Read urhobo Iruo rẹ Iyinkọn na 17 Bible Online

Iruo rẹ Iyinkọn na 17 - urhobo bible

Iruo rẹ Iyinkọn na 17

¹Asakiephana rẹ ayen vwọ wan Amfipolis kugbe Apolonia vrẹn nu, ayen de rhi te Tẹsalonaika, asan ri Sinagọg rẹ ihwo ri Ju epha.

²Pọl da ro uwevwi, kirobo rẹ uruemu rọye epha, ọ vẹ ihwo na da phro aphro nẹ ẹbe ọfuanfon na rhe ọsoso rẹ edidjala erha gbagba.

³Ọ fan yo dje nẹ o fori re Kristi na vwọ reoja ro ki vrẹn nẹ ughwu rhe, yọ tanẹ, Jesu nana ri mi ghwoghwo kẹ ovwan na, ọye hẹ Kristi na.

⁴O de mu evo ẹro, ayen de kuoma gbe Pọl kugbe Sailas; ọtiọye ji te ihwo ri Grik buebu ri vwo erhi rẹ egagọ eya ride buebu je he usun rẹ ayen.

⁵Ẹkẹvuọvo ihwo ri Ju na ke reoma, rẹ ayen vwọ reyọ ihwo ebrabra evo re ta ọpata, ayen de se otu koko, edo de mu vwẹ evun rẹ orere na, e da họrhọ ro uwevwi ri Jasin, re ayen kpono ayen phia rhe ihwo na.

⁶Ọke rẹ obọ rayen gbi te aye-en, ayen de kpono Jasin kugbe imoni na evo rhe otu ri suẹn na, tanẹ, Enana hẹ ihwo rẹ bọvwọn akpọ na rhuẹ na eye je rhe obonẹ na.

⁷Jasin phi ayen phihọ uwevwi; ki gbe urhi ri Siza kuẹ, tanẹ, ovie ọfa herọ re se Jesu.

⁸Ofu de dje ihwo na kugbe otu ri suẹn orere na rẹ ayen vwo nyo ọnana.

⁹Rẹ a vwọ re esarobọ ri Jasin kugbe otu ri chekọ nu e de siobọ nẹ ayen kpo.

¹⁰Siẹvuọvo na imoni na de ji Pol kugbe Sailas kpo Biria vwẹ ason; ọke rẹ ayen vwo te oboyi ayen de kpo sinagọg rẹ ihwo ri Ju.

¹¹Asakiephana ihwo ri Ju nana keye me ru dẹndẹn nọ ayen otu re hẹ Tẹsalonaika, kidie urhuru rẹ ota na si ayen gangan, kẹ ayen hiẹ ẹbe ọfuanfon na sẹ imu nana ghine ọtiọye.

¹²Ayen buebu de segbuyota, ihwo ri Grik na vwo unu-u ekpate eya na kugbe eshare na.

¹³Ẹkẹvuọvo ọke rẹ ihwo ri Ju re hẹ Tẹsalonaika vwo nyo nẹ Pọl ghwoghwo ota rẹ Ọghẹnẹ vwi Beroa rhe, ayen da je rhe oboyi, re kpare ophu re otu na.

¹⁴Okpokpakpa na imoni na da ghwa vwi Pọl kpo obo abadi, ẹkẹvuọvo Sailas kugbe Timoti da daji etiyin.

¹⁵Ihwo ri sun Pọl de suo rhiri re te Atẹns, kẹ etiyin ọ da vuẹ rhe Sailas kugbe Timoti nẹ ayen rhe phẹrẹkpẹ, tavwe rẹ ayen ki rhivwi.

¹⁶Ọke ri Pọl vwọ hẹrhẹ ayen vwe Atẹns, ọhọre kọ kparọ tututu rọ vwọ mrẹ orere na rọ vọnre vẹ ẹdjọ.

¹⁷Ọtiọye na ọ vẹ ihwo ri Ju evo rẹ egba rẹ egagọ ke phra aphro vwi Sinagọg, kugbe ihwo re yan ruo obọ vwẹ afieki kẹdẹ kẹdẹ.

¹⁸Evo vwẹ otu rẹ Epikuirian kugbe otu ri Stọik egbaghwanre da vwa. Evo da ta, Die ọbrẹbrẹ na tobọ ta? Efa herọ tanẹ, Ọ họhọ ohwo ro ghwoghwo ẹdjọ rẹ isiorho fikiridie o ghwoghwo Jesu kugbe ohwo ro vrẹnushi.

¹⁹Ayen de shahọ phihọ ayen de kpono rhe obo Areopagọs, tanẹ, Kẹ avwanrẹ sa riẹn uyono ọkpokpọ nana ru wo yono na?

²⁰Kidie ota ọkpokpọ wọ ta phihọ erhọn rẹ avwanre na; avwanre guọnọ riẹn obo rẹ imu nana epha.

²¹Asakiephana emotọ rẹ Atẹns kugbe erhorha re dia ejobi chedia ohwarha hẹrhẹ ikun ikun ekpokpọ rẹ ayen nyo.

²²Ọtiọye ri Pọl, vwo mudia uherevie rẹ Areopagọs, ọ da ta: Ihwo rẹ Atẹns, me mrẹ vughe nẹ vwẹ idjerhe kidjerhe ovwan nene esi rẹ egagọ gangan.

²³Kidie re me vwọ wanvrẹn na, rẹ ẹro mẹ vwo kpo ekuakua rẹ ovwan gọ, me da mrẹ vwẹ enu rẹ agbada ọvo vẹ obo re si phihọ, Vwọ kẹ Ọghẹnẹ re jẹriẹn. Obo rẹ ovwan gọ ru we jẹriẹn na koye mi ghwoghwo kẹ ovwan na.

²⁴Ọghẹnẹ rọ mama akpọ na kugbe kemu kemu rọ herọ, rọ vwọ dia Ọrovwohwo ro vwo odjuvwu vẹ akpọ na, ọ sa dia evun rẹ ẹshẹ rẹ ohwo vwẹ obọ ru-u,

²⁵eyẹ kẹ abọ rẹ ohwo rẹ akpọ a vwọ ga-a, kerẹsiẹ ra da mrẹ nẹ ọ guọnọ emu-u, kidie ekpuyovwi rọye re kẹ ihwo ejobi arhọ kugbe ẹnwẹn kugbe kemu kemu.

²⁶Ọ da ma ihwo phihọ ẹgborho ọvuọvo nẹ e dia enu rẹ akpọ na, ọ da kẹ ayen uchọke rẹ ayen dia akpọ na te kugbe ughwru ro gbere kẹ ẹdia rayen,

²⁷rere ayen vwọ guọnọ Ọghẹnẹ, vẹ iphiẹrohọ sẹ ayen sa vwẹ obọ gbo mrẹ. Dede na yo sheri kẹ avwanre ohwo ọvuọvo-o:

²⁸kidie Evun rọye avwanre epha etiyin avwanre da yan etiyin arhọ rẹ avwanre epha; kirobo rẹ isiẹbe rẹ ovwan evo tare, Kidie uyota avwanre ghine uvwiẹ rọye.

²⁹Rẹ avwanre vwọ dia uvwiẹ rọye na, avwanre gbi rhe roro nẹ Ọghẹnẹ na vwenẹ kọ họhọ oro, eyẹ idọnọ ọfuanfon, eyẹ oragha, oma rẹ ohwo rẹ akpọ vwẹ ona eyẹ iror evun kanre-e.

³⁰Ọke rẹ ughẹghẹ Ọghẹnẹ vwo ku opharo fia, ẹkẹvuọvo asakiephana o de ji urhi kẹ ihwo ejobi vwi kasan kasan nẹ e kurhẹriẹ,

³¹fikiridie o bru ẹdẹ ọvo ro che vwo guẹdjọ rẹ akpo na vwẹ evun rẹ ọvwata vwẹ obọ rẹ ohwo ro vwo mu, rere ọnana vwo mu ihwo ejobi ẹro kọye ọ vwọ kparọ vrẹn nẹ ughwu rhe.

³²Asakiephana rẹ ayen vwo nyo kpahe evrẹnushi rẹ irivwi, evo ke vwọ jehwe; ẹkẹvuọvo efa da ta, Avwanre cha rhoma nyo mie we kpahe emu nana.

³³Etiyin Pọl da yan nẹ ohri rẹ ayen.

³⁴Ẹkẹvuọvo ihwo evo de kuoma gbe ayen de segbuyota, Daonisiọs ohwo rẹ Areopagọs je hẹ ohri rọye kugbe aye ọvo re se odẹ rọye Damaris kugbe efa.