Read urhobo Iruo rẹ Iyinkọn na 15 Bible Online

Iruo rẹ Iyinkọn na 15 - urhobo bible

Iruo rẹ Iyinkọn na 15

¹Ẹkẹvuọvo ihwo ẹvo de nẹ obi Judia rhe ki yono imoni na nẹ, jokpa nẹ ovwan yanvwere kerẹ uruemu ri Mosis na-a, ovwan cha sa rhọ-ọ.

²Ri Pọl kugbe Banabas vẹ ayen vwọ ghwọ phraphro nu, e de ji Pọl kugbe Banabas kugbe ihwo ẹvo kpo obi Jerusalẹm rere ayen ra nẹ iyẹnrẹ rẹ ota nana kẹ iyinkọn vẹ ekpako na.

³Ọke rẹ ishọshi na vwo ji ayen yanran nu, ayen da wan Fonisha, kugbe Sameria vrẹn, ji gbẹ ikun rẹ ekuorhẹriẹ rẹ ihwo ri Keferi, ọ da dia aghọghọ rode vwọ kẹ imoni na ejobi.

⁴Ọke rẹ ayen rhi vwo te Jerusalẹm, ishọshi na kugbe iyinkọn na kugbe ekpako na, de dede ayen, ayen de gbe ikun rẹ emu ejobi rẹ Ọghẹnẹ reyọ ayen vwo ru.

⁵Ẹkẹvuọvo evo vwẹ otu ri Farisi ri segbuyota na de vrẹn rhe ayen da ta, o fori rere a yanvwe ayen, rere a ta kẹ ayen nẹ e yonre urhi ri Mosis na.

⁶Iyinkọn na kugbe ekpako na de si koko rhi vwo roro ota nana.

⁷Rẹ ayen vwọ phra aphro rẹ ota na krekri re, Pita de vrẹn ọ da ta kẹ ayen, Imoni, ovwan riẹnre nẹ ẹtuọhọ rhe Ọghẹnẹ da jẹ ihwo reyọ vwẹ ohri rẹ ovwan, nẹ ihwo ri Keferi na wan unu mẹ nyo ota rẹ iyẹnrẹ esiri na re ayen segbuyota.

⁸Ọghẹnẹ ro riẹn udu rẹ ihwo de se oseri kẹ ayen, ọ da kẹ ayen Erhi Ọfuanfon na kirobo ro je kẹ avwanre;

⁹o phi ofẹnẹ phihọ uvwre rẹ avwanre vẹ aye-en, ẹkẹvuọvo ọ de ru udu rayen fon fiki rẹ esegbuyota.

¹⁰Asakiephana kidie ovwan vwọ davwẹ Ọghẹnẹ nẹ rẹ ovwan vwo kru oghwa nyẹ ohore rẹ idibo na rẹ esẹ rẹ avwonre eyẹ okpuyovwi rẹ avwanre sa ghwa-a?

¹¹Ẹkẹvuọvo avwanre segbuyota nẹ avwanre cha rhọ vwẹ oma rẹ ẹserọphẹ rẹ Ọrovwohwo Jesu, kirobo rẹ ayen je rhọ.

¹²Ọghwẹgbe na ejobi da fọ gbie, ayen da kerhọn ri Banabas kugbe Pọl rẹ ayen vwọ gbe ikun rẹ eka vẹ ighunu rẹ Ọghẹnẹ wan oma rẹ ayen ru vwẹ ohri ri Keferi na.

¹³Rẹ ayen vwọ ta ota nu, Jems da kpahe, Imoni, wa kerhọn me.

¹⁴Simiọn gbe ikun rẹ obo rẹ Ọghẹnẹ tu bru ihwo ri Keferi rhe vwẹ ẹsosuọ, rọ reyọ ayen vwo ru ihwo rẹ obọ rọye fiki rẹ odẹ rọye.

¹⁵Ọnana vẹ eta rẹ emraro na gbare kirobo re siro,

¹⁶Ọnana da wan nu ki mi rhivwi rhe, rhe rhoma bọn ẹdia ri Devid, ro sheri; ke me rhoma bọn ẹdia ro sheri na

¹⁷rere ihwo ri chekọ vwọ sa guọnọ Ọrovwohwo, kugbe ihwo ri Keferi na ejobi ra vwẹ odẹ mẹ se.

¹⁸Ọrovwohwo na re tarọ, ọ rọ nẹrhẹ a riẹn ọnana nẹ awanre rhe.

¹⁹Orhiẹn ri mi bruru na nẹ avwanre rhe kpokpo otu ri Keferi na ri kurhẹriẹ bru Ọghẹnẹ rhe-e,

²⁰ẹkẹvuọvo e si rhe ayen nẹ ayen gbe sioma nẹ ẹguegbe rẹ ẹdjọ, ọfanrhiẹ kugbe obo ri churu ughwu kugbe ọbara.

²¹Kidie nẹ ẹtuọhọ rẹ uvwiẹ na rhe, ọye Mọsis vwọ vwẹ ihwo vwo mu vwẹ orere korere ri ghwoghwiro, kidie e se kedidjala kedidjala vwẹ evun ri sinegọg na.

²²Etiyin iyinkọn na kugbe ekpako na da mrẹ nẹ o yovwiri, kugbe ishọshi na ejobi nẹ a jẹ ihwo vwẹ ohri rẹ ayen re ji ayen kpo Antiọk vwọ ba Pọl kugbe Banabas. Ayen de ji Judas re se Basabas, kugbe Silas, uvi rẹ ihwo vwẹ ohri rẹ imoni na,

²³vẹ ọbe nana. Imoni, iyinkọn na vẹ ekpako ri si ọbe onana vwo rhe imoni ri Keferi re hẹ Antiọk kugbe Silisha, e yere ovwan.

²⁴Rẹ avwanre vwo nyo nẹ ihwo ẹvo vwẹ ohri rẹ avwanre na vwẹ eta kpokpo ovwan, re vwọ hra udu rẹ ovwan, yẹ avwanre vuẹ ayen ọtiọye-e,

²⁵kọye ọghwẹgbe rẹ avwanre vwo roro nẹ o fori nẹ a sanọ ihwo re ji ayen ba Banabas vẹ Pọl re ghare bru ovwan rhe,

²⁶ihwo ri dino ghwu fiki ri Jesu Kristi Ọrovwavwanre.

²⁷Kọye Avwanre ki ji Judas kugbe Sailas, kẹ ayen ọvo vwẹ unu gbe ikun rẹ emu na kẹ ovwan.

²⁸Kidie o yoma kẹ Erhi Ọfuanfon vẹ avwanre nẹ e kru oghwa ọhọhọ nyẹ ovwan vwẹ imu nana-a.

²⁹Ovwan gha obo ra vwọ gọ iye kugbe ọbara kugbe obo ri churu ghwu kugbe ọfanrhiẹ. Ovwan de si oma rẹ ovwan nẹ imu nana, yẹ ovwan riẹn ru. We yere eghwerẹ.

³⁰Ọtiọye na ọke re vwo ji ayen yanran nu, ayen da yanran kpo Antiọk; ọke rẹ ihwo na ejobi rhi vwo koko nu, ayen da vwẹ ọbe na kẹ ukoko na.

³¹Ọke rẹ ayen vwo se nu, oma rẹ eta na da vwerhe ayen.

³²Judas kugbe Sailas, rẹ ekpuyovwi rẹ ayen hẹ emraro rhe, da vwẹ eta buebu vwo bru imoni na uche, oma rẹ ayen da gan.

³³Rẹ ayen vwọ dia etiyin ọmọke nu, e de siobọ nẹ ayen kpo bru imoni na vwẹ ufuoma. [

³⁴Ẹkẹvuọvo o de je Sailas nẹ oye daji oboyi.]

³⁵Ẹkẹvuọvo Pọl kugbe Banabas da daji Antiọk, ri yono ji ghwoghwo ota rẹ Ọrovwohwo na ihwo efa buebu je vwẹ oma ba ayen rhe.

³⁶Rẹ ẹdẹ evo vwọ wan nu, Pọl da ta kẹ Banabas, Mọ, rere a rhoma ra mrẹ imoni na vwi korere korere re de ghwoghwo ota rẹ Ọrovwohwo na vẹrhe, rere avwanre mrẹ obo rẹ ayen epha.

³⁷Barnabas da guọnọ reyọ Jọn re se Mak vwọ ba oma.

³⁸Ẹkẹvuọvo Pọl da sen nẹ a vwọ ba oma-a kidie ọ djẹ jẹ ayen vwo dẹvure vwi Pamfilia, o rhe nene ayen kpo iruo na-a.

³⁹Aphro rode de she vwẹ uvwre rayen, ayen da hẹriẹ oma nẹ ohwohwo. Banabas da reyọ Mak vwọ ba oma o de kpo Saiprọs,

⁴⁰ẹkẹvuọvo Pọl da jẹ Sailas o de mu oyan, imoni na de muo phihọ ẹserọphẹ rẹ Ọrovwohwo na.

⁴¹Ọ da yanran kpo Siria kugbe Silisha, ro vwo ru ishọshi na gan.