Read urhobo Iruo rẹ Iyinkọn na 13 Bible Online

Iruo rẹ Iyinkọn na 13 - urhobo bible

Iruo rẹ Iyinkọn na 13

¹Asakiephana emraro kugbe iyono da herọ vwẹ ishọshi rẹ Antiọk, Banabas, Simiọn re se Naija, Lushọs ri Sairin, Manaen ọdiaguare rẹ rẹ ovie Hẹrọd, kugbe Sọl.

²Ọke rẹ ayen vwo chiri owẹvwe gọ Ọrovwohwo, Erhi ọfuanfon da ta, Hẹriẹ Banabas kugbe Sọl abọ vwọ kẹ iruo ri mi se ayen rhe na.

³Eriyin rẹ ayen vwo chiri owẹvwe rẹ ayen vwọ nẹ ẹrhovwo ayen da ghwẹ abọ rayen kpahe ayen, ayen de ji ayen yanran.

⁴Ọtiọye na, rẹ Erhi Ọfuanfon vwo ji ayen yanran nu, ayen de kpo obi Sẹlusha; kẹ oboyi ayen wan bi kpo Saiprọs.

⁵Ọke rẹ ayen vwo te Salamis, ayen de ghwoghwo ota rẹ Ọghẹnẹ na vwi Sinagọg rẹ ihwo ri Ju. Ayen da reyọ Jọn rọ chọ ayen uko.

⁶Ọke rẹ ayen vwọ yan ubrotọ na duvwu rhi te Pafọs ayen da rhe vwa ohwo ro ruẹ egbẹlẹkẹ, ohwo ri Ju ọmraro rẹ ofian, re se Ba-Jesu.

⁷Ọ vẹ Sajọs Pọlọs rẹ osun rẹ ubrotọ na re gbe dia, ohwo dẹndẹn ro vwo eriariẹ, ọ de ji ikọn re se Banabas kugbe Sọl rere o vwo nyo ota rẹ Ọghẹnẹ.

⁸Ẹkẹvuọvo Elimas ohwo ro ruẹ egbẹlẹkẹ na (kidie oye otọ rẹ odẹ rọye) ko gbe ota phihọ ayen unu, rere o vwo ku iroro rẹ osun na rhẹriẹ nẹ esegbuyota na.

⁹Ẹkẹvuọvo Sọl, re se Pọl, rọ vwọ vọn vẹ Erhi Ọfuanfon ọ da nabọ tẹrovio,

¹⁰ọ da ta, Wẹ ọmọ rẹ idẹbono na, ọvweghrẹ rẹ ọvwata ejobi na, ro vọnre vẹ ophiẹnvwe vẹ ọkon ejobi na, wo rhe jẹ idjerhe ọphiọn phiọn rẹ Ọrovwohwo na vwo ẹgẹrẹ?

¹¹Asakiephana, nighe, Ọrovwohwo mu kpahe owẹ re, wo che rhuẹro wọ gbe cha sa mrẹ orẹ-ẹ. Siẹvuọvo na ubigho da ghwa kpahọ ẹro kọ guọnọ ohwo rọ yọnrọn obọ.

¹²Etiyin osun na vwọ mrẹ obo re phiare o de segbuyota, kidie uyono rẹ Ọrovwohwo na gbereunu.

¹³Vwẹ ọke nana Pọl vẹ irivẹ rọye da ro okọ nẹ Pafọs, kpo Pẹga vwi Pamfilia. Jọn da yan jẹ ayen vwo kpo Jerusalẹm;

¹⁴ẹkẹvuọvo ayen da wanvrẹn Pega rhe Antiọk ri Pisidia. Vwẹ ẹdẹ rẹ urovwoma ayen de kpo evun ri Sinegọg ayen de tidia.

¹⁵Ọke re vwo se ọbe rẹ urhi na vẹ emraro na nu, isun ri Sinegọg na de ji ohwo ra vuẹ ayen, tanẹ, Imoni, ọ da dianẹ we vwo ota rẹ uchebro ru we bru ihwo na, wa ta.

¹⁶Ọtiọye na Pọl mudia, o de kpogho obọ tanẹ; Ihwo rẹ Izrẹl, ovwan kerhọn, ovwan re djẹ oshọ rẹ Ọghẹnẹ wa kerhọn.

¹⁷Ọghẹnẹ rẹ ihwo nana Izrẹl re jẹ esẹ rẹ avwanre reyọ ọ da vwẹ ayen ru ihwo ride vwẹ ọke re ayen vwọ hẹ otọ rẹ Ijipt ọ da vwẹ obọ ọgangan sun ayen no rhe.

¹⁸Kerẹ emu rẹ ikpe ujuvẹ ọye o chirako rayen vwẹ evun rẹ ghwa.

¹⁹Ọke rọ vwọ guọghọ ẹgborho ighwrẹ vwẹ otọ ri Kenan nu, ọ da vwẹ uku rẹ otọ na kẹ ayen, kerẹ emu rẹ ikpe ujori ẹne gbẹ ujuvẹ gbẹ ihwe.

²⁰Rẹ ọyena vwọ wan nu ọ da kẹ ayen iguẹdjọ bẹsiẹ ro vwo te ọke ri Samuẹl rẹ ọmraro na.

²¹Etiyin ayen da nọ ekpẹn rẹ ovie; Ọghẹnẹ da vwẹ Sọl rẹ ọmọ ri Kish vwo mu kẹ ayen, ohwo rẹ uvwiẹ ri Benjamin, o de sun ayen ikpe ujuvẹ.

²²Ọke ro vwo siono nu, ọ da vwi Devid vwo mu ovie kẹ ayen; kọye o se oseri kpahe ta nẹ, Dẹvid rẹ ọmọ ri Jẹse na ọye hẹ ohwo rẹ ẹro teri ro ru obo rẹ udu mẹ guọnọre.

²³Ẹkuoma rẹ uvwiẹ rẹ ohwo nana, ọye Ọghẹnẹ wan vwẹ osivwi ọvo kẹ Izrẹl, Jesu, kirobo ro veri.

²⁴Tavwe rọ ke rhe, yi Jọn ghwoghwo ame-ẹreyọ rẹ ekuorhẹriẹ kẹ ihwo ejobi vwẹ Izrẹl nure.

²⁵Ri Jọn ghwe vwo ru iruo rọye re nu, ọ da ta, Ono ovwan vwẹ ovwẹ roro? Mẹvwẹ dia ọye-e. Ẹjo, ẹkẹvuọvo ọye hẹ ohwo rọ cha vwẹ obuko mẹ na, mi fo ohwo rọ sa rhan ifi rẹ ephiẹn rọye-e.

²⁶Imoni, emọ rẹ uvwiẹ rẹ Ebraham, kugbe ovwan rẹ djẹ oshọ rẹ Ọghẹnẹ avwanre a vuẹ ovuẹ rẹ esivwo nana rhe.

²⁷Kidie otu re dia Jerusalẹm kugbe isun rayen, mrẹrẹ vughe-e eyẹ vwo ẹruọ rẹ eta rẹ emraro na re se kẹ ayen kedidjala kedidjala-a na, de ru enana gba vwẹ ehwe rẹ ayen hwere.

²⁸Dede nẹ ayen mrẹ oruchọ vwẹ obọ rọye-e na, yẹ ayen vuẹ Pailet nẹ o hwe.

²⁹Ọke rẹ ayen vwo ru obo re si kpaho gba nu, ayen da reyọ nẹ enu rẹ urhe, ayen de sho.

³⁰Ẹkẹvuọvo Ọghẹnẹ da kparọ vrẹn nẹ ughwu.

³¹Vwẹ ẹdẹ buebu vwọ wan nu o da vwẹ oma phia kẹ otu ri nẹ Galili bro rhe Jerusalẹm, asakiephana keye ri se oseri rọye kẹ ihwo na.

³²Iyẹnrẹ esiri na kọye avwanre ghwa rhe ovwan na nẹ obo rẹ Ọghẹnẹ vẹ kẹ esẹ na,

³³kọna o rhi ru gba kẹ avwanre emọ rayen rọ vwọ kpare Jesu nẹ ughwu; kirobo re siro phihọ Une rẹ Ejiro rivẹ, Wọwẹ hẹ Ọmọ mẹ, nonẹ na mi vwiẹ wẹ.

³⁴Vwẹ uyota nẹ o ghine kparo vrẹn nẹ ughwu, ọ gbe rha mrẹ egbo ọfa-a, kọye ọ vwọ ta wan idjerhe nana, ke me ke wẹ ebruba ọfuanfon ri Devid.

³⁵Kọye ọ je vwọ ta vwẹ asan ofa vwẹ Une rẹ Ejiro, Wo che jẹ Ọfuanfon wẹn Ọvuọvo na mrẹ egbo-o.

³⁶Kidie Devid, vwọ ga iroro rẹ Ọghẹnẹ vwẹ ọke rọye nu o da vwerhẹ, e de sho kugbe esẹ rọye, ọ da mrẹ egbo;

³⁷ẹkẹvuọvo ohwo rẹ Ọghẹnẹ kpare vrẹn na ọ mrẹ egbo-o.

³⁸E gbe jẹ onana mu ovwan ẹro, imoni, nẹ vwẹ oma rẹ ohwo nana a wan ghwoghwo evwoghovwo rẹ imwemwu kẹ ovwan na,

³⁹vwẹ oma rọye a wan sivwi kohwo kohwo ro segbuyota nẹ kemu kemu rẹ urhi ri Mosis se sivwo nu-u.

⁴⁰Eriyin na, ovwan gba kẹnoma, rere eta rẹ emraro na ta kpahe ovwan na vwo jẹ ovwan ekpokpo.

⁴¹Nighe, ovwan ejejefian, jo gbe ovwan unu, re ovwan ghwọrọ kidie mi ru iruo vwẹ ọke rẹ ovwan, iruo rẹ ovwan che se segbuyota-a, ọ da dianẹ ohwo djere kẹ ovwan.

⁴²Rẹ ayen vwọ yanran ruẹ otafe ihwo na da rẹ ayen nẹ ayen je rhoma gbe ikun rẹ emu nana ejobi kẹ ayen vwẹ ẹdidjala rivẹ.

⁴³Ọke rẹ ukoko ri Sinagọg na vwọ ghwiẹ nu, ihwo ri Ju buebu kugbe i ri kurhẹriẹ vwẹ egagọ ri Ju de nene Pọl vẹ Banabas, ayen da ta ota kẹ ayen rere ayen se vwo mudia vwẹ ẹserọphẹ rẹ Ọghẹnẹ na.

⁴⁴Vwẹ edidjala rivẹ degbe ihwo rẹ orere na ejobi re ghwẹ koko rere i rhi nyo ota rẹ Ọghẹnẹ.

⁴⁵Ọke rẹ ihwo ri Ju na vwo mrẹ urogho na, ayen da rhe vọn vẹ omaẹriọ, ayen de gbe ota phihọ Pọl unu ayen da harhọ.

⁴⁶Pọl kugbe Banabas da gbaudu, ta ota tanẹ, O fori ra ka vwọ ta ota rẹ Ọghẹnẹ na kẹ ovwan. Rẹ ovwan vwo gere ota na nẹ oma na, rẹ ovwan vwọ vwẹ oma rẹ ovwan guẹdjọ nẹ ovwan fo ihwo rẹ arho ri bẹdẹ na-a, nighe avwanre ki hirhe bru ihwo ri Keferi ra.

⁴⁷Kidie ọtiọye Ọrovwohwo ta kẹ avwanre nẹ, Me vwẹ ovwan rhu kerẹ urhukpẹ kẹ ihwo ri Keferi na, rere ovwan vwọ ghwa esivwo kpo oba rẹ akpọ na.

⁴⁸Ọke rẹ ihwo ri Keferi vwo nyo ọnana, oma da vwerhe ayen ayen de jiri ota rẹ Ọghẹnẹ na; buebu ra vwẹ arhọ ri bẹdẹ na kẹ de segbuyota.

⁴⁹Ota rẹ Ọrovwohwo na da hrabọ ro ubrakpọ na ejobi.

⁵⁰Ẹkẹvuọvo ihwo ri Ju na da kpare ophu rẹ eya ri vwo erhi rẹ ẹga kugbe ihwo ride rẹ orere na, ayen de mu kpahe Pọl kugbẹ Banabas, a da djẹ ayen nẹ ẹkuotọ rayen.

⁵¹Ẹkẹvuọvo ayen de phorho ekpẹn rẹ awọ rayen vwọ hẹ otọ kẹ ayen, ayen da yanran kpo Aikoniọm.

⁵²Idibo na da rhe vọn vẹ aghọghọ kugbe Erhi Ọfuanfon.