Read urhobo Iruo rẹ Iyinkọn na 10 Bible Online

Iruo rẹ Iyinkọn na 10 - urhobo bible

Iruo rẹ Iyinkọn na 10

¹Ọshare ọvo da herọ vwo obẹ Sizaria onotu rẹ ofovwi rẹ ihwo rẹ Itali, odẹ rọye Kọniliọs.

²Ohwo ro vwo erhi rẹ ẹga rọ djẹ oshọ rẹ Ọghẹnẹ ro vwo ẹgba rẹ ẹrhovwo ẹnẹ kẹdẹ kẹdẹ, te ọye vẹ evwruwevwi rọye ejobi, o ji ruẹse kẹ ihwo gangan.

³Vwẹ oghẹruvo vwẹ ẹdẹ na, kerẹ emu rẹ unọke rirhiri ọ da mrẹ amakashe rẹ Ọghẹnẹ ro bruro rhe vwẹ emramrẹ ro sere nẹ, Kọniliọs.

⁴Ọ da tẹrovio vẹ uguegue, ọ da ta, Didi emu Ọrovwohwo? Ọ da ta kẹ, Ẹrhovwo wẹn kugbe ẹse wẹn rhi mudia họ ekarohọ vwẹ obaro rẹ Ọghẹnẹ.

⁵Asakiephana gbe ji ihwo kpo obi Jọpa, re wo re se Saimọn re se Pita rhe;

⁶o wo asan ri Saimọn osiophiẹn na re uwevwi rọye orhoma rẹ abadi na.

⁷Ọke rẹ amakashe rọ ra ota kẹ na vwọ yanran nu, o de se idibo rọye rẹ eshare ive kugbe isodje ọvo ro vwo erhi rẹ ẹga vwẹ ohri ri isodje re rhẹrẹ na,

⁸ro vwo gbe ikun na ejobi kẹ ayen nu, o de ji ayen kpo obi Jọpa.

⁹Ẹdẹ rivẹ rẹ ayen vwọ yanran kẹ amasan rẹ ayen che vwo te orere na, Pita da yanran kpo obenu rẹ uwevwi ra nẹ erhuvwu, kerẹ emu rẹ unọke esan.

¹⁰Owẹvwe de rhi hwe, kọ guọnọ emu rọ re; ẹkẹvuọvo ọke rẹ ayen vwo chere emu na vwobọ, omovwerhẹ de djuo aro wan.

¹¹Ọ da mrẹ odjuvwu ro rhie phihọ, emu ọvo ko wotọ nẹ enu cha kerẹ osa rode ra vwe igogo ẹnẹ lọrọ cha otọ.

¹²Oghẹre rẹ eranvwe ejobi kugbe eranvwe vẹ esẹn kugbe emephran rẹ enu na ejobi da hẹ evun rọye.

¹³Etiyin urhuru ọvo de se, vrẹn, Pita; wo hwe wọ re.

¹⁴Ẹkẹvuọvo Pita da ta, Ejọ, Ọrovwohwo; kidie me je re oghẹre eyẹ emu ogbegbe tiọna dẹvo-o.

¹⁵Urhuru na da rhoma bro rhe obọ rivẹ, obo rẹ Ọghẹnẹ ru fon nu, wo se nẹ ogbegbe-e.

¹⁶Ọnana da phia asiarha, siẹvnọvo na e de mu emu na kpo odjuvwu.

¹⁷Rẹ iroro ri Pita vwọ epha tighi tighi fiki rẹ emramrẹ rọ mrẹre na, nighe, eshare ri Kọniliọs ji rhe na, re nọ ekpẹn rẹ uwevwi ri Saimọn, mudia vwẹ obaro rẹ unurhoro na.

¹⁸Ayen da nọ se Saimọn re se Pita wo phihọ etiyin.

¹⁹Ri Pita vwo roro iroro rẹ emramrẹ rọ mrẹre na, Erhi na da ta kẹ, Nighere, eshare erha herọ guọnọ owẹ.

²⁰Vrẹn wo nene ayen yanran kpatakpata; kidie Mẹvwẹ ri ji ayen rhe.

²¹Pita da yanran bru eshare na ọ da ta, Mẹvwẹ hẹ ohwo rẹ ovwan guọnọ; die sorọ rẹ ovwan vwọ rhe?

²²Ayen da ta, Kọniliọs, onotu rẹ ofovwi ohwo ọsoso rọ djẹ oshọ rẹ Ọghẹnẹ, rẹ ẹgborho rẹ ihwo ri Ju ejobi ta ota rọye yoyovwi, ọye amakashe ọfuanfon ta kẹ nẹ o ji ohwo rhi se we rhe uwevwi rọye, rere o nyo obo ru wọ cha ta kẹ.

²³Eriyin na o de phi erhorha na phihọ uwevwi rọye. Ẹdẹ rivẹ o vrẹnri ọ vẹ ayen da yanran, evo vwẹ imoni na ri nẹ Jọpa rhe de nene.

²⁴Ẹdẹ ro kpaherọ ayen de rhi te Sizaria. Kọniliọs de se ekru kugbe igbeyan rọye ejobi koko.

²⁵Ọke rẹ Pita vwọ ro uwevwi nu, Kọniliọs de diguẹ te otọ kẹ ọ da gọ.

²⁶Ẹkẹvuọvo Pita da kparọ vrẹn tanẹ, vrẹn mudia; Mẹvwẹ ohwo rẹ akpọ.

²⁷Rẹ ọ vẹ ọye vwọ ta ota na, ọ da ro uwevwi ọ da mrẹ ihwo buebu ri kokori.

²⁸Ọ da ta kẹ ayen, Ovwan riẹn kẹ oma rẹ ovwan jovwo nẹ oshehọ urhi rere ohwo ri Ju vwo kuoma kugbe eyẹrẹ o vwo wo ohwo rẹ ẹgborho ọfa-a; ẹkẹvuọvo Ọghẹnẹ da vwọ nẹ vwẹ nẹ mi se ohwo ọvuọvo ohwo ghevweghe-e eyẹ ogbegbe-e.

²⁹Fiki rẹ ọtiọye na re vwo se vwe nẹ me rhe, o rhe jẹ uvwe se-en. Me nọ ovwan die ovwan vwo ji ikọn rhi se vwe.

³⁰Kọniliọs da ta, Ẹdẹ ẹnẹ re wanre, kerẹ unọke nana, me vwọ nẹ ẹrhovwo rẹ unọke rirhiri vwẹ evun rẹ uwevwi mẹ; nighe, ọshare ọvo vẹ iwun wrowro vwẹ oma, de mudia vwẹ obaro mẹ,

³¹rọ tanẹ, Kọniliọs e nyo ẹrhovwo wẹn kugbe ẹse eruo wẹn a je karophihọ ayen vwo obaro rẹ Ọghẹnẹ.

³²Gbe ji ikọn kpo Jọpa ra no ekpẹn ri Saimọn re se Pita; o wo phihọ uwevwi ri Saimọn osiọphiẹn na, rọ kẹrẹ abadi na.

³³Siẹvuọvo na mi de ji ikọn rhi se we, wo ruru ru wọ vwọ rhe. Asakiephana avwanre ejobi rhi koko vwẹ obaro rẹ Ọrovwohwo vwẹ etinẹ, rhi vwo nyo obo rẹ Ọrovwohwo vuẹ wẹ nẹ wo ta kẹ avwanre.

³⁴Pita de rhie unu rọye ọ da ta. Uyota Me riere nẹ Ọghẹnẹ ghwẹ oma hẹ abọvo jẹ ọvo vwo-o;

³⁵ẹkẹvuọvo vwẹ ẹgborho kẹgborho ohwo rọ djẹ oshọ rọye ro de ru obo ri shehọ ọye ọ reyọ.

³⁶Ovwan riẹn ota na ro ji bru ihwo rẹ Izrẹl ra, iyẹnrẹ esiri rẹ ufuoma re ghwoghwo kẹ ayen vwẹ oma ri Jesu Kristi ọye Ọrovwohwo ro vwo emu ejobi,

³⁷ota re ghwoghwo vwi Judia ejobi, ra dia Galili tohọ vwẹ ame ẹreyọ ri Jọn ghwoghwori.

³⁸Obo rẹ Ọghẹnẹ vwọ vwẹ evwri ghworo Jesu ri Nazarẹt vwẹ Erhi Ọfuanfon kugbe ogangan obo ro yanrhe yankpo ro ruẹ emu esiri jo sivwi ihwo ejobi rẹ idẹbono shenyẹ, kidie Ọghẹnẹ vẹ ọye herọ.

³⁹Avwnare kẹ iseri rẹ emu na ejobi ro ruru vwẹ orho rẹ ihwo ri Ju kugbe Jerusalẹm. Ayen de hwe ghwu vwẹ enu rẹ urhe;

⁴⁰ẹkẹvuọvo Ọghẹnẹ da kparọ vrẹn vwẹ ẹdẹ rerha ọ da vwọ phia;

⁴¹ọ dianẹ kẹ ihwo na ejobi-i ẹkẹvuọvo vwọ kẹ avwanre ọvo rẹ Ọghẹnẹ jẹreyọ ne dia iseri, ihwo re vẹ ọye gba re re vẹ ọye gba da vwẹ ọke ro vwo vrẹn nẹ ughwu nu.

⁴²Ọ da vuẹ avwanre nẹ e ghwohwo kẹ ihwo, re ji se oseri nẹ ọye ọvo Ọghẹnẹ vwo mu nẹ o guẹdjọ rẹ ihwo ekpokpọ kugbe otu ri ghwuru.

⁴³Ọye emraro na ejobi se iseri kẹ nẹ kohwo kohwo ro sere gbuyota kọ vwo evwoghovwo rẹ imwemwn fiki rẹ odẹ rọye.

⁴⁴Ri Pita je vwọ ta ota na, Erhi Ọfuanfon na de she mu ayen ejobi ri nyo ota na.

⁴⁵Otu ri segbuyota ri nẹ ohri rẹ ihwo re yanvwere re vi Pita gba rhe o de gbe ayen unu, fikiridie e ku okẹ rẹ Erhi Ọfuanfon na ku otu ri Keferi na rhe.

⁴⁶Kidie ayen nyo ayen re jẹ ephẹrẹ vwo jiri Ọghẹnẹ. Etiyin Pita da ta,

⁴⁷Kẹ ohwo sa dje ihwo nana re reyọ Erhi Ọfuanfon na kirobo re avwanre je reyọ nure na ri de jẹ ame ẹ reyọ?

⁴⁸Ọ da ta nẹ a vwẹ ame kẹ ayen vwẹ odẹ ri Jesu Kristi. Etiyin ayen da rẹ nẹ ọ vẹ ayen dia emerha.