẹrẹ nure vwo, ke je vwẹ ọye re ta ota kẹ owẹ na.

³⁸Ọ da ta, Ọrovwohwo, mi sere gbuyota, ọ da ga.

³⁹Jesu da ta, Fiki rẹ ẹdjọeguo me vwọ rhe akpọ na, rere ihwo re mrẹ orẹ-ẹ vwọ mrẹ orẹ, rere otu re mrẹ orẹ vwo rhuẹro.

⁴⁰Farisi evo ri si kerẹ vwo nyo ọnana, ayen da ta kẹ, Avwanre ji rhuẹro rhe?

⁴¹Jesu da ta kẹ ayen, Ọ dianẹ kẹ ovwan rhuẹro, ovwan rha re abe-e; ẹkẹvuọvo asakiephana re ovwan vwọ ta nẹ, Avwanre mrẹ orẹ, kọye abe rẹ ovwan vwo chekọ na.