Read urhobo Iruo rẹ Iyinkọn na 12 Bible Online

Iruo rẹ Iyinkọn na 12 - urhobo bible

Iruo rẹ Iyinkọn na 12

¹Vwẹ ọke nana Herọd rẹ ovie de mu kpahe ihwo evo vwẹ ishọshi na.

²Ọ da vwẹ ọlọkọ nyavwe Jems rẹ oniọvo ri Jọn hwe;

³rọ vwọ mrẹ nẹ uruemu nana vwerhe ihwo ri Ju oma, o de ji re mu Pita rhẹ. Ọnana ọke rẹ orẹ rẹ Ikara ro jephuo.

⁴Re vwo muo nu, o de phio phihọ uwodi, ọ da vwọ kẹ isodje ihwe gbẹ esan yọnre rere ayen sẹro rọye, bẹsiẹ ra vwọ re orẹ rẹ Ewanvrẹn nu rere a ke vwọ phia kẹ ihwo na.

⁵Eriyin na Pita da hẹ evu rẹ uwodi; ẹkẹvuọvo kọke kọke kọye ishọshi na vwọ rẹ Ọghẹnẹ kẹ.

⁶Vwẹ ason yena ri Herọd vwọ jẹ iroro rere ọ reyọ nẹ uwodi na rhe, yi Pita herọ vwerhẹ vwẹ uherevie rẹ isodje ivẹ vẹ ejọnrọn ivẹ ra vwọ kanrọ, yẹ erhẹrotọ hẹ anurhoro vwẹ obo otafe re rhẹrẹ uwodi na.

⁷Siẹvuọvo na, amakashe rẹ Ọrovwohwo da vwẹ oma phia kẹ, urhukpẹ de rhi lo mu evun rẹ uwodi na; ọ da rhọvwọ Pita, ọ da ta kẹ, tanẹ, Vrẹn phẹrẹkpẹ. Ejọnrọn na de she nẹ abọ rọye.

⁸Amakashe na da ta kẹ, Ku ewun wẹn vẹ ephiẹn wẹ họ. Ọ de ru ọtiọye. Ọ da ta kẹ, Vwẹ okpan wẹn phopho rere wo nene uvwe.

⁹Ọ da yan nene ro otafe. Ọ rha riẹn nẹ obo rẹ amakashe na ruẹ kẹ na aruakpo na ọye epha-a ẹkẹvuọvo ko vwiro roro emramrẹ.

¹⁰Ọke rẹ ayen vwọ wanvrẹn ẹrhẹrẹ rẹsosuọ vẹ ọrivẹ nu, ayen da rhe yan te unurhoro rẹ utehru na ra wan kpo obo orere na. O de mu rhie kẹ ayen, ayen da ro otafe ra ru evun rẹ urhuvwu ọvo; siẹvuọvo na amakashe na da yan jovwo.

¹¹Pita da riẹn kẹ oma rọye, ọ da ta, Asakiephana o mu uvwe ẹro nẹ, Ọrovwohwo ri ji amakashe na rhe rhi sivwi uvwe nẹ obọ rẹ Herọd vẹ iroro rẹ ihwo ri Ju ejobi.

¹²Ọke rọ vwọ mrẹ ọnana vughe nu, ọ da yanran kpo uwevwi ri Meri, oni ri Jọn re ji se Mak, asan rẹ ayen buebu kokori rẹ ayen da nẹ ẹrhovwo.

¹³Ọke ro vwo hworo ẹchẹ rẹ unurhoro, ọmọtẹ re se Roda da rhe rhi kpahe kẹ.

¹⁴Ro vwo vughe urhuru ri Pita, vwẹ omavwerhovwẹ na o gbi jọ fobọ rhiẹ ẹchẹ kẹ-ẹ ẹkẹvuọvo ọ da djẹ ra ta nẹ Pita mudia vwẹ obo anurhoro.

¹⁵Ayen da ta kẹ, Wọ mwa orhuẹ. Ẹkẹvuọvo ọ da tua unu mu ayen nẹ ghine ọtiọye. Ayen da ta nẹ, ọ dia amakashe rọye heyọ!

¹⁶Ẹkẹvuọvo Pita ko dje ẹchẹ na ehwehworo; ọke rẹ ayen vwo rhie ẹchẹ na, ayen da mrẹ o de gbe ayen unu.

¹⁷Ẹkẹvuọvo o de kpogho obọ kẹ ayen nẹ ayen fo tovwi, o de gbe ikun rẹ obo rẹ Ọrovwohwo ru sio nẹ evun rẹ uwodi na rhe. Ọ da ta, we gbe ikun nana kẹ Jems kugbe imoni na. Ọ da yan jẹ ayen vwo kpo asan ọfa.

¹⁸Asakiephana ọke vwo rhie nu, isodje na ke pha gedegede kpahe obo re phia kẹ Pita.

¹⁹Ọke rẹ Herọd vwọ guọnọ rọ gbe mrẹ-ẹ, ọ da nọ erhẹrotọ na ejobi orhiẹn ọ da ta nẹ a teye ayen ejobi hwe. Etiyin o de vrẹn nẹ Judia kpo obi Sizaria ọ da daji oboyi.

²⁰Vwẹ asakiephana ophu rẹ ihwo ri Taya kugbe Saidọn ko muẹ Herọd; ayen da ghwiẹ bro rhe, rẹ ayen vwo yovwunu kẹ Blastọs ọrhẹrẹ-ighẹn rẹ ovie, ayen da guọnọ arhuẹrẹ fikiridie emuorẹ rayen vwenẹ otọ rẹ ovie na a ghwa ayen nẹcha.

²¹Vwẹ ẹdẹ re bruru na Herọd da ghwẹ osẹnvwe rẹ ovie rọye phihọ, o de tidia ekete rọye, o da ta ota kẹ ayen.

²²Ihwo na de kuvwie, Ọnana urhuru rẹ Ọghẹnẹ, ọ dia ọ rẹ ohwo rẹ akpọ-ọ!

²³Siẹvuọvo na amakashe rẹ Ọrovwohwo da ghwiẹ, fikiridie ọ vwẹ urinrin kẹ Ọghẹnẹ-ẹ; ihori da riọ o de ghwu.

²⁴Ẹkẹvuọvo ota rẹ Ọghẹnẹ na da rho phihọ ọ da ro asan ejobi.

²⁵Banabas kugbe Sọl vwo ru iruo rayen nu, ayen de rhivwi rhe Jerusalẹm, ayen da vwi Jọn re se Mak vwọ ba oma.