Read urhobo Iruo rẹ Iyinkọn na 16 Bible Online

Iruo rẹ Iyinkọn na 16 - urhobo bible

Iruo rẹ Iyinkọn na 16

¹Pọl vẹ Sailas de rhi te Dabe kugbe Listra. Etiyin ayen da mrẹ odibo ọvo re se Timoti, oni rọye ohwo ri Ju ro segbuyota; ọsẹ rọye ohwo ri Grik.

²Imoni na re hẹ Listra kugbe Aikoniọm de gbe ikun rọye vwevwerhe kẹ.

³Pọl da guọnọ nẹ Timoti nene ọye; etiyin ọ da reyọ ọ da yanvwọ fiki rẹ ihwo rẹ Ju re dia etiyin, kidie ayen ejobi riẹnre nẹ ọsẹ rọye ohwo ri Grik.

⁴Ọke rẹ ayen vwọ yan wan irere na, ayen de jẹ irhi rẹ iyinkọn na kugbe ekpako na re hẹ Jerusalẹm ji kẹ ayen nẹ ayen yọnrọn.

⁵Ọtiọye na esegbuyota rẹ ishọshi na da rhe ghwotọ, ke ayen buẹ phihọ kẹdẹ kẹdẹ.

⁶Ayen da yan wan ubrakpọ ri Frigia kugbe Galesha, Erhi Ọfuanfon na da djẹ ayen nẹ, ayen ghwoghwo ota na vwẹ Esha-a.

⁷Ọke rẹ ayen vwo hirhe opharo ku Maisha, ayen da guọnọ kpo Bitinia, ẹkẹvuọvo Erhi ri Jesu rhọvwe kẹ aye-en;

⁸ọtiọye na rẹ ayen vwọ wanvrẹn Maisha, ayen de kpo Troas.

⁹Pọl da mrẹ emramre vwẹ ason na. Ọshare ọvo ri Masidonia mudia rọ rẹ nẹ, Biko, Yanrhe obi Masidonia rere wọ rhe chọ avwanre uko.

¹⁰Ọke rọ vwọ mrẹ emramrẹ na nu, siẹvuọvo avwanre de mu oyan kpo Masidonia, kidie avwanre mrẹ vughe nẹ Ọghẹnẹ ri se avwanre nẹ avwanre re ghwoghwo iyẹnre esiri na kẹ ayen.

¹¹Avwanre de bi nẹ Troas, phiọnphiọn re te Samotras, vwẹ ẹdẹ rivẹ avwanre de kpo Neapolis,

¹²etiyin avwanre nu kpo Filipae, otorere ri Masidonia, orho ri Rom suẹn. Etinẹ kọye avwanre diare ẹdẹ buebu;

¹³vwẹ edidjala avwanre da wan unurhoro na vrẹn kpo orhoma rẹ urhie na, asan rẹ avwanre rori nẹ uwevwi rẹ ẹrhovwo epha, kẹ etiyin avwanre tidia da ta ota na kẹ eya na ri koko vwẹ etiyin.

¹⁴Aye ọvo re se Lidia de nyo ota rẹ avwanre, ohwo rẹ orere ri Taitira, ifenudu ọ shẹ, ọgọ Ọghẹnẹ o ruẹ. Ọrovwohwo de rhie udu rọye phihọ kẹ eta ri Pọl ta kẹ.

¹⁵Ọke ra vwọ vwẹ ame kẹ kugbe evwrumwevwi rọye nu, ọ da rẹ avwanre nẹ, ọ da dianẹ ovwan reyọ ovwẹ phihọ ohwo ro se Ọrovwohwo gbuyota, ovwan gba rhe dia uwevwi mẹ o de sivwi avwanre rẹyo. Ota roye da ro avwanre.

¹⁶Rẹ avwanre vwọ yanran kpo uwevwi rẹ ẹrhovwo na, avwanre da rhe vwa ọmọtẹ ọvo, oviẹn, ro vwo erhi rẹ aroẹmrẹ ro vwẹ aroẹmrẹ na vwọ ghwa efe vwo rhe inini rọye.

¹⁷Ọ da vwọ kpahe Pọl kugbe avwanre, ko kperẹ nẹ, Eshare nana hẹ idibo rẹ Ọghẹnẹ ro Me kpenu na, ri ghwoghwo idjerhe rẹ arhọ na kẹ ovwan.

¹⁸Ọ de ru ọnana vwẹ ẹdẹ buenu. Ẹkẹvuọvo ophu de rhi mu Pọl, ọ da rhẹriẹ oma ọ da ta kẹ erhi na, Vwẹ odẹ ri Jesu Kristi me ta kẹ wẹ nẹ wan nẹ oma rọye. Siẹvuọvo na ọ da wan no.

¹⁹Ẹkẹvuọvo ọke rẹ inini rọye vwọ mrẹ nẹ idjerhe rẹ efe rayen gberi, ayen de shabọ phihọ Pọl kugbe Sailas e de kpono ayen rhe afieki vwo rhe isun na;

²⁰ọke ra vwọ vwẹ ayen rhe iguẹdjọ na nu ayen da ta, Eshare nana ihwo ri Ju ri rhi kpokpo orere rẹ avwanre.

²¹Ayen rhi yono avwanre ihwo ri Rom orharhe rẹ uruemu ro fo ereyọ-ọ eyẹ eyono-o.

²²Otu na de kuoma gbe ihwo ri hwe ayen na; iguẹdjọ na bẹrẹ iwun dje ayen oma ayen da tanẹ a vwẹ ubiurhe fa ayen.

²³Ọke re vwo hwe ayen oma bruku nu, e de phi ayen phihọ uwodi, a da vwẹ ayen kẹ ọnọkpa rẹ uwodi na yọnre.

²⁴Ra vwọ vuẹ ọnana nu, ọ da vwẹ igoni kanre ayen awọ phihọ obo ẹtan rẹ uwodi na.

²⁵Ẹkẹvuọvo vwẹ oma rẹ uherevie ason Pọl kugbe Sailas vwọ nẹ ẹrhovwo nu kẹ ayen siune kẹ Ọghẹnẹ, yẹ ihwo efa re hẹ uwodi na ra kerhọn rẹ ayen.

²⁶Siẹvuọvo na otọ na de mu kpogho, ọtiọye na ichiyotọ rẹ uwodi na de ghwie; siẹvuọvo na ẹchẹ na ejobi de ghwe rhie igoni ra vwọ kanre ohwo ọvuọvo da kpare she.

²⁷Ọke rẹ ọnọkpa na vwọ rhọvwọ rhe rọ vwọ mrẹ ẹchẹ rẹ uwodi na ri rhieri, ko rori nẹ ihwo rẹ uwodi na ejobi djẹ kpo nure, o de yoro ọlọkọ rọye re o vwo hwe oma rọye.

²⁸Ẹkẹvuọvo Pọl de bunu tanẹ, Wọ hwe oma wẹ-ẹn, kidie avwanre hẹ etinẹ.

²⁹Ọ da nọ ekpẹn rẹ urhukpẹ ọ da họrhọ ro evun rẹ uwodi na, o de she diguẹ vwẹ obaro ri Pọl kugbe Sailas ko phariẹ guegue vẹ oshọ.

³⁰Ọ da reyọ ayen rhe uphẹphẹ ọ da ta, Ẹshare, kidie mi ru me vwọ rhọ?

³¹Ayen da ta, Se Ọrovwohwo Jesu gbuyota, ku wọ rhọ, owẹ kugbe evwruwevwi wẹn.

³²Ayen da ta ota rẹ Ọrovwohwo kẹ kugbe ihwo re hẹ uwevwi rọye ejobi.

³³Ọ da reyọ ayen vwẹ evun rẹ ason ọvuọvo na ọ da hworhẹ era re hẹ oma rayen, ọ da ghwa reyọ ame siẹvnọvo na, ọ vẹ ekru rọye ejobi.

³⁴Etiyin ọ da vwẹ ayen kpo uwevwi rọye ọ da vwẹ emu ke ayen re; ọ da ghọghọ ọ vẹ evwruwevwi rọye ejobi nẹ ayen se Ọghẹnẹ gbuyota.

³⁵Ẹkẹvuọvo rọ ọke vwo rhie, iguẹdjọ na de ji ọnọkpa, ra tanẹ, E jẹn esiobọ nẹ eshare na kpo.

³⁶Ọnọkpa na da vuẹ Pọl tanẹ, Oguẹdjọ na tare nẹ esiobo nẹ ovwan kpo; asakiephana ovwan gbe kpo vẹ ufuoma.

³⁷Ẹkẹvuọvo Pọl da ta kẹ ayen, Ayen hwe avwanre vwẹ azagha nure, yọ dianẹ e brorhiẹ hwe avwanre-e, avwanre eshare emotọ ri Rom, ayen de mu avwanre phihọ uwodi; asakiephana kẹ ayen rha bẹbẹ siobọ nẹ avwanre? Ẹjo, e jẹn ekpuyovwi rẹ ayen ọvo rhe rhi siobọ nẹ avwanre.

³⁸Ọnọkpa na da ra vuẹ iguẹdjọ na eta nana, oshọ de mu ayen rẹ ayen vwo nyo nẹ emotọ ri Rom ayen ruẹ;

³⁹Ọtiọye na ayen da rhe rhi yovwo unu kẹ ayen. A da reyọ ayen nẹ evun rẹ uwodi na rhe a da ta kẹ ayen nẹ ayen nẹ orere na.

⁴⁰Ọtiọye na ayen de nẹ evun rẹ uwodi na rhe, ayen da vwẹriẹ asan ri Lidia; rẹ ayen vwọ mrẹ imoni na nu, ayen de bru ayen uche ayen de kpo.