Read urhobo Iruo rẹ Iyinkọn na 14 Bible Online

Iruo rẹ Iyinkọn na 14 - urhobo bible

Iruo rẹ Iyinkọn na 14

¹Vwẹ Aikoniọm ayen de koko ro evun rẹ Sinagọg rẹ ihwo ri Ju, ayen da ta ota na rọ nẹrhẹ otu buebu segbuyota te ihwo ri Ju te ihwo ri Grik.

²Ẹkẹvuọvo ihwo ri Ju ẹvo ri segbuyota-a da rhe kpare ophu rẹ ihwo ri Keferi ayen dẹ miovwi ẹnwẹn rayen vwọ kpahe imoni na.

³Ọtiọye na ayen da dia etiyin krẹkri ta ota rẹ Ọrovwohwo na vẹ udu, vwo se oseri kpahe ota rẹ ẹserọphẹ rọye, ayen de ru emu rẹ eka kugbe igbunu buebu.

⁴Ẹkẹvuọvo ihwo rẹ orere na da gharoma; otu ẹvo vẹ ihwo ri Ju obọ, otu evo vẹ iyinkọn na obọ.

⁵Ọke rẹ ihwo ri Keferi kugbe ihwo ri Ju vẹ isun rayen vwọ guọnọ kpokpo ayen rere e phi ayen hwe,

⁶ayen da riẹn ayen da djẹ kpo Listra vẹ Dabe, irere rẹ Laikonia, kugbe orho re riariẹ ayen phihọ.

⁷Kẹ oboyi ayen de ghwoghwo iyẹnrẹ siri na.

⁸Vwi Listra oshare ọvo tidia vwẹ etiyin, ọ sa vwẹ awọ rọye ya-an; okpono nẹ ọke emọ rhe, ọ je yan dẹvo-o.

⁹Ọ da kerhọn ri Pọl rọ vwọ ta ota; ri Pọl vwọ tẹrovio, ọ da mrẹ nẹ o vwo esegbuyota ro se sivwo.

¹⁰Ọ da van ta kẹ, Vrẹ mudia. O de pho kpenu ọ da yan.

¹¹Ọke rẹ ihwo gbidi na vwọ mrẹ emu ri Pọl ruru, ayen de bunu vwẹ ephẹrẹ ri Laikonia tanẹ, ẹdjọ rhe vwẹ oma phia kẹ avwanre kẹrẹ ihwo rẹ akpọ!

¹²Ayen de se Banabas Zeus, ayen de se Pọl, Hẹms, fikiridie ọye hẹ ọtota rode.

¹³Orherẹn ri Zeus rẹ uwevwi rẹ ẹdjọ rọye ghwa hẹ ughere rẹ orere na de mu irhuẹn vẹ ẹvwe rhe ughere na rere ọ vẹ ihwo na vwo gọ.

¹⁴Ẹkẹvuọvo ọke rẹ iyinkọn na Banabas kugbe Pọl vwo nyo, ayen da bẹrẹ iwun rayen ayen da họrhọ ro ohri rẹ urogho na, ri kperẹ nẹ,

¹⁵Ihwo na, die ovwan vwo ruẹ ọnana? Avwanre je hẹ ihwo rhe kerẹ ovwan, re ghwẹ iyẹnre esiri rhe ovwan rere ovwan yan jẹ emu diodi nana vwo bru Ọghẹnẹ ọkpokpọ na rhe, ohwo rọ ma odjuvwu kugbe akpọ kugbe abadi kugbe obo re hẹro ejobi.

¹⁶Vwẹ ọke rẹ awanre o de kuerhọfia kẹ ẹgborho buebu rere ayen nene idjerhe ro je ayen;

¹⁷dede na o ji vwo ọkeọvo ro vwo jẹ iseri rẹ oma rọye ẹvwophia-a, kidie o ru emu esiri kẹ ovwan ọ da rhọ osio nẹ odjuvwu kugbe omamọ rẹ evwru vẹ ọke rẹ ivuevu rere ovwan vwo emuọre vẹ aghọghọ.

¹⁸Ẹgbẹgba eta nana vwọ djẹ ihwo na ayen izobo e ze kẹ.

¹⁹Ẹkẹvuọvo ihwo ri Ju de nẹ Antiọk vẹ Aikoniọm rhe; rẹ ayen vwọ riẹriẹ ihwo na phihọ nu, ayen da vwẹ ikpokpo phi Pọl ayen de kpono nẹ orere na, kẹ ayen roro nẹ o ghwu nure.

²⁰Ẹkẹvuọvo ọke rẹ idibo na rhe vwọ gba riariẹ ọ da rhọvwọ etiyin ọ da ro evun rẹ orere na; vwẹ ẹdẹ rivẹ ọ vẹ Banabas de kpo obi Dabe.

²¹Ọke rẹ ayen vwo ghwoghwo iyẹnrẹ esiri na kẹ orere yena nu ihwo buebu de kurhẹriẹ vwọ, ayen de rhivwi kpo Listra, Aikoniọm vẹ Antiọk.

²²Ayen da ta ejọghwa phihọ udu rẹ idibo na, o de bru ayen uche rere ayen mudia gan vwẹ esegbuyota na, tanẹ, ukpokpogho buebu a cha wanvrẹn nu tavwe rẹ avwanre ke sa ro uvie rẹ Ọghẹnẹ na.

²³Ọke rẹ a vwọ ekpako vwo mu vwẹ ishọshi ọvuọvo nu, ẹrhovwo ẹnẹ vẹ owẹvwe echiro, ayen de mu ayen phihọ obọ rẹ Ọrovwohwo rẹ ayen segbuyota na.

²⁴Etiyin ayen da wan Pisidia vrẹn, rhi te Pamfilia.

²⁵Ọke rẹ ayen vwo ghwoghwo ota na vwi Pẹga nu, ayen da yanran kpo Atalaya;

²⁶kẹ oboyi ayen wan bi kpo Antiọk, kẹ etiyin e de mu ayen phihọ ẹserọphẹ rẹ Ọghẹnẹ fiki rẹ iruo rẹ ayen ru gba.

²⁷Ọke rẹ ayen vwọ rhe, ayen de se ihwo rẹ ishọshi na ejobi koko, ayen de gbe ikun rẹ obo rẹ Ọghẹnẹ ruru kẹ ayen, kugbe obo re rhiẹ ẹchẹ rẹ esegbuyota na phihọ kẹ ihwo ri Keferi.

²⁸Ayen vẹ idibo na da dia etiyin krekri.