Read urhobo Iruo rẹ Iyinkọn na 11 Bible Online

Iruo rẹ Iyinkọn na 11 - urhobo bible

Iruo rẹ Iyinkọn na 11

¹Asakiephana iyinkọn kugbe imoni re hẹ obi Judia ejobi de nyo nẹ otu ri Keferi na je reyọ ota rẹ Ọghẹnẹ.

²Ọtiọye na ọke ri Pita vwo kpo Jerusalẹm re, ukoko rẹ otu re yanvwere na de guo,

³tanẹ, Die wo vwo bru otu ri jẹ yanvwọ na ra ru wọ vẹ ayen vwọ ria emu kuẹgbe?

⁴Ẹkẹvuọvo Pita de muhọ ọ danabọ gbe ikun notọrhe kẹ ayen.

⁵Re me vwo nẹ ẹrhovwo vwẹ orere ri Jọpa; ri mi vwo go ovwerhẹ me da mrẹ emramrẹ, rẹ oravwọ ọvo ra lọrọ cha otọ kerẹ osa rode ra vwi igogo ẹne lọrọ nẹ obenu cha; o de bru uvwe rhe.

⁶Me vwọ nabo no me da mrẹ eranvwe buebu kugbe eranvwe re djoma vẹ eranvwe vẹ esẹn kugbe ephran rẹ obenu na.

⁷Mi de nyo urhuru ọvo rọ ta kẹ vwẹ, vrẹn, Pita; hwe rere wọ re.

⁸Ẹkẹvuọvo me da ta, Ẹjo, Ọrovwohwo; kidie me je re oghẹrẹriọ eyẹ emu ogbegbe dẹvo-o.

⁹Ẹkẹvuọvo urhuru rivẹ de nẹ obenu rhẹ, obo rẹ Ọghẹnẹ ru fon nu wo se ogbegbe-e.

¹⁰Ọnana da phia asiarha tavwe ra ke rhoma reyọ kpo obenu.

¹¹Vwẹ ọke ọvuọvo yena eshare erha re ji nẹ obẹ Sizaria bru vwe rhe na da ghwa ro evun rẹ uwevwi rẹ avwanre epha na.

¹²Erhi na da vuẹ vwẹ nẹ mi gbe ghwe nene ayen yanran. Imoni esan nana da vwọ kpahe ovwẹ, ra ro uwevwi rẹ ọshare na.

¹³O de gbe ikun kẹ avwanre obo rọ mrẹ amakashe ro rhi mudia vwẹ uwevwi rọye rọ vuẹrẹ nẹ, Ji ikọn re se Saimọn Pita rọ hẹ obi Jopa rhe;

¹⁴kọye re cha nẹ iyẹnrẹ rẹ obo wọ vwọ rhọ kẹ wẹ, kugbe evwruwevwi wẹn ejobi.

¹⁵Re me ghwa vwọ ta ota na, Erhi Ọfnanfon na de she mu ayen kirobo ro she mu avwanre vwe ẹsosuọ na.

¹⁶Me da rhe karohọ ota rẹ Ọrovwohwo na, rọ tare nẹ Jọn vwẹ ame kẹ ihwo, ẹkẹvuọvo Erhi Ọfuanfon kọye ovwan cha vwọ họ.

¹⁷Ọ da dianẹ Ọghẹnẹ kẹ ayen okẹ ọvo na kirobo rọ kẹ avwanre ri se Jesu Kristi gbuyota na, kono o mẹvwẹ ro se nene Ọghẹnẹ phraphrọ?

¹⁸Ọke rẹ ayen vwo nyo ọnana ayen da fọ. Ayen de jiri Ọghẹnẹ, tanẹ, Kẹ Ọghẹnẹ je kẹ ayen otu ri Keferi ekuorhẹrie rẹ esivwo rẹ arhọ rhe.

¹⁹Vwẹ ọke nana ihwo re hrabọ vwi fikirẹ ughwu rẹ Stivin, da djẹ kpo obi Fonisha, Saiprọs, kugbe Antiọk, etiyin ayen de gbe ikun rẹ iyẹnresiri rẹ Jesu na kẹ ihwo ri Ju ọvo.

²⁰Ẹkẹvuọvo usun rẹ ihwo na, re dia emotọ ri Saiprọs vẹ Sairin ri kpo obi Antiok da rhe ta ota na kẹ ihwo ri Grik ayen de ghwoghwo iyenre esiri rẹ Ọrovwohwo Jesu na kẹ ayen.

²¹Obọ rẹ Ọrovwohwo vẹ ayen da herọ otu buebu ri segbuyota de kurhẹriẹ bro Ọrovwohwo rhe.

²²Usi nana de rhi kperi ro ishọshi ro hẹ Jerusalẹm, ayen de ji Banabas kpo Antiọk.

²³Ọke rọ vwọ rhe rhe mrẹ ẹserọphẹ rẹ Ọghẹnẹ na, oma da vwerhọn; o de bru ayen uche rere ayen nabọ mudia gan vwi iruo rẹ Ọrovwohwo na;

²⁴kidie omamọ rẹ ohwo o ruẹ, ro vọnre vẹ Erhi Ọfuanfon vẹ esegbuyota. Otu buebu de rhi kuoma gbe Ọrovwohwo na.

²⁵Ọtiọye na Banabas da yanran kpo obi Tasọs ra guọnọ Sọl.

²⁶Ọke rọ vwọ mrẹ ọ da reyọ vwọ rhe obi Antiọk. Kidie ayen dia ishọshi na ẹgbukpe soso ayen de yono ihwo buebu; Antiọk kọye hẹ asan rẹsosuọ re de mu odẹ kẹ idibo na nẹ ihwo ri Kristi.

²⁷Vwẹ ọke nana emraro buebu de nẹ obi Jerusalẹm kpo obi Antiọk.

²⁸Ọvo vwẹ usun rayen na re se ode rọye Agabọs vwo mudia, Erhi na de muo vwọ mraro nẹ owẹvwe rode che fi vwẹ akpọ na ejobi; aroẹmre nana ghine sẹ vwẹ ọke rẹ Kladiọs.

²⁹Idibo na ejobi de koko jẹ arhọghọ tiobo rẹ ohwo ọvuọvo sa jẹ vwo rhe imoni na re hẹ Judia rere owẹvwe vwo jẹ ayen ehwe.

³⁰Ayen vwọ je arhọghọ na nu, ayen da vwọ kẹ Banabas kugbe Sọl rere ayen vwo rhe ekpako na.